Wednesday, November 12, 2014

သန္ဓေတည်ခြင်းဆင်းရဲ

 
ဘုရားရှင်က ပဉ္စ၀ဂ္ဂီငါးဦးကို ထိုခေတ်ထိုအခါက ခေတ်စားနေတဲ့
အစွန်းရောက်ကျင့်စဉ်နှစ်မျိုးကို သုံးစားမရအောင် ရှင်းလင်းပြောဆိုပြီး
အလယ်အလတ်ကျင့်စဉ် (မဇ္ဈိမပဋိပဒါ) နဲ့ မိတ်ဆက်ပေးပါတယ်။
ပြီးမှ သစ္စာတရားကို ဟောကြားတော်မူပါတယ်။

သစ္စာဆိုတာ ပါဠိစကားပါ။
 အမှန်၊ အရှိ၊ သဘာဝ လို့ မြန်မာလိုပြန်ဆိုရင် အဆင်ပြေမယ်ထင်ပါတယ်။
ဘာပြုလို့လဲဆိုတော့ သစ္စာ ဆိုတဲ့စကားလုံးအောက်မှာ
အမှန်တရား၊ အရှိတရား၊ သဘာဝတရားတွေချည်း ဘုရားရှင်က ဟောထားလို့ပါ။
သစ္စာဆိုတဲ့ အမှန်တရား၊ အရှိတရား၊ သဘာဝတရားလေးမျိုးရှိပါတယ်။

(၁) ဒုက္ခသစ္စာ
(၂) ဒုက္ခ၏အစ၊ ဒုက္ခဖြစ်ပေါ်ရခြင်းအကြောင်း - သမုဒယသစ္စာ
(၃) ဒုက္ခ၏ချုပ်ငြိမ်းရခြင်း - နိရောဓသစ္စာ
(၄) ဒုက္ခ၏ချုပ်ငြိမ်းရာသို့သွားရာလမ်း - မဂ္ဂသစ္စာတဲ့။

(၁) ဒုက္ခသစ္စာ
ဘုရားရှင်က ပဉ္စ၀ဂ္ဂီငါဦးကို သစ္စာတရားဟောတဲ့အခါ
လောလောဆယ် ထင်သာမြင်သာဖြစ်တဲ့
လူတိုင်းတွေ့ကြုံခဲ့၊ တွေ့ကြုံဆဲ၊ တွေ့ကြုံနေရဦးမည်ဖြစ်တဲ့
ဆင်းရဲခြင်းဒုက္ခသဘောသဘာဝတွေကို သရုပ်ခွဲပြပါတယ်။

ပါရမီအတော်အသင့်ရှိသူ အိမ်ထောင်သားမွေးမပြုရသေးသူတွေအဖို့
ဘုရားရှင်ထုတ်ပြတဲ့ ဒုက္ခသရုပ်ကို ကြားရပြီး ဖတ်ရပြီး
အိမ်ထောင်သားမွေးပြုချင်စိတ် ကုန်သွားနိုင်ပါတယ်။
အိမ်ထောင်သားမွေး ပြုပြီးသူတွေဆိုရင်
သားမယားပစ်ထားခဲ့ပြီး တောထွက်သွားနိုင်ပါတယ်။

ဆင်းရဲခြင်းဒုက္ခနဲ့ပတ်သက်လို့ ဘုရားရှင် ပထမဦးဆုံးမိန့်တာက
 “ဇာတိပိ ဒုက္ခာ - ပဋိသန္ဓေတည်နေရခြင်းက ဆင်းရဲတယ်” တဲ့။
အမိဝမ်းတွင်းမှာ ပထမဦးဆုံး ရုပ်သစ်၊ စိတ်သစ်ဖြစ်ပေါ်တာကို
ပဋိသန္ဓေတည်နေတယ်လို့ဆိုပါတယ်။

ပဋိသန္ဓေတည်နေမှုနေ့ပတ်သက်လို့
ဘုရားရှင်က
“ရှေးဦးစွာ ကလလရေကြည်၊
ကလလရေကြည်မှ အမြှုပ်၊
အမြှုပ်မှ သားတစ်၊
သားတစ်မှ အခဲ၊
အခဲမှ ခက်မငါးဖြာ (ဦးခေါင်း၊ ခြေ၊ လက်) တို့ ဖြစ်ကုန်၏။
ဆံ, အမွေး, ခြေသည်းလက်သည်းတို့လည်း ဖြစ်ကုန်၏” လို့ ဟောခဲ့ဘူးပါတယ်။

ဘုရားရှင်ရဲ့ ဟောကြားချက်ကို ထပ်ပြီး အဓိပ္ပါယ်ဖွင့်တဲ့
အဋ္ဌကထာဆရာတော်က
ပဋိသန္ဓေ စ နေတဲ့ပထမ (၇) ရက်မှာ ကလလရေကြည်ဖြစ်ပါတယ်။
နောက် (၇) ရက်မှာ အမြှုပ်ဖြစ်လာတယ်။
နောက် (၇) ရက်မှာ သားတစ်လေးဖြစ်လာတယ်။
နောက် (၇) ရက်မှာ အခဲတုံး (ခပ်ကြီးကြီးလေး) ဖြစ်လာပါတယ်။
နောက် (၇) ရက်မှာ ဦးခေါင်း၊ ခြေ၊ လက်တို့ ထင်ရှားလာပါတယ်။
နောက် (၇၇) ရက်ဝန်းကျင်မှာတော့ မျက်စိ၊ နား၊ နှာ၊ လျှာတွေ ပေါ်ပေါက်လာပါတယ်။
နောက် (၂၉၄) ရက်ဝန်းကျင်မှာ ဆံပင်၊ မွှေးညှင်း၊ ခြေသဲ၊ လက်သဲတွေ ပေါက်လာတယ်လို့ဆိုပါတယ်။
အဲ့ဒီနောက်တော့ ကိုယ်ဝန်ရင့်ကျက်ပြီး ကိုးလနှင့် ဆယ်လကြား မွေးဖွားတယ်တဲ့။
အချို့ ခုနစ်လ၊ ရှစ်လလောက်နဲ့လဲ ဖွားကြပါသေးတယ်တဲ့။

ဒါကတော့ ဗုဒ္ဓစာပေမှာလာတဲ့ ပဋိသန္ဓေနဲ့စပ်တဲ့မှတ်သားစရာလေးတွေပါ။
သိပ္ပံခေတ် ဆေးသုတေသနလေ့လာချက်တွေနဲ့ ဗုဒ္ဓစာပေလာ ဖော်ပြချက်တွေဟာ
အတော်ကိုက်ညီကြောင်း စာအုပ်တစ်အုပ်ထဲမှာဖတ်ဖူးပါတယ်။

ဒီနေရာမှာပြောချင်တာက ဒီလိုအမိဝမ်းတွင်းမှာ
ကိုးလကျော် ဆယ်လနေခဲ့ရတဲ့ ဇာတိဒုက္ခအကြောင်းပါ၊
ဇာတိဒုက္ခ - ပဋိသန္ဓေနေတုန်းဆင်းရဲတာကို ပီပြင်အောင်
အဋ္ဌကထာဆရာတော် ရှင်မဟာဗုဒ္ဓဃောသ က
ဝိသုဒ္ဓိမဂ်ကျမ်း (The Path of Purification) မှာ
ပီပီပြင်ပြင် ရေးပြထားပါတယ်။
ဒီကျမ်းကို မှီပြီး မြန်မာပြည်က ဆရာတော်ကြီးတစ်ပါးက လင်္ကာသီကုံးထားတယ်။
စာဟောင်းစာသစ်၊ အောက်ထက်ဝန်းရံ၊
ပုပ်နှံညှီလောင်း၊ ကျဉ်းမြောင်းမဲမိုက်၊ မိဝမ်းတိုက်ဝယ်၊ ဘင်၌လောက်လို၊
ကျောကိုဝမ်းပြု၊ ဒူးနှစ်ခုကြား၊ ဦးခေါင်းထားလျက်၊
မေးဖျားလက်ဆုပ်၊ သစ်ငုတ်တိုမှာ၊ မျောက်အိုကုပ်သည့်နှယ်၊
မလှုပ်မရှက်၊ သေသောက်လက်ဝယ်၊ ဆိတ်သူငယ်လို၊ အလမ္ပါယ်မိ၊ မြွေငယ်ချိသို့၊
အမိစပ်ခါး၊ ပူအေးစားလည်း၊ ကိုယ်သားဆတ်ဆတ်၊ သက်ပြတ်တစေ၊ ဆယ်လနေ၍၊
လေကမ္မဇ၊ ဦးဇောက်ချသား၊ မဂ်ဝသို့ရောက်၊ သံကောက်ပေါက်ဝယ်၊ ဆွဲမြှောက်ဆင်ပြောင်၊ သံဘောင်ကြိတ်ခြေ၊ ပုံနေရယိက၊ ပြင်သို့ကျလည်း၊ အပ်ဆွသည့်ဟန်၊
ကြီးပြန်ဒုက္ခ၊ ပြစ်များလှသည်၊ မူလဇာတိမြစ်ရင်းတည်း။

ရှင်းလင်းချက်
 စာဟောင်းစာသစ်၊ အောက်ထက်ဝန်းရံ၊
ကိုယ်ဝန်တည်ချိန် အမိဝမ်းတွင်းမှာ ရောက်နေရတဲ့ရင်သွေးခလေးဟာ
မိခင်ရဲ့အစာဟောင်းအိမ် (ချေးထုပ်) ကို ဖင်ခုထိုင်ထားရပြီး
အစာသစ်အိမ်ကို ခေါင်းနဲ့ ရွက်ထားရတယ်တဲ့။
ပုပ်နှံညှီလောင်း၊ ကျဉ်းမြောင်းမဲမိုက်၊ မိဝမ်းတိုက်ဝယ်၊ ဘင်၌လောက်လို၊
ပုပ်နံ့ထွက်နေတဲ့ အညစ်အကြေတွေနဲ့ ပြည့်နေတဲ့ သားအိမ်ထဲမှာ
မိခင်ရဲ့ ကိုယ်ဝန်ဆောင် သွေးနဲ့ မိဘ နှစ်ဦးတို့၏ အညစ်အကြေး သုက်သွေးတို့ကို မှီခိုနေရတာဖြစ်လို့
မိခင်ဝမ်းတွင်းက ခလေးအနေအထားဟာ
မစင်တွင်းထဲက ပိုးလောက်နဲ့ ထူးမခြားနားပါ တဲ့။

ကျောကိုဝမ်းပြု၊ ဒူးနှစ်ခုကြား၊ ဦးခေါင်းထားလျက်၊
မေးဖျားလက်ဆုပ်၊ သစ်ငုတ်တိုမှာ၊ မျောက်အိုကုပ်သည့်နှယ်၊
ကိုယ်ဝန်တည်ချိန် အမိဝမ်းတွင်းမှာ ရောက်နေရတဲ့ရင်သွေးခလေးဟာ
အမိကျောဘက်ကို မျက်နှာမူပြီး ဒူးနှစ်လုံးတို့၏အကြား၌ ခေါင်းကိုထားလျက်
 မေးအောက်မှာ လက်နှစ်ဘက်ဆုပ်ကာ နေနေရတယ် တဲ့။
ဒီအနေအထားက ဘာနဲ့ တူသလဲ ဆိုရင်
သစ်ငုတ်တိုပေါ်၌ မျောက်အိုတစ်ကောင် ကုပ်ကုပ်လေး နေနေသလိုဘဲ တဲ့။

မလှုပ်မရှက်၊ သေသောက်လက်ဝယ်၊ ဆိတ်သူငယ်လို၊ အလမ္ပါယ်မိ၊ မြွေငယ်ချိသို့၊
ကိုယ်ဝန်တည်ချိန် အမိဝမ်းတွင်းမှာ ရောက်နေရတဲ့ရင်သွေးခလေးဟာ
မိခင်ဖြစ်သူ မြန်မြန်ဆန်ဆန် သွားတဲ့အခါ၊ ကုန်ချီကွချီပြုတဲ့အခါတွေမှာ
အရက်သမားလက်ထဲရောက်နေတဲ့ ဆိတ်ပေါက်စလို၊
မြွေ-အလမ္ပာယ်ဆရာက မြွေကိုဖမ်းပြီး အမျိုးမျိုး နှိပ်စက် ညှဉ်းပန်းသလို
 မချိမဆန့် ခံစားရတယ် တဲ့။

အမိစပ်ခါး၊ ပူအေးစားလည်း၊ ကိုယ်သားဆတ်ဆတ်၊ သက်ပြတ်တစေ၊ ဆယ်လနေ၍
ကိုယ်ဝန်တည်ချိန် အမိဝမ်းတွင်းမှာ ရောက်နေရတဲ့ရင်သွေးခလေးဟာ
မိခင်ဖြစ်သူ အစပ်စားရင် လှံနဲ့ထိုးပြီး ဆားနဲ့ပက်သလို ခံစားရတယ်တဲ့။
 အပူစားရင် မီးနဲ့မြှိုက်သလို ခံစားရတယ်တဲ့။
အအေးစာတွေကို စားရင် ရေခဲတုံးကြီးနဲ့ ဖိထားသလို ခံစားရတယ်တဲ့။
ဒီလိုဒုက္ခခံရတာက သေလုမတတ် အသားတဆတ်ဆတ်နဲ့ကို ခံစားရတာပါတဲ့။
(ဒါ့ကြောင့် မိခင်တွေ အစားအသောက် ဆင်ခြင်သင့်ပါတယ်)

လေကမ္မဇ၊ ဦးဇောက်ချသား၊ မဂ်ဝသို့ရောက်၊ သံကောက်ပေါက်ဝယ်၊ ဆွဲမြှောက်ဆင်ပြောင်၊ သံဘောင်ကြိတ်ခြေ၊ ပုံနေရယိက၊ ပြင်သို့ကျလည်း၊ အပ်ဆွသည့်ဟန်၊
ကြီးပြန်ဒုက္ခ၊ ပြစ်များလှသည်၊ မူလဇာတိမြစ်ရင်းတည်း။
အချိန်တန်လို့ ဗိုက်နာလာရင် ခြေထောက်ကို အထက်၊
ဦးခေါင်းကို အောက်ဘက်သို့ စောက်ထိုးမိုးမျှော် လှည့်ရပါတယ်။
ပြီးတော့ မဂ်ဝသို့ရောက်သောအခါ သေးငယ်တဲ့ သံပေါက်ကျဉ်းကျဉ်းလေးထဲကနေ
ဆင်ပြောင်ကြီးကို ဆွဲထုတ်ရသလို ခလေးခမျာ ခံစားရသတဲ့။
ကတ္တရာလမ်းကြိတ်တဲ့ ကားကြီးနဲ့ အကြိတ်ခံရသလို
ခလေးခမျာ ခံစားရှာသတဲ့။
ဒါ့အပြင် ကောင်းစွာမီးမဖွားနိုင်ရင် မိခင်ချမ်းသာ ပြီးရော,
ကလေး ဘယ်လို ဖြစ်ဖြစ် ဟု ဆိုသူက ဆိုကြသေး၏။
မိခင်ဝမ်းတွင်းမှာ လေတောင် အတိုးမခံရလို့ အလွန်နုရွနေတဲ့ ခလေးသူငယ်ကို
တခါတလေ ညှပ်နဲ့ ဆွဲထုတ်ရတယ်တဲ့။
အပြင်သို့ ရောက်လာရင်လဲ အ၀တ် ကြမ်းတမ်းတွေနဲ့ ကိုင်တွယ်လို့
ခလေးခမျာ အပ်နဲ့ ထိုးဆွသလို ခံစားရရှာတယ်။

အော်၊ ဇာတိဒုက္ခ - သန္ဓေတည်ခြင်းဆင်းရဲ တယ်ကြီးမားပါလား။

ရည်ညွှန်း၊ မင်္ဂလာသတင်းစဉ်၊ မော်လူး

Tuesday, November 11, 2014

စေတီပုထိုး

 
မြန်မာနိုင်ငံမှာတော့ ဘယ်တောင်ကုန်းကြည့်ကြည့်၊
စေတီပုထိုးတစ်ဆူဆူကိုတော့ တွေ့ရစမြဲမို့
ဒီနိုင်ငံက တောင်ကုန်းတွေကို ကြည့်မိတိုင်း တစ်ခုခုလိုနေသလို ခံစားရတယ်။
မြန်မာလူမျိုးဆိုတာ တောင်ကုန်းမြင့်မြင့်တွေ့ရင် စေတီပုထိုးတည်ပြီး
ဘုရားဒကာ အမည်ခံချင်ကြတာမို့လား။
ဘုရားဒကာ အမည်ခံချင်လွန်းလို့ စေတီပုထိုးတည်လိုက်တာ
ပုဂံလိုဒေသမျိုးမှာဆို သစ်တောကို ပြုန်းရော၊
ဒီနေ့ထိ နလံမထူနိုင်တော့ဘူး။

မြန်မာပြည်မှာ စေတီပုထိုးတွေ သိန်းပေါင်း ထောင်နဲ့သောင်းနဲ့ချီအကုန်အကျခံပြီး
 အသစ်ဆောက်နေတာကို တွေ့ရင် အတော် ဘ၀င်မကျဖြစ်မိတယ်။
စေတီပုထိုးပေါတဲ့ မြန်မာနိုင်ငံမှာ စေတီပုထိုးထပ်တည်ဆောက်ဖို့ လိုသေးလို့လား။

ဆင်းရဲမွဲတေနေတဲ့ ကိုယ့်အမိ မြန်မာနိုင်ငံမှာ
စေတီပုထိုး အသစ်တည်ဆောက်မဲ့အစား
အဲ့အတွက်ကုန်ကျငွေတွေကို ပညာရေး၊ ကျန်းမာရေးတွေမှာ အသုံးချလိုက်မယ်ဆိုရင်
ဘယ်လောက်ခရီးရောက်လိုက်မလဲ လို့စဉ်းစားမိပြန်တယ်။

ဟိုတစ်နှစ်က မလေးရှားနိုင်ငံ လွတ်လပ်ရေးရတဲ့ နှစ်ငါးဆယ်ပြည့်အထိမ်းအမှတ်အဖြစ်
မြို့တော်ဖြစ်တဲ့ ကွာလာလမ်ပူမြို့လည်မှာ ရဟတ်လို့ခေါ်သလားတော့မသိဘူး။
အတက်အောက်လည်ပတ်တဲ့ဟာကြီး တစ်ခု တည်ဆောက်တယ်။
လူတွေ စီးနင်းလိုက်ပါသွားရတာ။ ဖြည်းဖြည်း ဖြည်းဖြည်း လည်ပတ်တာ။
အပေါ်ရောက်သွားရင် ကွာလာလမ်ပူမြို့ ရှုခင်းတွေကို ကြည့်လို့ရတယ်။
လိုက်ပါစီးနင်းလိုတဲ့လူတွေ ပိုက်ဆံပေးရတယ်။

လန်ဒန်မှာလည်း အဲ့လိုဟာမျိုးကြီး တစ်ခုရှိတယ်။
London Eye လို့ခေါ်တယ်ထင်တယ်။ လန်ဒန်ရှုခင်းကို ကြည့်ဘို့။
တစ်ခါစီးရင် ပေါင်ကိုးပေါင်ပေးရတယ်။
နိုင်ငံသားတွေရော နိုင်ငံခြားသားတွေပါ စီးနင်းလိုက်ပါနေတာကို တွေ့ခဲ့ရတယ်။

ဒီမလေးရှားနိုင်ငံ အစိုးရလည်း UK အစိုးရကို အတုခိုးပြီး
လိုက်လုပ်တာဖြစ်မယ်။ နိုင်ငံအတွက် နိုင်ငံတိုးတက်ဘို့ ဘက်စုံက ဖြစ်တဲ့နည်းနဲ့ ဘဏ္ဍာငွေရှာနေကြတာ။ အတော်အားကျဘို့ကောင်းတယ်။

ဒို့နိုင်ငံလည်း စေတီပုထိုးတွေတည်နေမဲ့အစား
နိုင်ငံတော်အတွက် လိုအပ်တဲ့ဘဏ္ဍာငွေကို ရှာပေးနိုင်တဲ့
လန်ဒန်မှာရှိတဲ့ ကွာလာလမ်ပူမှာရှိတဲ့ မြို့တော်ရှုခင်းကို တစ်နေရာတည်းကကြည့်လို့ရတဲ့
ရဟတ်ကြီးတစ်ခု တည်ဆောက်တာ ပိုအကျိုးရှိမယ်လို့ထင်မိတယ်။
စဉ်းစားမိတာပါ။

ပြောချင်တာက စေတီပုထိုးရှိတဲ့ တောင်ကုန်း ရှုခင်းတွေနဲ့ ယဉ်ပါးလာတဲ့မျက်စိဟာ
ဒီနိုင်ငံက တောင်ကုန်း တောင်တန်းတွေမှာ
စေတီပုထိုးမတွေ့ရတော့ ရင်ထဲဟာမိတာတော့ အမှန်ပဲ။

စေတီပုထိုးဆိုတော့ စေတီပုထိုးနဲ့ဆက်စပ်ပြီး ဘုရားရှင် ညီ တစ်ဝမ်းကွဲ
ဘုရားရှင်ကို အလုပ်အကျွေးပြုစုသူ ရှင်အာနန္ဒာကြီးကို သတိရမိပြန်တယ်။
မြတ်စွာဘုရားသက်ရှိထင်ရှားရှိစဉ်အခါတုန်းက
မြတ်စွာဘုရားကို ကြည်ညိုတဲ့သူတွေ မြတ်စွာဘုရားကို ပူဇော်ဘို့ လှူဒါန်းဘို့
အခါအားလျှော်စွာ မြတ်စွာဘုရားထံလာကြတယ်။
မြတ်စွာဘုရားကျောင်းမှာရှိနေရင်တော့ ပါလာတဲ့ပစ္စည်း လှူဒါန်းခဲ့ရုံပေါ့။
မြတ်စွာဘုရားမရှိတဲ့အခါ ပါလာတဲ့ပစ္စည်းကို ဘယ်ကို ဘယ်သူ့ကို လှူဒါန်းခဲ့ရမှန်းမသိတော့ဘူး။
မြတ်စွာဘုရားကို လှူဒါန်းဘို့စိတ်ကူးနဲ့လာကြတာကိုး။

ဒီတော့ ကျောင်းဒကာ အနာထပိဏ်က ရှင်အာနန္ဒာကို
“ဘုရားရှင်ထံ လှူဒါန်းဘို့လာတဲ့သူတွေ ဘုရားရှင်မရှိတဲ့အချိန်မှာ
လှူဒါန်းလို့ အဆင်ပြေအောင် သင့်လျှော်တဲ့နေရာစီစဉ်ပေးဘို့” လျှောက်တယ်။
ရှင်အာနန္ဒာကလည်း ဒီကိစ္စကို မြတ်စွာဘုရားနဲ့တွေ့တော့လျှောက်ပြတယ်။

မြတ်စွာဘုရားက လှူဒါန်းပူဇော်သင့်တဲ့ အရာသုံးမျိုးကို ပြောပြပါတယ်။
၁။ ဓာတ်တော်မွေတော်အပါအ၀င် မြတ်စွာဘုရားရဲ့ ခန္ဓာကိုယ်
၂။ မြတ်စွာဘုရားရဲ့ အသုံးအဆောင်များ
၃။ မြတ်စွာဘုရားကို အာရုံယူဘို့ မြတ်စွာဘုရားကို ရည်ညွှန်းထားသော ရုပ်တု၊ စေတီ
ဒီသုံးမျိုးကို ပြောပြတာပါ၊

ရှင်အာနန္ဒာက “
မြတ်စွာဘုရားသက်ရှိထင်ရှားရှိတုန်း စေတီပုထိုးတည်ထားကိုးကွယ်လို့
အဆင်ပြေနိုင်ပါ့မလား” လို့ မေးလျှောက်တော့
မြတ်စွာဘုရားက
“စေတီကို ငါဘုရားပရိနိဗ္ဗာန်စံပြီးမှ ငါဘုရားရဲ့ အရိုးတော် ဓာတ်တော်တွေနဲ့
တည်ဆောက် ပူဇော်သင့်ကြောင်း၊ ဒီလို စေတီပုထိုးတော်တွေကို ပူဇော်တာဟာ
ရုပ်ကို အခြေခံပြီး ပူဇော်တာမျိုး မဟုတ်ကြောင်း၊
စေတီပုထိုးတော်တွေကို ပူဇော်တာဟာ စိတ်ရဲ့အလုပ်ဖြစ်ကြောင်း”
ဆက်လက်မိန့်ကြားပါတယ်။

ဘုရားရှင်းရဲ့ ဒီမိန့်မှာကြားချက်ကို
“စေတီပုထိုးကို ကြည့်ပြီး ဘုရားအစစ်ကို (သက်ရှိထင်ရှားမြတ်ဘုရားကို)
စိတ်နဲ့အာရုံပြုပြီး ပူဇော်ရမှာ” လို့ နားလည်မိပါတယ်။
တနည်းအားဖြင့် ပုံတော်နောက်က ဂုဏ်တော်ကို
စိတ်အာရုံရောက်အောင်ပြုပြီး ပူဇော်ရမှာဖြစ်တယ်လို့ ဆိုလိုတာပါ။

ဘုရားရှင်က
ဗောဓိညောင်ပင်ကိုသာ စိုက်ပျိုးပြီး
သူမရှိတဲ့အခါ သူခရီးထွက်နေသခိုက် သူ့ကိုယ်စား ဗောဓိညောင်ပင်ကိုသာ ပူဇော်ဘို့
ရှင်အာနန္ဒာကို အကြံပြုပါတယ်။

ဒီနောက် ရှင်အာနန္ဒာဟာ ရှင်မောဂ္ဂလာန်ကြီး အကူအညီနဲ့
ဗုဒ္ဓဂယာက ဗောဓိညောင်မျိုးစေ့ကိုယူပြီး
ဇေတ၀န်ကျောင်းနဲ့ မလှမ်းမကမ်းမှာ စိုက်ပျိုးပါတယ်။
အဲ့ဒီဗောဓိညောင်ပင်ကို အာနန္ဒဗောဓိပင်လို့ အမည်တွင်စေခဲ့ပါတယ်။
ယနေ့ အိန္ဒိယကို ဘုရားဖူးသွားကြတဲ့သူတွေ
အဲဒီအာနန္ဒဗောဓိပင်ကို တွေ့ကြမှာပါ။

ဒီဇာတ်လမ်းအဖြစ်အပျက်ကို အကြောင်းပြုပြီး
သီဟိုဠ် (သီရိလင်္ကာ) နိုင်ငံ ဘုန်းကြီးကျောင်းတိုင်းမှာ
ဗောဓိညောင်ပင်ကို ဘုန်းကြီးကျောင်း အင်္ဂါရပ် (၁) ချက်အဖြစ် ထည့်သွင်းထားပါတယ်။

သီဟိုဠ်ဘုန်းကြီးကျောင်း (၁) ကျောင်း တည်ထောင်ရင် ကျောင်းဝင်းထဲမှာ
၁၊ ဘုရားကျောင်းသီးသန့် (ဘုန်းကြီး၊ လူမနေရ၊ ဂန္ဓကုဋိကဲ့သို့)
၂၊ စေတီတစ်ဆူ
၃၊ ဗောဓိညောင်ပင် တစ်ပင်
၎၊ သံဃာနေဆောင် တို့ရှိရပါတယ်။

Monday, November 10, 2014

လူသားစင်စစ် ဧကန်ဖြစ်ပါရဲ့လား

 
-----*-----*-----*-----*-----*-----
ပါဠိစာပေမှာ မနုဿဆိုတဲ့ပုဒ်ရှိတယ်။
မြန်မာလိုတော့ “လူ”
မနုဿကို လူလို့ဘာသာပြန်တာက ဆင့်ပွါးအနက်အဓိပ္ပါယ်ဖြစ်ပါတယ်။

မနုဿ ဆိုတဲ့ပုဒ်ဟာ မန နဲ့ ဥဿ နှစ်လုံးပေါင်းစပ်ထားတဲ့ပုဒ်ပါ၊
မန ဆိုတာ စိတ် ဖြစ်ပြီး
ဥဿဆိုတာ မြှင့်တင်ပေးတတ်တာ။
ဒါ့ကြောင့် မနနဲ့ ဥဿ နှစ်ပုဒ်ပေါင်းထားတဲ့ မနုဿဆိုတဲ့ပါဠိပုဒ်ရဲ့ တိုက်ရိုက်အဓိပ္ပါယ်က
“စိတ်ကိုမြှင့်တင်ပေးတတ်တဲ့သူ” ဖြစ်တယ်။

မနုဿဆိုတဲ့ပါဠိပုဒ် တိုက်ရိုက်အဓိပ္ပါယ်အရဆိုရင်
သက်ရှိသတ္တ၀ါမည်သူမဆို
တစ်နှစ်ထက်တစ်နှစ်၊ တစ်လထက်တစ်လ၊ တစ်ရက်ထက်တစ်ရက်
မိမိရဲ့ စိတ်ကို မြင့်သထက်မြင့်အောင် မြှင့်တင်ပေးတတ်တဲ့သူကို မနုဿ = လူလို့ခေါ်ရမှာပါ။

စိတ်ကိုမြှင့်တင်ပေးတတ်တာလဲ လူသားကပဲ စိတ်ကို မြှင့်တင်ပေးတတ်တာ။
တိရိစ္ဆာန်တွေက သူတို့စိတ်ကို အဆင့်မှီအောင် မြှင့်တင် မပေးတတ်ကြပါဘူး။
ဒါ့ကြောင့် တိရိစ္ဆာန်တွေမှာ ဘာသာတရားမရှိဘူး။
ခရစ်ယာန်ဘာသာဝင်အိမ်က ခွေးတစ်ကောင်ကို
ဗုဒ္ဓဘာသာဝင်တစ်ယောက်က ၀ယ်ယူမွေးမြူပြီး
ဗုဒ္ဓဘာသာဝင်အိမ်မှာထားပေမဲ့ ဗုဒ္ဓဘာသာခွေးဖြစ်မလာပါဘူး။
အရင်ကတည်းက ခွေးမှာ ဘာသာတရားလက်ခံနိုင်လောက်အောင်
အတွေးအခေါ်အသိဥာဏ်မရှိခဲ့လို့ပါ။
ခွေးဟာ သူ့စိတ်ကို လူတွေလို အဆင့်မှီအောင် မတွေးခေါ်တတ်ပါဘူး။ မမြှင့်တင်တတ်ပါဘူး။
ဒါ့ကြောင့် သူတို့ဟာ မနုဿ = လူမဟုတ်ကြဘူး။

မနုဿဆိုတဲ့ပါဠိပုဒ် တိုက်ရိုက်အဓိပ္ပါယ်အရ
မိမိစိတ်ကို အဆင့်အတန်းမြင့်အောင်မြှင့်တင်တတ်မှ လူဆိုရင်
လူဖြစ်လာတဲ့တချို့လူတွေ
အသက်နှစ်ဆယ်အရွယ်တုန်းကလည်း ဒီအတိုင်းပဲ။
အသက်လေးဆယ်အရွယ်တုန်းကလည်း ဒီအတိုင်းပဲ။
အသက်ခြောက်ဆယ်အရွယ်မှာလည်း ဒီအတိုင်းပဲဆိုရင်
သူတို့ကို မနုဿ = လူလို့ခေါ်လို့ရပါ့မလား။
အချို့အသက်ကြီးလာသူတွေ ငယ်စဉ်အခါကထက်
စိတ်အဆင့်အတန်းပိုနိမ့်ကျလာတယ်ဆိုရင်
သူတို့ကို မနုဿ - လူလို့ ခေါ်ဆိုနိုင်ပါ့မလား။

လောကကြီးမှာ ကိုယ့်အဆင့်အတန်း တစ်ဆင့်ထက်တစ်ဆင့်
မြင့်သထက်မြင့်အောင် ကြိုးစားနေကြတဲ့သူတွေ တပုံတပင်ကြီးပါပဲ။
သို့သော်လည်း လူဆိုတာ အကောင်းနဲ့အဆိုး၊ အတော်နဲ့အညံ့ ဒွန်တွဲနေတာပါ၊
အဆိုးသမားတွေက အကောင်းသမားတွေဖြစ်လာအောင်၊
အညံ့သမားတွေက အတော်သမားတွေဖြစ်လာအောင် လုပ်ရမှာက
လူသားတွေရဲ့ မွေးရာပါတာဝန်ပဲ။
ဒီမွေးရာပါတာဝန်ကို ပျက်ကွက်ရင်
လူ့စာရင်းသွင်းဘို့ လူ့အဖွဲ့အစည်းထဲနေထိုင်ခွင့်ပြုဘို့ ခက်သွားပါပြီ။

ဗုဒ္ဓဘာသာစာပေထဲမှာဆိုရင်
ရှင်ဒေ၀ဒတ်ကြီးတို့လို အထက်တန်းကျတဲ့ ရဟန်းဘ၀ကို ရောက်လင့်ကစား
အဆင့်အတန်းအင်မတန်နိမ့်ကျတဲ့ သူ့အတွေးအခေါ်တွေကို
အကောင်အထည်ဖော်ခဲ့လို့
သူ့ကို ရဟန်းအဖွဲ့အစည်းထဲက မောင်းထုတ်ခဲ့ရတဲ့ အခြေအနေထိ ရောက်ခဲ့ပါတယ်။
သူ့ကြောင့် မြတ်ဗုဒ္ဓသာသနာ အမဲစက်ထင်ခဲ့ရပါတယ်။

အခြားတဖက်မှာတော့
တကယ့်စိတ်ဓာတ်ရေးရာ အဆင့်အတန်းမြင့်မားတဲ့
ရှင်အာနန္ဒာကြီးတို့လို ပုဂ္ဂိုလ်ထူးကြီးတွေရှိနေတော့
မြတ်ဗုဒ္ဓသာသနာ ဂုဏ်တက်ခဲ့ရပြန်ပါတယ်၊

(ဆရာတော်ဒေါက်တာကေ သိရီ ဓမ္မာနန္ဒတရားတော် နာကြားရင်း ချရေးဖြစ်တာပါ)

Sunday, November 9, 2014

လမ်းစဉ်

 
ဘုရားရှင်ကျင့်ခဲ့တဲ့ (အလယ်အလတ်လမ်းစဉ်) မဇ္ဈိမပဋိပဒါကျင့်စဉ်မှာ
အချက် (၈) ချက်ရှိတယ်။
ဒါကို အင်္ဂလိပ်လို Noble Eightfold Path, Middle Way စသဖြင့်
အဆင်ပြေသလို ပြန်ဆိုကြတယ်။

(၁) သမ္မာဒိဋ္ဌိ
ဒီသမ္မဒိဋ္ဌိကို အင်္ဂလိပ်လို
Right View, Right Understanding စသဖြင့် ပြန်ဆိုကြတယ်။
မြန်မာလိုတော့ မှန်ကန်တဲ့အမြင်၊ မှန်ကန်တဲ့ နားလည်မှုပေါ့။
နိဗ္ဗာန်သို့ ချီတက်သူ နိဗ္ဗာန်သို့လျှောက်လှမ်းသူတစ်ယောက်အနေနဲ့
ပထမဦးဆုံးမှန်ကန်တဲ့အမြင် (သမ္မာဒိဋ္ဌိ) (ခြေလှမ်း) ရှိကို ရှိရပါမယ်။
မှန်ကန်တဲ့အမြင်ရှိဘို့အတွက် အမြင်မှန်ဘို့လိုအပ်တယ်။
အမြင်မှန်ဘို့အတွက် မှန်ကန်တဲ့နားလည်မှု ရှိဘို့လိုပါတယ်။
မှန်မှန်ကန်ကန်နားလည်ဘို့ဆိုတာ
ကိုယ့်ကိုယ်ကို နားလည်တာကို ပြောတာပါဘဲ။
Right Understanding is the understanding of oneself as one really is.
ကိုယ့်ကိုယ်ကို နားလည်တာဆိုတာ
ကိုယ့်မှာရှိနေတဲ့ သိအပ်တဲ့ရုပ်နဲ့ သိတတ်တဲ့စိတ်ကို
ပိုင်းပိုင်းခြားခြား တိတိပပ သိတာကို ပြောတာပါ။

ဒါကို စာပေစကားမှာတော့
နာမ်ရုပ်တို့ကို ပိုင်းခြား၍ သိတတ်သော(နာမရူပပရိစ္ဆေဒ) ဥာဏ်တဲ့။
ဒီမှန်ကန်တဲ့အမြင် မှန်ကန်တဲ့နားလည်မှုဟာ
မဇ္ဈိပဋိပဒါလမ်းစဉ်မှာ အဓိကသော့ချက်ပဲ။
The key-note of Buddhism is this right understanding.

(၂) သမ္မာသင်္ကပ္ပ
မှန်မှန်ကန်ကန်မြင်တတ်တဲ့ မှန်မှန်ကန်ကန်နားလည်မှုရှိတဲ့သူသာ
မှန်ကန်တဲ့အတွေးရှိမှာပါ။
မှန်ကန်တဲ့အတွေးကို ပါဠိလို သမ္မာသင်္ကပ္ပတဲ့။
အင်္ဂလိပ်လိုတော့
Right Resolutions, Right Aspirations, Right Ideas စသဖြင့်
အမျိုးမျိုးပြန်ဆိုကြတယ်။
ပါဠိ၊ အင်္ဂလိပ်တတ်ကျွမ်းတဲ့ ဆရာတော်တစ်ပါးက
မှန်ကန်တဲ့အတွေးဆိုတော့ Right Thoughts လို့ဘာသာပြန်သင့်တယ်တဲ့။

(၃) သမ္မာဝါစာ
မှန်ကန်တဲ့အတွေးအခေါ်ရှိတဲ့သူသာ မှန်ကန်တဲ့စကားကို ပြောမှာ။
မှန်ကန်တဲ့စကားကို ပါဠိလို သမ္မာဝါစာတဲ့။
နိဗ္ဗာန်ကို တက်လှမ်းလိုသူအဖို့
သမ္မာဝါစာ - မှန်ကန်တဲ့စကားကိုသာ ပြောဆိုသင့်ပါတယ်။
မုသာဝါဒ - လိမ်လည်လှည့်ဖြား မပြောကြားသင့်ပါဘူး။
ဒါ့အပြင် ဂုံးချော ဂုံးတိုက်တဲ့စကား၊ ကြမ်းတမ်းတဲ့စကား၊
အရည်မရ အဖတ်မရတဲ့စကားတွေကိုလဲ ရှောင်ကြဉ်ရမှာပါ။
သမ္မာဝါစာ - မှန်ကန်တဲ့စကားဆိုလို့
ကိုယ်ပြောတဲ့စကား မှန်ကန်နေရုံနဲ့ မလုံလောက်ပါဘူး။
နားဝင်ချိုနေရုံနဲ့ မလုံလောက်ပါဘူး။
သာယာနာပျော်ဖွယ်ကောင်းနေရုံနဲ့ မလုံလောက်ပါဘူး။
ကိုယ်ပြောလိုက်တဲ့စကားဟာ သူတစ်ပါးအတွက်
အသုံးတည့်ရပါမယ်၊ အကျိုးဖြစ်ထွန်းစေရပါမယ်။ အကျိုးရှိရပါမယ်။
What one utters is not only true, sweet and pleasant
but also useful, fruitful and beneficial.

(၄) သမ္မာကမ္မန္တ
အပြောမှန်တာနဲ့ အလုပ်မှန်တာ ခွဲခြားလို့ မရပါဘူး။
ဘာ့ကြောင့်လဲဆိုရင် အပြောမှန်တဲ့သူသာ အလုပ်မှန်တတ်လို့ပါဘဲ။
အလုပ်မှန်တာကို ပါဠိလို သမ္မာကမ္မန္တလို့ခေါ်တယ်။
အင်္ဂလိပ်လို Right Action ပေါ့။
အလုပ်မှန်တဲ့ အမှန်လုပ်တဲ့ ဒီ Right Action ဆိုတာ
တခြားထွေထွေထူးထူးမဟုတ်ပါဘူး။
မိုက်မဲမှု(မောဟ) ကြောင့် လောဘစိတ်၊ ဒေါသစိတ်တွေအခြေခံပြီး
သူ့တပါးအသက် သတ်ခြင်း၊ သူ့ဥစ္စာ ခိုးခြင်း၊
သူတပါးသားမယား ပြစ်မှားစော်ကားခြင်းတို့ကို မလွန်ကျူးဘူးဆိုရင်
Right Action ဖြစ်တော့တာပါဘဲ။
It deals with abstinence from killing, stealing and sexual misconduct.

(၅) သမ္မာအာဇီဝ
အတွေးအခေါ် မှန်၊ အပြောမှန်ပြီး အလုပ်မှန်တဲ့သူအတွက်
အကြံအဖန်စီးပွါးရေးလုပ်ငန်းကို လုံးဝ စိတ်မ၀င်စားတော့ပါဘူး။
မှန်ကန်တဲ့စီးပွါးရေးလုပ်ငန်းနဲ့ပဲ သူ့ဘ၀ရပ်တည်တော့မှာ အမှန်ပါ။
မှန်ကန်တဲ့စီးပွါးရေးလုပ်ငန်းကို သမ္မာအာဇီဝလို့ခေါ်တယ်။
အင်္ဂလိပ်လို Right Livelihood ပေါ့။
ဒါနဲ့စပ်လို့ ဗုဒ္ဓဘာသာစာပေထဲမှာ
မလုပ်ရမဲ့စီးပွါးရေးလုပ်ငန်း ငါးမျိုးကို ပြဆိုထားပါတယ်။
(က) လက်နက်ရောင်းဝယ်မှု (Traiding in arms)
(ခ) လူကုန်ကူးမှု (Traiding in human beings)
(ဂ) သားငါးမွေးမြူရေး (Traiding in flesh)
(ဃ) အရက်၊ မူးယဇ်ဆေးဝါး (Traiding in intoxicating drinks)
(င) အဆိပ် (Trading in poison)

(၆) သမ္မာဝါယာမ
သမ္မာဝါယာမဆိုတာ မှန်ကန်တဲ့ကြိုးစားအားထုတ်မှု။
အင်္ဂလိပ်လိုတော့ Right Effort တဲ့။

နိဗ္ဗာန်သို့တက်လှမ်းလိုသူအတွက် နည်းမှန်လမ်းမှန် ကြိုးစားအားထုတ်ဘို့ လိုအပ်ပါတယ်။
ဒီခေတ်မှာ ဟိုနည်း ဒီနည်းနဲ့ နည်းတွေက နည်းတာမဟုတ်ဘူး။
နည်းမှန်ဘို့ အင်မတန်အရေးကြီးတယ်။
နည်းမှန်မှ လမ်းမှန်မှာပါ။
နည်းမှားနေရင် လမ်းမှားနေမှာ ဖြစ်တဲ့အတွက်
လိုချင်တဲ့ လျှောက်လှမ်းနေတဲ့ပန်းတိုင်ကို ရောက်မှာ မဟုတ်တော့ဘူး။

ဗုဒ္ဓစာပေမှာ မှန်ကန်တဲ့ကြိုးစားအားထုတ်မှုလေးမျိုးရှိတယ်။
(၁) ဖြစ်ပေါ်ပြီးတဲ့မကောင်းမှုအကုသိုလ်တွေကို ပယ်စွန့်နိုင်အောင် ကြိုးစားခြင်း၊
(၂) မဖြစ်သေးတဲ့ မကောင်းမှုအကုသိုလ်တွေကို မဖြစ်မိအောင် ကြိုးစားခြင်း
(၃) မဖြစ်ပြီးသေးကုသိုလ်ကောင်းမှုတွေကို ဖြစ်ပေါ်လာအောင် ကြိုးစားခြင်း၊
(၄) ဖြစ်ပြီးတဲ့ကုသိုလ်ကောင်းမှုတွေကို တိုးပွါးလာအောင် ကြိုးစားခြင်းဆိုပြီး
လေးမျိုးရှိပါတယ်။

မဇ္ဈိမပဋိပဒါ - အလယ်အလတ်လမ်းစဉ် ရှစ်ချက်ထဲမှာ
ဒီသမ္မာဝါယာမ (မှန်မှန်ကန်ကန်ကြိုးစားအားထုတ်မှု) ဟာလည်း အင်မတန်အရေးကြီးပါတယ်။
သံသရာမှ ထွက်မြောက်ဘို့ နိဗ္ဗာန်ကို ရဘို့ ရောက်ဘို့အတွက်
ကိုယ့်အားကို အားကိုးပြီး ကိုယ်ကိုယ်တိုင် ကြိုးစားရမှာပါ။
ပေးကမ်းလှူဒါန်း၊ ဆုတောင်းနေရုံမျှနဲ့
နိဗ္ဗာန်ကို လုံးဝ မရောက်နိုင်ပါဘူးလို့ ဒီအချက်က ရည်ညွှန်းပါတယ်။

(၇) သမ္မာသတိ
မဇ္ဈိမပဋိပဒါ - အလယ်အလတ်လမ်းစဉ် ရှစ်ချက်ထဲမှာ
သမ္မာဝါယာမနဲ့ ကပ်လိုက်လာတာက သမ္မာသတိ (မှန်ကန်တဲ့သတိ) ပါ။
Right Mindfulness လို့ အင်္ဂလိပ်လို ဘာသာပြန်ကြတယ်။
ကိုယ် (body), ဝေဒနာ (feeling), စိတ် (thoughts), နဲ့ ဓမ္မ (mind-objects) လို့ခေါ်တဲ့ အာရုံလေးမျိုးအပေါ်မှာ မိမိရဲ့ သတိကို အမြဲမပြတ်တင်ထားတာကို (အမြဲသတိ ရှိနေခြင်းကို)
သမ္မာသတိ - မှန်ကန်သော သတိလို့ခေါ်ပါတယ်။

ကိုယ့်ကိုယ်ကို
လှတယ် တင့်တယ်တယ်လို့ မမှတ်ယူမိအောင်၊
ချမ်းသာတယ်လို့ မမှတ်ယူမိအောင်၊
မြဲတယ်လို့ မမှတ်ယူမိအောင်၊
အတ္တရှိတယ်လို့ မမှတ်ယူမိအောင်၊
အဆိုပါ အာရုံလေးမျိုးအပေါ်မှာ သတိအမြဲရှိနေရတာ။
Mindfulness on these four objects tend to eradicate the misconceptions
with regard to desirablity (subha), so-called happiness (sukha),
permanence (nicca) and an immortal soul (atta) respectively.

(၈) သမ္မာသမာဓိ
မှန်မှန်ကန်ကန်ကြိုးစားပြီး သတိရှိလာတဲ့သူအဖို့
မှန်ကန်တဲ့သမာဓိတရားရရှိလာမှာ မလွဲပါဘူး။
မှန်ကန်တဲ့သမာဓိကို သမ္မာသမာဓိလို့ခေါ်တယ်။ Right Concentration တဲ့။
သမာဓိရလာရင်တော့ ကိုယ့်ကိုယ်ကို အမှန်အတိုင်းသိမြင်လာမှာပါ။
ကိုယ်ကိုယ့်ကို အသုဘကောင်ကြီးဆိုတာ သဘောပေါက်လာမှာပါ။
သစ္စာလေးပါးကို တကယ်သိလိုသူ၊ နိဗ္ဗာန်ကို ရလိုသူ၊ မျက်မှောက်ပြုလိုသူ
မည်သူမဆို
မဇ္ဈိမပဋိပဒါကျင့်စဉ်ဖြစ်တဲ့ ဒီအချက် (၈) ချက်ကို ကျင့်ရမှာပါ။

(ဆရာတော် Narada ရဲ့ The Buddha and His Teaching ဖတ်တုန်းက ချရေးဖြစ်ခဲ့တာလေးပါ)

Saturday, November 8, 2014

သူလိုရဟန်း


ညီအစ်ကို (၇) ယောက်
၁။ သုဒ္ဓေါဒန
၂။ ဓတောဒန
၃။ သက္ကောဒန
၎။ သုက္ကောဒန
၅။ အမိတောဒန
၆။ အမိတ
၇။ ပမိတာ

နံပါတ် (၁) အစ်ကိုအကြီးဆုံး သုဒ္ဓေါဒန ဆိုတာက
မြတ်စွာဘုရားရဲ့ အဖေ။
နံပါတ် (၅) အမိတောဒန ဆိုတာက
ရှင်အာနန္ဒာရဲ့ အဖေ။
ဆိုတော့ မြတ်စွာဘုရားနဲ့ ရှင်အာနန္ဒာ တို့က ညီအစ်ကို တစ်ဝမ်းကွဲ။
မြတ်စွာဘုရားနဲ့ ရှင်အာနန္ဒာတို့က သက်တူရွယ်တူတွေ။
ဖွားဖက်တော်လို့ စာပေကဆိုပါတယ်။

မြတ်စွာဘုရား ဘုရားအဖြစ်ကို ရောက်ပြီး (၂) နှစ်မြောက်မှာ
ရှင်အာနန္ဒာ သာသနာဘောင်ဝင်ရောက်လာတယ်။
ဘုန်းကြီးဝတ်လာတယ်ပေါ့။
မြတ်စွာဘုရား ဘုရားအဖြစ်သို့ရောက်ရှိတာက
အသက် (၃၅) နှစ်အရွယ်ဆိုတော့
မြတ်စွာဘုရားအသက် (၃၆) နှစ်ဖြစ်တဲ့
ဘုရားဖြစ်ပြီး (၂) နှစ်မြောက်မှာ
သက်တူရွယ်တူ (ဖွားဖက်တော်) ရှင်အာနန္ဒာ
သာသနာ့ဘောင်ဝတ်ရောက်လာတယ်လို့ ဆိုရမယ်။

လူလည်း လူ့အလျှောက်၊ ဘုန်းကြီးလည်း ဘုန်းကြီးအလျှောက်
မြတ်စွာဘုရားလည်း မြတ်စွာဘုရားအလျှောက်
အသက်အရွယ်ရလာရင် အနီးကပ် သတ်သတ်မှတ်မှတ် ပြုစုလုပ်ကျွေးမဲ့သူ
လိုအပ်တာ အမှန်ပဲ။

မြတ်စွာဘုရား ငယ်စဉ်တုန်းကတော့
သွားလိုတဲ့နေရာကို သွားပြီး ဟောလိုတဲ့တရားကို အေးအေးဆေးဆေးဟောကြားကာ
ရောက်တဲ့အရပ်က ဒကာ ဒကာမတွေ၊ ရဟန်းသံဃာတွေ ပြုစုလုပ်ကျွေးတာနဲ့ အဆင်ပြေနေတာပဲ။

မြတ်စွာဘုရားကို အနီးကပ် ပြုစုလုပ်ကျွေးတဲ့ ရဟန်းတော်အချို့ ရှိခဲ့ပါရဲ့။ ခဏပဲ။
ကြာလာတော့ မြတ်စွာဘုရား ပြောစကားနားမထောင်ဘူး။
မြတ်စွာဘုရားကို အလုပ်အကျွေးပြုဘူးတဲ့ရဟန်းတစ်ပါးဆို
အဲဒီအရပ်ကို မသွားပါနဲ့လို့ တားနေတဲ့ကြားက ထွက်သွားပြီး
ပြဿနာတက်ကာ
မြတ်စွာဘုရားထံမှ လစ်ထွက်သွားတယ်။
ဆိုတော့ မြတ်စွာဘုရားကို အနီးကပ်အလုပ်အကျွေးပြုစုဘူးတဲ့ရဟန်းတော် ခပ်များများဟာ
ခေတ်စကားနဲ့ပြောရရင်
မြတ်စွာဘုရားရဲ့ အထာကို မနပ်ကြဘူး။

ဒီလိုနဲ့
သက်တော် (၅၅) နှစ် ၀ါတော် (၂၀) ရသည့်တိုင်အောင်
မြတ်စွာဘုရားမှာ သတ်သတ်မှတ်မှတ် အနီးကပ် အမြဲတမ်း ပြုစုလုပ်ကျွေးမဲ့သူ မရှိခဲ့ပါဘူး။
သက်တော် ၅၅ နှစ် ၀ါတော် (၂၀) အရွယ်ရောက်တော့
မြတ်စွာဘုရားက ရဟန်းတွေကို စုဝေးစေပြီး
ရဟန်းတို့၊
ငါ အရွယ်ရလာပြီ။
ငါ့ကိုယ် အနီးကပ် အမြဲတမ်း ပြုစုစောင့်ရှောက်လုပ်ကျွေးနိုင်မဲ့ ရဟန်းတော်တစ်ပါးလိုအပ်တယ်။`
ငါ့အထာကို သိတဲ့
ငါ့ကို အမြဲတမ်း အနီးကပ် ပြုစုစောင့်ရှောက်လုပ်ကျွေးနိုင်မဲ့
ရဟန်းတစ်ပါးကို ရွေးချယ်ကြ -
လို့ မိန့်တော်မူပါတယ်။

ဒီတော့ ရှင်အာနန္ဒာ ကလွဲလို့
မြတ်စွာဘုရားရဲ့ ညာလက်ရုံး ဘယ်လက်ရုံးတွေဖြစ်ကြတဲ့
ရှင်သာရိပုတ္တရာ၊ ရှင်မဟာမောဂ္ဂလာန်တို့ကအစ
စုဝေးရောက်ရှိလာတဲ့ ရဟန်းသံဃာအားလုံး
တပည့်တော်တို့ အနီးကပ်ပြုစုလုပ်ကျွေးပါရစေလို့
အလုအယက်လျှောက်ကြတာပေါ့။
လျှောက်ထားသမျှ ရဟန်းသံဃာတွေ
မြတ်စွာဘုရားရဲ့ Reject နဲ့ တိုးတော့တာပဲ။

နောက်ဆုံးတော့ သံဃာကြားထဲ ခေါင်းကြီးစိုက်ပြီး ငြိမ်နေတဲ့ ရှင်အာနန္ဒာကြီးကို
ဝိုင်းတိုက်တွန်းရတော့တာပေါ့။

တိုက်တွန်းတော့ ရှင်အာနန္ဒာကြီး က
မြတ်စွာဘုရားရှင်အနေနဲ့ တပည့်တော်တောင်းဆိုတဲ့အချက် (၈) ချက်ကို လိုက်လျောပေးနိုင်မှသာ
အလုပ်အကျွေးလုပ်နိုင်မည်ဖြစ်ကြောင်းလျှောက်ကြားပါတယ်။

ကြည့်စမ်း၊ သူများတွေ သူ့ထက်ငါ မြတ်စွာဘုရားကို
အလုပ်အကျွေးလုပ်ချင်လွန်းလို့ အလုအယက်လျှောက်ကြားနေတဲ့အချိန်
ရှင်အာနန္ဒာကြီးကတော့ အေးဆေးပဲ။
အချက် (၈)ချက်တောင် မြတ်စွာဘုရားဘက်က လိုက်လျှောဘို့ တောင်းဆိုလိုက်သေးတယ်။

လောက လူ့သဘာဝက
ကိုယ့်ဆွေမျိုးထဲက တစ်ယောက်ယောက်များ
ရာထူးကြီးကြီးရရင်
ရာထူးကြီးကြီးရထားထဲ့ အဲ့ဆွေမျိုးကို အမှီပြုပြီး
မြေ၊ အိမ်ယာ၊ တိုက်တာ၊ ဈေးခန်း၊ ကားစသည်များရအောင်
အခွင့်အရေးယူတတ်ကြတာထုံးစံပဲ။

ရှင်အာနန္ဒာကရော?
မြတ်စွာဘုရားဟာ ငါ့အစ်ကိုဝမ်းကွဲပဲ၊ ဒီတစ်ချီတော့ ငါ့အကွက်ဆိုက်ပြီ၊
ငါ့ဆွေမျိုးကောင်းစားတုန်း ငါလဲ တစ်သက်တာဖူလုံအောင် ရိက္ခာရှာလိုက်မဟဲ့၊
ဖွားဘက်တော် နောင်တော်ဘုရားဆီက အခွင့်အရေးရတုန်း တောင်းလိုက်အုံးမဟဲ့ ဆိုတဲ့ အတ္တကိုယ်ကျိုးအတွက် ရှင်အာနန္ဒာကြီးက
အဆိုပါ အချက် (၈) ချက်ကို တောင်းဆိုခဲ့တာလား။
မဟုတ်ပါဘူး။

သူတောင်းဆိုခဲ့တာ မြတ်စွာဘုရားအတွက်ပါ။ ရဟန်းသံဃာတော်တွေအတွက်ပါ။
ဗုဒ္ဓဘာသာဝင်တွေအတွက်ပါ။
ရှင်အာနန္ဒာ မြတ်စွာဘုရားရဲ့ အလုပ်အကျွေးဖြစ်ဘို့အတွက် မြတ်စွာဘုရားထံက သူတောင်းဆိုတဲ့ အချက် (၈) ချက်ကို လေ့လာကြည့်ရအောင်။

၁။ မြတ်စွာဘုရား ရရှိလာတဲ့ သင်္ကန်းကို ဘယ်တော့မှ သူ့ကို မပေးရဘူးတဲ့။

၂။ မြတ်စွာဘုရားရဲ့ ဆွမ်းကို သူ့ကို ဘယ်တော့မှ မကျွေးပါနဲ့တဲ့။

၃။ မြတ်စွာဘုရားနေတဲ့ သန့်ရှင်းသပ်ယပ်တဲ့ ကျောင်းတော်အခန်းကို
ဘယ်လိုအကြောင်းပြချက်နဲ့မှ သူ့ကို မနေခိုင်းပါနဲ့ တဲ့။

၎။ မြတ်စွာဘုရားကို ဆွမ်းလှူဘို့ သင်္ကန်းလှူဘို့ စသဖြင့်
ပင့်တဲ့နေရာတွေကို သူ့ကို ဘယ်တော့မှ မခေါ်ပါနဲ့တဲ့။

၅။ သူ့ကို ပင့်တဲ့နေရာတွေကိုတော့ မြတ်စွာဘုရား အမြဲလိုက်ပါပေးရမယ်တဲ့။

၆။ ရပ်ဝေးရပ်နီးမှ မြတ်စွာဘုရားကို ဖူးမျှော်ဘို့ လာကြတဲ့ဧည့်ပရိသတ်တွေကို
မိတ်ဆွေဖွဲ့ခွင့်ပြုပါတဲ့။

၇။ သူ့မှာ တစုံတရာ သံသယရှိလို့ မေးစရာရှိလာလျှင်
ဘယ်အချိန်မဆို မြတ်စွာဘုရားထံလာရောက် လျှောက်ထားခွင့်ပြုပါတဲ့။

၈။ မြတ်စွာဘုရားအနေနဲ့ သူ့မျက်ကွယ် ဘယ်မှာပဲ တရားဟောခဲ့ ဟောခဲ့၊
သူ့ကို ပြန်ဟောပြရမယ်တဲ့။

ရှင်အာနန္ဒာကြီးတောင်းဆိုတဲ့ ဒီအချက် (၈) ချက်ကို ကြည့်ပြီး
ရှင်အာနန္ဒာကြီးက တယ်ကြည်ညိုလိုက်တာ။ အားကျအတုယူစရာ တယ်ကောင်းတာပဲ၊

ဒီအချက်တွေထဲက ပထမ (၃) ချက်ကို သေချာဖတ်ပြီး စဉ်းစားကြည့်ရအောင်။
ဘ၀မှာ အရေးအကြီးဆုံးဖြစ်တဲ့ စားဝတ်နေရေးနဲ့ပတ်သက်ပြီး
ရှင်အာနန္ဒာ မြတ်စွာဘုရားနဲ့ မပတ်သက်ချင်ဘူးဆိုတာ တွေ့လိုက်ရပါတယ်၊
ဘုရားကို အလုပ်အကျွေးပြုစုလို့
ဘုရားရဲ့ ပေးစာ ကမ်းစာ စားရ ၀တ်ရတဲ့ဘ၀မျိုး
ရှင်အာနန္ဒာ မနေလိုပါဘူး။
ဒါ့အပြင်
ရှင်အာနန္ဒာကြီးက
ဘုရားပြုစုလုပ်ကျွေးပြီး ဘုရားပေးစာ ကမ်းစာစားပြီး ကြီးပွါးနေတာပါကွာလို့
လူအများပြောမှာကို သူလိုလားဟန်မတူပါဘူး။

နံပါတ် (၄) တောင်းဆိုချက်ကို ကြည့်မယ်ဆို
“ဘုရားတစ်ပါးတည်းပင့်တာကို ရှင်အာနန္ဒာကြီးက
လိုက်ကပ်စားသောက်နေတာဟေ”့ လို့ ပတ်ဝန်းကျင်ကလည်း မြင်လာနိုင်တယ်။
ဒီလိုလဲ သူအမြင်မခံနိုင်ပြန်ဘူး။

နံပါတ် (၅) တောင်းဆိုချက်ကြတော့
သူ့ကို သူ့ဒကာ ဒကာမတွေက ပင့်ရင်တော့ မြတ်စွာဘုရားပါ လိုက်ပေးရမယ်ဆိုပဲ။
ဘယ်လောက် ဆရာသမားကို ရှေ့တန်းတင်တဲ့ ရှင်အာနန္ဒာကြီးလဲ။
ရှင်အာနန္ဒာတောင်းတဲ့ ပထမအချက် (၅) ချက်ကို နားလည်မိတာပါ။
Cousin Brother ဖွားဖက်တော်ဖြစ်တဲ့ နောင်တော်ဘုရားဆီက
လုံးဝအခွင့်အရေးမယူတတ်တဲ့ ရှင်အာနန္ဒာကြီးအကြောင်းကို ဖတ်ပြီး
ခံစားကြည်ညိုမိတာလေး ချရေးဖြစ်တာပါ။

Thursday, November 6, 2014

အချစ်သုံးမျိုး

 
ဒီနေ့ သတို့သား မောင်ဇော်ဇော်ဦးနဲ့ သတို့သမီးမအိအိခင်တို့
လောကကြီးကို နှစ်ယောက်အတူ လက်တွဲရင်ဆိုင်မယ်လို့ ဆုံးဖြတ်ချက်ချပြီး
ကိုယ့်အိုးကိုယ့်အိမ်ကို တည်ထောင်တဲ့ အိမ်ထောင်ပြုကြတဲ့ပွဲပေါ့။

တနည်းအားဖြင့် တစ်ဦးနဲ့တစ်ဦး ယုံကြည်လို့  အချင်းချင်း
ချစ်ခင်စုံမက်ပြီး လက်ထပ်ကြတဲ့ပွဲဖြစ်ပါတယ်။
ချစ်တာကို ပါဠိလို ပေမလို့ခေါ်တယ်။

ပေမလို့ခေါ်တဲ့ အချစ်က သုံးမျိုးသုံးစားရှိတယ်လို့ မှတ်သားဘူးတယ်။
(၁) တဏှာပေမ
(၂) ဂေဟဿိတပေမ
(၃) မေတ္တာပေမ တဲ့။

နံပါတ် (၁) တဏှာပေမဆိုတာ သမီးရည်းစားချစ်ကိုပြောတာ။
လူရယ်လို့ဖြစ်လာရင် အရွယ်ရောက်လာတဲ့အခါ
သမီးရည်းစားဘ၀ကို ရောက်ကြတာချည်းပဲ။
ဒီလို သမီးရည်းစားဘ၀ရောက်ပြီး သမီးရည်းစားချစ် ချစ်ကြတာကို
တဏှာပေမလို့ ခေါ်ပါတယ်။

နံပါတ် (၂) အမျိုးအစား ဂေဟဿိတပေမကို ၀တ္တရားချစ်လို့
အလွယ်နည်းနဲ့ ဘာသာပြန်ဆိုနိုင်ပါတယ်။
ဝတ္တရားချစ်ဆိုတာက လင်ရယ် မယားရယ်လို့ ဖြစ်လာပြီဆိုရင်
လင့်မှာလည်း လင့်ဝတ္တရား၊ မယားမှာလည်း မယားဝတ္တရား
အသီးအသီးရှိကြပါတယ်။

မထေမဲ့ကင်း၊ အပ်နှင်းဥစ္စာ၊ မိစ္ဆာမမှား၊ ၀တ်စားဆင်ယင်၊ မြတ်နိုးကြင်ဆိုတဲ့အတိုင်း
လင်ယောက်ကျားလုပ်တဲ့သူက
ကိုယ့်ဇနီးမယားအပေါ်မှာ (ငါကရှာကျွေးနေရတာပဲဆိုပြီး) မထေမဲ့မြင်မလုပ်ဖို့၊
ရလာတဲ့ ငွေ၊ စည်းစိမ်ဥစ္စာတွေကို ဇနီးမယားကို အပ်နှံဖို့၊
ကိုယ့်ဇနီးမယားကလွဲရင် ကျန်တဲ့ မိန်းမတွေကို ဖွဲ၊ ဆန်ကွဲလို့ သဘောထားဖို့၊
ကိုယ့်ဇနီးမယားကို နေ့ထူးနေ့မြတ်တွေမှာ အ၀တ်အစားလေးတွေ၊
ရတနာပစ္စည်းလေးတွေဝယ်ပြီး လက်ဆောင်ပေးကာ ဆင်ယင်ဖို့၊
ကိုယ့်ဇနီးမယားကို ကြင်နာမြတ်နိုးဖို့ ဆိုတဲ့
ဝတ္တရားတွေကို ကျေပြွန်အောင် ထမ်းဆောင်ရပါမယ်။

ဇနီးမယားလုပ်တဲ့သူကလဲ
အိမ်တွင်းမှုလုပ်၊ သိမ်းထုတ်သေချာ၊ မိစ္ဆာကြဉ်ရှောင်၊ လျော်အောင်ဖြန့်ချိ၊ ပျင်းရိမမူ
ဆိုသည့်အတိုင်း
အိမ်တွင်းအလုပ်တွေဖြစ်တဲ့ ထမင်းချက်၊ ဟင်းချက်၊ အ၀တ်လျှော်စတဲ့
အိမ်တွင်းအလုပ်တွေကို လုပ်ဆောင်ရပါမယ်။

(ဒီအချက်ကို ပြောပြတော့ သတိုးသမီးဖြစ်တဲ့ မအိအိခင်က
သူလည်း အပြင်ကို အလုပ်ထွက်လုပ် နေရလို့
အိမ်လုပ်ငန်းတွေကို လင်ယောက်ကျားဖြစ်တဲ့သူလည်း
လုပ်ဆောင်သင့်ပါတယ်ဘုရားလို့ ရယ်ရယ်မောမော လျှောက်လာပါတယ်။)

မအိအိခင်ပြောတာ မှန်ပါတယ်။
ဟိုးလွန်ခဲ့တဲ့နှစ်ပေါင်း ၂၆၀၀ နီးပါးက အိန္ဒိယနိုင်ငံ လူ့အဖွဲ့အစည်းမှာ
ဒီလင့်ဝတ္တယား မယားဝတ္တရားတွေကို ဘုရားရှင် ဟောကြားခဲ့တာပါ။
အိန္ဒိယထုံးစံက
အိမ်ထောင်ပြုမယ်ဆိုရင် အမျိုးသမီးများက အမျိုးသားများကို တင်တောင်းရပါတယ်။
အင်္ဂလိပ်လို Dowry လို့ခေါ်ပါတယ်။
လင်ယောက်ကျားရဲ့ ပညာဂုဏ် ဆွေဂုဏ်မျိုးဂုဏ် အဆင့်အတန်းပေါ်မူတည်ပြီး
တင်တောင်းရတဲ့ငွေကြေးပမာဏ အနည်းအများကွာပါတယ်။
လင်ယောက်ကျားကျေနပ်တဲ့အထိ ဇနီးမယားလုပ်မဲ့သူဘက်က ရှာကြံပေးရပါတယ်။

ဒီလိုဇနီးမယားလုပ်မဲ့သူက လင်ယောက်ကျားစိတ်ကြိုက် တင်တောင်းပြီးလို့
အကြင်လင်မယားအဖြစ်ရောက်သွားပြီဆိုရင် ဇနီးမယားက ဘာမှ မလုပ်တော့ပါဘူး။
အိမ်တွင်းမှာပဲ ကုတ်နေတော့တာပဲ။
ဒီစနစ် ဒီဓလေ့က ဒီနေ့အထိပါပဲ။

ဒါ့ကြောင့် အိန္ဒိယနိုင်ငံကို သွားရင်
ဈေးရောင်းနေတာလည်း ကုလားပဲ၊ စားပွဲထိုးလုပ်နေတာလည်း ကုလားပဲ။
နေရတကာမှာ ကုလားအထီးတွေချည်းဘဲ။
ဈေးတွေမှာလည်း ကုလားအထီးတွေဘဲ ဈေးရောင်း ဈေးဝယ်လုပ်နေတာ တွေ့ရပါတယ်။

ဒီလိုဓလေ့ထုံးစံရှိတဲ့ အိန္ဒိယလူ့အဖွဲ့အစည်းမှာ
ဇနီးမယားလုပ်တဲ့သူကို အိမ်တွင်းအလုပ်တွေကို ကျေပြွန်အောင် လုပ်ပါလို့
ဘုရားရှင်ဟောခဲ့တာပါ။

ဒီနေ့ဒီအချိန်အခါ ဒို့လူမျိုးအဖွဲ့အစည်းမှာတော့
လင်ယောက်ကျားရော၊ ဇနီးမယားပါ မနက်က မိုးချုပ် အပြင်ထွက်အလုပ်လုပ်နေရတာဆိုတော့
လင်ရော မယားပါ အိမ်တွင်းအလုပ်တွေကို အတူတူလုပ်ကြပေါ့။

နောက် ဇနီးမယားဝတ္တရားတွေက
လင်ယောက်ကျားက အပ်နှံတဲ့ ငွေ ပစ္စည်းဥစ္စာတွေကို
သေသေချာချာ သိမ်းဆည်းထားရပါမယ်။
ကိုယ့်ယောက်ကျားကလွဲလို့ တခြားယောက်ကျားတွေကို
ဖွဲ ဆန်ကွဲလို သဘောထားရပါမယ်။
တချို့က လင်ယောက်ကျားဘေးထားပြီး ရုပ်ရှင်ကားကြည့်ရင်း
“နေတိုးက အတော်ချောတာပဲ လို့ ပြောတတ်ကြတယ်။
မပြောသင့်ပါဘူး။ ဒါမျိုးကအစ ရှောင်ကြဉ်ရပါမယ်။
သူ့ဘက် ကိုယ့်ဘက် သင့်လျော်အောင် ဖြန့်ချိရပါမယ်။
မပျင်းမရိဘဲ တက်တက်ကြွကြွ နေထိုင်ရပါမယ်။

ဒီလိုအသီးအသီးရှိကြတဲ့ ၀တ္တရားတွေကို တာဝန်ကျေပြွန်အောင် ထမ်းဆောင်တာကို
တာဝန်ကျေပြွန်စွာ ထမ်းဆောင်ရင်းချစ်ကြတာကို
ဂေဟဿိတပေမ - ၀တ္တရားချစ်လို့ခေါ်ပါတယ်။

နံပါတ် (၃) ဖြစ်တဲ့ အချစ်ကတော့
မေတ္တာပေမ လို့ခေါ်ပါတယ်။ မေတ္တာချစ်ပေါ့။
မေတ္တာဆိုတာ ဘာပဲပြုပြု၊ ဘာပဲ ပြောပြော၊ ဘာပဲ ကြံကြံ
သူ့အကျိုးလိုလားစိတ်နဲ့ ပြုမူပြောဆိုကြံစည်တာကိုပြောတာပါ။
လင်ယောက်ကျားက ဇနီးမယားအကျိုးအတွက်
ပြုမူပြောဆိုကြံစည်ရမှာဖြစ်သလို
ဇနီးမယားကလည်း လင်ယောက်ကျားအကျိုးမျှော်ကိုးပြီး
ပြုမူ ပြောဆို ကြံစည်ရပါမယ်။
ဒါမျိုးကို မေတ္တာပေမ - မေတ္တာချစ်လို့ခေါ်ပါတယ်။

အိမ်ထောင်ပြုလို့ လင်ရယ် မယားရယ်လို့ဖြစ်လာမှတော့
သမီးရည်းစားချစ်နဲ့လည်း ချစ်ရမှာပါဘဲ။
ဝတ္တရားချစ်နဲ့လည်း ချစ်ရမှာပါဘဲ။
မေတ္တာချစ်နဲ့လည်း ချစ်ရမှာပါဘဲ။

ဒီသုံးမျိုးလုံးနဲ့ချစ်ရင် ပျော်ရွှင်ချမ်းမြေ့တဲ့အိမ်ထောင်သည်တွေဖြစ်မှာပါ။
ဒါ့ကြောင့် ဒီအချစ်သုံးမျိုးလုံးနဲ့ ချစ်နိုင်ကြပါစေ။
ချစ်နိုင်ပြီးသကာလ ဒီလင်ဒီမယား သက်ဆုံးတိုင်
အိုအောင်မင်းအောင်ပေါင်းနိုင်ကြပါစေ။

သာဓု သာဓု သာဓု

သီတင်းကျွတ်တော့ မင်္ဂလာဆွမ်းကျွေးတရားတွေ ဟောဟောနေရလို့
ဟောလေ့ဟောထရှိခဲ့တဲ့တရားလေးကို ပြန်တင်ပေးလိုက်တာပါ။

Wednesday, November 5, 2014

ခိုးလို့မရတာက


ဘုရားရှင်ကို နတ်သားမေးတဲ့ နောက်ဆုံးမေးခွန်းက
ကိံသု စောရေဟိ ဒူဟရံ
ဘယ်ဟာကို သူခိုး (ဓားပြ) တို့ ခိုးယူလုယက်နိုင်ခဲပါသလဲ တဲ့။
သူခိုးဓားပြတို့ ခိုးယူလုယက်လို့ မရနိုင်တဲ့အရာဟာ ဘယ်ဟာဖြစ်ပါသလဲ ပေါ့။

မီးခံသေတ္တာထဲက ဘဏ်ထဲက ငွေတွေ ရတနာပစ္စည်းတွေကို
သူခိုးဓားပြတွေ ခိုးယူလုယက်လို့ မရနိုင်ဘူးလို့ ထင်ကြမှာပါဘဲ။

လူတော်တော်များများက ကိုယ်ရှာဖွေထားတဲ့ပစ္စည်းဥစ္စာကို
အတော်လေး တပ်မက်ကြပါတယ်။
ကိုယ့်ရဲ့ ဇနီး မယား သမီး သားတွေကို အတော်လေး ချစ်ခင်စုံမက်ကြတယ်။
တချို့များ ကိုယ့်ဇနီးမယားကို သေပြီး နောင်ဘ၀အထိ ယူဆောင်သွားလို့
ရတယ်များထင်နေလား မသိဘူး။ ချစ်လိုက်ကြတာ၊ ယုယလိုက်ကြတာ။
လိုအပ်တာထက်ကို ပိုနေလိုက်ကြတာ။

ကိုယ့်တိုက်တာ အိမ်မြေ စည်းစိမ်တွေကိုလည်း ဒီအတိုင်းပါဘဲ။
တပ်မက်လိုက်ကြတာ၊ တွယ်တာလိုက်ကြတာ။
နောင်ဘ၀ ယူသွားလို့ ရတယ်များ ထင်နေလားမသိပါဘူး။

တကယ်တော့ လင်ယောက်ကျားပဲဖြစ်ဖြစ်၊ ဇနီးမယားပဲဖြစ်ဖြစ်
သေသွားပြီဆိုရင် ကျန်ရစ်သူကို ခေါ်သွားလို့ မရပါဘူး။

ဒီဘ၀မှာ တော်စပ်တဲ့ ဇနီးမယား ခင်ပွန်းယောက်ကျားက
ဒီဘ၀မှာပဲ ကိုယ်နဲ့ သက်ဆိုင်ပါတယ်။
ဒီဘ၀မှာ ရှာဖွေ စုဆောင်းထားတဲ့
စည်းစိမ်ဥစ္စာ ငွေရေးကြေးရေးတွေကလည်း
ကိုယ်နဲ့ ဒီဘ၀မှာပဲ သက်ဆိုင်ပါတယ်။
ဒီဘ၀မှာသာ ပိုင်ပါတယ်ဆိုတဲ့ ဇနီးမယားကိုတောင်
သူတပါးက လုယူသွားနိုင်သေးတယ်။
စည်းစိမ်ဥစ္စာလည်း ထို့အတူဘဲ။
ဟိုတလောက ဇနီးမောင်နှံနှစ်ယောက် မနက်စောစော
အုန်းနို့ခေါက်ဆွဲကပ်ဖို့ ကျောင်းကိုလာတယ်။
ဆိုင်ကယ်နဲ့။
ယောက်ကျားက ရှေ့က မောင်း။
မိန်းမက နောက်က စီး။
သူတို့နှစ်ဦးကြားမှာက လက်ကိုင်အိပ်လေးတင်လို့။
ဓာတ်ဆီဆိုင်နားရောက်တော့ ဆီဖြည့်ဖို့ ဆိုင်ကယ်ကို အရှိန်လျှော့လိုက်တာနဲ့
ဘယ်အချိန်က ကပ်လိုက်လာမှန်းမသိတဲ့ ဆိုင်ကယ်တစ်စီးက
ဝူး ဆို သူတို့ဆိုင်ကယ်နားကို ကပ်လိုက်ပြီး နှစ်ယောက်ကြားက လက်ကိုင်အိပ်လေးကို
ဆွဲလုပြီး မောင်းထွက်သွားတယ် တဲ့။
လက်ကိုင်အိပ်ထဲမှာက ပတ်စ်ပို့နဲ့ ငွေနည်းနည်းပါသွားတယ်။

ပတ်စ်ပို့နဲ့ဆက်စပ်လို့ ပြောရအုံးမယ်၊
နိုင်ငံခြားမှာနေတာ ပတ်စ်ပို့က အင်မတန်အရေးကြီးတယ်။
၁၉၉၉ - ခုနစ် နိုင်ငံခြား စထွက်ခါနီးတော့
နိုင်ငံခြားသွားဘူး လာဘူးရှိတဲ့ ဦးဇင်းက သြ၀ါဒချွေဘူးတယ်။
“နိုင်ငံခြားရောက်ရင် ပတ်စ်ပို့က အဖေ၊ ဒေါ်လာက အမေ၊
ဒီအဖေနဲ့အမေကို ရိုရိုသေသေကိုင်တွယ်ရမယ်၊
လုံလုံခြုံခြုံသိမ်းဆည်းရမယ်” တဲ့။

ပြောချင်တာက ကိုယ့်မှာရှိတဲ့ စည်းစိမ်ဥစ္စာ ငွေရေး ကြေးရေးတွေဟာ
ဘာမှ အစိုးမရဘူး။ အချိန်မရွေး သူခိုးဓားပြတွေ ခိုးယူ လုယက်သွားနိုင်တယ်။

ဒီမှာ နတ်သားရဲ့ သူခိုးဓားပြတို့ ခိုးယူလုယက်လို့ မရတဲ့အရာဟာ
ဘယ်ဟာဖြစ်ပါသလဲ ဆိုတဲ့အမေးအတွက် ဘုရားရှင်ရဲ့ အဖြေကို ကြည့်ရအောင်။

ပုညံ စောရေဟိ ဒူဟရံ - သူခိုးဓားပြတို့ ခိုးယူလုယက်လို့ မရတဲ့အရာဟာ
ကုသိုလ်ကောင်းမှုဖြစ်ပါတယ် တဲ့။

ဗုဒ္ဓဘာသာဝင်တွေက ၃၁ ဘုံကို လက်ခံယုံကြည်ပါတယ်။
ဆိုတော့ လူတစ်ဦးတစ်ယောက်ဟာ ဒီဘ၀နဲ့တင် ကိစ္စမတုံးသေးပါဘူး။
နောင်ဘ၀တွေမှာ (၃၁) ဘုံမှာ ကျင်လည်ရအုံးမှာပါ။

ဒီလို ၃၁ ဘုံကျင်လည်တဲ့အခါ ကောင်းတဲ့ဘုံရောက်ဖို့
ကောင်းတဲ့မိဘတွေနဲ့တွေ့ဘို့
ကောင်းတဲ့ဆရာသမားတွေနဲ့တွေ့ဘို့
ကောင်းတဲ့သူငယ်ချင်းတွေနဲ့တွေ့ဘို့အတွက်
ယခုလက်ရှိဘ၀ ကိုယ်လုပ်နေတဲ့အလုပ်က ကောင်းဘို့လိုပါတယ်။

အခု ကိုယ်လုပ်နေတဲ့အလုပ်က နောင်အခါမှာ နောင်ဘ၀မှာ
ကိုယ်ဘာကောင်ဖြစ်မလဲဆိုတာ ဆုံးဖြတ်ပေးမှာပါ။
ကိုယ့်နောင်ဘ၀အတွက် အခု ကိုယ်ဘာလုပ်နေတယ်ဆိုတာက အဆုံးအဖြတ်ပေးမှာပါ။

ဆိုလိုတာက
အခုကိုယ်လုပ်နေတဲ့ ကောင်းမှုကုသိုလ်က ကိုယ့်နောက်ကို အစဉ်အမြဲ လိုက်ပါနေမှာပါ။
ကိုယ်လုပ်တဲ့ကောင်းမှုကုသိုလ်ကို ကိုယ့်နောက်မပါအောင်
ဘယ်သူကမှ တားဆီးပိတ်ပင်လို့မရပါဘူး။
ကိုယ်လုပ်တဲ့ကောင်းမှုကုသိုလ်ကို ဘယ်သူခိုးကမှ ခိုးယူလို့ မရပါဘူး။
ဘယ်ဓားပြကမှ လုယူ တိုက်ယူလို့ မရပါဘူး။
ဒါ့ကြောင့် ဘုရားရှင်က
သူခိုးဓားပြတို့ ခိုးယူလုယက်လို့ မရတဲ့အရာဟာ
မီးခံသေတ္တာထဲက ဘဏ်ထဲက ငွေတွေ ရတနာတွေမဟုတ်ပါဘူး။
ကုသိုလ်ကောင်းမှုဖြစ်ပါတယ် လို့ ပြောကြားခဲ့တာပါ။

ဒီဂါထာလေးကို အကျဉ်းချုပ်လိုက်ရင်
အိုသည့်တိုင်အောင် ကောင်းတာက သီလ အကျင့်ပါ။
ကိုယ့်ရင်ထဲ နှလုံးသားထဲမှာ တည်ဆောက်ရမှာက သဒ္ဓါပါ။
လူသားတွေအတွက် ရတနာဆိုတာ ပညာကို ပြောတာပါ။
သူခိုးဓားပြတို့ခိုးယူလုယက်လို့ မရတဲ့အရာဟာ ကောင်းမှုကုသိုလ်ပါ။

Tuesday, November 4, 2014

ညီမျှနေဘို့


နတ်သားက ဘုရားရှင်ကို မေးတဲ့ နံပါတ် (၃) မေးခွန်းက
ကိံသု နရာနံ ရတနံ - အဘယ်တရားသည် လူတို့၏ ရတနာမည်ပါသနည်း တဲ့။
လူတွေရဲ့ ရတနာဆိုတာ ဘာကို ပြောတာလဲ။

အိမ်တစ်အိမ်မှာ ဒီတရားကို ဟောပြရင်း
ဒီနတ်သားမေးတဲ့ မေးခွန်းကို ဒကာကြီးတစ်ဦးကို မေးကြည့်တော့
ဘုရား တရား သံဃာ ရတနာသုံးပါးပါဘုရား လို့ ဖြေပါတယ်။
သူဖြေတဲ့အဖြေက ဗုဒ္ဓဘာသာဝင်တွေအတွက်တော့ ဟုတ်သလိုလိုပါပဲ။
ဒါပေမဲ့ နတ်သားမေးတဲ့ မေးခွန်းမှာပါတဲ့ လူဆိုတာ
ဗုဒ္ဓဘာသာဝင်တွေကိုသာ ရည်ညွှန်းတာ မဟုတ်ပါဘူး။
ဗုဒ္ဓဘာသာဝင်မဟုတ်တဲ့ အခြားဘာသာဝင် အခြားလူမျိုးအားလုံးကို ရည်ညွှန်းတယ်လို့ ဆိုရမှာပါ၊
ဗုဒ္ဓဘာသာဝင်မဟုတ်တဲ့ အဲ့ဒီလူတွေအတွက်
ဘုရား တရား သံဃာကို ရတနာလို့ ဘယ်လိုလုပ်သတ်မှတ်လို့ရမလဲ။
ဆိုတော့ ရတနာဆိုတာ အများနဲ့သက်ဆိုင်တဲ့ လူသားအားလုံးရဲ့ ရတနာဖြစ်ရပါမယ်။
“လူသားအားလုံးတို့၏ ရတနာသည် အဘယ်အရာဖြစ်ပါသနည်း” ပေါ့။

ဘုရားရှင်ရဲ့ အဖြေက
ပညာ နရာနံ ရတနံ - ပညာသာ လူတွေရဲ့ ရတနာဖြစ်ပါတယ်တဲ့။
ဟုတ်ပါတယ်၊ ပညာဟာ ဘယ်လူမျိုးအတွက်မဆို
ဘယ်ဘာသာဝင်အတွက်မဆို ရတနာပါ။
သဒ္ဓါ - ယုံကြည်မှု၊ ပညာ - ခွဲခြမ်းစိတ်ဖြာသိမှုကို ဒီနေရာမှာ တွဲပြီးပြတော့
ဘာသာရေးကိုးကွယ်ဆည်းကပ်တဲ့နေရာမှာ
ယုံကြည်မှု (သဒ္ဓါ) တရားသက်သက်နဲ့တင် မလုံလောက်ဘူး။
အစစအရာရာ စဉ်းစားတွေးခေါ်တတ်တဲ့ ဝေဘန်ပိုင်းခြားတတ်တဲ့
ပညာလဲ ပါရမယ်လို့ သဘောပေါက်နားလည်မိပါတယ်။
ပညာနဲ့ယုံကြည်မှသာ ကိုးကွယ်ဆည်းကပ်တဲ့နေရာမှာ တန်ဘိုးရှိမှာမို့လား။

မှန်ပါတယ်။
ပညာကင်းတဲ့ ယုံကြည်မှု (သဒ္ဓါ) တရားဟာ အကြည်ညိုမှားတတ်ပါတယ်။
ပညာနဲ့သဒ္ဓါ၊ သဒ္ဓါနဲ့ပညာ ညီတူညီမျှ ရှိနေရပါမယ်။
တစ်ခုက တစ်ခုထက် မပိုလွန်ရပါဘူး။
တစ်ခုက တစ်ခုထက်ပိုလွန်သွားရင် မကောင်းတတ်ပါဘူး။

မြန်မာပြည်က ဗုဒ္ဓဘာသာဝင်အများစုဟာ
သဒ္ဓါအားကောင်းပြီး ဝေဘန်ပိုင်းခြားတတ်တဲ့ ပညာအားနည်းတယ်လို့ ဆိုရမလားပဲ။
ယုံလွယ်တတ်ကြတယ်။ နာမည်ကြီးတာနောက် လိုက်တတ်ကြတယ်။
မှား၏ မှန်၏ မဝေဘန်ကြပါဘူး။
ဘယ်လောက်အထိ မဝေဘန်သလဲဆိုရင်
ရန်ကုန် မန္တလေး ကားလမ်းဘေးမှာ “မြွေဘုရား” ဆိုပြီး
မုခ်ဦးအကြီးကြီးတည်ဆောက်ထားတာဟာ
မှားသလား မှန်သလား တင့်တယ်သလား မတင့်တယ်ဘူးလားလို့
မဝေဘန်တတ်လောက်တဲ့အထိပါဘဲ။
စာရေးသူအနေနဲ့ မြွေဘုရားဆိုတဲ့မုခ်ဦးအကြီးကြီးကို ရုတ်တရက်တွေ့လိုက်တော့
အတော်စိတ်မသက်မသာဖြစ်မိတယ်။
ဘယ့်နှယ်၊ မြွေက ဘုရားဖြစ်သွားရတာတုန်း၊
ဘုရားက မြွေဖြစ်သွားရတာတုန်း လို့ ချက်ချင်း အတွေးဝင်လာမိပါတယ်။
နောက်မှ ဒေသခံ ဦးဇင်းတစ်ပါးကို မေးကြည့်တော့
ရိုက်စားလုပ်ထားမှန်းသိရတယ်။
ဒါမျိုးအထူးအဆန်းဖန်တီးထားတာကိုလည်း ဒို့မြန်မာဗုဒ္ဓဘာသာဝင်တွေက
ဝေဘန်ဆန်းစစ်မှုမရှိပဲ အလွယ်တကူလက်ခံယုံကြည်လိုက်ကြတာပါပဲ၊

ဒါဟာ ယုံကြည်မှု သဒ္ဓါအားကောင်းပြီး
စဉ်းစားဝေဘန်မှု ပညာအားနည်းတာနဲ့ပတ်သက်ပြီး ထင်ရှားတဲ့သာဓကပဲ။
စာပေမှာတော့
ဗလ၀သဒ္ဓေါ ဟိ မန္ဒပညော မုဒ္ဓပသန္နော ဟောတိ၊ အ၀တ္ထုသ္မိံ ပသီဒတိ တဲ့။
အဓိပ္ပါယ်က
ယုံကြည်မှုသဒ္ဓါတရားအားကြီးပြီး ပညာအားနည်းတဲ့သူဟာ
မိုက်မိုက်ကန်းကန်း မဆင်မခြင် မကြည်ညိုသင့်သည်ကို ကြည်ညိုတတ်၏၊
ကြည်ညိုဖွယ်မဟုတ်သောအရာဝတ္ထု ပုဂ္ဂိုလ်တို့၌ ကြည်ညိုတတ်၏ တဲ့။

အနောက်နိုင်ငံသား အများစုကတော့ ပညာအားကြီးပြီး
သဒ္ဓါတရားအားနည်းတယ်။
သိဒ္ဓတ္ထမင်းသားက မိန်းမယူပြီး ကလေးတစ်ယောက်ရမှ
ပစ်ထားခဲ့တာ တရားသလား၊ လုပ်မကျွေးချင်လို့လား။
မိသားစုတာဝန် မထမ်းဆောင်ချင်လို့လားနဲ့ လားပေါင်းများစွာ
မေးခွန်းထုတ်နေတာနဲ့ တကယ့်အနှစ်ဖြစ်တဲ့အကျင့်ဆီကို မရောက်နိုင်တော့ဘူး။

ဒီလို ဝေဘန်စပ်စုမှု ပညာအားကြီးပြီး ယုံကြည်မှု သဒ္ဓါအားနည်းတဲ့သူအတွက်
စာပေမှာလာတာက
ဗလ၀ပညော မန္ဒသဒ္ဓေါ ကေရာဋိကပက္ခံ ဘဇတိ တဲ့။
ပညာကြီးပြီး သဒ္ဓါအားနည်းတဲ့သူဟာ စဉ်းလဲသောအဖို့ ကောက်ကျစ်သည့်အပိုင်းသို့
ရောက်သွားတတ်၏ လို့ အဓိပ္ပါယ်ရပါတယ်။

ဒါ့ကြောင့် အရာခပ်သိမ်းမှာ အထူးသဖြင့် ဘာသာရေးနယ်ပယ်မှာ
ယုံကြည်မှု သဒ္ဓါအားကြီးတာလည်း မကောင်းဘူး။
ဝေဘန်မှု ပညာအားကြီးတာလည်း မကောင်းဘူး။
သဒ္ဓါနဲ့ ပညာ ညီမျှနေဘို့ လိုပါတယ်။

Monday, November 3, 2014

တည်ဆောက်၊ ဆောက်တည်


နတ်သားမေးတဲ့ နံပါတ် (၂) မေးခွန်းက
ကိံသု သာဓု ပတိဋ္ဌိတာ -
 (ကိုယ့်ရင်ထဲမှာ) ဘယ်လိုဟာမျိုး တည်ရှိသင့်ပါသလဲ တဲ့။
အင်္ဂလိပ်လိုဘာသာပြန်ထားတာကတော့
What is suitable to be established in? တဲ့။

ဆိုတော့ ကိုယ့်ရင်ထဲမှာ ကိုယ့်နှလုံးသားထဲမှာ ကိုယ့်ဦးဏှောက်ထဲမှာ
ဘာကို ဘယ်လိုဟာမျိုးကို ဆောက်တည်သင့်သလဲ၊ တည်ဆောက်သင့်သလဲ လို့
ဘာသာပြန်ရင် ပိုနားလည်နိုင်မယ်လို့ ထင်ပါတယ်။

ဘုရားရှင်ရဲ့ အဖြေက
သဒ္ဓါ သာဓု ပတိဋ္ဌိတာ တဲ့။
သဒ္ဓါတရားကို ကိုယ့်ရင်ထဲမှာ တည်ဆောက်သင့်တယ်၊ တည်ဆောက်ရမယ်ပေါ့။

သဒ္ဓါဆိုတဲ့ပုဒ်အဓိပ္ပါယ်ကို
အခြားအခြားသောဆရာတော် သမားတော်ကြီးတွေရဲ့ ဖွင့်ဆိုချက်ကို
ခဏမေ့ထားပြီး ကိုယ့်နည်းကိုယ့်ဟာနဲ့ ဖွင့်ဆိုနားလည်ကြည့်ရအောင်။
သဒ္ဓါဆိုတာက (ဘာသာရေး) ယုံကြည်မှုကိုပြောတာ။
ဘာသာရေးလိုက်စားမှ ဘာသာရေးကို ယုံကြည်မှာ၊
ဘာသာရေးလိုက်စားမှုဆိုတာ
ဘာသာရေးကျင့်ဝတ်တွေကိုလေ့လာပြီး
ကျင့်ကြံတာကို ပြောတာ၊ ကိုင်းရှိုင်းတာကို ပြောတာပါ။
သဒ္ဓါဆိုတာကို အဖြောင့်အားဖြင့် နားလည်လွယ်အောင် ဘာသာပြန်ဆိုရရင်
ဘာသာရေးကိုင်းရှိုင်းတာကို ပြောတာပါပဲ။
ဘာသာရေးကိုင်းရှိုင်းဘို့ ဘာသာရေးကျင့်ဝတ်တွေကို ကျင့်ဘို့ဆိုတာ
ရင်ထဲ နှလုံးသားထဲ ဦးဏှောက်ထဲ အလိုလိုရောက်လာတာမဟုတ်ဘူး၊
အလိုလိုပေါ်ပေါက်လာတာ မဟုတ်ဘူး။
တည်ဆောက်ယူရတာ။ ဆောက်တည်ယူရတာ။ ကြိုးစားယူရတာ။

ဒါ့ကြောင့် ဘုရားရှင်က
သဒ္ဓါ သာဓု ပတိဋ္ဌိတာ
ဘာသာရေးကိုင်းရှိုင်းမှုကို တည်ဆောက်ယူပါ၊
(မိမိနေဘို့ရန် အိမ်ကို ကြိုးစားပမ်းစား တည်ဆောက်သလို)
ဘာသာရေးကျင့်ဝတ်တွေကို ကျင့်ကြံနိုင်ဘို့ တည်ဆောက်ယူပါတဲ့။
ဟုတ်တယ်။ အရက်သောက်ဖို့၊ ဒစ္စကိုသွားဘို့၊
Pub သွားဘို့ဆိုရင် အထူးအားထုတ်စရာမလိုပါဘူး။
အထူးကြိုးစားစရာမလိုပါဘူး။
အလွယ်တကူပဲ။ အသံကြားတာနဲ့ ခြေက လှမ်းပြီးနေပြီ။ ခြေဦးက လှည့်ပြီးနေပါပြီ။

အဲ၊ ဘာသာရေးဆိုင်ရာကျင့်ဝတ်တွေကို ကျင့်ဘို့ဆိုရင်
အထူးကို ကြိုးစားရတယ်။ အားစိုက်ရတယ်။
ညစဉ်ညတိုင်း ရတနာသုံးပါး၊ မိဘ ဆရာသမားတွေကို
ရှိခိုးဦးချ မေတ္တာပို့ပြီးမှ အိပ်ရာဝင်တဲ့ ဘာသာရေးဆန်တဲ့အလေ့အကျင့်မျိုးဆိုရင်
ကြိုးစားရတယ်။ အားထည့်ရတယ်။

ဒီလိုအလေ့အကျင့်မျိုး နှစ်ချီကြာညောင်းလာပေမဲ့ ကြားထဲမှာ ကိစ္စတစ်ခုခုနဲ့
ပျက်သွားတယ်ဆိုရင် ပြန်ပြီးလုပ်ဆောင်နိုင်ဘို့ မနည်းအားယူရပါတယ်။

မနက်စောစော တရားထိုင်တဲ့အလေ့အကျင့်ကို နှစ်ပေါက်လုပ်ထားပေမယ့်
ကြားထဲမှာ အကြောင်းကြောင်းကြောင့် နှစ်ရက်လောက်ပျက်ကွက်သွားရင်
(ကောင်းတဲ့အလုပ်ဆိုတော့) ကိုယ့်ကိုယ်ကို မနည်းပြန်ခိုင်းယူရတယ်။

ဒါ့ကြောင့်မို့လည်း ဘုရားရှင်က
ဘာသာရေး ယုံကြည်မှုသဒ္ဓါတရား၊ ဘာသာရေးကိုင်းရှိုင်းမှုသဘောတရား၊
ဘာသာရေးကျင့်ဝတ်ဖြည့်ဆည်းမှုသဘောတရားကို တည်ဆောက်သင့်ပါတယ်
ကြိုးစားသင့်ပါတယ်လို့ ပြောထားတာဖြစ်မှာပါ လို့ ထင်မြင်ယူဆမိပါတယ်။

Sunday, November 2, 2014

အကောင်းဆုံးအရာ

ညက ပိဋကတ်စာပေထဲက ဇရာသုတ်ဆိုတာလေးကို ပြန်ဖတ်ဖြစ်တယ်။
နတ်သားတစ်ယောက်ကမေးတာကို
ဘုရားရှင်က ဖြေထားတဲ့သုတ်တော်လေး။
နတ်သားက ဂါထာလေးတစ်ပုဒ်နဲ့ မေးထားတာကို
ဆရာဘုရားရှင်က ဂါထာလေးတစ်ပုဒ်နဲ့ဖြေထားတာ။

အမေး
ကိံသု ယာဝဇရာ သာဓု
ဘယ်ဟာက အိုသည့်တိုင်အောင် ကောင်းတာပါလဲ?
နတ်သားက ဘုရားရှင်ကို မေးတဲ့ နံပါတ် (၁) မေးခွန်းပါ။

ဘုရားရှင်အဖြေကို မသိခင် ဒီမေးခွန်းရဲ့ အဖြေကို ကိုယ့်ကိုယ်ကို ဖြေကြည့်ရအောင်။
မြန်မာပြည်အိမ်တစ်အိမ်မှာ တရားဟောရင်း ဒီမေးခွန်းကို မေးမိတော့
ဒကာကြီးက
“တပည့်တော်ရဲ့ ဇနီးက အိုသည့်တိုင်အောင် ကောင်းတာပါ” တဲ့။
အဖြေကို သဘောကျလို့ ပြုံးလိုက်မိတယ်။

“သားသမီးတွေကို အမြဲတမ်း အိုသည့်တိုင်အောင် အားမကိုးရဘူး။
အရွယ်ရောက်လာရင် ကိုယ့်အိုးကိုယ့်အိမ်ထူပြီး မိဘတွေထံပါးမှ ခွဲခွါသွားကြတာချည်းပဲ။
ကိုယ့်ဇနီးမယားကသာ အိုသည့်တိုင်အောင် နောက်ဆုံးသေသည့်တိုင်အောင်
ကိုယ်နဲ့ မခွဲမခွါပေါင်းသင်းဆက်ဆံပြီး ဆေးပေးမီးယူ လုပ်ပေးဖော်ရတာ” လို့
ဒကာကြီးက ပြောချင်တာဖြစ်မှာပါ။

အဲ့ဒကာကြီးရဲ့သားကတော့
အိုသည့်တိုင်အောင် ကောင်းတာက ပိုက်ဆံပါတဲ့။
ပိုက်ဆံသာ ကိုယ့်မှာ အမြဲတမ်းရှိနေမယ်ဆိုရင်
အိုသည့်တိုင်အောင် ဘာမဆို လုပ်လို့ရတာဖြစ်လို့
အိုသည့်တိုင်အောင် ကောင်းတဲ့အရာဟာ ပိုက်ဆံလို့ပြောရတာပါ တဲ့။

ဒကာမကြီးကတော့ အိုသည့်တိုင်အောင် ကောင်းတဲ့အရာကို
စိတ်ချမ်းသာမှုလို့ ယူဆပါတယ်တဲ့။
သူပြောတာက ဟုတ်သလိုလိုတော့ ရှိပါတယ်။
ဒါပေမဲ့ ဒါဟာ အကျိုးတရားကြီးပဲ။
စိတ်ချမ်းသာမှုဖြစ်ပေါ်လာအောင် ဘာတွေ လုပ်ရမှာလဲ။
အကြောင်းတရားကို ရှာရအုံးမှာပါ။

ကဲ၊ ဘုရားရှင်ရဲ့ အဖြေကို ကြည့်ရအောင်။
ဘုရားရှင်ရဲ့ အဖြေက
သီလံ ယာဝ ဇရာ သာဓု၊ သီလက အိုသည့်တိုင်အောင် ကောင်းတာပါ တဲ့။

ဘုရားရှင်ရဲ့ ဒီအဖြေကို ဖတ်ပြီး အတော်စဉ်းစားဖြစ်တယ်။
သီလ က ဘာလို့ အိုသည့်တိုင်အောင် ကောင်းတာလဲပေါ့။
တချိန်တည်းမှာပဲ ဗုဒ္ဓဘာသာဝင်တွေသိတဲ့ ငါးပါးသီလကို ရွတ်ဆိုမိတယ်။
သူတပါးအသက်မသတ်နဲ့၊
သူ့ဥစ္စာမခိုးနဲ့၊
သူ့အိမ်ယာ မပြစ်မှားနဲ့၊
လိမ်မပြောနဲ့၊
မေ့လျှော့စေတတ်တဲ့အရက်၊ ဘိန်းစတာတွေကို မသောက်နဲ့၊ မသုံးစွဲနဲ့။
ဒီငါးပါးသီလက အခြေခံ လူ့ကျင့်ဝတ်ဖြစ်တယ်။
လူတိုင်းစောင့်ထိမ်းရမဲ့ သီလဖြစ်တယ်။

ဒီသီလက အိုသည့်တိုင်အောင် ကောင်းတယ် လို့ ဘုရားရှင်မိန့်တယ်။
အခြေခံလူ့ကျင့်ဝတ်ဖြစ်တဲ့ လူတိုင်းစောင့်ထိန်းရမယ့် ဒီသီလကို မစောင့်ထိန်းရင်
အိုသည့်တိုင်အောင် မကောင်းနိုင်ဘူးလို့ ပြောင်းပြန်တွေးမိတယ်။

တချိန်တည်းမှာပဲ ရွာက အရက်သမားဦးသာမောင်ကို သတိရမိတယ်။
အသက်က ၆၀ ကျော်နေပြီဆိုတော့ လူကြီးပိုင်းရောက်နေပြီပေါ့။
လူအိုအရွယ် ဇရာပိုင်းရောက်နေပြီ။ အရက်က သောက်တုန်း။
အကျိုးဆက်အနေအားဖြင့် သူ့ကို ဘယ်သူမှ မလေးစားဘူး။
သာရေး နာရေး ထမင်းစားဝိုင်းတွေမှာလည်း သူဘယ်တော့မှ
လူကြားသူကြား၊ လူတော သူတော မတိုးဘူး။ တိုးပြီး အစားအသောက် မစားရဲဘူး။
သူများတွေပြီးမှ ချောင်ကျကျတနေရာမှာ ခပ်ကုတ်ကုတ် ၀င်စားရတာချည်းပဲ။
သိရတာက ဒီဦးသာမောင်ဆိုတဲ့လူဟာ
ငယ်ငယ်ကတည်းက အရက်သောက်လာတာ။

အင်း၊ ငယ်ငယ်တုန်းကတော့ သူသူကိုယ်ကို အရက်သောက်ကြတာချည်းပါဘဲ။
ဒါပေမဲ့ ဒီအရက်ကို စီးပွါးရေးလောကထဲဝင်တဲ့ အသက်သုံးဆယ်ကျော်အရွယ်တိုင်အောင်
လူမှန်းသူမှန်းမသိတဲ့အဆင့်အထိ နေ့စဉ်သောက်သုံးနေမယ်ဆိုရင်
ဦးသာမောင်လို အသက်ခြောက်ဆယ်အရွယ်အထိ သားမေ့ မယားမေ့
ဘုရားမေ့ တရားမေ့အဆင့်အထိ သောက်သုံးနေမယ်ဆိုရင်
ပတ်ဝန်ကျင် လူ့လောကကြီးနဲ့ အင်ဝင်ဂွင်ကျ ဖြစ်မယ်မထင်ပါဘူး။

အရက်သောက်သုံးပြီး မူးမူးမှောက်မှောက်ဖြစ်နေတဲ့သူဟာ
(ဗုဒ္ဓဘာသာဝင်ဆိုရင်) အိမ်ဘေးက ဓမ္မာရုံမှာ တရားပွဲရှိတောင်
တရားနာ မသွားဝံ့တော့ဘူး။ သွားဝံ့သည် ထား၊
နောက်ဆုံးတန်းမှာ ခပ်ကုတ်ကုတ်နဲ့ နာရတော့မှာ။

လူ့ကျင့်ဝတ်ငါးပါးသီလထဲက နောက်ဆုံးသီလကို ချိုးဖျက်လိုက်တာနဲ့
ရရှိလာတဲ့ ဆိုးကျိုးတွေကို စဉ်းစားမိတာပါ။

ဒါ့ကြောင့် လူ့လောကကြီးမှာ အိုသည့်တိုင်အောင် ကောင်းတာဟာ
ဇနီးမယားလည်း မဟုတ်ဘူး၊ ပိုက်ဆံလည်းမဟုတ်ဘူး။
သီလသာဖြစ်တယ်လို့ ဘုရားရှင် ဖြေကြားခဲ့တာပဲ လို့ ထပ်ဆင့်းနားလည်လိုက်ပါတယ်။

Saturday, October 18, 2014

ကထိန်ပွဲ

 
Kathina Ceremony at Samnak Sambodhi Temple
On 19th Oct 2014 (Sunday)
19, Jalan 38, Desa Jaya, Kepong 52100 Kuala Lumpur.


Programme

8:30am        Procession

9.10am        Guests or Devotees/taking seat in new shrine hall

9.20am        Arrival of Sangha Members and taking seats in new shrine hall

9.30am        Administrating of 5 Precepts by all devotees

9.40am        Karaniya Sutta Chanting By Reverends.

9.50am        English Dhamma Talk by Dr. Ashin Indaka

10. 20am     Robes and Requisites Offering

10. 45am     Transferring of Merit By Ashin Revata

11.00am         Lunch Dana For Sangha

11.00am         Lunch for Guest or Devotees


Sadhu! Sadhu! Sadhu! Thank you.
မလေးရှားနိုင်ငံ၊ ကပုန်းကျောင်း မဟာဘုံကထိန်အခန်းအနား
19/10/2014 တနင်္ဂနွေနေ့
အစီအစဉ်
နံနက် ၈း၃၀        ပဒေသာပင်လှည့်
နံနက် ၉း၁၀        အလှူရှင်များ ဓမ္မာရုံထဲမှာ နေရာယူ
နံနက် ၉း၂၀        သံဃာတော်များ ဓမ္မာရုံအတွင်းသို့ကြွ
နံနက် ၉း၃၀        ငါးပါးသီလ ခံယူဆောက်တည်
နံနက် ၉း၄၀        မေတ္တသုတ်ပရိတ်တရားတော်ရွတ်ဖတ်
နံနက် ၉း၅၀        အနုမောဒနာတရား (အင်္ဂလိပ်)
နံနက် ၁၀း၂၀    ကထိန်လျှာသင်္ကန်းနှင့်လှူဖွယ်ဝတ္ထုများဆက်ကပ်လှူဒါန်း
နံနက် ၁၀း၄၅    ရေစက်သွန်းချ၊ အမျှပေးဝေ
နံနက် ၁၁း၀၀    နေ့ဆွမ်းဆက်ကပ်၊
နံနက် ၁၁း၀၀    အလှူရှင်များ၊ ဧည့်သည်တော်များအား
`            နေ့လည်စာ တည်ခင်းဧည့်ခံ

မွန်းလွဲပိုင်း ၁၂း၃၀ နာရီအချိန်တွင် မြန်မာအလှူရှင်များအား သီလပေး၊
ကထိန်အနုမောဒနာတရားဟော၊ ရေစက်သွန်းချ အမျှပေးဝေပါမည်။


Friday, October 17, 2014

လင်္ကာဝီကျွန်းခရီးစဉ် (၇) အပြန်ခရီး


ပီနန်း၊ မြန်မာဘုန်းတော်ကြီးကျောင်းမှာ တစ်ညအိပ်ပြီး
နောက်နေ့မနက်အစော  ကွာလာလမ်ပူကို ခရီးဆက်ရမှာပါ။
ဒီအတွက် မအိပ်ခင်
“မနက်ဖန်အပြန်ခရီးမှာ နေ့ဆွမ်းဘယ်မှာ ဘုန်းပေးမလဲ”
ဆိုတာနဲ့ပတ်သက်ပြီး ဆွေးနွေးဖြစ်ပါတယ်၊
ခရီးသွားတဲ့အခါ ဆွမ်းရေး ကွမ်းရေးကိစ္စကို ထည့်သွင်းစဉ်းစားရမယ်မို့လား။
ဘုန်းကြီးဆိုတော့ လူတွေလို အားတဲ့အချိန် ကြုံတဲ့နေရာမှာ စားလို့က မဖြစ်ဘူးလေ။
ကွာလာလမ်ပူကနေ ပီနန်းကို အလာတုန်းက ၀င်ခဲ့တဲ့
Ipoh နားက Pandai Remis လို့ ခေါ်တဲ့ တံငှာရွာလေးမှာ ကျောင်းထိုင်နေတဲ့
ခရီးဖော်လည်းဖြစ်တဲ့ ဆရာတော် ဦးမဏ္ဍလ က
အပြန်ခရီးမှာလည်း သူ့ရွာမှာပဲ နေ့ဆွမ်းဘုန်းပေးဘို့ပြောတာကို
အားလုံး သဘောတူလက်ခံလိုက်ပါတယ်။
သဘောတူညီမှုရတော့ ဆရာတော်ဦးမဏ္ဍလက
သူ့ရွာကို ဖုန်းဆက်အကြောင်းကြားပါတယ်။

Pandai Remis က စေတနာရှင်တစ်ဦးက အိမ်ပင့်ပြီး ပရိတ်တရားတော်နာလိုကြောင်း၊
နေ့ဆွမ်းဆက်ကပ်လိုကြောင်း၊
နေ့ဆွမ်းဆက်ကပ်တဲ့အခါ ဆရာတော်များ မစားဘူးတဲ့
ဂဏန်းဘုန်းကြီးဟင်းနဲ့ ကပ်လိုကြောင်း
ဆရာတော်ဦးမဏ္ဍလ က တဆင့်ပြောပြပါတယ်။

ဂဏန်းဘုန်းကြီးဆိုတာ စားဘူးဘို့ မပြောနဲ့ ကြားတောင် မကြားဘူးပါဘူး။
ဆိုတော့ ဂဏန်းဘုန်းကြီးဆိုတာ ဘယ်လိုဟာကြီးလဲ ဆိုတာ အတွေးနယ်ချဲ့နေမိပါတော့တယ်။
မန္တလေးနေတုန်းက ငယ်တုန်းရွယ်တုန်းဆိုတော့ ဥပုသ်နေ့လို စာမသင်ရတဲ့နေ့တွေမှာ
စိတ်ကူးတည့်ရာ (ရည်ရွယ်ချက်မရှိ) ဟိုဟိုဒီဒီ လျှောက်သွားလေ့ရှိတယ်။
တခါတလေ ဘုရားကြီး၊ တခါတလေ ဈေးချို၊
တခါတလေ စစ်ကိုင်းတောင်၊
တခါတလေ မန္တလေးတောင်၊
တခါတလေကျတော့ အမရပူရ (တောင်မြို့) က
မယ်ဇယ်ပင်တန်း၊ တောင်သမန်အင်း၊ ဦးပိန်တံတား။
အဲ့လို ဟိုဟိုဒီဒီလျှောက်သွားနေတဲ့အချိန်တွေတုန်းက
မယ်ဇယ်ပင်တန်းကနေ ဦးပိန်တံတားပေါ်ဖြတ်လျှောက်၊
ဟိုးဘက်အစွန်းရောက်တော့ ခပ်ရွယ်ရွယ် ဒကာမတစ်ယောက်တွေ့တယ်။
အသားမဲမဲ။ ပါးကွက်ကျားနဲ့။
သူ့ရှေ့မှာ ဗန်း၊ ဗန်းထဲမှာ ဂဏန်းကောင်ကျော်ကြီးတွေ၊
ဗန်းဘေးမှာ ထန်းရေအိုး၊ အိုးပေါ်မှာ ဖန်ခွက်၊
ဂဏန်းနဲ့ပတ်သက်လို့
ဦးပိန်တံတားက ဒီအခင်းအကျင်း ဒီမြင်ကွင်းကို ပြန်လည် မြင်ယောင်မိပါတယ်။
အခု
လာပြန်ပြီ ဂဏန်း၊ ဒီဂဏန်းက ရိုးရိုးဂဏန်းမဟုတ်ဘူး။
ဂဏန်းဘုန်းကြီးတဲ့။
ဘယ်လိုဟာကြီးလဲ။
ဂဏန်းဘုန်းကြီးလို့ ဘယ်သူက ဘာကြောင့် ဒီနာမည်ပေးထားတာလဲ။
ဂဏန်းကောင်က လှလို့ ဂဏန်းဘုန်းကြီးလို့ခေါ်တာလား။
ရုပ်ဆိုးလို့ ဂဏန်းဘုန်းကြီးလို့ ခေါ်တာလား။
ဂဏန်းကောင်ကြီးက ဂတုံးပုံစံကြီးမို့လား။
ဒီဂဏန်းဘုန်းကြီးနဲ့ပတ်သက်တဲ့
အတွေးတွေ အမေးတွေက ရင်ထဲမှာ ပြည့်နေတော့
မီးမှိတ် မျက်စိမှိတ် အိပ်တဲ့အထိ အိပ်လို့မပျော်ဘူး။

မနက်မိုးလင်း အရုဏ်ဆွမ်းစားပြီး အပြန်ခရီးကားပေါ်မှာလဲ
ဆရာတော်ဦးမဏ္ဍလ က
ကိုယ်တော်တော့ ဂဏန်းဘုန်းကြီးနဲ့ နေ့ဆွမ်းဘုန်းပေးရမှာနော် လို့ပြောလိုက်သေး။
နေ့ဆွမ်းစားရမဲ့အချိန်နဲ့ အိမ်ကို မြန်မြန်သာ ရောက်ပါတော့လို့ တမ်းတမိတော့တယ်။
မနက် ၁၀ နာရီခွဲလောက်မှာ ဆရာတော်ဦးမဏ္ဍလ သီတင်းသုံးတဲ့ကျောင်းကို ရောက်တယ်။
ရေမိုးချိုးပြီး ဆွမ်းစားရမဲ့အိမ်ကို ကြွကြတယ်။

စားရပါဘီ ဂဏန်းဘုန်းကြီးဟင်း။
ဂဏန်းလို မာတဲ့အခွံတွေရှိပေမဲ့ အတော်အသားပေါတာပဲ။
(အသားပေါလို့ ဂဏန်းဘုန်းကြီးခေါ်တာများလား၊ စားရင်း စဉ်းစားမိသေးတယ်။
ဟုတ်တယ်လေ။ များသောအာဖြင့် ဘုန်းကြီးတွေက ၀ပြီး အသား အခေါက်ကြီးတွေ ထူနေတာပဲ)
ဆွမ်းနည်းနည်း၊ ကြုံတုန်း ဂဏန်းဘုန်းကြီးအသား များများဘုဉ်းပေးပစ်လိုက်တယ်။
ဂဏန်းဘုန်းကြီးအခွံပုံတောင် တော်တော်မို့လာတယ်။ တော်တော်မြင့်လာတယ်။
ဆွမ်းဒကာများကလဲ ဟင်းခွက်ကို အလျော့မခံဘူး။ ထပ်ထည့်ပေးရှာပါတယ်။
သူတို့လေးတွေရဲ့ စေတနာကို ကြည့်ပြီး
စားနေရတာဟာ ဂဏန်းဘုန်းကြီးဟင်းစားရတယ်လို့ မထင်တော့ဘူး။
စေတနာတွေ စားနေရသလိုပဲ။
စေတနာတွေ ၀ါးနေရသလိုပဲ။
ဆွမ်းစားပြီးတော့ ဆွမ်းဒကာလေးက အချိုပွဲကပ်ရင်း
ဆရာတော်တို့ကို ဂဏန်းဘုန်းကြီးမြင်ဘူးအောင် ပြရအုံးမယ်လို့ ဆိုပြီး
ဂဏန်းဘုန်းကြီးအကောင်ကို ပန်းကန်ပြားထဲ ထည့်ယူလာပါတယ်။
သူပြတဲ့ ဂဏန်းဘုန်းကြီးအကောင်ကတော့
ဦးပိန်တံတားမှာတွေ့ခဲ့တဲ့ ဂဏန်းအကောင်လောက်မကြီးဘူး။
ခြေထောက်တွေကလဲ မရှည်ဘူး။
အရွယ်က ဒိုးစိလောက်ပဲ ရှိတယ်။ ၀ိုင်းဝိုင်းလေး။
သူရဲ့အရောင်က အ၀ါရောင်သန်းတယ်။ သင်္ကန်းရောင်ပေါ့။
ဒါ့ကြောင့်ပဲ မလေးရှားပင်လယ်ထဲကတွေ့တဲ့ ဂဏန်းကို
ကိုရွှေဗမာတို့က ဂဏန်းဘုန်းကြီးလို့ နာမည်ပေးထားတာဖြစ်လေမလားလို့ စဉ်းစားမိလိုက်သေးတယ်

နေ့လည်ဆွမ်းဘုန်းပေးပြီး ကျောင်းပြန်၊ ခဏနားပြီး ခရီးဆက်ခဲ့ပါတယ်။
ခရီးဆက်လို့ နာရီဝက်လောက်အကြာမှာ ကားသမား တရုတ်ဒကာကြီးက
လမ်းဘေးမှာ ဗမာစာတမ်းနဲ့ ဆိုင်းဘုတ်တွေ့လိုက်တယ် လို့ပြောပါတယ်။

ကားသမားဒကာက Petaling Jaya, SS 23, မှာ ရှိတဲ့
Chempaka Buddhist Lodge လို့ခေါ်တဲ့
(ချမ်ပက) စမ္ပကကျောင်းမှာ သီတင်းသုံးနေတဲ့
ခရီးဖော်ဆရာတော်ဦးဥတ္တမရဲ့ တပည့်ဒကာပါ။
ဆရာတော်က နီးနီးကပ်ကပ် ဗုဒ္ဓဘာသာစာပေသင်ကြားပေးနေတော့
ဆရာတော်ဖတ်တဲ့ မြန်မာစာအုပ်တွေမြင်ဘူးထားကြီး
 မြန်မာစာလုံးကိုတောင် သူမှတ်မိနေပါပြီ။
ဒါ့ကြောင့် လမ်းဘေးက မြန်မာလိုရေးထားတဲ့ဆိုင်းဘုတ်ကို သူ မြင်လို့
သူ့ကားကို U-Turn ပြန်ကွေ့ပြီး ဆိုင်းဘုတ်ကို ပြပါတယ်။
နိရောဓာရာမ တရားရိပ်သာတဲ့။

ဆိုင်းဘုတ်လမ်းညွှန်အတိုင်းလိုက်သွားတော့ ဦးဇင်းလေး ၁၀ ပါးလောက်ကို တွေ့ပါတယ်။
အင်ဒိုနီးရှားနိုင်ငံက ဖြစ်ကြောင်း၊
နိရောဓာရာမကျောင်း မြန်မာဆရာတော် ဦးနန္ဒသိဒ္ဓိထံမှာ ရဟန်းဖြစ်ကြောင်း
ဦးဇင်းလေးတွေက ပြောပြပါတယ်။

ခဏနေတော့ ဆရာတော် ဦးနန္ဒသိဒ္ဓိရောက်လာပါတယ်။
သူ့ရဲ့ သာသနာပြုလုပ်ငန်းစဉ်တွေကို ပြောပြပြီး
အခု အင်ဒိုနီးရှားနိုင်ငံက ဦးဇင်းလေးတွေကို ၀ိနည်း၊ အဘိဓမ္မာ စတာတွေအပြင်
ပါဠိသဒ္ဒါကိုလဲ သင်ပေးနေကြောင်း ပြောပြပါတယ်။
ဒီလို တကယ့်ကို သာသနာပြုနေတဲ့ဆရာတော်ကို တွေ့ရတော့လည်း
ရင်ထဲ အတိုင်းထက်အလွန် ၀မ်းသာမိပါတယ်။

တိပိဋကယောဆရာတော်က
သာသနာပြုတယ်ဆိုတာ
ဘုရားမရှိသေးတဲ့နေရာမှာ ဘုရားရှိအောင်
တရားမရှိသေးတဲ့နေရာမှာ တရားရှိအောင်
သံဃာမရှိသေးတဲ့နေရာမှာ သံဃာရှိအောင်လုပ်တာကို ခေါ်တာပါ လို့ပြောဘူးတယ်။

ဆရာတော်ဦးနန္ဒသိဒ္ဓိလည်း တိပိဋကယောဆရာတော် ပြောတဲ့ သာသနာပြုနည်းအတိုင်း
သာသနာပြုနေတဲ့ တကယ့်သာသနာ့အာဇာနည်တစ်ပါးပေဘဲ။
ကျောင်းတိုက်တည်ထောင်ပြီးသွားပြီ၊ ဘုရားတည်ပြီးသွားပြီ၊
လောလောဆယ် ဗုဒ္ဓဘာသာတရားစာပေကို သင်ပေးနေပါတယ်၊
ရဟန်းသံဃာတော်တွေ မွေးထုတ်ပေးနေပါတယ်။

ဆရာတော်ဦးနန္ဒသိဒ္ဓိကျောင်းမှာ နာရီဝက်လောက်နေပြီး
ကွာလာလမ်ပူ အပြန်ခရီးဆက်ပါတယ်။
ကားပေါ်မှာ သာသနာပြု လုပ်ငန်း (Missionary Work) ဆိုတဲ့စကားလုံးကို
ဆက်ပြီး စဉ်းစားနေမိပါတယ်။

သာသနာပြုလုပ်ငန်းရဲ့ ပင်မရည်ရွယ်ချက်က (6 Ps) ပီ - ခြောက်လုံးပဲ။
(၁) Plant = ဗုဒ္ဓဘာသာမျိုးစေ့စိုက်ပျိုးဘို့
(၂) Perpetuate = ဆက်လက်ရှင်သန်ဘို့
(၃) Preserve = ထိန်းသိမ်းစောင့်ရှောက်ဘို့
(၄) Prevent =  မပျောက်ပျက်အောင်ကာကွယ်ဘို့
(၅) Propagate = ဗုဒ္ဓဘာသာတရားပြန့်ပွါးဘို့
(၆) Promote = ဗုဒ္ဓဘာသာကို မြှင့်တင်ဘို့
ဒီ (P) ခြောက်လုံးကို ဟန်ချက်ညီညီ မလေးရှားမြေပေါ်မှာ လုပ်ရမဲ့တာဝန်က
ဒို့တာဝန်ပဲလို့ သာသနာပြုလုပ်ငန်း (Missionary Work) ဆိုတာနဲ့ဆက်စပ်ပြီး တွေးရင်း
ကားစီးလိုက်လာတာ ညနေ (၇) နာရီလောက်မှာ ချောမောစွာ
နေရပ်ရင်း သီတင်းသုံးတဲ့ကျောင်းကို ပြန်ရောက်ပါတယ်။

ဒီခရီးစဉ်မှာ ပါဝင်ကြတဲ့ ဘုန်းကြီး ဦးဥတ္တမ၊
သူ့ဒကာ ကားမောင်းကုသိုလ်ယူသူ မစ္စတာလျောင်း၊
ဓမ္မာရုံဆရာတော်ဦးကောသလ္လ၊
တံငှာရွာလေးမှာ (သက်စွန်းဆံဖျား) သာသနာပြုနေတဲ့ ဆရာတော်ဦးမဏ္ဍလတို့နှင့်တကွ
တွေ့ခဲ့ဆုံခဲ့သူ၊ ကျေးဇူးပြုဘူး၊ ယူဘူးသူအားလုံးကို ကျေးဇူးတင်ရှိပါတယ်။

Thursday, October 16, 2014

လင်္ကာဝီကျွန်းခရီးစဉ် (၆)


ဝန်ကြီးချုပ်ဟောင်း ဒေါက်တာမဟာသီယာ့ပြတိုက်ကြည့်ပြီးတော့
သင်္ဘောဆိပ် (Jetty) ကို သွားဘို့အချိန်တန်ပြီဖြစ်ကြောင်း တစ်ယောက်က သတိပေးတယ်။
သင်္ဘောနဲ့ ညနေ ၅ နာရီခွဲမှာမို့လား။
အခုလေးနာရီ ကျော်ကျော်ပဲ ရှိသေးတော့
သင်္ဘောဆိပ်ကို တန်းမသွားပဲ သင်္ဘောဆိပ်နားက စားသောက်ဆိုင်ကို ခဏ၀င်ဖြစ်တယ်။
အဲ့စားသောက်ဆိုင်မှာ ပါကြီးဆိုတဲ့ ဗမာဒကာလေးရှိတယ်။
စားသောက်ဆိုင်တစ်ဆိုင်လုံး သူ့ခြေ သူ့လက်ပါပဲ လို့ လျှောက်တယ်။
အဲ့မှာ နာရီဝက်လောက်နားပြီး သင်္ဘောပေါ်တက်ဖို့ အချိန်ကလဲ စောနေသေးတာနဲ့
သင်္ဘောဆိပ်ဘေးမှာ ရှိတဲ့ သိန်းငှက်ရုပ်တုကြီးနားသွားပြီး ဓာတ်ပုံရိုက်ကြတယ်။
ဒီသိန်းငှက်ရုပ်ကြီးက အတော်အသက်ဝင်တာပါကလား။
တကယ့်သက်ရှိ သိန်းငှက်ကြီးနဲ့ တစ်ပုံစံတည်းပဲ။
သိန်းငှက်ဆိုလို့ အရင်ရေးခဲ့တဲ့အထဲမှာ သိန်းငှက်တွေကို အစာကျွေးတဲ့နေရာကို
လှေသမားက လိုက်ပို့တယ်ဆိုတဲ့အကြောင်း နည်းနည်းရေးခဲးပါတယ်။
 ရှေးရှေးတုန်းက ဒီလင်္ကာဝီကျွန်းမှာ သိန်းငှက်တွေ အတော်ပေါခဲ့ပုံပေါက်တယ်။
အခုလဲ သိန်းငှက်တွေကို တွေ့နေရဆဲပါပဲ။
 လင်္ကာဝီဆိုတဲ့အမည်ကိုက နီညိုရောင်သိန်းငှက် လို့ အဓိပ္ပါယ်ရတယ်။

မလေးရှားစကားမှာ သိန်းငှက်ကို helang လို့ခေါ်တယ်။
Helang ရဲ့ အတိုကောက်က lang ၊ kawi ဆိုတာက နီညိုရောင်။
နှစ်ရပ်ပေါင်းတော့ lang+kawi (လင်္ကာဝီကျွန်း) ကို
နီညိုရောင် သိန်းငှက်တို့ ပျော်စံရာကျွန်းလို့ မြန်မာလို ခေါ်ဆိုနိုင်ပါတယ်။

အခုတော့ သိန်းငှက်တို့တင် ပျော်စံရာကျွန်း မဟုတ်တော့ပါဘူး။
အဖြူကောင်တွေရော၊ အမဲကောင်တွေရော ပျော်နေတာ တွေ့ခဲ့ရပါတယ်။
တရုတ်တွေရော ကုလားတွေပါ ပျော်နေတာ တွေ့ခဲ့ရပါတယ်။
ဘုန်းကြီးဖြစ်တဲ့ ဒို့တတွေတောင် ပျော်ခဲ့ကြသေးတာပဲမို့လား။

သိန်းငှက်ရုပ်တုကြီးရှေ့မှာ ဓာတ်ပုံအသီးသီးရိုက်ပြီးတော့
ပီနန်းထွက်မဲ့သင်္ဘောဆီကို သွားခဲ့ကြပါတယ်။

သင်္ဘောက ၅နာရီခွဲတိတိမှာ ကမ်းက ခွါပါတယ်။
သင်္ဘောကြီး ကမ်းခြေနဲ့ ဝေးကွာသွားသည်နှင့်အမျှ
မျက်စိအမြင်မှာ လင်္ကာဝီကျွန်းဟာ တဖြေးဖြေး မှုန်ဝါးပျောက်ကွယ်သွားပါတော့မယ်။
ဒါပေမဲ့ ပင်လယ်ထဲ ဘုတ်စီးပြီး လည်ပတ်ခဲ့ရတာ၊
cable ကြိုးစီးပြီး တောင်ထိတ်တက်ခဲ့ရတာ၊
ငါးကင်စားခဲ့ရတာတွေဟာ
နှလုံးသားထဲမှာတော့ ပိုပြီးထင်ရှားလာသလိုပဲ။
 မြန်မာစကားမှာ (မမေ့နိုင်ဘူး) ဆိုတာ
ဒီလို နှလုံးသားထဲမှာ စွဲထင်ရစ်တာကို ပြောတာနေမှာလို့လဲ
ဆက်စဉ်းစားမိလိုက်သေးတယ်။

သင်္ဘောပေါ်မှာ နာရီဝက်လောက်ကြာတော့ အပေါ်ထပ် (အမိုးပေါ်) တက်ပြီး
နေ၀င်ခါနီး နေညိုချိန် ပင်လယ်ပြင်တိမ်တောက်တဲ့အလှကို ခံစားဖြစ်ပါတယ်။

ည ၈နာရီခွဲလောက်မှာ ပီနန်း၊ ဆိပ်ကမ်းကို ရောက်တယ်။
ပီနန်းဆရာတော်ကြီးရဲ့ ကျောင်းဖြစ်တဲ့ ဓမ္မိကာရာမမြန်မာဘုန်းတော်ကြီးကျောင်းကို
ည ၉ နာရီလောက်ရောက်ပါတယ်။
ကျောင်းမှာနေနေတဲ့ ဦးဇင်းပညာစာရရဲ့အကူအညီကြောင့်
အတော်ကြီးကို စိတ်ချမ်းချမ်းသာသာ တည်းခိုခဲ့ရပါတယ်။

ရောက်ပြီး နာရီဝက်လောက်ကြာတော့
အဲ့ကျောင်းမှာနေနေတဲ့ နောက်ဦးဇင်းတစ်ပါးဖြစ်တဲ့ ဦးဝိစိတ္တ ရောက်လာပါတယ်။
သူက ကထိန်ပင့်စာနဲ့ စာအုပ်လေးတစ်အုပ် လက်ဆောင်လာပေးတာ။
ကထိန်ပင့်စာထက် စာအုပ်ကို စိတ်ဝင်စားလို့ စာအုပ်ကို အရင်ကြည့်ဖြစ်တယ်။

စာအုပ်နာမည်က
The Ancient Buddhist Monuments In 22 Countries တဲ့။
စာအုပ်ထဲမှာ စာအုပ်နာမည်နဲ့အညီ
အိန္ဒိယ၊ သီရိလင်္ကာ၊ ပါကစ္စတန်၊ ဘင်္ဂလားဒေ့ရှ်၊ အာဖဂန်နစ္စတန်၊
နီပေါ၊ ဘူတန်၊ တိဘက်၊ မြန်မာ စတဲ့ ဗုဒ္ဓဘာသာထွန်းကားခဲ့တဲ့ (ထွန်းကားဆဲဖြစ်တဲ့)
နိုင်ငံပေါင်း ၂၂ နိုင်ငံက ထင်ရှားတဲ့ ရှေးဟောင်းဖြစ်တဲ့ သမိုင်းဝင်တဲ့
နေရာဒေသတွေကို ရုပ်ပုံပန်းချီကားချပ်တွေနဲ့ ဖော်ပြထားတာတွေ့ရတယ်။
ဒီနိုင်ငံပေါင်း ၂၂ နိုင်ငံက ဗုဒ္ဓဘာသာနဲ့သက်ဆိုင်တဲ့ သမိုင်းဝင်ရုပ်ပုံကားချပ်တွေကို
တစ်နေရာတည်းမှာ တစ်စုတစ်ဝေးတည်း ကြည့်လို့ရအောင်
လေ့လာလို့ရအောင် ဖူးမျှော်လို့ရအောင်ဆိုပြီး
ပီနန်းဆရာတော်ကြီးဦးဆောင်ကာ
ပီနန်း၊ မြန်မာဗုဒ္ဓဘာသာကျောင်းတော်ကြီးအတွင်းမှာ
Golden Pagoda Bell Tower ဆိုတဲ့အမည်နဲ့
အင်မတန်ခန်းနားထည်ဝါတဲ့ အဆောက်အဦကြီးအကြောင်းရေးထားတဲ့စာအုပ်ပါ။
အဆောက်အဦကြီးက အမြင့် ၁၀၈ ပေရှိပြီး သုံးထပ်၊ ဘုံလေးဆင့်ရှိပါတယ်။
အဲ့ဒီအဆောက်အဦကြီးထဲမှာ
နိုင်ငံပေါင်း ၂၂ နိုင်ငံမှာရှိတဲ့ ဗုဒ္ဓဘာသာနဲ့ဆက်စပ်တဲ့
အထင်ကရ သမိုင်းဝင်နေရာတွေကို လေ့လာနိုင်ပါတယ်။
ဒါ့ကြောင့် ဗုဒ္ဓဘာသာသမိုင်းဝင်နေရာတွေကို တစ်နေရာတည်းမှာ စုပေါင်းထားရှိထားလို့
လေ့လာလိုသူ သုတေသီတို့အတွက်
ငွေလဲ အကုန်သက်သာ၊ အချိန်လဲ အကုန်သက်သာသွားပြီပေါ့။
ဒီအတွက် ပီနန်းဆရာတော်ကြီးနှင့်တကွ သူ့တပည့်ဦးဇင်းများ၊
သူ့ဒကာ၊ ဒကာမများကို ကျေးဇူးတင်ရမှာပါ။

Wednesday, October 15, 2014

လင်္ကာဝီကျွန်းခရီးစဉ် (၅)


ကားဆရာဒကာလေးလိုက်ပို့လို့ ၃ နာရီခွဲလောက်မှာ
ဒေါက်တာမဟာသီယာပြတိုက်ကို ရောက်ပါတယ်။
 ဒေါက်တာမဟာသီယာဆိုတာ မလေးရှားကို
ကမ္ဘာကိုသိအောင် လုပ်ပေးတဲ့ပုဂ္ဂိုလ်လို့ ပြောရင်မှားမယ်မထင်ဘူး။

ဒေါက်တာမဟာသီယာရဲ့ နာမည် အပြည့်အစုံက
Mahathir bin Mohamad ဖြစ်တယ်။
၁၉၂၅ - ခုနစ် ဇူလိုင် ၁၀ ရက်မှာ မွေးတယ်။
အခုသက်ရှိထင်ရှားရှိသေးတယ်။
(လောလောယ်ဆယ် သြစတေးလျနိုင်ငံမှာ ဆေးကုသမှု ခံယူနေပါတယ်။)
သူ့အရင် ၀န်ကြီးချုပ် (၃) ယောက်ရှိခဲ့တယ်။
(1) Tunku Abdul Rahman
(2)  Tun Abdul Razak
(3) Hussein Onn
သူဟာ မလေးရှားနိုင်ငံရဲ့ လေးယောက်မြောက်ဝန်ကြီးချုပ်ဖြစ်တယ်။

၁၉၈၁ - ခုနစ်က ၀န်ကြီးချုပ်စဖြစ်လာပြီး
၂၀၀၃ -ခုနစ်အထိ ၀န်ကြီးချုပ်တာဝန်ကို ထမ်းဆောင်ခဲ့လို့
အာရှမှာ အကြာဆုံးဝန်ကြီးချုပ်တာဝန်ထမ်းဆောင်ခဲ့တဲ့သူတွေထဲမှာ
တစ်ယောက်အပါအ၀င်ဖြစ်ခဲ့တယ်။

သူ ဒီလို နှစ်ပေါင်း ၂၂ နှစ်ကြာ ၀န်ကြီးချုပ်ရာထူးကို ထမ်းဆောင်တာဟာ
ရာထူးကို မက်မောလို့ မဟုတ်ပါဘူး။
အာဏာကို မက်မောလို့ မဟုတ်ပါဘူး။
ပြည်သူတွေက ခခယယတောင်းပန်ပြီး ၀န်ကြီးချုပ်လုပ်ခိုင်းလို့
ဝန်ကြီးချုပ်ရာထူးနဲ့ နိုင်ငံတာဝန်ကို ထမ်းဆောင်ခဲ့ရတာပါ။
၂၀၀၃ - ခုနစ် သူရာထူက နှုတ်ထွက်တော့လဲ
 ပြည်သူအများစုက ၀ိုင်းဝန်းတောင်းပန်ပြီး တားကြပါသေးတယ်။
တော်တဲ့ဝန်ကြီးချုပ်ဆိုတော့လဲ ဆင်းသွားမှာတောင် ကြောက်နေရတယ်။
နိုင်ငံကို အလုပ်အကျွေးပြုလုပ်ချင်သေးပေမဲ့ ဇရာက ခွင့်မပြုတော့လို့
အနားယူပါရစေတော့လို့ သူက  ပြည်သူတွေကို ခခယယ ပြန်တောင်းပန်ပြီး
ဝန်ကြီးချုပ်ရာထူးက နှုတ်ထွက်အနားယူသွားပါတယ်။
(မသေမချင်း ၀န်ကြီးချုပ်လုပ်ဖို့ အခွင့်အရေးရပေမဲ့ သူ မယူပါဘူး)
ဒို့လူတွေနဲ့တော့ အတော်ကွာပါတယ်။
ကွာခြားပုံနဲ့ ဆက်စပ်လို့ စလေဦးပုည ကဗျာကို သတိရမိတယ်။

စလေဦးပုညဆိုတာ ရေသည်ပြဇာတ်၊ ဒေါနဆီမေတ္တာစာ စတာတွေ ရေးခဲ့တဲ့သူ။
စာအရေးအသားကောင်းလွန်းလို့
စလေဦးပုညကို မင်းတုန်းမင်းကြီးက အတော် အလေးပေး မြှောက်စားတယ်။
တစ်နှစ်ကို ထောက်ပံ့ငွေ ခြောက်ရာလဲ ရသေးတယ်။
ဒါပေမဲ့ ကံအားလျှော်စွာ စလေဦးပုညရဲ့ လက်တစ်ဖက်က သေး(သိမ်) နေတယ်တဲ့။

ဒီအားနည်းချက်ကို အခွင့်ကောင်းယူကာ
ပြိုင်ဘက်ဖြစ်တဲ့ မနာလိုဝန်တိုစိတ်ဖြစ်ပြီး အစာမကြေဖြစ်နေတဲ့
အချုပ်တမ်း ဆရာဖေဆိုတဲ့သူက
ကဗျာစီ မောင်ပုညကိုတော့
ဆောင်ဂုဏ်ပြ ထုတ်လျှင်
တောင်ချုံက ပုတ်သင်လို
ကုတ်ကုတ်သင်လက်သေး။
မင်းမြှောက်လို့ သင်းလောက်ကျော်သည်
ထွင်းဖောက်နော် ဥာဏ်မျိုးနှင့်ဝေး လို့
ကဗျာရေးစပ် သရော်ပါလေရော။

ဦးပုညကို ဒီလို လုပ်တော့ ဘယ်ခံမလဲ။
ဦးပုည တစ်ပုညပဲ ရှိတယ်၊ ဘာမှတ်တုန်းဆိုပြီး
အချုပ်တမ်းဆရာဖေကို ကဗျာနဲ့  ပြန်ပက်တယ်။

ဂျပ်ကောင်လို ပန်းကြားက
သန်းစကားဆိုခါ
ရမ်းကားလို့ တုလာလျှင်
ဥပမာဆိုစို့။
ချေးပုံနှင့် မြင်းမိုရ်တောင်
ခင်းဆိုယောင် နှိုင်းလိုက်ပါဗျို့။
သေးကွက်နှင့် ပင်လယ်
နင်တကယ်ထင်လို့
သဘင်ဝယ် ယှဉ်မတို့လေနှင့်
သခင်တို့ဦးချီ။
အိုးမှုတ်လို အနေစားတွေက
ရွှေဖလား မနှိုင်းသင့်ပါပြီ။
ဥတုနှင့် ပုစွန်ဆီ
ဒွန်ပြီပြီ ယှဉ်တွဲလို့
စပ်ဖဲ အတွင်းခံ။
ရိုင်းလိုက်တဲ့ ဥာဏ်။
မိုးကြိုးနဲ့ အီးသံလို
ခရီးမှန် ကွာလှမ်းလို့လေး တဲ့။
ကွာပါတယ်နော်။ တခြားစီပါ။

ဒေါက်တာမဟာသီယာ ၀န်ကြီးချုပ်မဖြစ်ခင်တုန်းက မလေးရှားလူမျိုးတွေ
သားစိမ်းငါးစိမ်း စားရတဲ့ဘ၀မှာပဲ ရှိသေးတယ်။
သူဝန်ကြီးချုပ်ဖြစ်လာတော့ မလေးရှားနိုင်ငံ ပြောင်းလဲလာလိုက်တာ။
နေ့ချင်း ညချင်းပဲ။

သူ့ကြောင့် မလေးရှားနိုင်ငံဟာ အာရှကျားတစ်ကောင်ဖြစ်လာရတယ်။
သူ့ကြောင့် မလေးရှားနိုင်ငံကို ကမ္ဘာက တလေးတစား ဆက်ဆံလာကြတယ်။
ကမ္ဘာက မလေးရှားနိုင်ငံကို တလေးတစားဆက်ဆံလာကြတယ်လို့ဆိုတာထက်
ကမ္ဘာက သူ့ကို တလေးတစားဆက်ဆံလာတယ်လို့ ပြောရင် ပိုမှန်မယ်။
ဒီစကားကို ဒီဒေါက်တာမဟာသီယာပြတိုက်က ထောက်ခံနေတယ်။


ဒီပြတိုက်ထဲမှာ နိုင်ငံအသီးသီးက နိုင်ငံ့ခေါင်းဆောင်ကြီးတွေက
ဒေါက်တာမဟာသီယာနဲ့ သူ့ဇနီးကို ပေးထားတဲ့
လက်ဆောင်ပစ္စည်းတွေကို ခင်းကျင်းပြသထားတာပါ။
နည်းတာမဟုတ်ဘူး။
နိုင်ငံတကာက ပေးထားတဲ့လက်ဆောင်ပစ္စည်းအမျိုးအစားပေါင်း
 ၉၀၀၀ ကျော်ရှိတယ်လို့ဆိုတယ်။
တစ်ခါတစ်ခါခင်းကျင်းပြသရင် ၂၀၀၀ လောက်ပဲ ပြသနိုင်တယ်တဲ့။
မတူကွဲပြားတဲ့ လက်ဆောင်ပစ္စည်းတွေကို အလှည့်နဲ့ ခွဲပြီး ပြသရသတဲ့။
ဒါ့ကြောင့် အဲ့ပြတိုက်ကို အနည်းဆုံး ၄ ကြိမ်လောက်ရောက်ဖူးမှသာ ဒေါက်တာမဟာသီယာတို့ဇနီးမောင်နှံကို ပေးထားတဲ့
လက်ဆောင်ပစ္စည်းတွေ အကုန်လုံးမြင်တွေ့နိုင်ကြောင်း သိရပါတယ်။
မြန်မာပြည်က ပေးထားတဲ့ ကျောက်မှုန့်လေးတွေနဲ့လုပ်ထားတဲ့
ဒေါက်တာမဟာသီယာတို့ ဇနီးမောင်နှံပုံတူလေးကိုလဲ မှတ်မှတ်ရရ တွေ့ခဲ့ရတယ်။

ဒီပြတိုက် တည်ဆောက်ထားပုံ အတော်ခန်းနားပါတယ်။ ၂ ထပ်တိုက်။
အကန့် သုံးကန့် ကန့်ထားပါတယ်။
Block (A), Block (B), Block (C) ဆိုပြီး Block သုံးခုပေါ့။

Block (A) မှာ
ဒေါက်တာမဟာသီယာကို လက်ဆောင်ပေးထားတဲ့
သစ်သားရုပ်တု၊ ယွန်းထည်ပစ္စည်း၊ ဖန်သား (မှန်သား) တွေနဲ့ လုပ်ထားတဲ့ အရုပ်မျိုးစုံအပြင်
ရတနာပစ္စည်းများ။ ဂီတအနုပညာပစ္စည်းများကို တွေ့ရတယ်။
သူရရှိခဲ့တဲ့ဘွဲ့လက်မှတ်၊ ဂုဏ်ပြုလက်မှတ်တို့ကိုလဲ တစ်နေရာမှာ
သီးသန့် စနစ်တကျ ပြသထားတာကိုလဲ သတိပြုမိခဲ့တယ်။
ဒေါက်တာမဟာသီယာက မွတ်စလင်ဆိုတော့ အစ္စလာမ်ဘာသာနဲ့ သက်ဆိုင်တဲ့ လက်ဆောင်ပစ္စည်းတွေကိုလည်း ဒီ Block A မှာ တွေ့ရပါတယ်။

Block B မှာ
ဒေါက်တာမဟာသီယာရဲ့ ဇနီး Dr. Siti Hasmah လက်ခံရရှိထားတဲ့
အ၀တ်အထည်တွေအပြင် ငွေထည်၊ ကြေးထည့်ပစ္စည်းအမြောက်အများကို တွေ့ရပါတယ်။

Block C မှာတော့
သူ့ကို လက်ဆောင်ပေးထားတဲ့ ပန်းချီးကားချပ်တွေ၊ ရတနာပစ္စည်းတွေကို တွေ့ရမှာဖြစ်ပြီး
သူအငယ်တုန်းက အသုံးပြုခဲ့တဲ့ မော်တော်ဆိုင်ကယ်၊ ကားအမျိုးမျိုးအပြင်
ပါကစ္စတန်နိုင်ငံက လက်ဆောင်ပေးထားတဲ့
အနုပညာဆန်တဲ့ (လန်ချားလို) လှည်းကိုလဲ တွေ့ခဲ့ရပါတယ်။

ခြုံပြီးကြည့်လိုက်ရင် ဒေါက်တာ မဟာသီယာကြီးဟာ
သူရရှိခဲ့တဲ့လက်ဆောင်ပစ္စည်းတွေကို
သူမြတ်နိုးတွယ်တာမယ်ဆိုတာ ယုံမှားသံသယရှိဖွယ် မလိုပါဘူး။

ဒီလို သူမြတ်နိုးတဲ့ပစ္စည်းတွေကို
သူကိုယ်တိုင် တမြတ်တနိုး တရိုတသေထိမ်းသိမ်းထားပြီး
သူသက်ရှိထင်ရှားရှိစဉ်မှာပဲ
ပြတိုက်ဆောက်ပြီး ခင်းကျင်းပြသတာဟာ
အဓိပ္ပါယ်အများကြီးရှိမှာပါ။

နောင်မျိုးဆက်သစ်တွေ အတုယူ အားကျအောင်၊
မျိုးချစ်စိတ်ရှိအောင် ပြသတာလဲ ဖြစ်မှာပေါ့။

နိုင်ငံက ထွက်ရှိတဲ့ သယံဇာတ အရင်းအမြစ်တွေကို
နိုင်ငံအတွက်သာ အသုံးပြုရမယ်၊ ကိုယ်ကျိုးအတွက် အသုံးပြုလို့ကတော့
ဒီလိုလက်ဆောင်ပစ္စည်း လုံးဝ (လုံးဝ) မရနိုင်ဘူးလို့ ပြောချင်တာလား။

ငါ့နိုင်ငံသည် ငါ့အတွက် မဖြစ်စေပဲ
ငါသည် ငါ့နိုင်ငံအတွက်ဖြစ်စေရမယ်ဆိုတဲ့ စိတ်ဓာတ်နဲ့လုပ်မှသာ
ဒီလို လက်ဆောင်ပစ္စည်းတွေ ရနိုင်တယ်လို့ ပြောချင်တာလား။

သူသက်ရှိထင်ရှားရှိစဉ်မှာပဲ
ပြတိုက်ဆောက်ပြီး သူ့လက်ဆောင်ပစ္စည်းတွေကို ခင်းကျင်းပြသတာဟာ
ဒီထက်မကတဲ့ အဓိပ္ပါယ်တွေ ရှိအုံးမှာပါ။

Tuesday, October 14, 2014

လင်္ကာဝီကျွန်းခရီးစဉ် (၄)


လင်္ကာဝီကျွန်းတခွင် တစ်နေကုန် လျှောက်လည်ပြီး
ပင်ပင်ပန်းပန်းနဲ့ ဟိုတယ်ပြန်အိပ်လိုက်တာ
မနက် ၈ နာရီခွဲလောက်မှ နိုးတယ်။
ရေမိုးချိုးပြီး ရှိတဲ့ကော်ဖီလေးတွေဖျော်၊ မုန့်လေးတွေကို စားရင်း
ကားဆရာဒကာလေး လာအခေါ် စောင့်နေရတယ်။
မောင်မင်းကြီးသား ကားဆရာဒကာလေးက ၁၀ နာရီခွဲလောက်မှ ရောက်လာတယ်။

ဒီနေ့သွားမည့်နေရာမှာ စားသောက်ဆိုင် သိပ်အဆင်မပြေလို့
ဆွမ်းစောစောစားပြီးမှ ဆက်သွားဘို့ ကားဆရာ ဒကာလေးက လျှောက်ပါတယ်။
နံနက် ၁၀ နာရီခွဲအချိန်ဆိုတော့ နေ့ဆွမ်းစားဘို့ စောနေသေးလို့
ကားဆရာဒကာလေးလျှောက်တာကို
ဆရာတော်တွေ ဘာမှပြန်မပြောပဲ
အင်းမလုပ်၊ အဲမလုပ်။ ဆိပ်ဆိပ်ငြိမ်နေကြတယ်။
“အရှင်ဘုရားတို့ လင်္ကာဝီရောက်တုန်း
လင်္ကာဝီငါးကင်လေးလည်း ဘုန်းပေးသွားရအောင်
ငါးကင်ကောင်းတဲ့ဆိုင်ကို ပို့ပေးမယ်” လို့ ဆက်လျှောက်ပါတယ်။
ဆွမ်းစားဘို့ စောနေသေးလို့ စိတ်မပါပဲဖြစ်နေတဲ့ဆရာတော်တွေ
ငါးကင်သံကြားတော့ အလိုလို ခေါင်းထောင်လာပါတယ်။
ဆရာတော်တစ်ပါးကဆို ငါးကင်ဆိုလုပ်ပါဟ လို့တောင် အော်ပြောလိုက်မိသေးတယ်။
 အော်၊ လျှာကို အမှီပြုပြီး တောင့်တ တတ်မက်တဲ့ရသတဏှာ မလွယ်ပါလား။

ဒါနဲ့စပ်လို့ ငါးခုံဆရာတော်ကြီးကိုတောင် သတိရမိလိုက်သေးတယ်။
မင်းကွန်းမှာနေတဲ့ဆရာတော်ကို မင်းကွန်းဆရာတော်၊
မကွေးမှာနေတဲ့ဆရာတော်ကို မကွေးဆရာတော်
လယ်တီကျောင်းတိုက်မှာနေတဲ့ဆရာတော်ကို
လယ်တီဆရာတော်လို့ ခေါ်သလိုပါပဲ။
ငါးခုံရွာသား ဆရာတော်ကို ငါးခုံဆရာတော်လို့ ခေါ်ကြပါတယ်။
ငါးခုံကို ငခုံ လို့ အသံထွက်ကြတယ်။

ဒီငါးခုံဆရာတော်ဆိုတာ စာအလွန်တတ်တာ။
စာတတ်ငါးခုံ၊ စာစုံ မကျည်းတော ဆိုလား အဆိုတောင်ရှိသေး။
ဗုဒ္ဓ၀င် ဗုဒ္ဓဖြစ်တော်စဉ်ကျမ်းစာအုပ်ကိုလည်း
ဒီငါးခုံဆရာတော်ကြီးက အစောဆုံး အစဦးဆုံး ရေးသွားတာ။
စာတတ်တဲ့ငါးခုံဆရာတော်ကြီးကို အခြားသော ဆရာတော်တစ်ပါးက
(မနာလိုစိတ်လေးတွေ အရင်းခံပြီး)
“ငါးခုံတို့၊ စာတတ်တယ် တတ်တယ်နဲ့၊
ပိဋကတ်သုံးပုံထဲက လွတ်အောင်တော့ တရား မဟောတတ်ပါဘူးကွာ” လို့
မကြာမကြာ မကြားတကြားပြောလေ့ရှိသတဲ့။

တစ်နေ့ ငါးခုံဆရာတော်နဲ့
အဲ့ဒီဆရာတော်တို့ အိမ်တစ်အိမ်မှာ ဆွမ်းစားဆုံကြသတဲ့။
ဆွမ်းဒကာက ငါးခုံဆရာတော်ကို တရားချီးမြှင့်ပေးဘို့လျှောက်ထားတော့
ငါးခုံဆရာတော်က ဟောပေးပါမယ် ပြောပြီး
“ပိဋကတ်ထဲက အလွတ်ဖြစ်အောင် ဟောမယ်” လို့ ကြံရွယ်ကာ
ငါးပါးသီလကိုလည်း ဆိုပြီးရော၊
ငါးခုံဆရာတော်က ဆွမ်းဒကာကို မေးပါတယ်။
“ဒကာကြီး၊ နိဗ္ဗာန်ကို လိုချင်သလား”
“မှန်လှပါ။ လိုချင်ပါတယ်ဘုရား”
“အိမ်း၊ နိဗ္ဗာန်လိုချင်ရင် ဒကာကြီးမှာရှိတဲ့ အရိုးမရှိတဲ့ အရာနှစ်ခုကို အလိုမလိုက်နဲ့၊
အရိုးမရှိတဲ့အရာနှစ်ခုသည်
အထက်မှာ တစ်ခု၊ အောက်မှာ တစ်ခု ရှိသတည်း” ဆိုပြီး
တရားကို အဆုံးသတ်သွားသတဲ့။
 ပိဋကတ်သုံးပုံထဲမှာ မပါတဲ့တရားကို ငါးခုံဆရာတော်တို့ ဟောသွားတာပါ၊

အရိုးမပါတဲ့အရာနှစ်ခုကတော့ အားလုံးသိပြီးသားပါ။
အထက်မှာ အရိုးမပါတာ တစ်ခုဆိုတာက လျှာ။
ဒီလျှာကို အလိုလိုက်နေသ၍ နိဗ္ဗာန်နဲ့ဝေးနေကြအုံးမှာပဲ။
အစားအသောက်ကောင်းတာဆို အလွန်ကြိုက်တတ်တဲ့
တနည်းအားဖြင့် ငါးကင်လိုအစားအစာမျိုးဆို ခေါင်းထောင်လာကြတဲ့
ဒို့တတွေ နိဗ္ဗာန်နဲ့တော့ နီးလျက်နဲ့ဝေး ၃ နဲ့ ၄ ပမာ ဝေးကွာနေအုံးမှာပါလားလို့
ဆင်ခြင်အတွေးလေးက လျှပ်တပျက် ၀င်လာတာပါ။


ရောက်ပါဘီ ငါးကင်ဆိုင်၊ မလေးရှား မွတ်စလင်ဆိုင်၊
တောဓလေ့ တောအပြင်အဆင်လေးနဲ့။
ဆရာတော်တစ်ပါးက ငါးကင်ကို ကဗျာဆန်ဆန်စားရအောင်ဆိုပြီး
ဆိုင်ခြံထဲမှာရှိတဲ့ ၀ါးတဲလေးထဲကို ဦးဆောင်ခေါ်သွားပါတယ်။
ငါးကင်ကို ငရုတ်သီးစပ်စပ် မလေးရှားငပိဖုတ်သုတ်နဲ့ တို့စားရတာ။
အတော်ကောင်းသားပဲ။
ကဲလေ၊ နိဗ္ဗာန်နဲ့ဝေးကာမှ ဝေးရော၊
ကြုံတုန်း လွေးလိုက်အုံးမဟဲ့ဆိုပြီး ဘုန်းပေးလိုက်တာ
ငါးကင်ခပ်ကြီးကြီး သုံးကောင်လောက် ကုန်သွားတယ်။

ငါးကင်ဘုဉ်းပေးခြင်းကိစ္စပြီးတော့ ကားဆရာ ဒကာလေးက
ပထမဦးဆုံး (Crocodile Show) မိကျောင်းပြပွဲကို ခေါ်သွားတယ်။
မိကျောင်းပြပွဲဆိုတာ မိကျောင်းနဲ့ လူတရင်းတနှီး နေပြတာကို ပြောတာပါ။
မိကျောင်းပြပွဲကြည့်ရတာ် သဲထိပ်ရင်ဖိုပါပဲ။
မိကျောင်းပေါ်ကို လူ တက်ပြတယ်၊ လမ်းလျှောက်ပြတယ်၊
တင်ပလ္လင်ခွေထိုင်ပြတယ်။ အိပ်ပြတယ်။
မိကျောင်းပေါ်မှာ တစောင်းလေးအိပ်ပြီး လက်တစ်ဖက်က မေးထောက်ကာ
ကျန်လက်တစ်ဖက်က ကြည့်ရှုနေတဲ့ပရိသတ်ကို ဝှေ့ယမ်းနှုတ်ဆက်ပြတယ်၊
နောက်ဆုံး လူတစ်ယောက်က ဟနေတဲ့မိကျောင်းပါးစပ်ထဲကို လက်နှိုက်ပြတယ်။

မိကျောင်းပြပွဲကြည့်ပြီးတော့ မွန်းလွဲ ၂ နာရီလောက်ရှိသွားပြီ။
Cable ကြိုးနဲ့ တောင်ပေါ်တက်ရမဲ့နေရာကို ကားဆရာလေးက ခေါ်သွားတယ်။
တက်ရမဲ့တောင်အမြင့်က မီတာ ၇၀၅ မီတာလောက်မြင့်တယ်။
Cable ကြိုးကို ချိတ်ထားတဲ့ မှန်လုံခန်းမှာ လူခြောက်ယောက်လောက် စီးသွားရတာ။
တက်လိုက်သွားရုံပါပဲ။
စီးတက်သွားရင်း သွားရင်း ကြာလေ မြင့်လေ ဖြစ်လာတာ။
စိတ်အားငယ်တတ်တဲ့သူဆို အောက်တောင် မကြည့်ရဲလောက်ဘူး။
အမြင့်ကြီးဆိုတော့ အတော်ရင်ခုန်စရာကောင်းတာ။

ရင်ခုန်ဆိုတဲ့ စကားနဲ့ဆက်စပ်လို့
မန္တလေး၊ သာသနာ့တက္ကသိုလ်တက်တုန်းက ကထိကဆရာတော်တစ်ပါးဖြစ်တဲ့
ပျံလွန်တော်မူသွားပြီဖြစ်တဲ့ ဦးခေမိက ကြီးကို သတိရမိသေးတယ်။
တစ်နေ့
သူက စာသင်သားဦးဇင်းတွေ စာမေးပွဲဖြေခါနီးတော့
မင်းတို့တတွေ၊ စာမေးပွဲဖြေရင် ရင်ခုန်လားလို့ မေးတယ်။
အေး၊ ရင်ခုန်တယ်ဆိုရင် မင်းတို့တတွေ ချစ်သူရည်းစားနဲ့ တွေ့နေရတယ်လို့မှတ်၊
ချစ်သူရည်းစားနဲ့တွေ့ရရင်လဲ ဒီလိုရင်ခုန်တာပဲ လို့ သူက ပြောပြဘူးပါတယ်။
ဟုတ်မဟုတ်တော့ မသိပါဘူး။ သူလဲ ဘယ်စာအုပ်ဖတ် ပြောတယ်မသိပါဘူး
ဒီကထိကဆရာတော် ဒီ Cable စီးပြီး တောင်ပေါ်တက်ဖူးသွားရင်
ရင်ခုန်ဘူးသွားမှာ အသေအချာပါပဲ။
သူ ဒီ Cable စီးပြီး ရင်ခုန်ဘူးသွားရင်
ဘယ်လိုများပြောဦးမယ်မသိဘူး။
Cable လမ်းခရီးတစ်ဝက်မှာ တောင်တစ်လုံးကို ရောက်တယ်။
ခဏနား ဟိုကြည့် ဒီကြည့်လုပ်ပြီး
ဒီထက်မြင့်တဲ့ နောက်တစ်တောင်အတွက် ခရီဆက်ဖို့
Cable ထပ်စီးရပြန်တယ်။

တောင်တွေပေါ်မှာတော့ ထူးထူးခြားခြား ဘာမှ မရှိပါဘူး။
အအေးဆိုင်၊ သောက်ရေသန့်ဗူးအရောင်းဆိုင်နဲ့
အသေးအဖွဲ စားဖွယ် သောက်ဖွယ်ရောင်းတာလောက်ပဲ ရှိတယ်။
အောက်ရှုခင်းတွေကို တောင်ထိပ်ကနေ ကြည့်ဘို့
Cable တွေ တပ်ဆင်ထားတဲ့သဘောလောက်ပါပဲ။
ငွေအများကြီးပေးပြီှး ကေဘယ်လ်ကြိုးစီးကာ တောင်ထိပ်ပေါ်ကို တက်ကြရတာပါ။
ဒီလိုမျိုး ကြံကြံဖန်ဖန် ငွေရှာတတ်တဲ့ မလေးရှားအစိုးရကို ချီးကျူးမိပြန်တယ်။

တချိန်တည်းမှာပဲ
မြန်မာပြည်က ကျိုက်ထီးရိုးတောင်ကို သတိရမိတယ်။
လူအတက်များတဲ့ မြန်မာပြည်က ကျိုက်ထီးရိုးတောင်မှာလည်း
ဒီလို Cable ကြိုးတွေ တတ်ဆင်ပေးထားရင် ကောင်းမှာ လို့ တွေးမိပြန်တယ်။
ဟယ်၊ မဖြစ်သေးပါဘူး။ မြန်မာပြည်မှာက ၂၄ နာရီ(တစ်ရက်) မှာ
လျှပ်စစ်မီးက ၈ နာရီလောက် လာတာ။
မတော်၊ Cable ကြိုးနဲ့ တောင်ပေါ်တက်နေတုန်း လမ်းတစ်ဝက်မှာ
မီးပျက်သွားမှဖြင့် ဒုက္ခလို့  ပြန်စဉ်းစားမိရင်း
အတွေးစကို ကိုယ့်ဟာကို ပြန်လည်ရုတ်သိမ်းလိုက်ပါတယ်။

Cable ကြိုးနဲ့ တောင်ပေါ်ကဆင်းပြီး လက်ဆောင်ရောင်းတဲ့ဆိုင်တန်းလေးတွေးကိုဖြတ်ကာ
ကားဆရာဒကာလေးထံသွားပြီး ခရီးဆက်ဖို့ပြောရပါတယ်။
သဲမဲတွေရှိတဲ့ သဲမဲကျွန်း၊ သဲဖြူတွေရှိတဲ့ သဲဖြူကျွန်းစသဖြင့်
နေရာတော်တော်များများ လိုက်ပို့ပြီး
မလေးရှားနိုင်ငံမှာ နှစ်ပေါင်း ၂၀ ကျော် ၀န်ကြီးချုပ်လုပ်သွားခဲ့ဘူးတဲ့
ဒေါက်တာ မဟာသီယာရဲ့ ပြတိုက်ကို ရောက်လာပါတယ်။

Monday, October 13, 2014

လင်္ကာဝီကျွန်းခရီးစဉ် (၃)


ပင်လယ်ထဲက ဟိုကျွန်း ဒီကျွန်း ဟိုနေရာ ဒီနေရာတွေကို လည်ပတ်ပြီး
တည်းခိုမည့် ဟိုတယ်ကို သွားကြပါတယ်။
အစောက ပြောခဲ့တဲ့ ဒကာလေး မောင်ဇေယျာကျော်ဝင်း ကားနဲ့ပါပဲ။
လှေဆိပ်နဲ့ ဟိုတယ် အချိန်တော်တော်ကြာ မောင်းရတော့
ကားသမားလေးနဲ့ စကားပြောဖြစ်တယ်။
စကားပြောရင်း သူ့အကြောင်းတွေ သိခဲ့ရတယ်။

သူမလေးရှား လင်္ကာဝီကျွန်းကို ရောက်တာ (၃) နှစ်ရှိပြီဖြစ်ကြောင်း၊
စားသောက်ဆိုင်မှာ စားဖိုမှူးလုပ်နေကြောင်း၊
မလေးရှားအမျိုးသမီးနဲ့ အိမ်ထောင်ကျနေကြောင်းစတဲ့
သူ့ဘ၀ဇာတ်ကြောင်းလေးတွေကို ကားမောင်းရင်း ပြောပြပါတယ်။

ဒီမလေးရှားနိုင်ငံမှာ ဥပဒေက
မလေးရှားလူမျိုးကို ဘယ်လူမျိုးက အိမ်ထောင်ပြု ပြု၊
အထီးကပဲ ဖြစ်ဖြစ်၊ အမကပဲဖြစ်ဖြစ် မလေးလူမျိုးကို အိမ်ထောင်ပြုမယ်ဆိုရင်
အစ္စလာမ်ဘာသာကို ပြောင်းရပါတယ်။

ရှင်းအောင်ပြောရရင်
ဗုဒ္ဓဘာသာ ယောက်ကျားက မလေးရှားအမျိုးသမီးကို ယူလဲ
အစ္စလာမ်ဘာသာကို ပြောင်း ကိုးကွယ်ရပါတယ်၊
ဗုဒ္ဓဘာသာအမျိုးသမီးက မလေးရှား အမျိုးသားကို ယူလဲ
အစ္စလာမ်ဘာသာကို ပြောင်း ကိုးကွယ်ရပါတယ်။

တကယ်တော့ အစ္စလာမ်ဘာသာကို ပြောင်း ကိုးကွယ်ရရုံတင် မကပါဘူး။
သူ့မူရင်းနာမည်ကိုပါ မွတ်စလင်နာမည် ထည့်၊ ပြောင်းပစ်ရပါတယ်။
ဥပမာ၊ ဇေယျာကျော်ဝင်း ဆိုရင် အဗ္ဗဒူလာ ဇေယျာကျော်ဝင်း
ဒါမှမဟုတ် မိုဟာမက် ကျော်ဝင်း စသည်ဖြင့်ပေါ့။

ဒီဇေယျာကျော်ဝင်းဆိုတဲ့ ဒကာလေးလဲ နာမည်ပြောင်းပြီးသွားပြီလို့ သိရပါတယ်။
သူ့နာမည် မာမွတ်ကျော်ဝင်းဆိုလား၊ ရာကွတ်ကျော်ဝင်းဆိုလား။
မမှတ်မိတော့ပါဘူး။
ဒါ့အပြင်
သောကြာနေ့ဆို ဗလီကို သွားပြီး ၀တ်ပြုတဲ့အလုပ်လည်း မဖြစ်မနေ လုပ်ရပါတယ်တဲ့။

ဒီလိုတွေ ဘာလို့ ဖြစ်ကုန်တာလဲ လို့ ဆက်မေးကြည့်တော့
သူက ဒီမလေးရှားနိုင်ငံသားဖြစ်ချင်လို့ မလေးရှားနိုင်ငံသား ဖြစ်အောင်
သူတို့ပြဌာန်းထားတဲ့ဥပဒေစည်းကမ်းလိုက်နာတာပါလို့ပြောပါတယ်။

ဘယ်လောက်ဝမ်းနည်းစရာကောင်းလိုက်သလဲ။
ကိုယ့်နိုင်ငံ စီးပွါးရေးအဆင်မပြေလို့ ပညာရေး မမြင့်မား။
ပညာရေး မမြင့်မားတော့ လူမှုရေး၊ ဘာသာရေးနိမ့်ကျ၊

ခြုံကြည့်လိုက်တော့
မြန်မာနိုင်ငံမှာ မွေးပြီး မြန်မာ့လေကို ရှူ၊ မြန်မာ့ရေကိုသောက်
မြန်မာ့ဆန်ကိုစားပြီး လူဖြစ်လာတဲ့သူက
မြန်မာနိုင်ငံသား မဖြစ်ချင်တော့ဘူး…တဲ့။
မိဘကိုးကွယ်တဲ့ဘာသာကိုတောင်စွန့်ပြီး သူများနိုင်ငံသားဖြစ်ချင်နေပြီ ဆိုပဲ။

ဒို့နိုင်ငံမှာ ဒီလိုလူငယ်တွေ ဘယ်လောက်များနေပြီလဲ။
ဘာကြောင့် ကိုယ့်နိုင်ငံကို မချစ်ချင်တော့ပဲ ပစ်ခွါချင်လာကြတာလဲ။
တရားခံက ဘာလဲ။
ဘယ်သူလဲ။
ကိုယ့်ကိုယ်ကို မေးနေမိပါတယ်။

ဆက်စဉ်းစားမိတာက ဒို့နိုင်ငံ အခြေခံဥပဒေမှာလဲ
ဘယ်သူပဲ ဒို့လူမျိုးကို ယူယူ၊ ဗုဒ္ဓဘာသာပြောင်းခိုင်းရရင် ကောင်းမှာ၊
ဒီလိုဥပဒေမျိုး ဒို့နိုင်ငံမှာလဲ ခိုင်ခိုင်မာမာ ရေးစွဲထားရင်ကောင်းမှာလို့
ကျဉ်းကျဉ်းမြောင်းမြောင်း တွေးခေါ်မိပါသေးတယ်။

ကားသမားဒကာလေးနဲ့ စကားပြောရင်း တွေးရင်း ဟိုတယ်ကို ရောက်လာပါတယ်။
ဟိုတယ်နာမည်က Delta တဲ့။
ပင်လယ်ဘေး။
နှစ်ယောက်ခန်းကို မလေးရှားငွေ ၁၃၀ ပေးရတယ်။
ဟိုတယ်အခင်းအကျင်းကိုတော့ သိပ်ဘ၀င်မကျလှပါဘူး။
သို့သော်လဲ
ငါရဟန်းပဲလေ၊ သစ်တစ်ပင်အောက် ၀ါးတစ်ပင်အောက်တောင် နေရအုံးမှာမို့လားလို့
ကိုယ့်စိတ်ကို ဖြေတွေးလေး တွေးပြီး အပမ်းဖြေလိုက်တယ်။

နာရီဝက်လောက်ကြာတော့ ဟိုတယ်နဲ့ကပ်နေတဲ့
(Under Water World) ရေအောက်ကမ္ဘာကို ၀င်ကြည့်ဘို့
ကားသမားလေးက လာခေါ်လို့ လိုက်သွားဖြစ်တယ်။
ရေအောက်ကမ္ဘာဆိုတာကို စင်္ကာပူသွားတုန်းက ကြည့်ဘူးတယ်၊
ဒီမှာတော့ စင်္ကာပူလောက် မခန်းနားဘူး။
ရေအောက်ကမ္ဘာဆိုလို့ ပင်လယ်ကြီးအောက် သွားကြည့်ရတာတော့ မဟုတ်ပါဘူး။
ဖန်တီးထားတဲ့တိုက်ကြီးထဲမှာ မှန်လုံရေကန်ကြီးတွေထဲ ထည့်ထားတဲ့
ရေနေသတ္တ၀ါတွေကို သွားကြည့်တာပါ။
ရန်ကုန်က ငါးပြတိုက်လိုဟာ။
ဒါပေမဲ့ ဒီကဟာတွေက အနည်းနဲ့ အများ ခန်းနားကြပါတယ်။
ခန်းနားအောင်လုပ်ပြီး လာကြည့်တဲ့သူတွေဆီက ၀င်ကြေးပိုက်ဆံကို များများတောင်းယူကြတယ်။

ရေအောက်ကမ္ဘာဝင်ကြည့်ပြီးတော့ ဟိုတယ်ပြန် ရေမိုးချိုးပြီး
လင်္ကာဝီကျွန်းမှာ အကြီးဆုံးဖြစ်တဲ့ ဈေးကြီးကို သွားဘို့
ကားသမား ဒကာလေးက လာခေါ်တယ်။
ကွာလာလမ်ပူက လာတဲ့သူမို့လားတော့ မသိဘူး။
လင်္ကာဝီကျွန်းက အကြီးဆုံးဈေးကြီးက သိပ်မခန်းနားလှဘူးလို့ပဲ ထင်မိတယ်။

ဈေးကြီးထဲမှာတော့ လက်ဆောင်ဝယ်စရာပစ္စည်းမျိုးစုံကို တွေ့ရတယ်။
ဈေးကြီးအောက်ထပ် သုံးပုံ တစ်ပုံလောက်ကို
ဘီယာဆိုင် အရက်ဆိုင်ကြီးက နေရာယူထားလို့
လိုက်ပို့တဲ့ကားသမားလေးကို
"ဒကာတို့ လင်္ကာဝီသားတွေ အရက်အတော်ကြိုက်ပုံပေါ်တယ်။
အရက်ရောင်းတဲ့ဆိုင်ကြီးက ကြီးလှချည်းလား” လို့ ပြောမိတော့
ဒီလင်္ကာဝီကျွန်းမှာ အရက်နဲ့စီးကရက်က Duty Free ဖြစ်ကြောင်း၊
ဈေးသက်သာကြောင်း၊
ကွာလာလမ်ပူမှာ ဘီယာတစ်ဗူးကို မလေးရှားငွေ ၄ ကျပ်ပေးရပေမယ့်
ဒီလင်္ကာဝီကျွန်းမှာ ၁ ကျပ်ခွဲသာ ပေးရကြောင်း၊
ကျန်တဲ့ Black label, Blue Label စတာတွေလဲ အလွန်ဈေးတော်ကြောင်း
ရှည်ရှည်ဝေးဝေးရှင်းပြနေလို့
ဟဲ့ ၊ ဒကာလေး၊ ဒကာလေးက သီလရှင်ရှေ့မှာ  ဘီး ကြော်ငြာနေသလို ဖြစ်နေပြီ”
လို့ ရယ်ရယ်မောမော ပြန်ပြောလိုက်ဖြစ်လိုက်တယ်။

ဒီလင်္ကာဝီကျွန်းမှာရှိတဲ့ အကြီးဆုံးဈေးကြီးထဲမှာ
၄၅ မိနစ်လောက် လှည့်ပတ်ကြည့်ရှု ၀ယ်ယူပြီး ဟိုတယ်ကိုပြန်ကာ
တစ်နေကုန်ပင်ပမ်းသမျှ (ဘုန်းကြီးဆိုတော့) အိပ်စက်ခြင်းဖြင့်သာ
အနားယူပါတော့တယ်။

Sunday, October 12, 2014

လင်္ကာဝီကျွန်းခရီးစဉ် (၂)


ပီနန်းကျောင်းမှာ တစ်ညအိပ်ပြီး နောက်နေ့မနက် ၈နာရီ ၁၅ မိနစ်မှာ
ပီနန်းကျွန်းမှ လင်္ကာဝီကျွန်းကို ဘုတ်သင်္ဘောနဲ့ ခရီးဆက်ဖြစ်တယ်။
သင်္ဘောခ မလေးရှားငွေ ၆၀ ကျတယ်။ မလေးရှားငွေ ၆၀ ပေးရတာနဲ့စာရင်
သင်္ဘောက အကောင်းကြီးတော့ မဟုတ်ဘူး။
ဒါပေမဲ့ မြန်မာပြည်က ငယ်ငယ်တုန်းက ရန်ကုန်က သန်လျင်ကို သွားတဲ့
သင်္ဘောတွေထက်တော့ အများကြီးသာပါတယ်။
၁၁ နာရီ ဆွမ်းစားမီ လင်္ကာဝီကျွန်းကို ရောက်ပါတယ်။
လင်္ကာဝီကျွန်း၊ စားသောက်ဆိုင်မှာ အလုပ်လုပ်နေတဲ့ အသက် ၃၀ ၀န်းကျင်ရှိတဲ့
ရန်ကုန်၊ ကြည့်မြင်တိုင်သား မောင်ဇေယျာကျော်ဝင်း ဆိုတဲ့ ဒကာလေးက
သင်္ဘောဆိပ်ကို ကားနဲ့လာကြိုပါတယ်။
ဆွမ်းစားချိန်ဆိုတော့ ထမင်းဆိုင် အရင်ပို့ပေးတယ်။
ထမင်းဆိုင်က မွတ်စလင်ကုလားဆိုင်ပါ၊
ဟင်းတွေကတော့ စုံပါတယ်။
ဒါပေမဲ့ လတ်ဆပ်မှု၊ သန့်ရှင်းမှုတော့ သိပ်မရှိလှပါဘူး။
စားသောက်ပြီးတော့ လင်္ကာဝီကျွန်းရောက်ရင် မဖြစ်မနေသွားရမယ့်
မာစုရီ (Mahsuri) ဆိုတဲ့နေရာကို ကားသမားလေးက ပို့ပေးပါတယ်။ (ပုံကြည့်)
မာစုရီဆိုတာက လင်္ကာဝီကျွန်းသမိုင်းထဲက အမျိုးသမီးတစ်ယောက်နာမည်ပါ၊
သူ့အကြောင်းဗွီဒီယိုဇာတ်လမ်းတိုလေးကို အခန်းလေးတစ်ခန်းထဲမှာ ဖွင့်ပြထားပါတယ်။
ပုံထဲ ဗွီဒီယိုထဲကြည့်ခဲ့ရတာတော့ အတော်ချောမောလှပတယ်။
သူက ရွာသူကြီး (ရှင်ဘုရင်) ရဲ့ ဇနီးတဲ့၊
သူ့ခင်ပွန်းဖြစ်တဲ့ရှင်ဘုရင် ရှေ့တန်းစစ်တိုက်သွားတော့
မာစုရီကို စောင့်ရှောက်ဖို့ စစ်သူကြီးတစ်ယောက်ကို အစောင့်ထားခဲ့တယ်တဲ့။

မနာလိုတဲ့ ရွာသူလုံမေတို့က
မာစုရီကို စစ်သူကြီးနဲ့ ဖောက်ပြန်တယ် ဆိုပြီး ရှင်ဘုရင်ပြန်လာတဲ့အခါ ပြောကြတယ်။
ဂုံးတိုက်ကြတယ်ပေါ့။
ဆင်ခြင်ဥာဏ် တွေးခေါ်ဥာဏ် မရှိတဲ့ ရှင်ဘုရင်က
မစူးစမ်း မဆင်ခြင် မစုံစမ်းပဲ မာစုရီကို သေဒဏ်ပေးလိုက်တယ်။

မာစုရီကို မကွပ်မျက်မီ မာစုရီက ကြိမ်စာဆိုခဲ့ပါတယ်၊
“မဖောက်ပြန်ဘဲ ဖောက်ပြန်တယ်လို့ စွပ်စွဲတဲ့လူတွေနေတဲ့ ဒီလင်္ကာဝီကျွန်းမှာ
နောင် ဆွေခုနစ်ဆက် မျိုးခုနစ်ဆက် ဘာပင်မှစိုက်လို့ မရပါစေသား၊
ဘာစီးပွါးရေးမှ လုပ်လို့ မရပါစေသား” လို့ ကြိမ်စာတိုက်ခဲ့တယ်။
သူကြိမ်စာတိုက်ခဲ့သည့်အတိုင်း လင်္ကာဝီကျွန်းမှာ  ဘာမှ စိုက်လို့မရခဲ့ဘူးတဲ့။
ဘာစီးပွါးရေးမှ မဖြစ်ထွန်းခဲ့ဘူးတဲ့။

မလေးရှားဝန်ကြီးချုပ်ဟောင်း ဒေါက်တာ မဟာသီ လက်ထက်ရောက်မှ
ကြိမ်စာတိုက်ထားတဲ့ ဆွေခုနစ်ဆက် မျိုးခုနစ်ဆက်ပြည့်တဲ့အချိန်ရောက်လာလို့
ပြန်လည်စီကားလာတာလို့ ဆိုပါတယ်။
အခုတော့ အတော်လေး စီကားနေပါပြီ။ လင်္ကာဝီကျွန်းကို ကမ္ဘာက သိနေပါပြီ။

မာစုရီနေရာအနီးအနားတ၀ိုက် လည်ပတ်ကြည့်ရှုပြီးတော့
ပင်လယ်ထဲက လည်ပတ်စရာနေရာတွေကို သွားဘို့အတွက်
လှေဆိပ်ကို သွား၊ လှေငှားရပါတယ်။
လှေဆိပ်မှာ လှေ စင်းလုံးငှားရင် မလေးရှားငွေ ၂၅၀ ပေးရပြီး
အများနဲ့ ရောလိုက်ချင်ရင်တော့ တစ်ယောက် ၃၀ ပေးရတယ်လို့ သိရပါတယ်။

ကိုယ်သွားချင်တဲ့နေရာကို လွတ်လွတ်လပ်လပ်သွားချင်တာက တစ်ကြောင်း၊
အဆင်ပြေတဲ့နေရာမှာ ကိုယ်နေချင်သလောက်နေလိုတာက တစ်ကြောင်းကြောင့်
လှေစင်းလုံးငှားဖြစ်ပါတယ်။
ပထမဆုံး Palau Dayang Bunting ဆိုတဲ့နေရာကို သွားဖြစ်တယ်။ (ပုံကြည့်)
အဲ့နေရာက ကျွန်းလေးတွေ ၀ိုင်းရံနေပြီး
အလယ်တည့်တည့်မှာ ရေအိုင်လေးလိုမျိုးဖြစ်နေတာ။
ထူးခြားတာက
အဲ့ရေအိုင်ထဲက ရေက ရေငံမဟုတ်ပဲ ရေချိုဖြစ်နေတာ။
ဒီရေအိုင်မှာ ဒီထက် ထူးဆန်းတဲ့အဖြစ်အပျက် ရှိခဲ့ဘူးတယ်။
ဟိုးရှေးရှေးတုန်းက
လက်ထပ်ပြီး နှစ်ပေါင်း ၁၉ နှစ်ကြာသည်အထိ ခလေးမရတဲ့
လင်မယားအတွဲတစ်တွဲ ဒီရေအိုင်ကိုလာလည်ခဲ့ကြတယ်တဲ့။
လာလည်ပြီး ဒီရေအိုင်ထဲက ရေကို လင်ရော မယားပါ သောက်ဖြစ်ကြတယ်တဲ့။
ဒီအိုင်ထဲက ရေကို သောက်ပြီးမှ သူတို့လင်မယား ခလေးရတယ်တဲ့။

ဒါ့ကြောင့် ခလေးမရတဲ့ အိမ်ထောင်သည်တွေ
ဒီအိုင်ကိုလာပြီး ရေသောက်လေ့ရှိကြတယ်လို့ ဆိုပါတယ်။
ကဲ၊ အိမ်ထောင်ကျပြီး ခလေးမရတဲ့သူတွေ ဒီအိုင်ကို အရောက်သွားပြီး
အိုင်ထဲကရေ သွားသောက်ပေတော့ အကြံပြုလိုပါတယ်။ :D

အဲဒီအိုင်ကနေပြီး လှေသမားက ဟိုဟိုဒီဒီလိုက်ပို့ရှာပါတယ်။
သိန်းငှက်တွေ ပေါတဲ့နေရာ၊ သဲဖြူကျွန်း စသည်ဖြင့်။
သဲဖြူကျွန်းက ပင်လယ်ရေချိုးလို့ ကောင်းတဲ့နေရာလို့ ဆိုပါတယ်။
ဒါ့ကြောင့်ထင်ပါရဲ့
နိုင်ငံခြားသား (အထူးသဖြင့်) အနောက်နိုင်ငံသားတွေ
အတော်စည်ကားသိုက်မြိုက်စွာ ရေချိုးနေတာကို တွေ့ရပါတယ်။

သူတို့တတွေကို ကြည့်ပြီး အိန္ဒိယမှာ ပညာသင်ခဲ့ဘူးတဲ့
ဆရာတော် ဒေါက်တာဥတ္တရဥာဏ ပြောသွားတဲ့စကားကို သတိရမိပြီး
ပြုံးလိုက်မိပါသေးတယ်။
သူမြန်မာပြည်ကို ခဏအလည်ပြန်လာတော့
အိန္ဒိယနိုင်ငံအကြောင်းပြောပြရင်း
“ကိုယ့်လူတို့၊ အိန္ဒိယနိုင်ငံကို လာရင် Neither, Nor; Either, Or;
ဗိုက်သားပေါ်လေးတွေ တွေ့ရလိမ့်မယ်” တဲ့။
လင်္ကာဝီကျွန်းမှာတော့ အနောက်တိုင်းသူ လှပျိုဖြူတွေ
ဗိုက်သားပေါ်ရုံတင် မကတော့ပါလား။

Saturday, October 11, 2014

လင်္ကာဝီကျွန်းခရီးစဉ် (၁)


၂၈၊ ၉၊ ၂၀၁၀ အင်္ဂါနေ့ က လင်္ကာဝီကျွန်းကို ခရီးထွက်ဖြစ်တယ်။
ဘာရယ်လို့တော့ မဟုတ်ဘူး။
ဘာမှ အစီအစဉ်မရှိပဲ ခရီးထွက်ဖြစ်တာ။

Petaling Jaya မှာ နေနေတဲ့ ဘုန်းကြီးဦးဥတ္တမ က
သူ့တရုတ်ဒကာ (ဟင်းရွက်ရောင်းတဲ့သူ)
ကားအဟောင်း (Second Hand) တစ်စီးဝယ်ထားကြောင်း
အဲ့ကားလေးနဲ့လင်္ကာဝီသွားမှာဖြစ်ကြောင်း ပြောပါတယ်။
မရောက်ဖူးလို့ ကားအဆင်ပြေမယ်ဆိုရင် လိုက်ချင်ကြောင်းပြောတာနဲ့
အဆင်ပြေတာနဲ့ပဲ လိုက်ဖြစ်သွားတယ်။

ဟင်းရွက်ရောင်းတဲ့သူဝယ်ထားတဲ့ကားက မာစီဒီး ပါ။
မြန်မာပြည်က လုပ်ငန်းရှင်ကြီးများစီးနေတဲ့
ကားထက်တောင် ကောင်းနေသေးတယ်လို့ ထင်မိပါတယ်။
အင်း၊ စဉ်းစားပြီး ကိုယ့်နိုင်ငံကို သတိရမိလို့ မရှိပြုံးပြုံးမိပါသေးတယ်။
မနက် ၈ နာရီ ၁၅ မိနစ်မှာ စထွက်တယ်။
Ipoh မြို့နားက Pandai Remis ဆိုတဲ့
ပင်လယ်ကမ်းခြေရွာဖြစ်တဲ့ တံငှာရွာလေးကို
၁၀ နာရီခွဲလောက်မှာ ရောက်တယ်။
(Pandai ဆိုတာ မြန်မာလို ကမ်းခြေတဲ့)
အဲ့ရွာမှာ မြန်မာရဟန်းတော်တစ်ပါး သီတင်းသုံးသာသနာပြုနေတယ်။
အဲ့မှာ နေ့ဆွမ်းစားတယ်။

ရွာလေးလို့သာပြောရတယ်၊
အင်တာနက်က အစ ဘာညာ သာရကာ အကုန်ရှိတယ်။

အဲ့ရွာမှာ သီတင်းသုံးနေတဲ့ဆရာတော်လေးက ပြောတယ်၊
မြန်မာပြည်မှာလဲ ဒီနိုင်ငံမှာလို တောရွာလေးတွေမှာရော
အင်တာနက်တို့ ဘာတို့ရရင် အဆင်ပြေမှာတဲ့။
အင်တာနက်တို့ ဘာတို့ရှိရင်
ဘုန်းကြီးတွေ တောရွာတွေမှာ ပျော်လာပြီး
တောရွာတွေရဲ့ ဗုဒ္ဓဘာသာအခြေအနေ
အခုထက် ပိုတိုးတက်လာနိုင်တယ်တဲ့။
အခုတော့ ဘုန်းကြီးတွေ ရန်ကုန်၊ မန္တလေးလို မြုိ့ကြီးတွေမှာပဲ ပေါများနေတာတဲ့။
သူ့အဆိုအရ တောရွာတွေမှာ အင်တာနက်သုံးလို့ရအောင်
လုပ်ပေးနိုင်မယ်ဆိုလို့ရှိရင် တခြားတခြားသော
ပညာရေး၊ စီးပွါးရေးတိုးတက်ဖို့ အကြောင်းတရားသက်သက်မဟုတ်ပဲ
ဗုဒ္ဓဘာသာတိုးတက်ဖို့ အကြောင်းတရားလည်း ဖြစ်ကြောင်း
ပြောချင်တာ တူပါရဲ့။

ဒီအိပ်မက်မျိုးတော့ မမက်ချင်သေးပါဘူး။
ရန်ကုန်လို မန္တလေးလို မြို့ကြီးတွေမှာတောင်
အင်တာနက် speed က အတော်နှေးတယ်လို့ သိရတယ်။

ဒီဆရာတော်လေးနေတဲ့ တံငှာရွာလေးက တောရွာလေးဆိုပေမဲ့ အတော်သာယာတယ်။
အဲ့ဒီရွာလေးမှာ ထားဝယ်၊ ကော့သောင်း၊ ရခိုင်ပြည်နယ် ကမ်းရိုးတမ်း
စတဲ့နေရာက လူတွေ ငါးရာလောက်ရှိတယ်တဲ့။
ဒီငါးရာလောက်သောလူတွေအတွက်
သာရေး၊ နာရေးကိစ္စတွေကို သူဆောင်ရွက်ပေးနေရသတဲ့။
 သူမရောက်ခင်တုန်းကဆိုရင် မြန်မာဗုဒ္ဓဘာသာဝင်တစ်ယောက်ယောက်
ကွယ်လွန်လို့ သရဏဂုံတင်တဲ့အခါ
ငါးပါသီလဆိုတတ်တဲ့သူက ရှေ့ကတိုင်ပေးပြီး မဆိုတတ်တဲ့ ကျန်တဲ့သူများက
နောက်က လိုက်ဆိုပြီး သရဏဂုံတင်ခြင်းအမှုကိစ္စပြုလုပ်ရကြောင်း၊
တခါတလေ ငါးပါးသီလတောင် ဆိုတတ်တဲ့သူ မရှိလို့
တရုတ်နည်းနဲ့ သေဆုံးသူတွေကို သဂြိုဟ်လိုက်ရတာ ရှိကြောင်း
ဆရာတော်လေးက ဆက်လက်ပြောပြပါတယ်။

၁၁ နာရီခွဲလောက်မှာ အဲ့ဒီတောရွာကျောင်းလေးမှာ နေ့လည်စာ ဆွမ်းဘုန်းပေးဖြစ်ပါတယ်။
ဗုဒ္ဓဘာသာ မြန်မာဒကာ ဒကာမတချို့က ကပ်တဲ့ဆွမ်းပါ။
တံငှာလုပ်ရင်း အားရင် အားသလို ကုသိုလ်ယူတတ်တဲ့ ရွှေမြန်မာဗုဒ္ဓဘာသာတွေကို
တွေ့လို့ ကြည်နူးမိပါတယ်။
ဆွမ်းစားပြီး ပီနန်ကို ခရီးဆက်ပါတယ်။
ပီနန် မရောက်ခင် Lunas Hermitage ကို ၀င်ဖြစ်ပါတယ်။
Lunas Hermitage ဆိုတာက
ပီနန်ကျွန်းဘက်ကို မကူးခင် ဒီဘက်ကမ်းမှာ တည်ရှိတဲ့
Butterworth ဆိုတဲ့မြို့လေးက နာရီဝက်လောက် ကားစီးပြီး သွားရတဲ့
Lunas ဆိုတဲ့မြို့မှာ တည်ရှိတဲ့ တရားရိပ်သာတစ်ခုပါ။
မဟာစည်သြ၀ါဒခံ ရိပ်သာတစ်ခုဖြစ်တယ်။

မဟာစည်မုခ်ဦးကြီးနဲ့။ အဲ့ဒီမုခ်ဦးဖွင့်ပွဲတုန်းက အင်္ဂလိပ်လို တရားဟောပေးဘို့
အဲ့ရိပ်သာမှာ သတင်းသုံးနေတဲ့ ဆရာတော်က ပင့်လို့ အရင် ရောက်ဖူးတယ်။
အခု တစ်ခေါက် အဲ့ဆရာတော် ဗမာပြည်ပြန်ရောက်နေပြီလို့ သိရတယ်။
ဆရာတော်အသစ်ဖြစ်တဲ့ မဟာစည်သာယာကုန်းဆရာတော်နဲ့
ရုပ်ရှင်မင်းသားရဲအောင်ရဲ့ ယောက်ခမဖြစ်တဲ့ ဆရာတော် တဖြစ်လဲ
ဒေါက်တာ ဦးသုနန္ဒတို့ကို တွေ့ခဲ့ရတယ်။

နာရီဝက်လောက် ဟိုပြောဒီပြော ပြောပြီး
ပီနန်းကို ခရီးဆက်တယ်။ ညနေ ၇ နာရီလောက်ရောက်တယ်။
ပီနန်းဆရာတော်ကြီးနဲ့ တန်းတိုးတာပဲ။

ပီနန်းဆရာတော်ကို ၂၀၀၀ ခုနစ် စာသင်သားဘ၀တုန်းက
သီဟိုဠ်ကနေ အလည်သွားခိုက် ပထမဆုံး တွေ့ဘူး စကားပြောဘူးတယ်။
နောက် ၂၀၀၂ ခုနစ်တုန်းက တစ်ကြိမ်။
၂၀၀၄ ခုနစ်က တစ်ကြိမ်။
အဲ့နောက် မတွေ့ဖြစ်တော့ဘူး။
အခုတစ်ကြိမ်တွေ့လိုက်တော့ ဆရာတော်ကြီး အတော်ကျသွားတယ်ဆိုတာ
သတိပြုလိုက်မိတယ်။ သိပ်မသွက်တော့ဘူး။

Tuesday, October 7, 2014

ကျေးဇူး

 
မနက်ဖန် သီတင်းကျွတ်လပြည့်နေ့ (၈၊ ၁၀၊ ၂၀၁၄)
ည ၇ နာရီ ကပုန်းကျောင်းတွင်
ဆီမီးပူဇော်ပွဲ ကျင်းပမည်
 
ပညာဥာဏ်ကြီးမားလေ အမေ့ကျေးဇူးသိလေ
(၁)
ဘုရားရှင်က သူ့အမေ့အပ်ါမှာ ကျေးဇူးသိတတ်ပုံကို
အနည်းငယ်ရေးပြဘူးတယ်။
ဘုရားအလောင်းတော်ကို မွေးဖွားပြီး (၇) ရက်မြောက်မှာ မယ်တော်မဟာမာယာ နတ်ရွာစံသွားပြီး
နတ်ပြည်မှာ သန္တုဿိတအမည်နဲ့ နတ်သားသွားဖြစ်ပါတယ်။
ဆိုတော့ ဘုရားရှင်ဟာ နောက်ဆုံးဘ၀မှာ
မယ်တော် မဟာမာယာနဲ့ (၇) ရက်သာ တွေ့လိုက်ရပါတယ်။
ဒါပေမဲ့ ဘုရားရှင် ဘုရားဖြစ်ပြီးတဲ့နောက်
မယ်တော်မဟာမာယာကနေ ဘ၀ပြောင်းသွားတဲ့ သန္တုဿိတနတ်သားကို
သောတာပန်ဖြစ်သွားအောင် ၀ါတွင်းသုံးလပတ်လုံး
အဘိဓမ္မာတရားများဟောကြားပေးခြင်းအားဖြင့် ကျေးဇူးဆပ်ခဲ့ပါတယ်။

ဘုရားအဖြစ်သို့ရောက်ရှိပြီး ဘုရားရှင်ဖြစ်အပြီး
သူ့ဟာသူ အေးအေးလူလူနေမယ်ဆို နေလို့ရတဲ့ ဘုရားရှင်ကိုယ်တော်မြတ်ကြီးဟာ
အေးအေးလူလူမနေပဲ
အမေ့ကျေးဇူးဆပ်ချင်လွန်းလို့ အလွန်ဝေးကွာလွန်းလှတဲ့ နတ်ပြည်အထိ ကြွချီကာ
တရားရေအေး အမြိုက်ဆေး တိုက်ကျွေးခြင်းဖြင့် ကျေးဇူးဆပ်ခဲ့တာပါ။
ဘုရားရှင်က ပညာဥာဏ်ကြီးမားတော့ အမေ့ကျေးဇူးသိတာပေါ့။
(၂)
ရှင်သာရိပုတ္တရာကြီးကို ဗုဒ္ဓဘာသာဝင်တိုင်း သိကြပါတယ်။
ပညာဥာဏ်ဧတဒဂ်ရသူပါ။ ဘုရားရှင်ပြီးရင် ပညာအကြီးဆုံးပုဂ္ဂိုလ်လို့ ဆိုလိုပါတယ်။
တစ်နေ့…
ရှင်သာရိပုတ္တရာကြီးဟာ သူ့ဥာဏ်စွမ်းနဲ့ သူ့ကိုယ်သူ ပြန်လည်ကြည့်ရှုဆင်ခြင်မိတဲ့အချိန်..
မကြာခင် ပရိနိဗ္ဗာန်စံတော့မှာပါလားဆိုတာ သိသွားတယ်။
ဒါနဲ့ ရှင်သာရိပုတ္တရာကြီးက ဘုရားရှင်ကို
“တပည့်တော်ပရိနိဗ္ဗာန်ပြုပါရစေဘုရား၊ ဒီလိုပရိနိဗ္ဗာန်ပြုတဲ့အခါမှာ
တပည့်တော်မွေးဖွားရာ တိုက်ခန်းမှာပဲ ပြုပါရစေဘုရား၊
တပည့်တော်ရဲ့ မယ်တော်ကြီးဟာ မိစ္ဆာအယူမှာဘဲ ယုံကြည်သက်ဝင်ဆဲမို့
တပည့်တော်ရဲ့ မယ်တော်ကြီးကို ကျေးဇူးဆပ်ဖို့ ကျန်ပါသေးတယ်ဘုရား” လို့ လျှောက်ကြားပါတယ်။
တိုတိုပဲပြောကြပါစို့၊
နောက်ဆုံးတော့ သားဖြစ်သူ ရှင်သာရိပုတ္တရာကြောင့်
မိစ္ဆာအယူမှ သမ္မာအယူကူးပြောင်းကာ
မယ်တော်ကြီး ဗုဒ္ဓဘာသာဝင်ဖြစ်ခဲ့ရပါတယ်။

အော်၊ ပညာဥာဏ်ကြီးသူဆိုတော့ အမေ့ကျေးဇူး သိပြီး
ရရာနည်းနဲ့ ရတဲ့အချိန်မှာ ကျေးဇူးဆပ်တော့တာပေါ့။
(၃)
မျက်မှောက်ခေတ်မှာလည်း မင်းကွန်းတိပိဋကဆရာတော်ကြီးကို လူတိုင်းသိကြပါတယ်။
မင်းကွန်းတိပိဋကဆရာတော်ကြီးကလည်း တိပိဋကစာမေးပွဲတွေပြီးတော့
သူနေထိုင်တဲ့ မင်းကွန်းက ကျောင်းထဲမှာ အဆောင်လေးတစ်ဆောင်ဆောက်စေပါတယ်။
ပြီးတော့ သူ့ဇာတိ မြင်းခြံနယ် ရွာက မယ်တော်ကြီးကို ခေါ်ထားပြီး
တရားအားထုတ်စေကာ  လုပ်ကျွေးပြုစုပါတယ်။
၂ နှစ် ၃ နှစ်ကြာတော့ မယ်တော်ကြီးက ပျင်းလာသတဲ့။
ဒါနဲ့ ဇာတိဖြစ်တဲ့ မြင်းခြံက ရွာကိုပဲ ပြန်နေချင်ကြောင်း
သားတော် မင်းကွန်းတိပိဋကဆရာတော်ကြီးကို ပြောတာပေါ့။

မင်းကွန်းတိပိဋကဆရာတော်ကြီးကလည်း
“ပျော်တဲ့နေရာ၊ စိတ်ချမ်းသာတဲ့နေရာမှာသာ နေပါ၊
မယ်တော်ကြီးရွာပြန်နေမယ်ဆိုရင်လည်း ရွာမှာ အိမ်ဆောက်ပေးပါ့မယ်” လို့ပြောပြီး
သူ့ခေတ် သူ့အခါက ရွာမှာ ကျပ် ၇၀၀၀ တန်
အိမ်ကောင်းကြီးတစ်လုံးကို ဆောက်လုပ်ပေးသတဲ့။
အဲ့ခေတ်က ရွှေတစ်ကျပ်သားကို ၂၀၀ ကျပ်သာ ရှိသေးတဲ့အချိန်ဆိုတော့
ရွာမှာဆို အိမ်ကောင်းကြီးတစ်လုံးရတာပေါ့။
မင်းကွန်းတိပိဋကဆရာတော်ကြီးကလည်း အမေ့အတွက် အမေမသေခင်
ရရနည်းနဲ့ ကျေးဇူးဆပ်ခဲ့တာပါဘဲ။
အော်. . ပညာဥာဏ်ကြီးတဲ့ဆရာတော်ကြီးဆိုတော့ အမေ့ကျေးဇူး သိတာပေါ့။
(၄)
ဗိုလ်ချုပ်အောင်ဆန်းကိုလည်း ကြည့်ပါအုံး။
တစ်နေ့ ဗိုလ်ချုပ်အောင်ဆန်း ဗမာပြည်အလယ်ပိုင်း သွားဘို့ ခရီးကြုံလာတယ်။
သူ့ရဲ့ ပီအေ ဖြစ်တဲ့ ဗိုလ်ထွန်းလှက
“ဗိုလ်ချုပ်၊ ကျနော်တို့ မြန်မာပြည်အလယ်ပိုင်း သွားစရာရှိတယ်၊
လေယာဉ်စီစဉ်ထားတယ်” လို့ပြောတယ်။
ဒီတော့ ဗိုလ်ချုပ်က
“မြန်မာပြည်အလယ်ပိုင်းသွားမှာဆို လေယာဉ်မစီစဉ်ပါနဲ့ကွ၊
ကားနဲ့စီစဉ်ပါ၊ ငါနတ်မောက်ကို ၀င်ပြီး အမေ့ကို ကန်တော့ချင်သေးတယ်” လို့ပြောတယ်။
ဒီလိုနဲ့ ကားနဲ့သွားဖြစ်ပြီး နတ်မောက်က သူ့အမေဒေါ်စုကို ၀င်ကန်တော့ရင်း
“အမေ၊ ကျနော်နဲ့ ရန်ကုန်လိုက်နေရင် နေ၊
ဒီနတ်မောက်မှာနေရင်လည်းပဲ ကျနော်က စားဝတ်နေရေး အကုန်တာဝန်ယူပါရစေ” လို့
ဗိုလ်ချုပ်က ပြောသတဲ့။
အသိဥာဏ်ကြီးမားတော့ အမေ့ကျေးဇူးကို သိပြီး ကျေးဇူးပြန်လည် ဆပ်ချင်တာပေါ့။
(၅)
နောက် ဦးသန့်၊ ကုလသမဂ္ဂအတွင်းရေးမှူချုပ်ဖြစ်ခဲ့သူ
သူ နယူးယောက်မှာ တာဝန်ထမ်းနေစဉ် မြန်မာပြည်ခဏပြန်လာပြီး
သူ့အမေနဲ့တွေ့တယ်။ သူ့အမေက လေယာဉ်ကွင်း ဆင်းကြိုတယ်။
လေယာဉ်ပေါ်က ဆင်းဆင်းချင်း အမေနေကောင်းရဲ့လားလို့ မေးပြီး ၀တ်ချတယ်။
ပြီးတော့ “အမေ၊ အမေရိကကို ကျနော်နဲ့ အတူ လိုက်နေချင်လဲ နေ၊
မြန်မာပြည်မှာနေရင်လဲ အမေ့စားဝတ်နေရေးအတွက် ကျနော်အကုန်တာဝန်ယူပါရစေ” လို့
ဦးသန့်ကလည်း ပြောတယ်တဲ့။
ပညာဥာဏ်ကြီးမားတဲ့သူများ အမေ့ကျေးဇူး သိတတ်လိုက်တာ။

(မနှစ်က ဒီနေ့တုန်းက ရေးခဲ့တာလေးပါ။)
မှတ်ချက်၊ ဘုန်းကြီးဦးရာဇတရားနှင့် ပိဋကတ်တော်လာတရားများကို မှီငြမ်းရေးသားပါသည်။