About

စမိဘို့နဲ့ စွဲမြဲဘို့


နိုင်ငံခြားမှာနေတာ အတော်ကြာပြီလို့ ဆိုနိုင်တယ်။
ပထမဆုံး နိုင်ငံခြားခရီးစဉ် အဖြစ်ပညာ သင်ကြား ရေးကိစ္စနဲ့
သီရိလင်္ကာနိုင်ငံကို ၁၉၉၉ ခုနှစ်က ထွက်ဖြစ်တယ်။
ပညာသင်ကြားရင်း
သီရိလင်္ကာနိုင်ငံ ဗုဒ္ဓဘာသာ သာသနာရေး အခြေအနေကို လေ့လာခဲ့တယ်။

နံပါတ် (၁) လေ့လာဖြစ်ခဲ့တဲ့အချက်က
သူတို့နိုင်ငံမှာရှိတဲ့ဆယ်ကျော်သက် လူငယ်တွေ
ဗုဒ္ဓဘာသာအကြောင်း ကောင်းကောင်းသိကြတယ်။
ကိုယ့်ဘာသာအကြောင်းကို ကောင်းကောင်း ရှင်းပြနိုင်တယ်။ အခြားဘာသာဝင်တွေနဲ့တွေ့ရင်လည်း ကောင်းကောင်းစည်းရုံးနိုင်တယ်။

ဆယ်ကျော်သက် အရွယ်ကလေးငယ်တွေ ဘာလို့
ဒီလောက် ဗုဒ္ဓဘာသာအကြောင်း သိနေရတာလဲ။

သူတို့နိုင်ငံမှာ Sunday Dhamma School တွေရှိတယ်။
တနင်္ဂနွေနေ့ နံနက် (၇) နာရီလောက်ဆိုရင်
အဖြူရောင်ဝတ်စုံလေးတွေနဲ့ ကျောင်းသူကျောင်းသားလေးတွေ 
ပန်းစည်းလေးတွေ ကိုယ်စီစွဲကာ ကျောင်းကို ရောက်လာကြပြီ။ 
အရွယ်စုံပဲ။ အချိန်ကြတော့ ဆရာတော့်ထံမှာ သီလယူကြတယ်။ 
ပြီးတော့ ကိုယ့်စာသင်ခန်းအသီးသီးကို သွားပြီး 
ဗုဒ္ဓဘာသာသင်္ခန်းစာတွေ သင်ရတယ်။

စုံစမ်းလို့ သိရတာက 
''အစိုးရတန်းကျောင်းတွေမှာ တက်နေတဲ့ ကျောင်းသား ကျောင်းသူတိုင်း 
တနင်္ဂနွေနေ့မှာ ဘုန်းကြီးကျောင်းကို လာပြီး 
ဗုဒ္ဓဘာသာသင်္ခန်းစာတွေကို မသင်မနေရ သင်ရတယ်၊ 
ဒီဘုန်းကြီးကျောင်းမှာ သင်ရတဲ့ ဗုဒ္ဓဘာသာသင်္ခန်းစာတွေကလည်း 
သူတို့အတန်းအသီးသီးမှာ ဘာသာရပ်တစ်ခုအနေနဲ့ မဖြစ်မနေသင်ယူရတယ်" 
စသဖြင့် ဆရာတော်က ရှင်းပြတယ်။

နောက်နံပါတ် (၂)ု သီရိလင်္ကာနိုင်ငံမှာနေစဉ် လေ့လာဖြစ်တာက အင်္ဂလိပ်စာ။ 

မြန်မာပြည်မှာ တချိန်က အင်္ဂလိပ်စာမှာ နာမည်ကြီးခဲ့တဲ့ 
စိန်ပေါလ် လိုကျောင်းမျိုးတွေ သူတို့နိုင်ငံမှာ ရှင်သန်နေတုန်းပဲ။ 

အဲ့လိုကျောင်းမျိုးတွေထဲက 
Aquinas College ဆိုတဲ့ ကျောင်းမှာ အင်္ဂလိပ်စာသင်ဖြစ်ခဲ့တယ်။ 
ဈေးလည်းသက်သာ သွားရေးလာရေးလည်း လွယ်ကူ 
အဆင့်လည်းမှီတဲ့ကျောင်းတစ်ကျောင်းပဲ။ 

အင်္ဂလိပ်စာကို အဓိကထား သင်ကြားပေးပြီး 
ကျန်တဲ့ပြင်သစ်ဘာသာ၊ ဂျပန်ဘာသာတို့အပြင် 
ကွန်ပြူတာ ပညာရပ်များကိုလည်း သင်ကြားပေးတယ်။ 
အုပ်ချုပ်တဲ့သူက ခရစ်ယာန် father ကြီးတွေ။

ဒီအချက် (၂) ချက်ကို လေ့လာပြီး 
''ဒို့နိုင်ငံ ဒို့လူမျိုးအတွက် ဗုဒ္ဓဘာသာ အကြောင်းကိုလည်း သိအောင် 
အင်္ဂလိပ်စာ အင်္ဂလိပ်စကားကိုလည်း 
ကျွမ်းကျွမ်းကျင်ကျင် မရှက်မကြောက် ပြောတတ် လာအောင် 
ကျောင်းတစ်ကျောင်း တည်ထောင်ပြီး ဗုဒ္ဓဘာသာအကြောင်းအရာတွေကို 
အင်္ဂလိပ်လို သင်ပေးရရင် ကောင်းမှာပဲ'' လို့ အကြံရလာတယ်။

ဒီလိုအကြံရတဲ့အချိန်ကစပြီး သူငယ်ချင်းဆရာတော်များနဲ့တိုင်ပင်တယ်။ 
ခရစ်ယာန် father ကြီးတွေ သူတို့ရဲ့ကျောင်းတွေမှာ 
ဦးစီးဦးကိုင် ကျွမ်းကျွမ်းကျင်ကျင် အုပ်ချုပ်သလို 
ဒို့ဗုဒ္ဓဘာသာ ဘုန်းတော်ကြီးတွေလည်း ညီညီညာညာအုပ်ချုပ်နိုင်ရေးအတွက်
အကောင်အထည်ဖော်ဖို့ လှုပ်ရှားဖြစ်ခဲ့တယ်။
သူငယ်ချင်းတွေကို ဖိတ်ပြီး အစည်းအဝေး လုပ်ဖြစ်တယ်။ 

ဦးစီးဦးကိုင်ပြုလုပ်မဲ့ ဆရာတော်ဟာ 
အနည်းဆုံး ဓမ္မာစရိယအောင်မြင်ပြီး မဟာဝိဇ္ဇာ (M.A) ဘွဲ့ရပြီးသူဖြစ်ဖို့ 
တညီတညွတ်တည်း သဘောတူ ဆုံးဖြတ်ချက်ချဖြစ်တယ်။

ထိုသဘောတူဆုံးဖြတ်ချက်အရ
(၁) ဒေါက်တာအရှင်ဣန္ဒက
(သာသနဓဇဓမ္မာစရိယ၊ တက္ကသီလဓမ္မာစရိယ၊ B.A, M.A, Ph.D)
(ယခုလောလောဆယ် သမ္မာသမ္ဗောဓိကျောင်း၊ ကွာလာလမ်ပူ၊ မလေးရှား)
(၂) အရှင်ဒေ၀ိန္ဒ
(တက္ကသီလဓမ္မာစရိယ၊ B.A,တက္ကသီလမဟာဓမ္မာစရိယ၊ M.A)
(ယခုလောလောဆယ် တာဝန်ခံဆရာတော်၊ ဓမ္မဥယျာဉ်ကျောင်း၊ ဗဟန်း၊ ရန်ကုန်)
(၃) ဒေါက်တာပါရမီ
(တက္ကသီလဓမ္မာစရိယ၊ B.A,တက္ကသီလမဟာဓမ္မာစရိယ၊M.A, Ph.D)
(ယခုလောလောဆယ် နယူးဒေလီ၊ အိန္ဒိယ)
(၄) ဒေါက်တာနောဓိဥာဏ
(တက္ကသီလဓမ္မာစရိယ၊ B.A,တက္ကသီလမဟာဓမ္မာစရိယ၊ M.A,Ph.D)
(ယခုလောလောဆယ် တွဲဘက်ပါမောက္ခ၊ 
အပြည်ပြည်ဆိုင်ရာထေရ၀ါဒသာသနာပြုတက္ကသိုလ်၊ စွယ်တော်အနီး၊ ရန်ကုန်)
(၅) ဒေါက်တာ အာသဘ
(တက္ကသီလဓမ္မာစရိယ၊ B.A, M.A, Ph.D)
(ရွှေဝါ၀င်းမိုးကုတ်ရိပ်သာ၊ ဒဂုံတောင်၊ ရန်ကုန်)
(၆) ဒေါက်တာနန္ဒက
(တက္ကသီလဓမ္မာစရိယ၊ B.A, M.A, Ph.D)
(ယခုလောလောဆယ် ဓမ္မဒူတကျောင်း၊ ကိုးရီးယားနိုင်ငံ)
ဆရာတော်များက ဦးစီးပြီး စီစဉ်ဆောင်ရွက်ကာ သင်တန်းများပို့ချမှာ ဖြစ်ပါတယ်။

ကျောင်းတိုက်တည်ထောင်ရေးအတွက် အရေးကြီးဆုံးအချက်မှာ မြေနေရာ ရရှိဖို့ပင်။ 
ဒီအတွက် ဒီနှစ် (၂၀၀၉ ခုနှစ်) ဖေဖေါ်ဝါရီလတုန်းက 
မြန်မာပြည်ပြန်တော့ မြေကွက်တစ်ကွက် အလှူခံရရှိ်ခဲ့တယ်။ 
ကျောင်းတိုက် တည်ဆောက်ဖို့ လိုသေးတယ်။ 
ရည်ရွယ်ချက်အတိုင်း ကျောင်းတိုက်တည်ဆောက်ဖို့ 
ကျွမ်းကျင်တဲ့ အင်ဂျင်နီယာများနဲ့ တိုင်ပင်ဖြစ်တယ်။

ကျောင်းတိုက်မှာ စာသင်ခန်း၊ ကွန်ပျူတာခန်း၊ စာကြည့်တိုက်၊ 
တရားထိုင်ခန်း၊ ရုံးခန်း၊ ဘုရားခန်း၊ ထမင်းစားခန်း၊ မီးဖိုချောင်ခန်း၊ 
ဆရာတော်များနေခန်း၊ စာသင် ဆရာတော်များ နားနေခန်း။ 
နောက်ဆုံး ကျောင်းသား ကျောင်းသူတို့အတွက် စားသောက်ဆိုင် စသဖြင့် ခေတ်မှီတဲ့ ပညာသင်ဌာန တစ်ခုအတွက် လိုအပ်တဲ့ အခန်းတွေပါတဲ့ 
အဆောက်အဦမျိုးကို အင်ဂျင်နီယာကို ဆွဲခိုင်းတယ်။ 
ထိုအတွက် သိန်း ၃၀၀၀ လောက်တော့ ကုန်မယ်တဲ့။

လုပ်မှတော့ အပီအပြင်လုပ်ဖို့ ရည်ရွယ်ထားတယ်။ 
၂၀၁၂ - ဇန်န၀ါရီလဆန်းပိုင်းမှာ တချို့သင်တန်းတွေ စဖွင့်နိုင်လိမ့်မယ်လို့ မျှော်လင့်တယ်။
အောင်မြင်ဘို့အတွက် စတော့ စမိသွားဘီ။ စွဲမြဲဘို့ပဲ လိုတော့တယ်။

မှတ်ချက်၊ အထက်ပါစာကို လွန်ခဲ့တဲ့လ အတန်ကြာက ရေးခဲ့ခြင်း ဖြစ်ပါသည်။
ယခုအခါ ရန်ကုန်၊ ဗဟန်းမြို့နယ်၊ ဗိုလ်ချုပ်ပြတိုက်လမ်း၊ 
(ဗိုလ်ချုပ်ပြတိုက်ရှေ့တည့်တည့်မှာ) 
ဓမ္မဥယျာဉ်ကျောင်း (Dhamma Garden Centre) ဟူသောအမည်ဖြင့်
ကျောင်းတိုက်တည်ထောင်လျက်ရှိရာ
သုံးထပ်ကျောင်းဆောင် တစ်ဆောင် ပြီးခါနီးပါပြီ။

မကြာမီ (၂ လ၊ ၃ လအတွင်း)
Sunday Dhamma School သင်တန်းကို အရင်ဆုံးဖွင့်လစ်သင်ကြားပို့ချပါမည်။
တဖြေးဖြေး သင်တန်းများကို တိုးချဲ့ဖွင့်လစ်သွားပါမည်။

အင်္ဂလိပ်လိုသာပြောတတ် ရေးတတ်သော မိမိတို့၏ ရင်သွေးငယ်များအတွက်
ဗုဒ္ဓဘာသာယဉ်ကျေးမှုစာပေများကို အင်္ဂလိပ်လိုပါ သင်ကြားပေးဘို့ စီစဉ်ထားပါသည်။
ဘုရားရှင်၏အဆုံးအမ ဘုရားရှင်၏တရားတော်များ
ငယ်စဉ်ကတည်းက ရင်ထဲနှလုံးသားထဲ အမြစ်တွယ်သွားစေဘို့
မိမိတို့ရင်သွေးငယ်တို့ကို
Sunday Dhamma School သို့ ပို့ကြပါစို့။