Thursday, October 31, 2013

အကျိုးပြုဆဲ


ဗုဒ္ဓက ပရိနိဗ္ဗာန် စံသွားပြီဆိုတော့ သူက ကျွန်ုပ်တို့ကို ဘယ်လို ကူညီနိုင်ပါသလဲ။

ဖြေ - လျှပ်စစ်ဓါတ်ကိုတွေ့ရှိတဲ့ မိုက်ကယ် ဖာရာဒေး ဟာ ကွယ်လွန်သွားပါပြီ။
သို့သော်လဲ သူ့ရဲ့ တွေ့ရှိချက်က ကျွန်ုပ်တို့ကို အခုတိုင် ကူညီနေပါတယ်။
ရောဂါပေါင်း များစွာကို ကုသတဲ့ ကုထုံးတွေကို တွေ့ရှိတဲ့
လူးဝစ်ပါးစ်ချားဟာလဲ ကွယ်လွန်သွားပါပြီ။
သို့သော်လဲ သူတွေ့ရှိတဲ့ ကုထုံးတွေက
အခုတိုင် အသက်ပေါင်း များစွာကို ကယ်နေဆဲပါပဲ။

ကျော်ကြားတဲ့ အနုပညာ များစွာကို တီထွင် ဖန်တီးခဲ့တဲ့
လီယိုနာဒိုဒါဗင်ချီ ဟာလဲ သေသွားပါပြီ။
သို့သော်လဲ သူဖန်တီးခဲ့တဲ့ အနုပညာတွေက လူတွေကို
အခုတိုင် ပျော်ရွှင်မှု ပေးနေဆဲပါပဲ။

မြင့်မြတ်တဲ့ ပုဂ္ဂိုလ်ကြီးများနဲ့ အာဇာနည် ပုဂ္ဂိုလ်ကြီးများ
ကွယ်လွန်သွားကြတာ ရာစုနှစ်ပေါင်းများစွာ ကြာသော်လည်း
သူတို့အကြောင်းကို ကျွန်ုပ်တို့ ဖတ်ရှုရတဲ့အခါမှာ
သူတို့လို နေထိုင် ပြုမူလိုစိတ်များ ကျွန်ုပ်တို့ သန္တာန်မှာ
တဖွားဖွား ပေါ်လာပါတယ်။

ဟုတ်ပါတယ်။
ဗုဒ္ဓမြတ်စွာ ပရိနိဗ္ဗာန် စံတာဟာ နှစ်ပေါင်း ၂၅၀၀ ကျော် ကြာသွားပါပြီ။
သို့သော်လဲ ရှင်တော်မြတ်ဘုရားရဲ့ တရားတော်များဟာ
အခုတိုင် ကူညီနေဆဲပါပဲ။
ဗုဒ္ဓမြတ်စွာရဲ့ နမူနာကောင်းတွေက လူတွေကို
အခုတိုင် အားတက်စေတုန်းပါပဲ။
သူ့စကားတော်တွေက
အခုတိုင် လူတွေရဲ့ ဘ၀တွေကို ပြောင်းလဲစေတုန်းပါပဲ။
ဗုဒ္ဓမြတ်စွာမှာသာလျှင် ပရိနိဗ္ဗာန်စံပြီးနောက်
ရာစုနှစ်ပေါင်းများစွာ ကြာသည့်တိုင်အောင်
ဒီလိုစွမ်းအားများ ရှိနေနိုင်တာ ဖြစ်ပါတယ်။

(ဘိက္ခုဓမ္မိက - အမေးအဖြေစာအုပ်လေးမှ)

Wednesday, October 30, 2013

ဘေးကင်းဘို့

 အိမ်အသစ်ပြောင်းနေတဲ့အတွက် ဒီနေ့ ကိုနေအောင်တို့ အရုဏ် ဆွမ်းကပ်တာပေါ့။
အိမ်သစ်ပြောင်းတဲ့အခါ ဒီအိမ်တွင်းမှာနေထိုင်ကြမည့် မိမိတို့တတွေ
ဘေးခပ်သိမ်း ရန်ခပ်သိမ်း အန္တရာယ်ခပ်သိမ်း ကင်းငြိမ်းဘို့ဆိုတဲ့
ရည်ရွယ်ချက်စိတ်ကူးနဲ့ သံဃာတော်အရှင်သူမြတ်တွေကို ပင့်ဖိတ်ပြီး
ဆွမ်းဆက်ကပ် လှူဒါန်း၊ ပရိတ်တရားတော်တွေ နာယူကြာတာ။

ဆိုတော့ ပရိတ်ဆိုတာ
“အရပ်လေးမျက်နှာ အရပ်ရှစ်မျက်နှာတို့မှ ကျရောက်လာမည့်အန္တရာယ်ကို
ကာကွယ် တားဆီး စောင့်ရှောက်ပေးတတ်တယ်” လို့
ပရိတ်အကြောင်းကို ရှေးရှေးဆရာတော်ကြီးများ စာပေမှာလာအတိုင်း
မကြာခဏဟောပြောလေ့ရှိပါတယ်။
ပါဠိလိုတော့ ပရိ သမန္တတော တာယတိ ရက္ခတီတိ ပရိတ္တံ  တဲ့။

ပရိတ်တော်တွေကိုရွတ်ဆိုတယ်ဆိုတာ
ကြွရောက်လာတဲ့ ဆရာတော်တွေက
(ဒီအိမ်တွင်းမှာ မှီတင်းနေထိုင်တဲ့) လုံးစုံများစွာ သတ္တ၀ါတွေကို
ဒကာ ဒကာမတွေကိုယ်စား မေတ္တာပို့ပေးတာ၊
ဘုရားဂုဏ်၊ တရားဂုဏ်၊ သံဃာ့ဂုဏ်တွေ ရွတ်ဆိုပေးတာ။
မင်္ဂလာအပေါင်း ခညောင်းဘို့၊
နတ်မြတ်နတ်ကောင်း နတ်အပေါင်းတို့က စောင့်ရှောက်ဖို့ အာသီသပြုပေးတာ။
ထိုဂုဏ်အသီးသီးတို့ရဲ့ တန်ခိုးတေဇော်အာနုဘော်ကြောင့်
ကိုယ်စိတ်နှစ်ဖြာ ကျန်းမာ ချမ်းသာဘို့ ဆုတောင်းပေးတာကို ပြောတာပါ။
အကျဉ်းချုပ် အကြမ်းဖြင်းအားဖြင့် ဒါကို အန္တရာယ်ကင်းအောင်
ပရိတ်ရွတ်ဆိုပေးတယ်လို့ ခေါ်ဆိုကြတာပေါ့။

ဘေးခပ်သိမ်း ရန်ခပ်သိမ်း အန္တရာယ်ခပ်သိမ်းကင်းငြိမ်းဘို့
ပရိတ်တရားတော်တွေကိုလည်း နာယူပေါ့။

ဒကာတို့မိသားစုက မလေးရှားနိုင်ငံမှာနေနေတာဆိုတော့
တကယ်တမ်း ဘေးခပ်သိမ်း ရန်ခပ်သိမ်း အန္တရာယ်ခပ်သိမ်းကင်းငြိမ်းဘို့အတွက်
ဒီဃနိကာယ်မှာလာတဲ့ ဒို့ဘုရားရှင်ပေးထားတဲ့နည်းလမ်းလေး
(၇) ခုကို လိုက်နာကျင့်သုံးစေချင်တယ်။

ဒီဃနိကာယ်ဆိုလို့ ဗဟုဿုတအဖြစ် တဆက်တည်းပြောပြလိုက်အုံးမယ်။
ဒို့ဘုရားရှင်ဟောခဲ့တဲ့တရားတော်တွေကို နိကာယ်အနေအားဖြင့် (၅) အုပ်စုခွဲထားတယ်။
နိကာယ်ဆိုတာ နိကာယ - စုစည်းမှု၊ အုပ်စု လို့ခေါ်တယ်။
၁။ ဒီဃနိကာယ် -
၂။ မဇ္ဈိမနိကာယ် -
၃။ သံယုတ္တနိကာယ် -
၎။ အင်္ဂုတ္တရနိကာယ် -
၅။ ခုဒ္ဒကနိကာယ် တဲ့။

ဒီနိကာယ် (၅) အုပ်စုကို ပိဋကတ်အနေနဲ့ဆို (၃) ပုံတဲ့။
နိကာယ် (၅) အုပ်စုကို
ပိဋကထဲ ထည့်သွင်းရေတွက်မယ်ဆို (၃) အုပ်စုသာရှိတဲ့သဘောပေါ့။
၁။ ၀ိနည်း
၂။ သုတ္တန်
၃။ အဘိဓမ္မာ တဲ့။
အခုပြောချင်တဲ့ အချက် (၇) ချက်က နိကာယ်အနေအားဖြင့် ပြောရရင် ဒီဃနိကာယ်ထဲကပါ။
ပိဋကတ်အနေနဲ့ဆို သုတ္တန်ထဲက။
ဘေးရန်ခပ်သိမ်းကင်းဝေးဘို့ အဆင်ပြေချောမွေ့စွာနေနိုင်ဘို့အတွက်
“ညူ” ၇ လုံးနဲ့ ပြည့်စုံအောင်နေထိုင်ဘို့ သုတ္တန်ပိဋကထဲမှာ
ဘုရားရှင် မှာထားတာရှိပါတယ်။
ညူ ဆိုတာက ပါဠိစကားပါ။ မြန်မာလိုတော့ သိတာတဲ့။
သဗ္ဗညူ ဆိုတဲ့စကားလုံးကို ဒို့ဗုဒ္ဓဘာသာဝင်တွေ ရင်းနှီးပြီးသားပါ။
သဗ္ဗညူ ဆိုတာ သဗ္ဗဆိုတဲ့ပုဒ်နဲ့ ညူ ဆိုတဲ့ပုဒ် ၂ ပုဒ်ကို ပေါင်းစပ်ထားတာ။
သဗ္ဗဆိုတာ အလုံးစုံ၊ ညူ ဆိုတာက သိတာ။
ဆိုတော့ သဗ္ဗညူ ဆိုတာ အလုံးစုံအကုန်သိတဲ့ဘုရားရှင်ပေါ့။

ဒီနေရာမှာလည်း ညူဆိုတဲ့ပုဒ်လေးနဲ့ တွဲပြီးသုံးထားတဲ့ စကားလုံး (၇) လုံးရှိတယ်။
နံပါတ် (၁) က ဓမ္မညူ  တဲ့။
ဓမ္မဆိုတာက အကြောင်း၊ ညူ ဆိုတာက သိတာ။
နှစ်ရပ်ပေါင်းတော့ ဓမ္မညူ - အကြောင်းကို သိရမယ်ပေါ့။
ပြဿနာတစ်စုံတစ်ရာပေါ်ပေါက်လာရင်
အဲ့ဒီပြဿနာရဲ့ ဇစ်မြစ်အကြောင်းတရားကို သိအောင်လုပ်ရပါမယ်။
ပြဿနာရဲ့ ဇစ်မြစ်အကြောင်းတရားကို သိပြီးမှ
အဲ့ဒီပြဿနာကို မှန်မှန်ကန်ကန်သုံးသပ်နိုင်ပြီး ဆုံးဖြတ်ချက်ချနိုင်မှာမို့ပါ။

ဆိုကြပါစို့၊ မြန်မာပြည်မှာ လတ်တလောဖြစ်ပျက်သွားတဲ့
ဗုံးပေါက်ကွဲတာတွေ၊ ဘာသာရေးအဓိကရုဏ်းတွေ၊
ဒီလိုဖြစ်ပေါ်လာတဲ့ပြဿနာတွေရဲ့ ဇစ်မြစ်အကြောင်းတရားက ဘာလဲ၊
ဒါကို သိအောင်လုပ်ရပါမယ်။

နံပါတ်၂ က အတ္ထညူ - တဲ့။
အတ္ထ ဆိုတာ အကျိုးတရား၊ ညူဆိုတာ သိတာ။
နှစ်ရပ်ပေါင်းတော့ အကျိုးတရားကို သိတာ။
ပြဿနာ အကြောင်းအရာရဲ့ နောက်ဆက်တွဲ အကျိုးတရားကိုလည်း သိရပါမယ်တဲ့။

နံပါတ် ၃ ကတော့ အတ္တညူ - တဲ့။
အတ္တဆိုတာ ကိုယ့်ကိုယ်ကို၊ ညူ ဆိုတာ သိတာ။
အတ္တညူဆိုတာ
ကိုယ့်ကိုယ်ကို ဘာကောင်လဲဆိုတာကိုလဲ သိဘို့လိုတယ်လို့ အဓိပ္ပါယ်ရတယ်။
လောကကြီးမှာ ကိုယ့်ကိုယ်ကို ဘာကောင်လဲဆိုတာ မသိလို့
ပြဿနာတွေတက်နေကြတာမို့လား။

ဒို့နိုင်ငံကို ပြန်ကြည့်လိုက်စမ်း၊
ကိုယ့်ကိုယ်ကို ဘာကောင်လဲ ဆိုတာ မသိလို့ ဒို့နိုင်ငံသားတွေ ဒုက္ခရောက်နေကြတာ။
စစ်သားက သူ့ကိုယ်သူ ဘာကောင်လဲဆိုတာ သိရပါမယ်။
သိပြီး သူ့အလုပ်သူ လုပ်ရပါမယ်။
ဆရာဝန်ကလည်း သူ့ကိုသူ ဘာကောင်လဲဆိုတာ သိရပါမယ်။
သိပြီး သူ့အလုပ်သူ လုပ်ရပါမယ်။
အဲ၊ ဒို့ဘုန်းကြီးတွေလည်း ကိုယ့်ကိုယ်ကို ဘယ်သူလဲဆိုတာ သိရပါတယ်။
ဒကာတို့ ဒကာမတို့လည်း ကိုယ့်ကိုယ်ကို ဘာကောင်လဲဆိုတာ သိရပါမယ်။
ကိုယ့်ကိုယ်ကို ဘာကောင်လဲဆိုတာ မသိဘူးဆိုရင်
ပြဿနာတွေ ဒုက္ခတွေနဲ့ မိတ်ဆွေဖြစ်ပြီသာမှတ်ပေတော့။

နံပါတ် ၄ က မတ္တညူ -  တဲ့။
မတ္တဆိုတာ အတိုင်းအရှည်၊ ပမဏာ၊ စွမ်းရည်၊
ညူ ဆိုတာ သိတာ။
နှစ်ပုဒ်ပေါင်းတော့ ကိုယ့်အတိုင်းအရှည်၊ ကိုယ့်ပမဏာ၊ ကိုယ့်စွမ်းရည်ကို သိတာ။
ကိုယ့်လုပ်နိုင်တဲ့ စွမ်းနိုင်တဲ့ ပမာဏကိုလဲ သိရပါမယ်လို့ ဆိုလိုတာ။
တချို့က ကိုယ့်စွမ်းရည်ကို ကိုယ်နားမလည်ဘူး။
ကိုယ့်စွမ်းရည်က တစ်မတ်လောက်ရှိပြီး တစ်ကျပ်လောက်လုပ်ချင်တာ။
စွမ်းနိုင်တာက တစ်မတ်လောက် ၊ လိုချင်တာ ရချင်တာက တစ်ကျပ်လောက်။
ဒီလိုလဲ မဖြစ်သင့်ပါဘူး။

နံပါတ် ၅ ကတော့ ကာလညူ - တဲ့။
ကာလ ဆိုတာ အချိန်အခါ၊ ညူ ဆိုတာ သိတာ။
အချိန်အခါကိုလဲ သိရပါမယ်။ မှန်ကန်တဲ့အချိန်ကို သိရပါမယ်တဲ့။
ဒီနိုင်ငံမှာ ဒီအချိန်ဟာ စီးပွါးရေး လုပ်သင့်တဲ့အချိန်လား၊
မလုပ်သင့်တဲ့အချိန်လားဆိုတာ သိရပါမယ်တဲ့။

နံပါတ် ၆ က ပရိသညူ - တဲ့။
ပရိသဆိုတာက ပရိသတ်၊ ၀ါ - ပတ်ဝန်းကျင်။ ညူ ဆိုတာက သိတာ။
ဆိုတော့ ပရိသညူဆိုတာ ပတ်ဝန်းကျင်အနေအထားကို သိတာ။
ကိုယ်နေတဲ့အိမ်၊ နေရာရဲ့ ပတ်ဝန်းကျင်အနေအထားကို သိနေရပါမယ်တဲ့။
ကိုယ့်အိမ်ရဲ့ ညာဘက်ကိုသွားရင် ဘယ်ရောက်မယ်၊ ဘယ်ဘက်ကိုသွားရင် ဘယ်ရောက်မယ်။
အိမ်နောက်ဖေးလမ်းကြားက ဘယ်ကိုရောက်တယ်စသဖြင့် သိအောင် လုပ်ထားရပါမယ်။
ဒါ့အပြင် ကိုယ့်အိမ်ပတ်ဝန်ကျင်လူတွေရဲ့ စရိုက် သဘောသဘာဝတွေကိုပါ လေ့လာထားရပါတယ်။
သို့မှသာ အရေးအကြောင်းဆို အဆင်ပြေမှာပါ။

အဲ၊ နောက်ဆုံး နံပါတ် ၇ ကတော့ ပုဂ္ဂလညူ တဲ့။
ပုဂ္ဂလဆိုတာ ပုဂ္ဂိုလ်၊ ညူဆိုတာ သိတာ။
နှစ်ရပ်ပေါင်းတော့ ပုဂ္ဂလညူဆိုတာ ဒီလူဟာ ပေါင်းသင့်တဲ့ပုဂ္ဂိုလ်လား
မပေါင်းသင့်တဲ့ပုဂ္ဂိုလ်လားဆိုတာ သိရပါမယ်၊ ချင့်ချိန်တတ်ရပါမယ်တဲ့။
ဒီ ညူ (၇) လုံးနဲ့အညီ ကျင့်ကြံနေထိုင်မယ်ဆိုရင်
ဘေးခပ်သိမ်း ရန်ခပ်သိမ်း အန္တရာယ်ခပ်သိမ်း ကင်းငြိမ်းပြီး
အောင်မြင်တဲ့ လူတော်တစ်ယောက်ဖြစ်လာနိုင်ပါတယ်တဲ့။

ဒီ (၇) လုံးကို အကျဉ်းချုပ်ပြန်မှတ်လိုက်။
၁။ ဓမ္မညူ - ပြဿနာ အကြောင်းအရာ တစ်စုံတစ်ခုရဲ့ ဇစ်မြစ် အကြောင်းကို သိရပါမယ်။
၂။ အတ္ထညူ - ပြဿနာ အကြောင်းအရာရဲ့ နောက်ဆက်တွဲ အကျိုးတရားကို သိရပါမယ်။
၃။ အတ္တညူ - ကိုယ့်ကိုယ်ကို ဘာကောင်လဲဆိုတာကိုလဲ သိဘို့လိုပါတယ်။
၎။ မတ္တညူ - ကိုယ့်လုပ်နိုင်တဲ့ စွမ်းနိုင်တဲ့ ပမာဏကိုလဲ သိရပါမယ်။
၅။ ကာလညူ - အချိန်အခါကိုလဲ သိရပါမယ်။ မှန်ကန်တဲ့အချိန်ကို သိရပါမယ်။
၆။ ပရိသညူ - ပတ်ဝန်းကျင်အနေအထားကိုလဲ သိနေရမယ်။
၇။ ပုဂ္ဂလညူ - ပေါင်းသင့်တဲ့သူလား။ မပေါင်းသင့်တဲ့သူလား ချင့်ချိန်တတ်ရပါမယ်။

ကဲ၊ ကိုနေအောင်ရေ..
ဘေးရန်ခပ်သိမ်း ကင်းငြိမ်းဖို့၊ အောင်မြင်တဲ့သူတစ်ယောက်ဖြစ်ဖို့
ဒီညူ (၇) လုံးနဲ့ ပြည့်စုံအောင်နေပါလို့ တိုက်တွန်းလိုပါတယ်။
ဒီညူ (၇) လုံးနဲ့ ပြည့်စုံပြီး
ဘေးခပ်သိမ်း ရန်ခပ်သိမ်း အန္တရာယ်ခပ်သိမ်း ကင်းငြိမ်းပါစေလို့
ဆန္ဒပြုရင်း ဦးဇင်းရဲ့ အနုမောဒနာ အကြံပြုလွှာကို နိဂုံးချုပ်ပါတယ်။

သာဓု        သာဓု        သာဓု

(ဒီဃနိကာယ် ၃၊ ပါ ၂၀၈။ ဋ္ဌ ၂၂၁ ကို မှီငြမ်းဟောကြားရေးသားပါသည်။)

Monday, October 28, 2013

ဘက်စုံမွမ်းမံ

ဗုဒ္ဓဘာသာခေါင်းဆောင်များဖြစ်ကြတဲ့ ရဟန်းသံဃာတို့အလုပ်ဟာ
အကြမ်းအားဖြင့်
(၁) ပရိယတ်လုပ်ငန်းနဲ့
(၂) ပဋိပတ်လုပ်ငန်းလို့ နှစ်မျိုးရှိပါတယ်။

နားလည်သလိုပြောရရင်
(၁) သင်ခြင်းအလုပ်နဲ့ ကျင့်ခြင်းအလုပ်ပေါ့။

စာသံပေသံ၊ စာလာပေလာစကားနဲ့ပြောရရင်
(၁) ဂန္ထဓူရနဲ့ (၂) ၀ိပဿနာဓူရတဲ့။

နံပါတ် (၁) လုပ်ငန်းဖြစ်တဲ့ ဂန္ထဓူရလို့ခေါ်တဲ့
ပရိယတ္တိလုပ်ငန်း၊ စာသင်စာချခြင်းလုပ်ငန်းကို
မြန်မာပြည်အနယ်နယ်အရပ်ရပ် မြို့ကြီးမြို့လေးတွေမှာရှိတဲ့
ပရိယတ္တိစာသင်တိုက်တွေက ထမ်းဆောင်ကြပါတယ်။

သာသနာကို ရေရှည်တည်တံ့အောင် လုပ်ဆောင်ပေးနေတာ
ဒီပရိယတ္တိစာသင်တိုက်တွေပါ။
ပရိယတ်သမားမရှိဘဲ နည်းမှန်လမ်းမှန်ညွှန်ပြပေးနိုင်တဲ့
ပဋိပတ်သမား ပေါ်ထွက်လာနိုင်စရာ အကြောင်းမရှိဘူးဆိုတာ
အားလုံးတညီတညွတ်တည်း လက်ခံထားပါတယ်။

ဒါ့ကြောင့်မို့
ပရိယတ်မကင်းတဲ့ ပဋိပတ်ဖြစ်ရေး၊
ပဋိပတ်မကင်းတဲ့ ပရိယတ်ဖြစ်ရေးမူတွေကို
တတ်သိနားလည်တဲ့ဆရာတော်ကြီးများက
လွန်ခဲ့တဲ့ ဆယ်စုနှစ်လောက်ကတည်းက စတင်ချမှတ်လာခဲ့ပါတယ်။
အောင်မြင်သင့်သလောက် အောင်မြင်လာတယ်လို့ ပြောလို့ရပေမဲ့
လိုအပ်တာတွေ ရှိနေဆဲပါ။

နိုင်ငံတကာမှာ စာသင်ဌာန (Institute) တစ်ခုတည်ထောင်တော့မယ်ဆိုရင်
အရေးအကြီးဆုံးက စာကြည့်တိုက် ပါ။
စာသင်ဌာနတစ်ခုရဲ့ အောင်မြင်မှုဟာ
အဲ့ဒီစာသင်ဌာနမှာရှိတဲ့ စာကြည့်တိုက်မှာ စာအုပ်ဘယ်လောက်စုံစုံလင်လင်ရှိသလဲ၊
စာကြည့်တိုက်စနစ် ဘယ်လောက်ကောင်းသလဲ ဆိုတာပေါ်မှာ မူတည်တယ်လို့
နိုင်ငံတကာပညာသင်ဌာနတွေက လက်ခံယုံကြည်ထားပါတယ်။

ဆိုတော့ မြန်မာပြည်က ဘုန်းကြီးကျောင်းပညာသင်ဌာနတွေဖြစ်တဲ့
ပရိယတ္တိစာသင်တိုက်တွေမှာ
စာသင်ဌာနတစ်ခုရဲ့ အရေးအကြီးဆုံးဖြစ်တဲ့ စာကြည့်တိုက် ရှိပါရဲ့လား။
ရှိခဲ့ရင် စနစ်ဘယ်လောက်ကောင်းပါသလဲ။
စာကြည့်တိုက်မှာ စာသင်သားတစ်ဦးလိုအပ်တဲ့စာရွက်စာတမ်းတွေ မိတ္တူကူးဘို့
မိတ္တူကူးစက်လို အထောက်အကူပြုပစ္စည်းမျိုးတွေ အလွယ်တကူ ထားပေးနိုင်ပါသလား။

ပရိယတ္တိစာသင်တိုက်တွေမှာ စာကြည့်တိုက်မရှိရင် ရှိအောင်လုပ်ရပါမယ်။
စာကြည့်တိုက်နဲ့ဆက်စပ်တဲ့အထောက်အကူပြုပစ္စည်းတွေ
စာသင်သားတွေအတွက် ဖြည့်ဆည်းပေးရပါမယ်။
စာကြည့်တိုက်ဟာ စာသင်သားရဲ့အသက်ဆိုတာကို
နိုင်ငံတကာမှာ နားလည်သဘောပေါက်နေတဲ့အချိန်
ပရိယတ္တိစာသင်တိုက်တွေမှာ စာကြည့်တိုက် ထားပေးရကောင်းမှန်းမသိရင်
ခေတ်နဲ့ရင်ဘောင်တန်းနိုင်တဲ့အသိဥာဏ် ဘယ်လိုလုပ် ရနိုင်မလဲ။

စာမေးပွဲပြဌာန်းစာထဲမှာ မပါတဲ့ ဘာသာကြီးလေးခုအကြောင်း၊
ဗုဒ္ဓဘာသာသမိုင်းစာအုပ်၊ မြန်မာလူမျိုးတို့လက်ခံယုံကြည်တဲ့ဗုဒ္ဓဘာသာနဲ့
တခြားနိုင်ငံက လက်ခံယုံကြည့်တဲ့ဗုဒ္ဓဘာသာတူမတူ စတာတွေကိုဖတ်ဖို့
ပရိယတ္တိစာသင်တိုက်တွေမှာ စာကြည့်တိုက် ရှိကို ရှိရပါမယ်။
ဒါမှသာ ခေတ်နဲ့ရင်ဘောင်တန်းနိုင်လာမှာဖြစ်ပြီး သာသနာကို
အကွက်ကျကျ စွမ်းစွမ်းတမံ ပြုနိုင်မှာပါ။

ခေတ်နဲ့ရင်ဘောင်တန်းနိုင်တဲ့အသိဥာဏ်မရရင်
(၀ါ) သဒ္ဒါရုပ်တွက်နဲ့သဂြိုဟ်သရုပ်ခွဲလောက်ကိုသာ လေ့လာခွင့်ရမယ်ဆိုရင်
ဗုဒ္ဓသာသနာတိုးတက် ပြန့်ပွါးဘို့ ဘယ်လိုလုပ် စွမ်းဆောင်နိုင်မလဲ။

နောက်တစ်ခုက ပရိယတ္တိစာသင်တိုက်တွေမှာ စာသင်ခန်းမရှိတာ။
စာသင်တိုက်လုပ်ပြီး စာသင်ခန်းမရှိတာ အတော်အံ့သြစရာကောင်းပါတယ်။
တချို့စာသင်တိုက်တွေမှာ ကျောင်းဆောင်တွေ မှိုလိုပေါက်အောင် ဆောက်ထားပေမဲ့ စာသင်ခန်းကျောင်းဆောင် မဆောက်တာဟာ အတော်ဝမ်းနည်းစရာကောင်းပါတယ်။

တချို့စာသင်တိုက်တွေမှာဆိုရင်
စားလဲဒီနေရာဘဲ၊ အိပ်လဲ ဒီနေရာဘဲ၊ စာသင်လဲ ဒီနေရာဘဲ။
ဒီလို မဖြစ်သင့်ပါဘူး။

စာသင်တိုက်မှာ စာသင်ခန်းရှိသင့်ပါတယ်။ ရှိရပါတယ်။
ဒီနေရာအိပ်၊ ဒီနေရာစား၊ ဒီနေရာမှာပဲ လေးဘက်ထောက်ပြီး
စာသင်ရတာဟာ စာသင်သားရဲ့ ဦးဏှောက်ကို မရွှင်လန်းစေပါဘူး။
အမြင်မတော်ပါဘူး။ အမြင် မတင့်တယ်ပါဘူး။
လေးဘက်ထောက်ပြီး စာသင်ရတဲ့ခေတ် စနစ်ကြီး ကုန်ဆုံးသင့်ပါပြီ။

အဆင့်မြင့်တဲ့ဘုရားရှင်ရဲ့ စာပေတွေကို သင်ကြား သင်ယူနေတာဖြစ်တဲ့အတွက်
အဆင့်မြင့်မြင့်ဘဲ သင်ကြား သင်ယူသင့်ပါတယ်။
လောကဓာတ်ကျောင်းသားတွေလို
ကိုရင်စာသင်သား ဦးဇင်းစာသင်သားတွေလဲ စာသင်ခန်းထဲမှာ ထိုင်ခုံနဲ့၊ စားပွဲနဲ့၊
စာချဘုန်းကြီးကလဲ စာသင်ခန်းထဲမှာ ထိုင်ခုံနဲ့၊ စားပွဲနဲ့၊ မိုက်နဲ့၊ ဘောနဲ့ စသဖြင့်
လိုအပ်တဲ့အထောက်အကူပြု ပစ္စည်းအပြည့်အစုံနဲ့ဆိုရင် ဘယ်လောက်ကောင်းလိုက်မလဲ။
သင်ပေးသူရော သင်ယူသူရော စိတ်တက်ကြွ ရွှင်လန်းပြီး
ဥာဏ်တွေ နဂိုကထက် ပွင့်လင်းလာမှာ အမှန်ပါ။

ပရိယတ္တိစာသင်တိုက်တွေမှာ ကိုရင်လေးတွေ ဦးဇင်းပေါက်စတွေကို စာသင်ပေးရင်
စာချဘုန်းကြီးလုပ်တဲ့သူက စာချည်းသက်သက် ပို့ချနေရုံနဲ့ မလုံလောက်ပါဘူး။
ဒီကိုရင်လေးတွေ ဦးဇင်းပေါက်စတွေကို
သာသနာပြုချင်စိတ်ဖြစ်ပေါ်လာအောင် အမြဲတမ်း ပြောဆိုပေးသင့်ပါတယ်။
ငယ်ငယ်လေးကတည်းက သာသနာကို စောင့်ရှောက်လိုတဲ့စိတ်ဖြစ်ပေါ်လာအောင်၊
ရောက်ရာအရပ်မှာ ဖြစ်တဲ့နည်းနဲ့ သာသနာပြုချင်စိတ်ဖြစ်ပေါ်လာအောင် ပြောပြသသင့်ပါတယ်။

ဒီလိုလုပ်ပေးခြင်းဖြင့် တောရွာတွေမှာ ဝေးလံတဲ့အရပ်တွေမှာ
သာသနာပြုချင်စိတ်ပေါ်ပေါက်လာမှာဖြစ်ပြီး
အခုလောလောဆယ်တွေ့ကြုံနေရတဲ့ တောရွာတွေမှာ
စာမတတ် ပေမတတ်တဲ့ တောထွက်ရဟန်းတော်ကြီးတွေ
ကြီးစိုးနေတဲ့ဘေးက ကင်းလွတ်သွားမှာပါ။

တကယ်တော့ ဒါတင်မကပါဘူး။
ကိုရင်လေးတွေ ဦးဇင်းပေါက်စလေးတွေကို
(မြင်လိုက်တာနဲ့ ရှိခိုးချင်စိတ်၊ ကြည်ညိုစိတ်ပေါက်လာအောင်)
ဝတ်နည်း ရုံနည်း၊ နေနည်း ထိုင်နည်း၊
စားနည်း သောက်နည်း၊ ပြောနည်း ဟောနည်းတွေကို သင်ပေးသင့်ပါတယ်။

သို့မှသာ အချိုးကျတဲ့ ဦးဆောင်နိုင်တဲ့သူဖြစ်လာမှာပါ။
လူရှေ့သူရှေ့ထွက်ရင် တင့်တယ်သပ်ရပ်တဲ့သူဖြစ်လာမှာပါ။
ရှိခိုးခံရမဲ့သူဟာ ရှိခိုးမဲ့သူထက် အစစအရာရာ သာလွန်နေရပါမယ်။

စားတဲ့နေရာမှာလဲ အဆင့်မြင့်မြင့် စားတတ်မယ်၊
ဝတ်တဲ့နေရာမှာလဲ အဆင့်မြင့်မြင့် ၀တ်တတ်မယ်၊
ပြောတဲ့ ဟောတဲ့နေရာမှာလဲ အဆင့်မြင့်မြင့် ပြောတတ် ဟောတတ်မယ်ဆိုရင်
သူတို့လေးတွေကို ကြည့်ပြီး အထင်သေးမှု မဖြစ်တော့ဘဲ
လေးစားအတုယူအားကျသူတို့အဖြစ် မှတ်ယူလာမှာဖြစ်ပါတယ်။

ဒီလိုလုပ်ပေးခြင်းဟာ သာသနာတော်ကို မြှင့်တင်ပေးရာရောက်တဲ့အပြင်
လူမျိုးကို မြှင့်တင်ပေးရာလဲ ရောက်ပါတယ်။

မြန်မာနိုင်ငံဟာ ဗုဒ္ဓဘာသာအများစုနေထိုင်တဲ့နိုင်ငံဆိုတော့
မြို့ကြီး မြို့လေးတွေရဲ့ ရပ်ကွက်အသီးသီးသီးမှာ
ဗုဒ္ဓဘာသာ ဓမ္မာရုံတွေရှိပါတယ်။
အမြဲတမ်း တံခါးပိတ်ထားတာကို တွေ့ရပါတယ်။

ဒီ ဓမ္မာရုံတံခါးတွေကို ဖွင့်ဘို့ ဖွင့်နိုင်ဘို့က
ပရိယတ္တိစာသင်တိုက် ဆရာတော်တွေရဲ့ တာဝန်လို့ မြင်မိပါတယ်။
ရပ်ကွက်ထဲကဓမ္မာရုံလူကြီး ဂေါပကအဖွဲ့တွေနဲ့တိုင်ပင်ညှိနှိုင်းပြီး
ဥပုသ်နေ့လို ဒါမှမဟုတ် တနင်္ဂနွေနေ့လိုနေ့တွေမှာ
စာသင်တိုက်က အဆင်ပြေလောက်မဲ့ စာချဘုန်းကြီး ဦးဇင်းတွေကို စေလွှတ်ပြီး
(ငှက်ပျောပွဲ၊ အုန်းပွဲကို မကြည့်ဘဲ)
သြကာသမှသည် ငါးပါးသီလ၊ ဗုဒ္ဓ၀င်စသည်တွေကို သင်ကြားပေးသင့်ပါတယ်။

ဒီလို သင်ကြားပေးခြင်းဖြင့် ဗုဒ္ဓဘာသာဝင်တိုင်း ဗုဒ္ဓဘာသာအကြောင်းနားလည်လာပြီး
ဘယ်လိုအကြောင်းကြောင့်ပဲဖြစ်ဖြစ် ဘယ်လိုအခြေအနေမျိုးနဲ့ကြုံကြုံ
အခြားဘာသာကို ကူးပြောင်းတော့မှာ မဟုတ်ပါဘူး။

လောကီဆန်ဆန်အတွေးနဲ့ပြောရရင်လဲ စာသင်တိုက်ဆရာတော် သံဃာတော်များ
(ရိပ်သာက ဘုန်းကြီးတွေလို) ဒကာ ဒကာမတွေနဲ့ တိုက်ရိုက်တွေ့ထိလာနိုင်ပြီး
စာသင်တိုက် စိုပြေရေးအတွက် တစ်ဖက်တစ်လမ်းက အထောက်အကူပြုလာမှာ
မြေကြီးလက်ခတ်မလွဲပါ။

သိသလောက်နဲ့တတ်နိုင်သမျှ အကျဉ်းချုပ်အကြံပြုချင်တာကတော့
ပရိယတ္တိစာသင်တိုက် ဆရာတော်သံဃာတော်များ
မိမိတို့အုတ်တံတိုင်းအတွင်းမှာလဲ တတ်နိုင်သမျှ ခေတ်မီတဲ့ပညာရေးစနစ်ကို ချမှတ်ပြီး
တစ်ပိုင်တစ်နိုင်ထမ်းဆောင်ရပါမယ်။

အုတ်တံတိုင်းအပြင်ထွက်ပြီးတော့လဲ
မိမိတို့နဲ့နီးစပ်ရာ ဒကာ၊ ဒကာမတွေနဲ့ တတ်နိုင်သမျှ နီးစပ်အောင်အားထုတ်ပြီး
ဘာသာအသိ သာသနာအသိတွေကို သူတို့ရဲ့ ဦးဏှောက်ထဲ ထည့်သွင်းပေးသင့်ပါတယ်။

(မြန်မာပြည်၊ မန္တလေး၊ မဟာကုသိုလ်ပရိယတ္တိစာသင်တိုက်
ငွေရတုစာစောင်အတွက် ရေးလိုက်တဲ့ ဆောင်းပါးလေးဖြစ်ပါတယ်)

ကပုန်းကျောင်း ကထိန်ပွဲ

ဗုဒ္ဓဘာသာဝင်သူတော်စင်အပေါင်းတို့ခင်ဗျား...
ကျွန်တော်များကပုန်းဘုန်းတော်ကြီးကျောင်းတွင် သီတင်းသုံးတော်မူသည့်
ဆရာတော်ဒေါက်တာအရှင်ဣန္ဒက
ပင့်သံဃာတော်အရှင်သူမြတ်တို့အား
ကထိန်သင်္ကန်းနှင့် လှူဖွယ်ဝတ္ထုအစုစုတို့ကို လှူဒါန်းမည့်
စုပေါင်းမဟာဘုံကထိန်ပွဲတော်ကြီး ကို
အောက်ဖော်ပြပါအစီအစဉ်အတိုင်း စည်ကားသိုက်မြိုက်စွာ
ကျင်းပမည်ဖြစ်ပါသောကြောင့်
စေတနာကြည်လင် ဗုဒ္ဓဘာသာဝင်သူတော်စင်များအနေဖြင့်
လာရောက်ကြည်ညိုသဒ္ဓါပွါးများနိုင်ရန်အတွက်
လေးစားစွာဖိတ်ကြားအပ်ပါသည်။

********************

အစီအစဉ်
နေ့ရက်
၁၃၇၅ - ခုနှစ်၊ တန်ဆောင်မုန်းလဆန်း ၈ ရက်၊ တနင်္ဂနွေနေ့
10/ 11/ 2013 Sunday

အချိန်
နံနက် (၇း၀၀) နာရီ အရုဏ်ဆွမ်းဆက်ကပ်
(၈း၀၀) နာရီ ပဒေသာပင်လှည့်
(၉း၀၀) နာရီ တရားဟော (Mandarin)
(၁၀း၃၀) နာရီ ပရိသတ်ဧည့်ခံ
(၁၁း၃၀) နာရီ နေ့ဆွမ်းဆက်ကပ်
မွန်းလွဲ(၁း၀၀) တရားဟော (မြန်မာ)

နေရာ
ကပုန်းကျောင်း
19, Jalan 38, Desa Jaya,
Kepong 52100

ခမ်းမြင့်မိသားစုစားသောက်ဆိုင်မှ
ဆွမ်းထမင်းတို့ဖြင့် ကျွေးမွေးဧည့်ခံလှူဒါန်းပါမည်။

Sunday, October 27, 2013

လူမိုက် "အား"


သူတပါးတို့ကို ကြံကြံဖန်ဖန် ကဲ့ရဲ့ ခြင်းသည်
လူမိုက်တို့၏ ကိုးစားရာ အားတည်း။
 
(အင်္ဂုတ္တိုရ်ပါဠိတော်၊ အဋ္ဌက၊ ဂဟပတိဝဂ်၊ ပထမဗာလသုတ်)

Saturday, October 26, 2013

အင်္ဂလိပ်စကားမတတ်လို့

ဝိနည်းပိဋကမှာ အုပ်ရေ ငါးအုပ်ရှိတယ်။
ကိုယ်ပထမဆုံးလေ့လာဖြစ်တာက မဟာဝါ(ပါဠိတော်) စာအုပ်။
ပထမကြီးတန်းကို ကိုရင်ဘ၀ အသက် (၁၇) နှစ်သားတုန်းက အောင်တာဆိုတော့
ဘာလုပ်ရမှန်းမသိဖြစ်နေတုန်း သူငယ်ချင်းကိုရင်တစ်ပါးက
သာမဏေကျော်စာမေးပွဲ ၀င်ဖြေပါလား ဆိုတာနဲ့ သာမဏေကျော်စာမေးပွဲပြဌာန်းစာထဲက
တစ်အုပ်ဖြစ်တဲ့ မဟာဝါ စာအုပ်ဆိုတာကို စလေ့လာဖြစ်တာ။

မြန်မာပြည်မှာ ဘုန်းကြီးကျောင်းပညာရေးစနစ်မှာ
သာမဏေကျော်စာမေးပွဲဆိုတာရှိတယ်။ ကိုရင်တွေအတွက်။
ဒီစာမေးပွဲကို ပထမဦးဆုံး မန္တလေးမှာရှိတဲ့ သကျသီဟအသင်းက စတင်ကျင်းပတာ။
ပြဋ္ဌာန်းစာကို တောင်မြို့၊ မဟာဂန္ဓာရုံဆရာတော်ကြီး ရေးဆွဲပေးတာလို့ သိရတယ်။
အတော်ကောင်းတာပဲ။

ပထမဆင့်၊ ဒုတိယဆင့်၊ တတိယဆင့်ဆိုပြီး သုံးဆင့်ခွဲထားတယ်။
သုံးဆင့်လုံးအောင်ရင် ၀ိနည်းငါးကျမ်းလုံးသင်ပြီးသားဖြစ်သွားပြီ၊
ဓမ္မပဒဋ္ဌကထာနှစ်အုပ်လုံးပေါက်။ အင်္ဂုတ္ထိုရ်သုံးအုပ်လုံးကုန်သွားပြီ။
သဂြိုဟ်နဲ့ သဒ္ဒါလဲ အတော်သိသွာပြီ။

သာသနာရေးဌာနက ကြီးမှူးကျင်းပနေတဲ့ ပဌမပြန်စာမေးပွဲပြဌာန်းစာတွေကို
ဒီသာမဏေကျော်စာမေးပွဲက ပြဌာန်းစာတွေနဲ့ အစားထိုးပြီး
ပြင်သင့်တာပြင်၊ ထည့်သင့်တာထည့်ကာ သင်တန်းနှစ်ကို
(၃ နှစ်မဟုတ်ပဲ ၇ နှစ်လောက်အထိ) တိုးချဲ့သတ်မှတ်လိုက်ရင်
မြန်မာပြည် ရဟန်းသာမဏေတို့ ပညာရေးစနစ်
ဒီထက် အများကြီး ကောင်းလာနိုင်တယ် လို့ စဉ်းစားမိတယ်။

ပဌမပြန်စာမေးပွဲနဲ့ ဓမ္မာစရိယစာမေးပွဲသင်ရိုးညွှန်းတမ်းတွေဟာ
ဒီခေတ်ကာလနဲ့ လိုက်လျှောညီထွေ ရှိမရှိ စီစစ်သင့်ပြီ။
ခေတ်နှင့်ရင်ဘောင်တန်းနိုင်အောင် ပြင်သင့်တဲ့ဘာသာရပ်တွေကို ပြင်ပြီး
ထည့်သင့်တဲ့ အင်္ဂလိပ်စာလို ပထ၀ီလို ဗုဒ္ဓဘာသာသမိုင်းလို
ဘာသာရပ်မျိုးများ သင်ကြားစေသင့်ပြီ။

ကြားဘူးတာလေး ပြောကြည့်ချင်တယ်။
ဟုတ်မဟုတ်ဆိုတာ ကာယကံရှင်တို့ အသိဆုံး။
လွန်ခဲ့တဲ့နှစ် ၂၀ ကျော်က မြန်မာပြည်မှာ ပရိယတ္တိသာသနာ့တက္ကသိုလ်တွေ
ဖွင့်ဘို့အရေး သက်ဆိုင်ရာဆရာတော်များနဲ့
သာသနာရေးအရာရှိများ ငါးနိုင်ငံခရီးထွက်ကြတယ်။

သီရိလင်္ကာနိုင်ငံရောက်တော့ ဝေယျာဝစ္စလုပ်ပေးမဲ့ကိုရင်လေးများက
မြန်မာပြည်က ဆရာတော်ကြီးတွေနားသွားပြီး
ဘာအကူအညီပေးရမလဲ လို့ အင်္ဂလိပ်လို ပြောပါတယ်။
ဆရာတော်ကြီးများက (ပါးစပ်ကိုတိပ်ဖြင့် ပိတ်ထားသည့်ပမာ) ဘာမျှပြန်မပြော။
ပြန်လဲ မပြောတတ်။ ပြန်ပြောရအောင် နားလဲ မလည်။

သို့နှင့် ကိုရင်လေးတွေက ပါဠိဘာသာစကားနဲ့ ပြောင်းပြီး ပြောပြန်တယ်တဲ့။
ဒို့ဆရာတော်ကြီးများကတော့ ပါဠိလိုလဲ တစ်ခွန်းမျှ ပြန်မပြောတတ်ချေ။
အလေ့အကျင့်လဲ မရှိ၊ အသံထွက်ကလဲ မတူတော့
ပါဠိလို ပြောနေတယ်လို့တောင် ထင်မှာ မဟုတ်ဘူး။

ဒီလိုဖြစ်တာ ဘာသာစကား အခက်အခဲကြောင့်ဆိုတာ သူလဲ သိ၊ ကိုယ်လဲ သိ။
နို့၊ ဘာလို့ ဒီဘာသာစကားကို မျိုးဆက်သစ်ရဟန်းသာမဏေများ
မပြောတတ် မဖြစ်ရအောင် ယနေ့အထိ ပထမပြန် ပြဌာန်းစာထဲမှာ
မထည့်ဖြစ်သေးပါသလဲ။
စဉ်းစားသင့်ပြီ၊ ပြုပြင်သင့်ပြီ၊ အကောင်အထည်ဖော်သင့်ပြီ။

ဒီကိစ္စနဲ့ပတ်သက်လို့
မန္တလေး၊ သာသနာ့တက္ကသိုလ်ထွက်ဆိုတော့
တက္ကသိုလ်နှစ်ပတ်လည်မဂ္ဂဇင်းအတွက်
စာမူတောင်းလို့ ဆောင်းပါးတစ်ပုဒ် ဒီလိုခေါင်းစဉ်နဲ့ ရေးပို့လိုက်တယ်။

သာသနာတော် (တကယ်) ထွန်းကားပြန့်ပွါးလိုလျှင်
ဒေါက်တာအရှင်ဣန္ဒက

မြန်မာပြည် ရဟန်းသံဃာတော် ပညာရေးမူအတိုင်း
ပထမကြီးတန်းအောင်လို့ သာသနာ့တက္ကသိုလ် ၀င်ခွင့်ဖြေဆိုကာ
သာသနာ့တက္ကသိုလ်မှာ ပညာသင်ခွင့်ရပြီး
သာသနတက္ကသီလဓမ္မာစရိယဘွဲ့ ရတယ်။
အဲ့တက္ကသိုလ်မှာပဲ မဟာတန်းတက်ခွင့်ရလို့ ဆက်တက်ဖြစ်တယ်။
(၂) နှစ်ဆက်တက်ပြီး ကျမ်းပြုတယ်။
တချိန်တည်းမှာပဲ အစိုရကကျင်းပတဲ့ ဓမ္မာစရိယစာမေးပွဲဝင်ဖြေတာ
သာသနဓဇဓမ္မာစရိယဘွဲ့ ရတယ်။
ဒီတော့ မြန်မာပြည် ရဟန်းသံဃာတော်တွေရဲ့ ပညာရေးကို
လုံးစိပါဌ်စိမသိတောင် အတော်အသင့် နားလည်ခဲ့တယ် လို့ ပြောလို့ရတယ်။

မြန်မာပြည် ရဟန်းသံဃာတော်တွေရဲ့ ပညာရေးစနစ်မှာ
(အကြမ်းဖျင်းအားဖြင့်) ပထမငယ်တန်း၊ ပထမလတ်တန်း၊ ပထမကြီးတန်း၊
ဓမ္မာစရိယတန်း ဆိုပြီး အတန်း (၄) တန်းပဲ ရှိတယ်။
အတန်းက သာ (၄) တန်းပဲ ရှိတာ။
စာသင်သားရဟန်းသံဃာတော်အများစုဟာ
(၁၀) နှစ်လောက်ကြာအောင် သင်ယူရတယ်။
ဒီအတန်း (၄) တန်းကို (၄) နှစ်နဲ့ အောင်မြင်ဘို့ မလွယ်ပါဘူး။
၎ နှစ်နဲ့ အောင်သွားတဲ့ရဟန်းတော် မရှိသလောက် ရှားပါတယ်။
ရဟန်းသံဃာတော်အများစု ၁၀ - နှစ်လောက်ကြာအောင် သင်ယူရနေတဲ့
ဒီအတန်း (၄) တန်းကို ဘာလို့များ အတန်းတိုးပြီး မထားနိုင်ရတာလဲ။
ဘာလို့များ အတန်း (၄) တန်းထဲ သတ်မှတ်ထားရတာလဲ။
မေးခွန်းထုတ်စရာပါ။ ဒီကိစ္စ ၀ိုင်းဝန်းစဉ်းစားပေးရမှာပါ။

နောက်တစ်ချက်က ရဟန်းသံဃာတော်များပညာရေး ပြဌာန်းစာမှာ
ပါဠိဘာသာ (Language) နဲ့ ဗုဒ္ဓဘာသာ (Subject) ရောထွေးနေတယ်။
ရောရောထွေးထွေး သင်ပေး သင်ယူနေရတာ ပြဿနာတော့ မဟုတ်ပါဘူး။
ဒါပေမဲ့ သင်ပေးနေတဲ့ စာချဆရာတော်အများစုက
ပါဠိဘာသာပိုင်း (Language) နဲ့ ဗုဒ္ဓဘာသာအကြောင်းအရာပိုင်း (Subject) ကို ဓမ္မာစရိယတန်းရောက်တဲ့အထိ ခွဲခွဲခြားခြား ပြောမပြဘူး။
သင်မပေးဘူး။ ဗုဒ္ဓဘာသာအကြောင်းအရာပိုင်းသင်ကြားပေးမှု
အားနည်းတယ်လို့ ပြောမယ်ဆို ပိုမှန်နိုင်တယ်။

ဗုဒ္ဓအကြောင်း၊ ကံ ကံ၏အကျိုး၊ ဗုဒ္ဓဘာသာရဲ့ လူမှုရေး၊ နိုင်ငံရေး၊
စီးပွါးရေးအမြင် စသည်၊ နိဗ္ဗာန်သို့ရောက်ကြောင်းကျင့်စဉ် လမ်းစဉ်စတဲ့
အကြောင်းအရာတွေကို နည်းနည်းလေးမှ ပြဌာန်း စာထဲမှာ မတွေ့ရဘူး။

အကျိုးဆက်က ဘာဖြစ်လာသလဲဆိုတော့
စာတတ်လူမိုက် (ပညာတတ်လူမိုက်) တွေဖြစ်လာတယ်။
ဒီထက်ဝမ်းနည်းစရာကောင်းတာက
ဓမ္မာစရိယတန်းအောင်ပြီးသားဦးဇင်းတွေ ဓမ္မာစရိယတန်းမှာ သင်ရတဲ့
သာမညဖလသုတ်၊ အမ္ဗဋ္ဌသုတ်အကြောင်းတွေကို မပြောပြတတ်တာပဲ။

နောက်ပြီး ရဟန်းသံဃာတော်များပညာရေး ပြဌာန်းစာမှာ
ဗုဒ္ဓဘာသာနဲ့ ပတ်သက်တဲ့သမိုင်း၊ ဗုဒ္ဓဘာသာသမိုင်း၊
ဗုဒ္ဓစာပေသမိုင်းပညာရပ်တွေ ထည့်မထားဘူး။

ဒီဘာသာရပ်ဟာ ရဟန်းတော်တိုင်း သိသင့်တဲ့ ဘာသာရပ်ဖြစ်တယ်။
ကိုယ်ဖတ်နေတဲ့ သင်ကြားနေတဲ့ အဋ္ဌကထာစာအုပ် (သို့) ဋီ့ကာစာအုပ်ကို
ဘယ်ခေတ်က၊ ဘယ်ရာစုက၊ ဘယ်ခုနစ်ခန့်က ဘယ်ပုဂ္ဂိုလ်က
ဘယ်ဆရာတော်နဲ့ ခေတ်ပြိုင် ဆရာတော်က ရေးခဲ့တယ်ဆိုတာ သိသင့်တာပေါ့။

ဥပမာ၊ ပုဂံခေတ်က သာသနာရေးအခြေအနေ၊
အင်းဝခေတ်သာသနာရေး အတက်အကျ၊
ဘာ့ကြောင့် သာသနာအားနည်းသွားရတယ်
စတဲ့အကြောင်းအရာတွေကို သာသနာပြုရဟန်းတော်တွေ သိကို သိရပါမယ်။
ဒါမှသာ သာသနာပြုရာမှာ ခရီးရောက်ပါမယ်။

သီရိလင်္ကာနိုင်ငံမှာ ပညာသင်တုန်းက
ကုလားကိုရင်လေးတစ်ပါးနဲ့ စကားပြောဘူးတယ်။
သူတို့ ဗုဒ္ဓဘာသာသမိုင်းသင်ရကြောင်း၊
သမိုင်းထဲမှာ မြန်မာနိုင်ငံက ရွှေတိဂုံစေတီတော်ကြီးအကြောင်းလည်းပါကြောင်း၊ ရွှေတိဂုံစေတီတော်ကြီးအကြောင်းထဲမှာ
တပုဿနဲ့ ဘလ္လိကကုန်သည်ညီနောင် တို့ပါကြောင်း၊
သူတို့ဟာ မြန်မာနိုင်ငံသားများဖြစ်ကြောင်း၊
ကုန်ရောင်းဝယ်ရင်း ဘုရားရှင်နဲ့တွေ့ရာ သူတို့နှစ်ဦးဟာ
အဦးဆုံး သရဏဂုံနှစ်ပါးဆောက်တည်သူများဖြစ်ကြောင်း၊
သူက ပြောပြတယ်။

သူ ဆက်မေးတယ်။
ဒီလို အဦးဆုံး သရဏဂုံဆောက်တည်ရမှာ
ဘယ်ဘာသာစကားနဲ့ ဆောက်တည်တာလဲ၊
ပါဠိဘာသာစကားနဲ့လား၊ မြန်မာဘာသာစကားနဲ့လားတဲ့။
သမိုင်းကို သင်တော့ သမိုင်းထဲက အကြောင်းအရာတွေကို
စူးစမ်းတတ်တဲ့ ဒီသီဟိုဠ်ကိုရင်လေးကို ချီးကျူးရမှာပါ။
သမိုင်းစာအုပ်တွေကပြောပြတာတွေ သင်ယူရတာတွေကို
သီရိလင်္ကာကိုရင်လေး က စူးစမ်းတဲ့သဘောလေးပါ။
မြန်မာကိုရင်၊ ဦးဇင်းများလည်း ဒီလို စူးစမ်းမှုလေးတွေနဲ့
အမှန်တရားကို ရင်ဝယ်ပိုက်နိုင်အောင် ဗုဒ္ဓဘာသာသမိုင်းကို
အတန်းတိုင်းမှာ ထည့်သွင်း သင်ကြားပေးဘို့ လိုအပ်ပါတယ်။

နောက်ပြီး မြန်မာနိုင်ငံ ရဟန်းသံဃာတော်များပညာရေးအားနည်းချက်တစ်ခုက
စာသင်သား တပည့်တွေ မရှင်းလင်းတာကို မေးခွင့် ပေးမထားဘူး။
စာချချိန်ပြည့်ရင် စာချဘုန်းကြီးက
“ကဲ၊ တော်ပြီ” လောက်ပြောပြီး စာအုပ်ပိတ်၊ သူ့အခန်းထဲ ၀င်သွားတော့တာပဲ။
စာသင်သား နားလည်လည် မလည်လည် သူနဲ့ မဆိုင်သလိုဘဲ။
တကယ်တော့ စာချချိန် တစ်နာရီဆိုရင် တစ်နာရီအပြည့်မချဘဲ
မိနစ် (၅၀) လောက်သာ ပို့ချသင့်ပါတယ်။
ကျန်တဲ့ (၁၀) မိနစ်ကို စာသင်သားတွေ မရှင်းတာမေးဘို့ ချန်ထားသင့်တယ်။
ဒီလိုအလေ့အထမရှိတော့ မြန်မာပြည်မှာ စာသင်ပြီး ဓမ္မာစရိယဘွဲ့တွေသာ ရတယ်။
စာပေနဲ့ပတ်သက်တဲ့ အတွေးအခေါ် အယူအဆ တိုးတက်မှု နည်းပါးတာကို တွေ့ရတယ်။

မြန်မာပြည် ရဟန်းသံဃာတော်များစာသင်နည်းစနစ်က
ဗုဒ္ဓစာပေဆိုင်ရာမှာ လွတ်လွတ်လပ်လပ် တွေးခေါ်ခွင့် ပေးမထားဘူး။
မြန်မာပြည် ဘုန်းကြီးကျောင်းပညာရေးစနစ်က
ရှေ့ကဆို နောက်ကလိုက်ရေးရတဲ့
(ကြက်တူရွေး) ပညာရေးစနစ်ဖြစ်န်ေတယ်။
ဒါကို ဒီလိုမှတ်၊ ဒီလိုဖြေနဲ့ ပီးတော့တာပဲ။
စာသင်သားတွေရဲ့ သံသယဆူးညောင့်တွေကို နှုတ်မပေးကြဘူး။
ဆရာကဆို တပည့်က နောက်က လိုက်ရေးရတဲ့ ပညာရေးစနစ်ကြားမှာ
ကိုယ်သံသယရှိတာ မရှင်းတာကို ထမမေးရဲဘူး။
မရှင်းတာမေးရင် ဆရာသမားတွေကို မရိုသေရာရောက်တယ်၊
ဘုကန့်လန့်လုပ် တယ်လို့ အယူရှိတဲ့ စာချဆရာတော်တွေထံမှောက်မှာ
ဗုဒ္ဓဘာသာနဲ့ဆက်စပ်တဲ့သံသယတွေကို (အောင့်အီး) မြိုချရင်း
ဘွဲ့လက်မှတ်ကြီးတွေကို ရခဲ့တယ်။

နောက်ဆုံး အရေးအကြီးဆုံးအချက်က
မြန်မာရဟန်းတော်များ အင်္ဂလိပ်ဘာသာ အရေး အဖတ် အပြော တတ်မြောက်ထားဘို့ပါပဲ။ သိကြပြီးဖြစ်တဲ့အတိုင်း အင်္ဂလိပ်စာ မတတ်ရင်
အသေးအဖွဲ ကိစ္စလေးတွေမှာကို အဆင်ပြေဘို့ မလွယ်ဘူး။
တချို့ နိုင်ငံခြားကို အလည်လာတဲ့ ဆရာတော်ကြီးများလည်း
ဒီအင်္ဂလိပ်စာမတတ်လို့ ဒုက္ခရောက်ပုံတွေ အမျိုးမျိုးကြားနေရတယ်။

ဟိုတလောဆီက အတော်အသင့်နာမည်ရတဲ့
အင်္ဂလိပ်စာမတတ်တဲ့ ဓမ္မကထိကဆရာတော်တစ်ပါး
အင်္ဂလိပ်စာတတ်တဲ့ သူ့တပည့်ဦးဇင်းလေး အကူအညီနဲ့ ဂျပန်နိုင်ငံကို အလည်သွားတယ်တဲ့။
ဂျပန်ရောက်လို့ ရက်အနည်းငယ်ကြာတော့
ဆရာတော်နဲ့ ဦးဇင်းလေး ဘာအစာမကြေဖြစ်တယ် မသိဘူး။
ဦးဇင်းလေးက ဆရာတော့်ကို မြို့လည်ခေါင် ရထားဘူတာရုံနားမှာ ပစ်ထားခဲ့တယ်။
ဆရာတော်က မြန်မာစကားက လွဲလို့ ဘာစကားမှ မပြောတတ်တော့
သူများနိုင်ငံမှာ အခက်တွေ့ တော့တာပေါ့။
နောက်ဆုံး ဘာမှ ကြံရာမရတော့ ရထားဘူတာက ထွက်လာတဲ့
လူအုပ်ကြီးဘက်ကို လှည့်ပြီး
“မြန်မာများ ပါကြပါသလားခင်ဗျား၊ မြန်မာများ ပါကြပါသလားခင်ဗျား” လို့
တစ်နေကုန် အော်နေရသတဲ့။

မြန်မာစာသင်သားရဟန်း၊ သာမဏေများ အင်္ဂလိပ်စာသင်ကြားရေးနဲ့ပတ်သက်ပြီး
ထင်ရှားတဲ့ ဆရာတော်တစ်ပါးရဲ့ အမြင်ကို
၂၀၁၀၊ ဧပြီလထုတ် အပ္ပမာဒမဂ္ဂဇင်းမှာ တွေ့လိုက်ရတယ်။
သာမန်စာသင်တိုက်ဆရာတော်တစ်ပါးက ဒီထင်ရှားတဲ့ဆရာတော်ထံသွားပြီး
အင်္ဂလိပ်စာကို အခြေခံတန်းတွေမှာ ထည့်သွင်းသင်ကြားပေးလိုကြောင်း၊
သင့်မသင့် အကြံတောင်းတယ်။

ထင်ရှားတဲ့ဆရာတော်ပြောတာ က
“အခြေခံစာမေးပွဲတွေမှာ အင်္ဂလိပ်စာထည့်သွင်းပြဌာန်းတာဟာ
ခေတ်အခြေအနေအရ သိပ်ကောင်းပါတယ်။
အရှင်ဘုရားအနေနဲ့ ဘယ်လိုရည်ရွယ်ချက်နဲ့
ထည့်သွင်းချင်တာလဲဆိုတာကိုတော့ မေးစရာရှိတာပေါ့။
လမ်းဘေးချိတ်ထားတဲ့ ဆိုင်းဘုတ်ဖတ်တတ်ရုံ ရည်ရွယ်တာလား၊
နိုင်ငံခြားသားတွေနဲ့ စကားပြောတတ်ရုံလောက် ရည်ရွယ်တာလား၊
ဒါမှမဟုတ် ဗုဒ္ဓဓမ္မတွေကို အင်္ဂလိပ်ဘာသာနဲ့ ကမ္ဘာအထိကျယ်ပြန့်သွားအောင်
သိသွားအောင် ဆောင်ရွက်ချင်တာလား။
ဆိုင်းဘုတ်ဖတ်တတ်တာလောက်ကိုပဲ ခေတ်အမြင်ရှိတယ်လို့ယူဆရင်၊
နိုင်ငံခြားသားတွေနဲ့ စကားလက်ဆုံပြောတတ်တာကိုပဲ
အမြင်ကျယ်တယ်လို့ယူဆရင်တော့ အခြေခံတန်းတွေမှာ
အင်္ဂလိပ်စာထည့်သွင်းပြဋ္ဌာန်းတာကို ဘာမျှ မပြောလိုပါဘူး။

ဒါပေမဲ့ ဗုဒ္ဓဓမ္မတွေကို ကမ္ဘာအထိသိအောင်၊
ကျယ်ပြန့်သွားအောင်လုပ်ဖို့ ရည်ရွယ်ပါတယ် ဆိုရင်တော့
ဒီနည်းစနစ်နဲ့ မသင့်တော်ဘူးထင်တယ်။
ပါဠိ၊ အဋ္ဌကထာ၊ ဋီကာအသွားအလာကို ဓမ္မာစရိယတန်းအောင်မြင်တဲ့အထိ
မြန်မာနိုင်ငံက သင်ကြားနည်းစနစ်နဲ့ ကျကျနနသင်စေချင်တယ်။
ပြီးမှ အင်္ဂလိပ်စာသင်ယူတာက ပိုကောင်းမယ်။
တကယ်စိတ်ဝင် စားတယ်၊ ဥာဏ်အသင့် အတင့်ရှိတယ်ဆိုရင်
အသက် (၃၀) ကျော်ဝန်းကျင်လောက်မှာ
အင်္ဂလိပ်စာတတ်ကျွမ်းတဲ့အဆင့်ထိ ရောက်နိုင်ပါတယ်။” တဲ့။

သူပြောခဲ့တဲ့ အထက်ပါစကားတွေ ထဲမှာ မရှင်းမလင်းတာတွေပါနေတယ်။
ဥပမာ၊ လမ်းဘေးချိတ်ထားတဲ့ ဆိုင်းဘုတ်ဖတ်တတ်ရုံ ရည်ရွယ်တာလား၊
နိုင်ငံခြားသားတွေနဲ့ စကားပြောတတ်ရုံလောက် ရည်ရွယ်တာလား၊
ဒါမှမဟုတ် ဗုဒ္ဓဓမ္မတွေကို အင်္ဂလိပ်ဘာသာနဲ့ ကမ္ဘာအထိကျယ်ပြန့်သွားအောင်
သိသွားအောင် ဆောင်ရွက်ချင်တာလား ဆိုတဲ့ သူ့စကား။

ဆရာတော်အနေနဲ့ ဒီလို မေးစရာမလိုဘူးလို့ယူဆတယ်။
ကိုရင် (သို့) ဘုန်းကြီးတစ်ပါးကို အင်္ဂလိပ်စာသင်းပေး၊ သင်ယူကတည်းက
ဗုဒ္ဓဓမ္မတွေကို အင်္ဂလိပ်ဘာသာနဲ့ ကမ္ဘာအထိ ကျယ်ပြန့် သွားအောင်
သိသွားအောင် ဆောင်ရွက်ချင်တာပါပဲ။

ဒီလို ဗုဒ္ဓဓမ္မတွေကို အင်္ဂလိပ်ဘာသာနဲ့ သင်ပေးသင်ယူသွားရင်းနဲ့ပဲ
လမ်းဘေးက ဆိုင်းဘုတ်တေကို ဖတ်တတ်မှာဖြစ်ပြီး
နိုင်ငံခြားသား တွေနဲ့ စကားပြောတတ်လာမှာပါ။

နောက်ပြီး ဆရာတော်က
“ဆိုင်းဘုတ်ဖတ်တတ်တာလောက်ကိုပဲ ခေတ်အမြင်ရှိတယ်လို့ယူဆရင်၊
နိုင်ငံခြားသားတွေနဲ့ စကားလက်ဆုံပြောတတ်တာကိုပဲ
အမြင်ကျယ်တယ်လို့ယူဆရင်တော့ အခြေခံတန်းတွေမှာ
အင်္ဂလိပ်စာထည့်သွင်းပြဋ္ဌာန်းတာကို ဘာမျှ မပြောလိုပါဘူး” လို့ ဆိုတယ်။

ဒါက ဘာကို ဆိုလိုတာပါလဲ။

စာရေးသူအမြင်ကတော့
အင်္ဂလိပ်စာသင်ယူတာဟာ အင်္ဂလိပ်စကားကို ပြောတတ်ဖို့၊ ရေးတတ်ဖို့၊ ဖတ်တတ်ဖို့ပါပဲ။
ဆိုင်းဘုတ်ကိုပဲ ဖတ်ရ ဖတ်ရ၊ သတင်းစာကိုပဲ ဖတ်ရ ဖတ်ရ၊
ပိဋကတ်စာပေကိုပဲ ဖတ်ရ ဖတ်ရ၊ ဖတ်တတ်ဖို့ပါပဲ။

အင်္ဂလိပ်စကားပြောရာမှာလဲ အကြောင်းအရာမျိုးစုံကို
တရုတ်လူမျိုးနဲ့ပြောရ ပြောရ၊ ကုလားလူမျိုးနဲ့ ပြောရ ပြောရ၊ ပြောတတ်ဖို့ပါပဲ။

ဆရာတော်ဆက်ပြောတာက
“ဒါပေမဲ့ ဗုဒ္ဓဓမ္မတွေကို ကမ္ဘာအထိ သိအောင်၊ ကျယ်ပြန့်သွားအောင် လုပ်ဖို့
ရည်ရွယ်ပါတယ် ဆိုရင်တော့
ဒီနည်းစနစ်နဲ့ မသင့်တော်ဘူးထင်တယ်။
ပါဠိ၊ အဋ္ဌကထာ၊ ဋီကာအသွားအလာကို ဓမ္မာစရိယတန်းအောင်မြင်တဲ့အထိ
မြန်မာနိုင်ငံက သင်ကြားနည်းစနစ်နဲ့ ကျကျနနသင်စေချင်တယ်။
ပြီးမှ အင်္ဂလိပ်စာသင်ယူတာက ပိုကောင်းမယ်” တဲ့။

ဆရာတော်ရဲ့ ဒီစကားအရ
ဆရာတော်က အခြေခံတန်းတွေမှာ အင်္ဂလိပ်စာကို မပြဋ္ဌာန်းစေလိုဘူး။
ဝါ - အခြေခံတန်း စာသင်သားတွေကို
အင်္ဂလိပ်စာ မသင်ကြနဲ့လို့ ပြောလိုက်တာပါ။

စာရေးသူအမြင်ကတော့
အခြေခံတန်းမှာကတည်းက သူ့အရွယ် သူ့အဆင့်နဲ့အညီ သိသင့်တဲ့
စာသင်သားလဲ ကျက်မှတ်ဖတ်နိုင်လောက်တဲ့
အခြေခံအင်္ဂလိပ်စာကို ပြဋ္ဌာန်းပေးပြီး သင်ကြားပေး ထားသင့်တယ်။
ဒီလိုလုပ်ပေးခြင်းဖြင့် ပါဠိစာပေဖက်မှာ အားနည်းသွားမယ်လို့တော့
(လုံးဝ) မယုံကြည်ဘူး။
ဘာ့ကြောင့်လဲ။

အင်္ဂလိပ်စာ မသင်ရလဲ ပါဠိစာပေ အားနည်းချင် နည်းနေတာပဲ မဟုတ်လား။
တော်တဲ့လူက တော်တာပါပဲ။ ညံ့တဲ့လူက ညံ့နေတာပါပဲ။
ဆရာတော်က စာသင်သားသံဃာတော်တွေကို
ဓမ္မာစရိယတန်းအောင်မှ
အင်္ဂလိပ်စာ သင်ယူစေချင်တယ် ဆိုတော့
အတန်းပြဋ္ဌာန်းစာထဲမှာ မထည့်သွင်းပဲနဲ့ အလွတ်သင်ယူစေချင်တဲ့
သဘောလို့ ယူဆမိတယ်။

ဆရာတော်ရဲ့ ဒီအမြင်ဟာ ယေဘုယျမဆန်ဘူးလို့ယူဆပါတယ်။
ဆရာတော်ကိုယ်တိုင်ကတော့ ဓမ္မာစရိယတန်းကို ငယ်ငယ်ရွယ်ရွယ်နဲ့အောင်မြင်ခဲ့တော့ အင်္ဂလိပ်စာလေ့လာဖို့ အချိန်တွေ အများကြီးရတာပေါ့။

ဒါပေမဲ့ အများစုက အသက် ၃၀ လောက်မှ ဓမ္မာစရိယတန်းကို အောင်ကြတာ။ ဓမ္မာစရိယတန်းအောင်ပြီးရင်လဲ စာသင်တိုက်အများစုက လက်ခံချင်ကြတာမဟုတ်ဘူး။
ဆိုတော့ အသက်လဲကြီး နေစရာလဲ အခက်အခဲတွေ့နေတဲ့
ဓမ္မာစရိယအောင်မြင်ပြီးတဲ့ရဟန်းတော်ဟာ
အင်္ဂလိပ်စာသင်ယူဖို့ အခွင့်အရေး အတော့်ကို နည်းသွားပါပြီ။

စာရေးသူအမြင်က
ဒီအင်္ဂလိပ်စာကို အခြေခံအတန်းတွေမှာကတည်းက
ပြဋ္ဌာန်းစာတစ်ခုအဖြစ် သတ်မှတ်ပေးပြီး သင်ယူစေချင်တာ။

ထူးချွန်တဲ့ရဟန်းတော်များက
ပိဋကတ်စာပေတွေကို အင်္ဂလိပ်ဘာသာသို့ ပြန်ဆိုနိုင်ကြမှာဖြစ်ပြီး
ဘက်စုံတော်တဲ့ နိုင်ငံခြားသာသနာပြု
ရဟန်းတော်များဖြစ်လာမှာ သေချာပါတယ်။

အလည်အလတ်တန်းစားရှိတဲ့ရဟန်းတော်များကတော့
ဓမ္မာစရိယတန်းအောင်ပီးတာနဲ့ မိမိတို့ ကျောင်းထိုင်မဲ့ နေရာအသီးသီးမှာ
(၁၀) တန်းကျောင်းသား ကျောင်းသူလေးတွေကို
အင်္ဂလိပ်စာ ပြနိုင်တဲ့အဆင့်ရောက်လာမှာပါ။

အဲ၊ အနိမ့်ဆုံးအဆင့်ကတော့
လမ်းဘေးကဆိုင်းဘုတ်တွေ လမ်းညွှန်တွေကို ဖတ်တတ်လာပြီး
အထက်တစ်နေရာမှာ တင်ပြခဲ့တဲ့
ဂျပန်အလည်သွားတဲ့ ဆရာတော်ကြီးလို
“မြန်မာများ ပါကြပါသလားခင်ဗျား၊ မြန်မာများ ပါကြပါသလားခင်ဗျား” လို့
အော်စရာ မလိုတော့ဘူးပေါ့။

ပြောချင်တာက
ကိုယ့်နိုင်ငံက ရဟန်းတော်များ ထူးထူးချွန်ချွန်သာသနာပြုနိုင်အောင်
ပါဠိစာပေရော၊ ဗုဒ္ဓဘာသာစာပေရော၊ ဗုဒ္ဓဘာသာသမိုင်းရော၊ အင်္ဂလိပ်စာရော
ပြဋ္ဌာန်းစာထဲမှာ ထည့်ပြီး သင်ကြားပေးစေချင်တာပါ။

(မန်း သာသနာ့တက္ကသိုလ် နှစ်ပတ်လည်စာစောင်အတွက် ရေးထားတာပါ)

Friday, October 25, 2013

အချစ်သုံးမျိုး


ဒီနေ့ သတို့သား မောင်ဇော်ဇော်ဦးနဲ့ သတို့သမီးမအိအိခင်တို့
လောကကြီးကို နှစ်ယောက်အတူ လက်တွဲရင်ဆိုင်မယ်လို့ ဆုံးဖြတ်ချက်ချပြီး
ကိုယ့်အိုးကိုယ့်အိမ်ကို တည်ထောင်တဲ့ အိမ်ထောင်ပြုကြတဲ့ပွဲပေါ့။

တနည်းအားဖြင့် တစ်ဦးနဲ့တစ်ဦး ယုံကြည်လို့  အချင်းချင်း
ချစ်ခင်စုံမက်ပြီး လက်ထပ်ကြတဲ့ပွဲဖြစ်ပါတယ်။
ချစ်တာကို ပါဠိလို ပေမလို့ခေါ်တယ်။

ပေမလို့ခေါ်တဲ့ အချစ်က သုံးမျိုးသုံးစားရှိတယ်လို့ မှတ်သားဘူးတယ်။
(၁) တဏှာပေမ
(၂) ဂေဟဿိတပေမ
(၃) မေတ္တာပေမ တဲ့။

နံပါတ် (၁) တဏှာပေမဆိုတာ သမီးရည်းစားချစ်ကိုပြောတာ။
လူရယ်လို့ဖြစ်လာရင် အရွယ်ရောက်လာတဲ့အခါ
သမီးရည်းစားဘ၀ကို ရောက်ကြတာချည်းပဲ။
ဒီလို သမီးရည်းစားဘ၀ရောက်ပြီး သမီးရည်းစားချစ် ချစ်ကြတာကို
တဏှာပေမလို့ ခေါ်ပါတယ်။

နံပါတ် (၂) အမျိုးအစား ဂေဟဿိတပေမကို ၀တ္တရားချစ်လို့
အလွယ်နည်းနဲ့ ဘာသာပြန်ဆိုနိုင်ပါတယ်။
ဝတ္တရားချစ်ဆိုတာက လင်ရယ် မယားရယ်လို့ ဖြစ်လာပြီဆိုရင်
လင့်မှာလည်း လင့်ဝတ္တရား၊ မယားမှာလည်း မယားဝတ္တရား
အသီးအသီးရှိကြပါတယ်။

မထေမဲ့ကင်း၊ အပ်နှင်းဥစ္စာ၊ မိစ္ဆာမမှား၊ ၀တ်စားဆင်ယင်၊ မြတ်နိုးကြင်ဆိုတဲ့အတိုင်း
လင်ယောက်ကျားလုပ်တဲ့သူက
ကိုယ့်ဇနီးမယားအပေါ်မှာ (ငါကရှာကျွေးနေရတာပဲဆိုပြီး) မထေမဲ့မြင်မလုပ်ဖို့၊
ရလာတဲ့ ငွေ၊ စည်းစိမ်ဥစ္စာတွေကို ဇနီးမယားကို အပ်နှံဖို့၊
ကိုယ့်ဇနီးမယားကလွဲရင် ကျန်တဲ့ မိန်းမတွေကို ဖွဲ၊ ဆန်ကွဲလို့ သဘောထားဖို့၊
ကိုယ့်ဇနီးမယားကို နေ့ထူးနေ့မြတ်တွေမှာ အ၀တ်အစားလေးတွေ၊
ရတနာပစ္စည်းလေးတွေဝယ်ပြီး လက်ဆောင်ပေးကာ ဆင်ယင်ဖို့၊
ကိုယ့်ဇနီးမယားကို ကြင်နာမြတ်နိုးဖို့ ဆိုတဲ့
ဝတ္တရားတွေကို ကျေပြွန်အောင် ထမ်းဆောင်ရပါမယ်။

ဇနီးမယားလုပ်တဲ့သူကလဲ
အိမ်တွင်းမှုလုပ်၊ သိမ်းထုတ်သေချာ၊ မိစ္ဆာကြဉ်ရှောင်၊ လျော်အောင်ဖြန့်ချိ၊ ပျင်းရိမမူ
ဆိုသည့်အတိုင်း
အိမ်တွင်းအလုပ်တွေဖြစ်တဲ့ ထမင်းချက်၊ ဟင်းချက်၊ အ၀တ်လျှော်စတဲ့
အိမ်တွင်းအလုပ်တွေကို လုပ်ဆောင်ရပါမယ်။

(ဒီအချက်ကို ပြောပြတော့ သတိုးသမီးဖြစ်တဲ့ မအိအိခင်က
သူလည်း အပြင်ကို အလုပ်ထွက်လုပ် နေရလို့
အိမ်လုပ်ငန်းတွေကို လင်ယောက်ကျားဖြစ်တဲ့သူလည်း
လုပ်ဆောင်သင့်ပါတယ်ဘုရားလို့ ရယ်ရယ်မောမော လျှောက်လာပါတယ်။)

မအိအိခင်ပြောတာ မှန်ပါတယ်။

ဟိုးလွန်ခဲ့တဲ့နှစ်ပေါင်း ၂၆၀၀ နီးပါးက အိန္ဒိယနိုင်ငံ လူ့အဖွဲ့အစည်းမှာ
ဒီလင့်ဝတ္တယား မယားဝတ္တရားတွေကို ဘုရားရှင် ဟောကြားခဲ့တာပါ။

အိန္ဒိယထုံးစံက
အိမ်ထောင်ပြုမယ်ဆိုရင် အမျိုးသမီးများက အမျိုးသားများကို တင်တောင်းရပါတယ်။
အင်္ဂလိပ်လို Dowry လို့ခေါ်ပါတယ်။
လင်ယောက်ကျားရဲ့ ပညာဂုဏ် ဆွေဂုဏ်မျိုးဂုဏ် အဆင့်အတန်းပေါ်မူတည်ပြီး
တင်တောင်းရတဲ့ငွေကြေးပမာဏ အနည်းအများကွာပါတယ်။
လင်ယောက်ကျားကျေနပ်တဲ့အထိ ဇနီးမယားလုပ်မဲ့သူဘက်က ရှာကြံပေးရပါတယ်။

ဒီလိုဇနီးမယားလုပ်မဲ့သူက လင်ယောက်ကျားစိတ်ကြိုက် တင်တောင်းပြီးလို့
အကြင်လင်မယားအဖြစ်ရောက်သွားပြီဆိုရင် ဇနီးမယားက ဘာမှ မလုပ်တော့ပါဘူး။
အိမ်တွင်းမှာပဲ ကုတ်နေတော့တာပဲ။
ဒီစနစ် ဒီဓလေ့က ဒီနေ့အထိပါပဲ။

ဒါ့ကြောင့် အိန္ဒိယနိုင်ငံကို သွားရင်
ဈေးရောင်းနေတာလဲ ကုလားပဲ၊ စားပွဲထိုးလုပ်နေတာလဲ ကုလားပဲ။
နေရတကာမှာ ကုလားအထီးတွေချည်းဘဲ။
ဈေးတွေမှာလည်း ကုလားအထီးတွေဘဲ ဈေးရောင်း ဈေးဝယ်လုပ်နေတာ တွေ့ရပါတယ်။

ဒီလိုဓလေ့ထုံးစံရှိတဲ့ အိန္ဒိယလူ့အဖွဲ့အစည်းမှာ
ဇနီးမယားလုပ်တဲ့သူကို အိမ်တွင်းအလုပ်တွေကို ကျေပြွန်အောင် လုပ်ပါလို့
ဘုရားရှင်ဟောခဲ့တာပါ။

ဒီနေ့ဒီအချိန်အခါ ဒို့လူမျိုးအဖွဲ့အစည်းမှာတော့
လင်ယောက်ကျားရော၊ ဇနီးမယားပါ မနက်က မိုးချုပ် အပြင်ထွက်အလုပ်လုပ်နေရတာဆိုတော့
လင်ရော မယားပါ အိမ်တွင်းအလုပ်တွေကို အတူတူလုပ်ကြပေါ့။

နောက် ဇနီးမယားဝတ္တရားတွေက
လင်ယောက်ကျားက အပ်နှံတဲ့ ငွေ ပစ္စည်းဥစ္စာတွေကို
သေသေချာချာ သိမ်းဆည်းထားရပါမယ်။
ကိုယ့်ယောက်ကျားကလွဲလို့ တခြားယောက်ကျားတွေကို
ဖွဲ ဆန်ကွဲလို သဘောထားရပါမယ်။
တချို့က လင်ယောက်ကျားဘေးထားပြီး ရုပ်ရှင်ကားကြည့်ရင်း
“နေတိုးက အတော်ချောတာပဲ လို့ ပြောတတ်ကြတယ်။
မပြောသင့်ပါဘူး။ ဒါမျိုးကအစ ရှောင်ကြဉ်ရပါမယ်။
သူ့ဘက် ကိုယ့်ဘက် သင့်လျော်အောင် ဖြန့်ချိရပါမယ်။
မပျင်းမရိဘဲ တက်တက်ကြွကြွ နေထိုင်ရပါမယ်။

ဒီလိုအသီးအသီးရှိကြတဲ့ ၀တ္တရားတွေကို တာဝန်ကျေပြွန်အောင် ထမ်းဆောင်တာကို
တာဝန်ကျေပြွန်စွာ ထမ်းဆောင်ရင်းချစ်ကြတာကို
ဂေဟဿိတပေမ - ၀တ္တရားချစ်လို့ခေါ်ပါတယ်။

နံပါတ် (၃) ဖြစ်တဲ့  အချစ်ကတော့
မေတ္တာပေမ လို့ခေါ်ပါတယ်။ မေတ္တာချစ်ပေါ့။
မေတ္တာဆိုတာ ဘာပဲပြုပြု၊ ဘာပဲ ပြောပြော၊ ဘာပဲ ကြံကြံ
သူ့အကျိုးလိုလားစိတ်နဲ့ ပြုမူပြောဆိုကြံစည်တာကိုပြောတာပါ။
လင်ယောက်ကျားက ဇနီးမယားအကျိုးအတွက်
ပြုမူပြောဆိုကြံစည်ရမှာဖြစ်သလို
ဇနီးမယားကလည်း လင်ယောက်ကျားအကျိုးမျှော်ကိုးပြီး
ပြုမူ ပြောဆို ကြံစည်ရပါမယ်။
ဒါမျိုးကို မေတ္တာပေမ - မေတ္တာချစ်လို့ခေါ်ပါတယ်။

အိမ်ထောင်ပြုလို့ လင်ရယ် မယားရယ်လို့ဖြစ်လာမှတော့
သမီးရည်းစားချစ်နဲ့လည်း ချစ်ရမှာပါဘဲ။
ဝတ္တရားချစ်နဲ့လည်း ချစ်ရမှာပါဘဲ။
မေတ္တာချစ်နဲ့လည်း ချစ်ရမှာပါဘဲ။

ဒီသုံးမျိုးလုံးနဲ့ချစ်ရင် ပျော်ရွှင်ချမ်းမြေ့တဲ့အိမ်ထောင်သည်တွေဖြစ်မှာပါ။
ဒါ့ကြောင့် ဒီအချစ်သုံးမျိုးလုံးနဲ့ ချစ်နိုင်ကြပါစေ။
ချစ်နိုင်ပြီးသကာလ ဒီလင်ဒီမယား သက်ဆုံးတိုင်
အိုအောင်မင်းအောင်ပေါင်းနိုင်ကြပါစေ။

သာဓု သာဓု သာဓု
 
မနေ့က မင်္ဂလာဆွမ်းကျွေးမှာ ဟောခဲ့တဲ့တရားဖြစ်ပါတယ်

Thursday, October 24, 2013

ကွမ်းစားသူအတွက်


ကွမ်းစားသူတွေအတွက် ဥပဒေ ထုတ်ပေးပါ။

မြန်မာလူမျိုးတွေ ကွမ်းအတော်စားကြတယ်။
ဟိုတလောက မြန်မာပြည်ရောက်တုန်းက အညာဘက် ဇာတိမြေကို သွားတော့
အသိဒကာတစ်ယောက်ကို ခေါ်သွားတယ်။
ဒကာက ကားလည်းမောင်း၊ ကပ္ပိယလည်း လုပ်ပေါ့။
ဒကာက ကားမောင်းရင်း ကွမ်းအတော်ဝါးတယ်။
ရန်ကုန် မန္တလေး အမြန်လမ်းမပေါ်မှာ
ကွမ်းဝါးရင်း ကားတံခါးကို ဖွင့်၊ ကွမ်းထွေးတွေ ထွေးထုတ်နေလို့
ပြောဆို ဆုံးမဖြစ်တယ်။
 
“ကွမ်းထွေးတွေကို အဲ့လို တွေ့ကရာ နေရာမှာ မထွေးသင့်ဘူး ဒကာကြီး”
“ဒီနားမှာ ဘယ်သူမှ မရှိပါဘူး။ ဘယ်သူမှ မမြင်ပါဘူး ဦးဇင်းရဲ့”
“ဘယ်သူမှ မရှိရှိ၊ ဘယ်သူမှ မမြင်မြင်၊ လမ်းပေါ်မှာ ကွမ်းထွေး မထွေးရဘူး ဒကာကြီးရဲ့၊
လမ်းလည်း ညစ်ပတ်တယ်၊ ကားကို အရှိန်နဲ့မောင်းနေတော့ ကားတံခါးဖွင့် ကွမ်းထွေးထွေးတာ
အန္တရာယ်လည်း များတယ်မို့လား။ ဦးဇင်းတို့လူမျိုးတွေ ရန်ကုန်မြို့လယ်ခေါင် လမ်းတွေပေါ်မှာလည်း
ကွမ်းထွေးတွေ ထွေးထားတာ မြင်မကောင်းဘူး။ တချို့လူတွေ ဘတ်စ်ကားပေါ်မှာ ကွမ်းဝါးပြီး
ပလပ်စတစ်အိပ်လေးတွေထဲ ထွေးထည့်တယ်။
အိပ်ပြည့်တော့ ကွမ်းထွေးထုတ်ကို လမ်းပေါ်ပစ်ချတယ်။
အတော်လေး အဆင့်အတန်းနိမ့်တယ်။
ကိုယ်ဒီလိုလုပ်တာ အဆင့်အတန်းနိမ့်ပါလားဆိုတဲ့အသိတော့ ရှိသင့်တယ်။
တကယ်တော့ ဒီလိုလုပ်တာ နိုင်ငံနဲ့ လူမျိုးပါ ထိခိုက်တယ်။
နိုင်ငံနဲ့လူမျိုးပါ သိက္ခာကျတယ်။
ကိုယ်ထွေးတဲ့တံတွေး ကိုယ်ကိုယ်တိုင်လည်း ပြန်မကြည့်ချင်ဘူး။
ကိုယ်ကိုယ်တိုင်မကြည့်ချင်တဲ့ ကိုယ့်တံတွေးကို သူများက ဘယ်ကြည့်ချင်ပါ့မလဲ။
အင်မတန် ရွံစရာကောင်းတာကိုး။
ဒီလို ရွံစရာကောင်းတဲ့ ကွမ်း (တံတွေး) တွေကို တွေ့ကရာနေရာတွေမှာ မထွေးထုတ်သင့်ဘူး။
ဖြစ်နိုင်ရင် ကွမ်းမစားတာ အကောင်းဆုံးပဲ။
မလေးရှားနိုင်ငံမှာတော့ ကွမ်းတံတွေးကြောင့် အိမ်ငှားရတာတောင် ရွှေမြန်မာတွေ အခက်တွေ့နေပြီတဲ့။
မလေးရှားနိုင်ငံက အိမ်ရှင်တွေက မြန်မာဆိုရင် အိမ်မငှားချင်တော့ဘူးတဲ့။
ဘာလို့လဲဆိုတော့
မြန်မာတွေကို အခန်းငှားလိုက်ရင် အိမ်ငှားတင်လိုက်ရင်
အဲ့ဒီအိမ်ရဲ့ အတက်အဆင်းလှေခါးတွေရဲ့ ဒေါင့်တွေမှာ ကွမ်းထွေးတွေနဲ့ ညစ်ပတ်လွန်းလို့တဲ့။
သန့်ရှင်းနေတဲ့ လှေခါးဒေါင့်တွေမှာ ကွမ်းထွေးမထွေးသင့်ဘူးဆိုတဲ့ အသိဥာဏ်တောင်
ဒို့လူမျိုးတွေမှာ မရှိကြတော့ဘူးလား။

Wednesday, October 23, 2013

ဒီဓလေ့ (၃)

 
ဗုဒ္ဓဘာသာစာပေမှာ
“ကျေးဇူးရှိတဲ့သူတွေကို ကျေးဇူးသိပြီး ကျေးဇူးပြန်ဆပ်တတ်တဲ့ပုဂ္ဂိုလ်ကို
လောကကြီးထဲမှာ တွေ့ရခဲတယ်” ဆိုတဲ့စာကြောင်းလေးရှိပါတယ်။
သားသမီးတွေအတွက် မိဘတွေဟာ အင်မတန်ကျေးဇူးကြီးမားတဲ့သူတွေပါ။
ဒီလိုကျေးဇူးကြီးမားတဲ့ မိဘတွေကို ကျေးဇူးသိပြီး
ကျေးဇူးပြန်ဆပ်တတ်တဲ့သားသမီးမျိုး တွေ့ရခဲတယ်လို့ ဗုဒ္ဓစာပေက ဆိုလိုတာပါ။

မြန်မာစကားမှာ
“ရခဲမှ ရတနာ၊ သိခဲမှ ပညာ” လို့ ပြောလေ့ရှိပါတယ်။
ခဲခဲရင်းရင်းရတဲ့အရာဝတ္ထုကိုမှ ရတနာ၊
ခဲခဲရင်းရင်း သိလိုက်ရတဲ့ အသိဥာဏ်မျိုးကိုမှ ပညာလို့ ဆိုလိုတာပါ။

သားသမီး ၅ ယောက်ရှိတဲ့မိဘတွေမှာ
အဲဒီမိဘတွေရဲ့ ကျေးဇူးကို ပြန်လည်သိတတ်တဲ့ သားသမီးမျိုးရခဲပါတယ်။
မိဘကျေးဇူးကို သားသမီး ၅ ယောက်စလုံး မသိနိုင်ပါဘူး။
သားသမီး ၅ ယောက်ထဲကမှ သား ၁ ယောက်က မိဘကျေးဇူးကို သိတတ်တယ်ဆိုရင်
အဲ့လိုသားမျိုးက တကယ့်ကို ရခဲတဲ့သားပါ။
ဒီလို ကျေးဇူးသိတတ်တဲ့ရခဲတဲ့သားမျိုးနဲ့ ရခဲတဲ့ ရတနာဆိုတဲ့စကားနဲ့ တွဲစပ်ပြီး
သားရတနာလို့ ခေါ်ရပါတယ်။

သားသမီးငါးယောက်ရှိတဲ့ မိဘတွေအတွက်
မိဘကို ပြန်လည်စောင့်ရှောက်တဲ့၊ မိဘကို ပြန်လည်ထောက်ပံ့တဲ့
မိဘကို ပြန်လည်ကျေးဇူးပြုတတ်တဲ့ သား သို့မဟုတ် သမီးကို
သားရတနာ သမီးရတနာလို့ ခေါ်ရပါမယ်။

မိဘကို ပြန်လည်မစောင့်ရှောက်၊ မထောက်ပံ့၊
မိဘကျေးဇူးမသိ ကျေးဇူးမတုန့်ပြန်တဲ့ သား သို့မဟုတ် သမီးမျိုးကို
မိဘတွေက မွေးထုတ်လိုက်တဲ့အတွက်
သား လို့ပဲ ခေါ်ရမယ်၊ သမီးလို့ပဲ ခေါ်ရပါမယ်။
သူတို့ဟာ သားရတနာ မဟုတ်ကြဘူး။ သမီးရတနာ မဟုတ်ကြဘူး။

ကျေးဇူးဆိုတဲ့စကားနဲ့စပ်လို့
အာမိသ - ပိုက်ဆံ၊ ပစ္စည်းဝတ္ထု၊ တိုက်တာအဆောက်အဦတွေနဲ့ကျေးဇူးဆပ်ခြင်း၊
ဓမ္မ - မိဘတွေ တရားအသိတိုးပွါးအောင် တရားဓမ္မဗဟုဿုတတိုးပွါးဘို့အတွက် အခွင့်အလန်းများဖန်တီးပေးခြင်းရယ်လို့ ၂ မျိုးရှိပါတယ်။

ဗုဒ္ဓစာပေမှာ သားသမီးများအနေနဲ့ မိဘတွေကို ကျေးဇူးဆပ်ဖို့
အကောင်းဆုံးနည်းလမ်းတွေကို ဘုရားရှင် ညွှန်ပြထားပါတယ်။

ဘုရားရှင် အလိုကျ
သားသမီးများအနေနဲ့ မိဘတွေကို
အကောင်းဆုံး ကျေးဇူးဆပ်နည်းတွေကတော့
(၁) အဿဒ္ဓေ သဒ္ဓါသမ္ပဒါယ သမာဒပေတိ -
ဘာသာရေး မကိုင်းရှိုင်းတဲ့ မိခင်ဖခင်တွေကို ဘာသာရေးကိုင်းရှိုင်းလာအောင်
ပြုမူဆောင်ရွက်ပေးပါ တဲ့။
(၂) ဒုဿီလေ သီလသမ္ပဒါယ သမာဒပေတိ -
သီလမရှိတဲ့ သီလမဆောက်တည်နိုင်တဲ့ မိခင် ဖခင်တွေကို
သီလရှိလာအောင် သီလဆောက်တည်နိုင်လာအောင်
သီလ ဆောက်တည်ချင်လာအောင် ပြုမူဆောက်ရွက်ပေးပါတဲ့။
(၃) မစ္ဆရီ စာဂသမ္ပဒါယ သမာဒပေတိ -
နှမျှောတွန့်တိုပြီး ဒါနမျိုးစေ့မချချင်တဲ့ မိခင်ဖခင်တွေကို
ဒါနအမှုပြုချင်လာအောင် တိုက်တွန်းပေးပါ တဲ့။
(၄) ဒုပ္ပညေ ပညာသမ္ပဒါယ သမာဒပေတိ -
(ဒီမှာ ပညာကို ၀ိပဿနာပညာ ကို ယူလိုက်မယ်၊ ဆိုတော့
ဝိပဿနာပညာမရသေးတဲ့ မိခင်ဖခင်တွေကို ၀ိပဿနာပညာတွေ ရလာအောင်
ပြုမူဆောင်ရွက်ပေးပါတဲ့။
ဒါကို အဖြောင့် ထင်သာမြင်သာအောင် ဘာသာပြန်ပြပေးရရင်
တရားမထိုင်ချင်တဲ့ မိခင်ဖခင်တွေကို
တရားထိုင်ချင်စိတ်ဖြစ်ပေါ်လာအောင် ပြုမူဆောင်ရွက်ပေးပါတဲ့။

ဘုရားရှင်က ဒီလေးမျိုးကို မိဘတွေ ကျင့်သုံးချင်လာအောင်
ကျင့်သုံးလာအောင် သားသမီးတွေအနေနဲ့
ပြုလုပ်ပေးသင့်တယ်၊ ပြုလုပ်ပေးရမယ်တဲ့။
ဒါဟာ မိဘတွေကို အကောင်းဆုံး ကျေးဇူးဆပ်နည်းနဲ့ ကျေးဇူးဆပ်တာပါတဲ့။

ဘုရားရှင်ညွှန်ပြခဲ့တဲ့ ဒီတရား ၄ ပါးကို စဉ်းစားကြည့်လိုက်ရင်
အတိတ်ကံတစ်ခုခုကြောင့် ဒီဘ၀မှာ ဆုံးစည်းလို့ မိသားစုတစ်စုတည်းမှာ
အတူတူလူလာဖြစ်တဲ့သူတွေအနေနဲ့
နိဗ္ဗာန်မရမီ သံသရာခရီးလျှောက်လှမ်းရာမှာ
အဆင့်မြင့်မြင့်လျှောက်လှမ်းရဘို့ ဒီတရားလေးပါးကို ကျင့်သုံးအောင်
အချင်းချင်း တိုက်တွန်းကြဘို့ပါဘဲ။

ဒီတရားလေးပါးကို မိသားစုအချင်းချင်း ကျင့်သုံးစေတာဟာ
သံသရာခရီးလျှောက်လှမ်းရာမှာ အဆင့်မြင့်မြင့် လျှောက်လှမ်းနိုင်ဘို့အရေး
 လက်တွဲ ခေါ်ရာလည်း ရောက်ပါတယ်။
သံသရာခရီးအတွက် ဖေးမကူညီရလည်း ရောက်ပါတယ်။

ဒါ့ကြောင့် ဒီတရားလေးပါး မကျင့်သုံးချင်တဲ့ မကျင့်သုံးနိုင်တဲ့
မိဘတွေကို ကျင့်သုံးစေတာဟာ ဒီဘ၀ကောင်းစားရေးအတွက်သာမဟုတ်ပဲ
သံသရာခရီးကောင်းစားရေးအတွက်ပါဖြစ်လို့
အကောင်းဆုံးကျေးဇူးဆပ်နည်းလို့ ဘုရားရှင်ဟောခဲ့တာနေမှာလို့ စဉ်းစားမိပါတယ်။

ဆိုတော့ကား
မိဘတွေကိုသာမဟုတ်၊
နီးစပ်ရာ ညီ အစ်ကို၊ ဆွေမျိုးသားချင်း၊ မိတ်ဆွေအပေါင်းအသင်းတို့ကိုလည်း
ဒီတရားလေးမျိုးကို ကျင့်သုံးချင်လာအောင် တိုက်တွန်းသင့်ပါတယ်။

နိဂုံးချုပ်အနေဖြင့်
အားလုံးဒီတရားလေးမျိုးကို မိမိကိုယ်တိုင်လည်း ကျင့်ကြံ၊
မိဘတွေကိုလည်း တိုက်တွန်းခြင်းဖြင့်
မိဘကျေးဇူးကို သိတတ်သော
သားရတနာ၊ သမီးရတနာလေးများ ဖြစ်ကြပါစေ။

Tuesday, October 22, 2013

ဒီဓလေ့ (၂)

 (မလေးရှားရောက်ရွှေမြန်မာတို့ကို
သီတင်းကျွတ်လပြည့်ညက ကပုန်းကျောင်းတွင်
ဟောကြားဆုံးမပေးသောတရာတော်ဖြစ်ပါသည်။)

ဒီသီတင်းကျွတ်လပြည့်နေ့ကို ပ၀ါရဏာနေ့လို့သာခေါ်တာ မဟုတ်ဘူး။
အဘိဓမ္မာအခါတော်နေ့လို့လည်း ခေါ်သေးတယ်။
ဒို့ဗုဒ္ဓဘာသာစာပေမှာ ပိဋကတ်သုံးပုံရှိတယ်။
ဝိနည်းပိဋကတ်၊ သုတ္တန်ပိဋကတ်၊ အဘိဓမ္မာပိဋကတ်တဲ့။
ဒီသီတင်းကျွတ်လပြည့်နေ့ကို ၀ိနည်းအခါတော်နေ့၊
သုတ္တန်အခါတော်နေ့လို့မခေါ်ဘဲ ဘာလို့ အဘိဓမ္မာအခါတော်နေ့လို့ ခေါ်ရတာလဲ။
သိသင့်တာပေါ့။

ဒို့ဘုရားရှင်ရဲ့ မယ်တော်မာယာဟာ
ကပိလ၀တ်ပြည်မှ ဒေ၀ဒဟပြည်ကို အသွား
လမ်းခရီးအင်ကြင်းတော၊ အင်ကြင်းပင်အောက်မှာ
ဘုရားအလောင်းတော်လေးကို ဖွားမြင်ပါတယ်။
မွေးဖွားချိန်မှာ
မယ်တော်မာယာ့အသက် အတော်ကြီးရင့်နေပြီတဲ့။
အသက် ၅၆ နှစ်ကျော်နေပြီလို့ ဆိုပါတယ်။
အသက်ကလည်း ကြီး၊
မီးဖွားရတဲ့နေရာကလည်း ခုခေတ် ဆေးရုံ ဆေးခန်းလိုမျိုး
လုံလုံခြုံခြုံ နွေးနွေးထွေးထွေး နေရာမျိုးမဟုတ်၊
ဆိုတော့ မယ်တော်မာယာရဲ့ ကျန်းမာရေးထိခိုက်မှာ သေချာပါတယ်။
မကြာပါဘူး၊ ဘုရားအလောင်းတော်လေးမွေးဖွားပြီး
(၇) ရက်မြောက်မှာ မယ်တော်မာယာဆုံးပါးသွားတယ်။
နတ်ရွာစံသွားတယ်ပေါ့။

ဒီကိစ္စနဲ့ပတ်သက်ပြီး ဆရာတော်အရှင်သြဘာသာဘိဝံသ က
သူ့ရဲ့ သုတေသနသမ္မာမဂ္ဂင်္ဂပဥှာကျမ်းမှာ ဒီလိုဖော်ပြထားပါတယ်။

မေး။
အလောင်းတော် သိဒ္ဓတ္ထမင်းသားဟာ
မယ်တော်မာယာ သက်တော် ဘယ်လောက်မှာ
ပဋိသန္ဓေတည်နေစွဲယူပါသလဲ၊
သက်တော် ဘယ်လောက်ထဲမှာ နတ်ရွာစံပါသလဲဘုရား၊…
ဖြေ။
အင်း…ကြံကြံဖန်ဖန် တော်တော်တွေးပြီး မေးတာပဲကိုး၊
သည်အကြောင်းအရာကို သမန္တစက္ခုဒီပနီစတဲ့ ကျမ်းဆရာတော်တို့က
အသက်တစ်ရာတမ်းကို သုံးပုံပုံ၍ အရွယ်သုံးပါး ပိုင်းခြားထားကာ
မယ်တော်မာယာ၏ ဒုတိယပိုင်းအရွယ်
အသက် ၅၅ နှစ် နှင့် ၆ လ အရက် ၂၀ ရောက်သော
ဝါဆိုလပြည့် ကြာသပတေးနေ့မှာ
အလောင်းမင်းသား ပဋိသန္ဓေတည်နေစွဲယူကြောင်းနှင့်…

မယ်တော်မာယာ၏ ၀မ်းဗိုက်ရတနာတိုက်ခန်းမှာ
ဆယ်လကြာမျှ ကိန်းအောင်းလျက် ကဆုန်လပြည့် သောကြာနေ့၌
ဖွားမြင်တော်မူကာ ခုနစ်ရက်ကြာသောအခါ မယ်တော်မာယာ နတ်ရွာစံရသည်တဲ့။

သည်နှစ်ရပ်ကို ပေါင်းစပ်လိုက်လျှင် ၅၆ နှစ်နှင့် ၄ လ၊ ၂၇ ရက်ရှိရမှာမို့
သက်တော် ၅၆ နှစ်၊ ၄ လ၊ ၂၇ ရက်မှာ မယ်တော်မာယာ နတ်ရွာစံကြောင်းနဲ့ သိရတယ်၊
မိမိတို့ရဲ့ အထွတ်ထိပ်ထား ဗုဒ္ဓဘုရားကိစ္စမို့ သိထားကြပေါ့လေ၊
ဒါဟာ သိထားရမယ့် ဘာသာရေးအချက်ပဲကိုး။….

ဘုရားအလောင်းတော်လေးရဲ့နာမည်က သိဒ္ဓတ္ထ တဲ့။
အသက် ၁၆ နှစ်အရွယ်မှာ ယသောဓရာဆိုတဲ့အမျိုးသမီးနဲ့ အိမ်ထောင်ပြုတယ်။
အသက် ၂၉ နှစ်အရွယ်မှာ သားတော်ရာဟုလာလေး ဖွားမြင်တယ်။
ဖွားမြင်ပြီးမကြာပါဘူး။ လောကီအာရုံကာမဂုဏ်ကို ငြီးငွေ့ပြီး တောထွက်တယ်။
တောထဲမှာ ၆ နှစ်ကြာတရားကျင့်ပြီး
အသက် ၃၅ နှစ်အရွယ်မှာ ဘုရားဖြစ်ပါတယ်။
ဘုရားဖြစ်ပြီး ၁ ၀ါ၊ ၂ ၀ါ၊ ၃ ၀ါ၊ ၄ ၀ါ၊ ၅ ၀ါ၊ ၆ ၀ါ
၇ ၀ါမြောက်မှာ နတ်ပြည်မှာ ၀ါဆိုပါတယ်။

လူ့ပြည်မှာ ၇ ရက်သာတွေ့လိုက်ရတဲ့
လောလောဆယ် နတ်ပြည်မှာ နတ်သားသွားဖြစ်နေတဲ့
မယ်တော်မာယာတစ်ဖြစ်လဲ သန္တုဿိတနတ်သားကို ကျေးဇူးဆပ်တဲ့အနေနဲ့
တရားသွားဟောဖို့အတွက် နတ်ပြည်မှာ (၇) ၀ါမြောက် ၀ါဆိုရတာပါ။
ဟောတဲ့တရားက အဘိဓမ္မာတရားပါ။

နတ်ပြည်မှာ ကျေးဇူးဆပ်အဘိဓမ္မာတရားဟောပြီး
ခုလို သီတင်းကျွတ်လပြည့်ညမှာ လူ့ပြည်ကို ဘုရားရှင် ပြန်ဆင်းလာပါတယ်။
လူ့ပြည်က လူတွေက ဘုရားရှင်ကို ကြိုဆိုတဲ့အနေနဲ့
မီးရှူးမီးပန်းတွေ လွှတ်ကြပါတယ်။
ဗျောက်အိုးတွေ ဖောက်ကြပါတယ်။
ဆီမီးတွေ ကိုယ်စီညှိထွန်းကိုင်ဆောင်ကာ
ဒို့ဘုရားရှင်ကို ကြိုဆိုကြပါတယ်။

ဒီလောက်ရှင်းပြလိုက်ရင်
ဒီနေ့ကို အဘိဓမ္မာအခါတော်နေ့ရယ်လို့ ဘာကြောင့်သတ်မှတ်ပြီးကျင်းပရတယ်၊
မီးရှူးမီးပန်းဘာကြောင့် လွှတ်ရတယ်၊
ဗျောက်အိုးတွေ ဘာကြောင့် ဖောက်ရတယ်ဆိုတာ သဘောပေါက်ရောပေါ့။

ဒီဘုရားရှင်ဗုဒ္ဓ၀င်ဇာတ်လမ်းမှာ အရေးကြီးတဲ့အချက်က
(အရင်နှစ်တုန်းက ပြောခဲ့သလိုပါပဲ)
ဒို့ဘုရားရှင်ဟာ
သူ့မယ်တော်ကြီးနဲ့ လူ့ပြည်မှာ ၇ ရက်သာ ဆုံစည်းခွင့်ရလိုက်တာတောင်
မယ်တော်ကြီးကျေးဇူးကို နတ်ပြည်အထိ လိုက်ဆပ်တယ်နော်။

ဒို့ညီငယ် ညီမငယ်တွေကတော့
အမေချက်ကျွေးတာ နှစ် ၂၀ မက စား၊
အမေပေးတာယူ၊
အမေ၀ယ်ပေးတာ ၀တ်၊
အမေသင်ပေးလိုက်တဲ့ ဘာသာစကားတွေပြော။
ဆိုတော့ အမေကို ကျေးဇူးအများကြီးဆပ်သင့်တာပေါ့။
အဖေလည်း ပါတာပေါ့နော်။ အဖေက ပိုက်ဆံရှာပေးသူမဟုတ်လား။

မိဘတွေကို ကျေးဇူးဆပ်တဲ့နေရာမှာ
အာမိသနဲ့ ကျေးဇူးဆပ်ခြင်း၊
ဓမ္မနဲ့ ကျေးဇူးဆပ်ခြင်းလို့ ကျေးဇူးဆပ်ခြင်း ၂ မျိုးရှိတယ်။

ဆက်ရန်…

Monday, October 21, 2013

ဒီဓလေ့ (၁)


(မလေးရှားရောက်ရွှေမြန်မာတို့ကို
သီတင်းကျွတ်လပြည့်ညက ကပုန်းကျောင်းတွင်
ဟောကြားဆုံးမပေးသောတရာတော်ဖြစ်ပါသည်။)
 
ဒီနေ့ သီတင်းကျွတ်လပြည့်နေ့
ဒို့သံဃာတော်အရှင်သူမြတ်တွေ ၀ါဆိုလပြည့်ကျော် ၁ ရက်နေ့ကနေပြီး
သီတင်းကျွတ်လပြည့်နေ့အထိ ရက် (၉၀) တိတိကို သီတင်းဝါလလို့ ခေါ်ပါတယ်။
ဒီနေ့ကတော့ သီတင်းဝါလ ကျွတ်တဲ့နေ့ လွတ်တဲ့နေ့၊ သီတင်းကျွတ်လပြည့်နေ့ပေါ့။

သီတင်းကျွတ်လပြည့်နေ့အကြောင်းကို ၂ ပိုင်းခွဲပြောချင်တယ်။
တစ်ပိုင်းက ပ၀ါရဏာနေ့အကြောင်းဖြစ်ပြီး
နောက်တစ်ပိုင်းကတော့ အဘိဓမ္မာအခါတော်နေ့အကြောင်းဖြစ်တယ်။
ပ၀ါရဏာဆိုတာ မြန်မာလို (အပြစ်ရှိရင် ပြောကြားဖို့) ဖိတ်ကြားတာ၊ ပန်ကြားတာ။
ဒါ့ကြောင့် ပ၀ါရဏာပွဲကို အင်္ဂလိပ်လုို Invitation Ceremony လို့ ဘာသာပြန်ကြတယ်။

ဒီနှစ် သီတင်းကျွတ်လပြည့်နေမှာ
ဒီမလေးရှားရောက်နေတဲ့ဘုန်းကြီးတွေ ပ၀ါရဏာပွဲကျင်းပကြတယ်။
ကျင်းပတဲ့နေရာက ဘုန်းကြီးဦးဥတ္တမ သီတင်းသုံးနေထိုင်နေတဲ့
Petaling Jaya က Chempaka Buddhist Lodge မှာ။
သူများနိုင်ငံမှာဆိုတော့ ဒို့ဘုန်းကြီးတွေလည်း များများစားစားတော့ မရှိပါဘူး။
တစ်ကျောင်း တစ်ပါးနှုန်းသာရှိတဲ့ ကျောင်းဆယ်ကျောင်းက
သံဃာတော် ၁၀ ပါး တက်ရောက်တယ်ပေါ့။
အေး၊ ဘုရားရှင်ပညတ်ထားတဲ့ ၀ါတွင်းကာလမှာ  ခရီးမထွက်ရဘူးဆိုတဲ့
သိက္ခာပုဒ်တော်ကြောင့်ရယ်၊ အခြားအခြားသော အကြောင်းတွေကြောင့်ရယ်
ဒီကွာလာလမ်ပူအနီးတ၀ိုက်မှာ သီတင်းသုံးနေတဲ့ဘုန်းကြီးတွေ
မတွေ့ဆုံဖြစ်တာ အတော်ကြာပြီ။

ဒီနေ့ သီတင်းကျွတ်လပြည့် ပ၀ါရဏာနေ့ကြမှပဲ
တစ်နေရာတည်းမှာ (တစ်သိမ်တည်းမှာ) စုစုစည်းစည်း ဆုံတွေ့ပြီး
“တပည့်တော်အပေါ် အပြစ်တစုံတရာ တွေ့မြင် ကြားသိ ယုံမှားရှိခဲ့သော်
တပည့်တော်ကို ဆိုဆုံးမတော်မူကြပါ” လို့ အချင်းချင်း ပန်ကြား ဖိတ်ကြားလိုက်ရတာ
တော်တော်လေး အရသာရှိလိုက်တာ။
သက်ကြီးဝါကြီးဆရာတော်ကြီးတွေကလည်း ငယ်တဲ့ဆရာတော်လေးတွေကို ပန်ကြား၊
ငယ်တဲ့ဆရာတော်လေးတွေကလည်း ဆရာတော်ကြီးတွေကို ပန်ကြား။`
အချင်းချင်းရိုသေလေးစားမှု (အညမညဂါရ၀) ကို ပြတဲ့ပွဲလို့ ဆိုရင်လည်း မမှားဘူးပေါ့။
ဘုရားရှင်ချမှတ်ခဲ့တဲ့ အင်မတန်ထူးကဲမွန်မြတ်တဲ့ ဓလေ့တစ်ခုပါ။

ဒီအကျင့် ဒီမူ ဒီဓလေ့ကို အတုခိုးပြီး လူတွေလည်း
ဒီသီတင်းကျွတ်လပြည့်နေ့မှာ လူပ၀ါရဏာပွဲကျင်းပတာကို အကဲခတ်မိမှာပေါ့။
မိမိတို့ရဲ့ အဖိုး အဖွား မိဘ ဆရာသမားတွေဆီ သွားပြီး
“ကာယကံ ၀စီကံ မနောကံ ကံသုံးပါးတို့တွင် တစ်ပါးပါးသောကံဖြင့်
ပစ်မှားကျူးလွန်မိသည်ရှိသော် ထိုအပြစ်တို့ ပျောက်ပါစေခြင်းအကျိုးငှာ”
စသဖြင့် ကန်တော့တဲ့ဓလေ့လေး ထွန်းကားနေတယ်မို့လား။
ဒါ ဘုန်းကြီးပ၀ါရဏာကို လူ့ပ၀ါရဏာအဖြစ် မွေးစားယူလိုက်တာပါ။

ဒီလို သီတင်းကျွတ်လပြည့်ညချမ်းမှာ
မလေးရှားရောက်နေတဲ့ ညီငယ် ညီမငယ်တို့ကို
ဝမ်းနည်းစရာစကားလေး ထည့်မပြောချင်ပေမဲ့ ပြောရအုံးမယ်။
ဆိုကြပါစို့။
မောင်နှမ သုံးယောက်ရှိတယ်။
၂ ယောက်က မြန်မာပြည်မှာ။
တစ်ယောက်ကတော့ ဒီမလေးရှားရောက်နေတယ်။
မြန်မာပြည်မှာရှိတဲ့ သားသမီး ၂ ယောက်က ဒီအချိန်ဆို
မိဘတွေ ကန်တော့နေရောပေါ့။
ဒီလို ကန်တော့နေတဲ့အချိန် ဒီမိဘတွေဟာ မလေးရှားရောက်နေတဲ့ သားကို
သေချာပေါက် သတိရနေမှာပါ။
သတိရတာနဲ့တပြိုင်နက် ဒီမလေးရှားရောက်နေတဲ့သားအပေါ်မှာ
မေတ္တာလွှမ်းခြုံတဲ့ “နေရောကောင်းရဲ့လား၊ အဆင်ရောပြေရဲ့လား” ဆိုတဲ့
စိုးရိမ်စိတ်တွေ ပေါ်ပေါက်နေမယ်လို့ ထင်ပါတယ်။

ကဲ မေးလိုက်ပါရစေ၊ ဒီမလေးရှားရောက်နေတဲ့ သားဖြစ်သူကရော
ဒီနေ့ သီတင်းကျွတ်လပြည့်ညမှာ မိဘတွေအပေါ်
ဘယ်လိုဖီလင်မျိုး ဖြစ်ပေါ်လာပါသလဲ။
မြန်မာပြည်က မိဘတွေကို ကိုယ့်ညီအကို မောင်နှမတွေက
ကာယကံမြောက် ကန်တော့နေတဲ့အချိန်
ကိုယ်က မလေးရှားကနေပြီး ဖုန်းလေးဆက်ကာ
ဝစီကံမြောက် ကန်တော့ဖြစ်ရဲ့လား။
ကန်တော့ဖို့ စိတ်ကူးပေါ်ရဲ့လား။
အနိမ့်ဆုံးအဆင့် မိဘတွေဆီ ဖုန်းလေးဆက်ကာ
ကန်တော့ပေးဘို့ တိုက်တွန်းလိုပါတယ်။

မလေးရှားနိုင်ငံရောက်မှ ဒို့ဗုဒ္ဓဘာသာတွေအမြဲကျင့်သုံးလာတဲ့
လူ့ပ၀ါရဏာပွဲ
(တနည်းပြောရရင်)
သီတင်းကျွတ်လပြည့်ည ကန်တော့ခြင်းအလေ့အထကို
မဖျောက်ဖျက်လိုက်ပါနဲ့။

မြန်မာဗုဒ္ဓဘာသာတို့မှာသာရှိတဲ့ မြန်မာဗုဒ္ဓဘာသာတို့ရဲ့ ဒီဓလေ့လေးဟာ
သိပ်ကို မြတ်နိုးဖွယ်ကောင်းပါတယ်။ သိပ်ကို တန်ဘိုးကြီးပါတယ်။
ဆက်ရန်....

Friday, October 18, 2013

သီတင်းကျွတ်လပြည့်နေ့ အထူးအစီအစဉ်


(၁၉၊ ၁၀၊ ၂၀၁၃) စနေနေ့

နံနက် ၁၀ နာရီခန့်တွင်
သရဏဂုံသုံးပါးနှင့်တကွ ရှစ်ပါးသီလပေးပါမည်။

ညနေ (၇) နာရီတွင်
ကပုန်းကျောင်းဆရာတော် ဒေါက်တာအရှင်ဣန္ဒကမှ
တရားတော်ချီးမြှင့်ပါမည်

ညနေ (၈) နာရီခန့်တွင်
ဓမ္မာရုံအတွင်းရှိ ရုပ်ပွါးဆင်းတုတော်ကြီးအား
ဆီမီးထွန်းပူဇော်ပါမည်။