Thursday, July 18, 2013

ဝိသာခါကျေးဇူး

 
“ဒီနေ့ဝါဆိုသင်္ကန်းကပ်ပွဲဆိုတော့ အရင်ဒီလိုမျိုး ၀ါဆိုသင်္ကန်း ကပ်ဖူးလား”
“မကပ်ဖူးပါဘုရား”
“သူများကပ်တာရော သွားဘူးလား”
“မသွားဘူးပါဘုရား”
“ဟုတ်ပြီ၊ ဒါဆို ဘာ့ကြောင့်ဝါဆိုရတယ်၊
ဝါဆိုသင်္ကန်းဘာ့ကြောင့်ကပ်ရတယ်ဆိုတာ ၁၅ မိနစ်လောက်ပြောပြ အုံးမယ်၊
ပြီးမှ သင်္ကန်းကပ်၊ ရေစက်ချ။”

သံဃာ့အဖွဲ့အစည်းတည်ထောင်ပြီး အစောပိုင်းကာလမှာ ရဟန်းသံဃာတော်တွေအတွက် ၀ါဆိုရမယ်ဆိုတဲ့ ၀ိနည်းဥပဒေကို ဘုရားရှင် မထုတ်ပြန်ရသေးပါဘူး။ ဆိုတော့ ရဟန်းသံဃာတော်တွေဟာ နွေ မိုး ဆောင်း သုံးဥတုစလုံး ခရီးထွက်ကြတာပေါ့။ နွေရာသီ ဆောင်းရာသီကာလတွေမှာ ခရီးထွက်တာ ဘာပြဿနာမှ မဖြစ်ခဲ့ပေမဲ့ မိုးရာသီခရီးထွက်တာ ပြဿနာအကြီးအကျယ်တက်တော့တာပဲ။

အဲ့ဒီခေတ် အဲ့ဒီအခါ အဲ့ဒီဒေသကလူတွေ မိုးရာသီမှာ မိုးကိုအမှီပြုပြီး လယ်ယာစိုက်ပျိုးရေးလုပ်ငန်းနဲ့ အသက်မွေးဝမ်းကြောင်းပြုကြရတာမို့လား။ ဆိုတော့ မိုးဦးကာလ သူတို့စိုက်ပျိုးထားတဲ့ သီးပင်းစားပင်လေးတွေ အစို့အညှောင့်ထွက်လာတဲ့အချိန် ရဟန်းသံဃာအုပ်စုက ခရီးထွက်၊ ဖြတ်ကျော်၊ နင်းသွား၊ သီးပင် စားပင်လေးတွေ ပျက်စီး။ ဒီလို တစ်ခါမက နှစ်ခါ၊ တစ်ရာသီမက နှစ်ရာသီ ဖြစ်လာတော့ သည်းမခံနိုင်တော့သည့်အဆုံး ရဟန်းသံဃာတော်တွေကို “ဘယ့်နှယ်၊ ဗုဒ္ဓတပည့်သား ရဟန်းသံဃာတော်တွေ နေပူမရှောင် မိုးရွာမရှောင်ခရီးထွက်နေပါလား၊ တခြားဘာသာက ဘာသာဝင်တွေနဲ့လည်း မတူပါလားဟေ့၊ တိရိစ္ဆာန်ဖြစ်တဲ့ ငှက်တွေတောင် ဒီလိုမိုးရာသီမှာ အသိုက်လုပ်ပြီး စွဲစွဲမြဲမြဲ တစ်နေရာတည်းမှာ ခိုအောင်းနေတာ” စသဖြင့် အကဲ့ရဲ့ခံရတော့တာပဲ။

ဒီလိုကဲ့ရဲ့နေတာကို ဘုရားရှင်ကြားတော့ “ငါ့တပည့်သားရဟန်းသံဃာတွေ မိုးဥတု မိုးရာသီသုံးလအတော အတွင်း တစ်နေရာတည်းမှာ ၀ါကပ်သီတင်းသုံးနေထိုင်စေ” လို့ ၀ိနည်းဥပဒေ ထုတ်ပြန်လိုက်တယ်။ အဲ့ဒီအချိန်ကစပြီး ရဟန်းသံဃာတော်တွေ မိုးရာသီ မိုးဥတုဖြစ်တဲ့ ၀ါဆိုလပြည့်ကျော်တစ်ရက်နေ့မှသည် သီတင်းကျွတ်လပြည့်နေ့အထိ တစ်ကျောင်းတည်းမှာနေထိုင်ပြီး ၀ါဆိုဝါကပ် သီတင်းသုံးနေထိုင်ရတော့ တာပဲ။ ဘယ်မှ ညအိပ်ညနေ သွားလို့မရတော့ဘူး။

ဒါပေမဲ့ အရေးပေါ်ကိစ္စ (မိသားစုအရေး၊ လှူရေးတန်းရေး) တွေ ပေါ်ပေါက်လာရင်တော့ “ဒီဝါဆိုရာကျောင်းတိုက်ကို (၇) ရက်အတွင်း ပြန်လာပါမည်” ဆိုပြီး ၀ါပန်ကာ ခရီးထွက်ခွင့် ပြုထားပါတယ်။
အရေးပေါ်ကိစ္စမရှိပဲ ညအိပ်ညနေခရီးထွက်ရင်၊ အရေးပေါ်ကိစ္စရှိသော်ငြား မူလ၀ါဆိုရာကျောင်းတိုက်မှ ပြင်ပတစ်နေရာရာမှာ (၇)  ရက်ထက်ကျော်လွန်အောင် နေမိလို့ရှိရင် အဲ့ဒီရဟန်း ၀ါကျိုးပါတယ်။ ဝါကျိုးတယ် ဆိုလို့ ဝါကျိုးတဲ့ရဟန်းမှာ ဝါအရေအတွက်တော့ လျော့မသွားပါဘူး။ မနှစ်က ၁၉ ၀ါရခဲ့ရင် ဒီနှစ်ဝါ ၂၀ ဆိုပြီး ထည့်သွင်းရေတွက်ရပါမယ်။ ဒါပေမဲ့ ဝါကျိုးတဲ့ရဟန်းအတွက် အပြစ်အာပတ်သင့်ပြီး သီတင်းကျွတ် ဝါကျွတ်တဲ့အခါမှာ ကထိန်လျာသင်္ကန်းအလှူခံခွင့် မရှိတော့ပါဘူး။

ဒီနေရာမှာ သတိပြုရမည့်အချက်က ဘုရားရှင်က ၀ိနည်းဥပဒေတွေကို ထုတ်ပြန်ရာမှာ သူရောက်နေတဲ့ပတ်ဝန်းကျင်က လူ့အဖွဲ့အစည်းနဲ့ ဆန့်ကျဘက်မလုပ်ပဲ ပတ်ဝန်းကျင်ရဲ့တောင်းဆိုမှုတွေကို လိုက်လျောညီထွေ လက်ခံကျင့်သုံးပေးတာကို တွေ့ရပါတယ်။

နောက်တစ်ချက်ဆက်စဉ်းစားရမှာက မိုးဥတုကာလသတ်မှတ်ချက်ပါ။ ဘုရားရှင်ပွင့်ထွန်းပေါ်ပေါက် ခဲ့တဲ့အိန္ဒိယနိုင်ငံနဲ့ မြန်မာနိုင်ငံရာသီဥတုက သိပ်မကွာတဲ့အတွက် မိုးဥတုကာလသတ်မှတ်ချက် တူညီနေလို့ ၀ါဆိုလပြည့်ကျော် ၁ ရက်မှသည် သီတင်းကျွတ်လပြည့်အထိ မိုးဥတုသတ်မှတ်ပြီး ဒီမိုးဥတုကာလမှာ မြန်မာပြည်က ရဟန်းသံဃာတော်တွေ ၀ါဆိုဝါကပ်တာ သဘာဝကျပါတယ်။ အနောက်နိုင်ငံမှာ သီတင်သုံးနေတဲ့ရဟန်းတော်တွေအတွက် မိုးဥတုသတ်မှတ်ချက်ကရော၊ ၀ါဆိုကာလ ကရော?

နောက်တခါစဉ်းစားမိတာက သီးပင်ဝါးပင်လေးတွေကို ရဟန်းသံဃာတော်တွေ တက်နင်းမိလို့ မိုးရာသီ မိုးဥတုကာလမှာ တစ်နေရာတည်းမှာ နေပြီး ၀ါဆိုဝါကပ်ဖို့ ဘုရားရှင် အမိန့်ထုတ်ထားတာပါ။ ဒီခေတ်မှာတော့ ကား၊ ရထား၊ လေယာဉ်ပျံတွေနဲ့ ခရီးထွက်နေရတာမို့လား။ သီးပင်စားပင်တွေကို တက်နင်းမိမှုအတွက် စိုးရိမ်ကြောင့်ကြမှု မရှိတော့ဘူးမို့လား?
မေးစရာမေးခွန်းတွေပါ။

တကယ်တော့ ဘုရားရှင်အမိန့်ထုတ်ထားတဲ့ဝါဆိုဝါကပ်ဝိနည်းဥပဒေရဲ့နောက်ကွယ်မှာ အဓိပ္ပါယ်တွေ အများကြီးရှိနေမယ်လို့ ထင်ပါတယ်။ ယနေ့ခေတ် မြန်မာပြည် ပရိယတ္တိပညာရေးလုပ်ငန်းမှာပင် ၀ါဆိုဦးအချိန် ၀ါဆိုပြီးအခါမှစတင်ပြီး အားသွန်ခွန်စိုက်ပို့ချသင်ကြားနေတာကို တွေ့ရပါတယ်။ ပဋိပတ္တိအကျင့်လည်း ထို့အတူနေမှာပါ။ ဒီဝါတွင်းငါဘယ်အဆင့်အရောက်ကျင့်မယ်ဆိုတဲ့ အဓိဋ္ဌာန်မျိုး တောရဆောက်တည်နေတဲ့ ရဟန်းသံဃာတော်တွေမှာ ရှိမှာပါ။ ဒါ့ကြောင့် ရဟန်းသံဃာတော်များ ၀ါဆို ၀ါကပ်ခြင်းဟာ အဓိပ္ပါယ်ရှိနေဆဲပါ၊ အကျိုးသက်ရောက်မှု ရှိနေဆဲပါ။

ရဟန်းသံဃာတော်များ ၀ါဆိုဝါကပ်ဖို့ ၀ိနည်းဥပဒေပြဌာန်းပြီးဖြစ်ပေမဲ့ ၀ါဆိုသင်္ကန်းကပ်လှူဘို့ ၀ါဆိုသင်္ကန်းအလှူခံဘို့ ဘုရားရှင်ထံမှ ခွင့်ပြုချက်မရသေးပါဘူး။ ၀ါဆိုသင်္ကန်းလှူခွင့်နဲ့အလှူခံခွင့်ပြုဘို့  ၀ိသာခါကျောင်းအမကြီးက ဘုရားရှင်ကို လျှောက်ထားပါမှ ခွင့်ပြုချက်ရပြီး ၀ါဆိုသင်္ကန်းဆိုတာ ဖြစ်ပေါ်လာတာပါ။ ဒီလိုဝိသာခါကျောင်းအမကြီး လျှောက်ထားရတာကလည်း အကြောင်းရှိပါတယ်။

ဘုရားရှင်နဲ့ တပည့်ရဟန်းသံဃာတော်များ သာဝတ္ထိပြည်၊ ဇေတ၀န်ကျောင်းမှာ သီတင်းသုံးနေတော်မူချိန်၊ တစ်နေ့ ၀ိသာခါကျောင်းအမကြီးက နောက်နေ့အရုဏ်ဆွမ်းဘုဉ်းပေးဘို့ ဘုရားရှင်နဲ့အတူ ရဟန်းသံဃာတော်တွေကို ပင့်လျှောက်ပါတယ်။ အဲ့ဒီညမှာ မိုးက သဲသဲမဲမဲရွာသွန်းပါလေရော။ မိုးရွာသွန်းချိန်မှာ ဘုရားရှင်က ရဟန်းတော်တွေကို မိုးရေချိုးခိုင်းပါတယ်။ မနက်ခင်းအစော ၀ိသာခါကျောင်းအမကြီးအိမ် ဆွမ်းစားလည်း သွားရအုံးမယ်၊ ဘုရားရှင်ကလည်း ရေချိုးခိုင်းနေတယ်၊ သင်္ကန်းကလည်း အပိုမရှိဆိုတော့ ကိုယ်လုံးတီးရေချိုးကြတာပေါ့။

ရဟန်းတော်တွေ ဒီလိုကိုယ်လုံးတီးရေချိုးနေချိန်မှာ ၀ိသာခါကျောင်းအမကြီးကလည်း ဆွမ်းပွဲပြင်ပြီးလို့ အိမ်ဖော်မလေးကို ဇေတ၀န်ကျောင်းစေလွှတ်ပြီး အပင့်ခိုင်းချိန်နဲ့ ကြုံကြိုက်နေပါလေရော။ အိမ်ဖော်မလေး ချက်ချင်းအိမ်ပြန်ပြေးပြီး “ဇေတ၀န်ကျောင်းမှာ ဘုန်းကြီးတွေ မတွေ့ခဲ့ဘူး၊ အ၀တ်မ၀တ်တဲ့ အာဇီဝကတွေပဲ တွေ့ခဲ့တယ်” လို့ ၀ိသာခါကျောင်းအမကြီးကို ပြောပြပါတယ်။

ဝိသာခါကျောင်းအမကြီးက ဆင်ခြင်ဥာဏ်ရှိသူဆိုတော့ “အင်း၊ ငါ့ကိုယ်တော်တွေ ရေချိုးနေတာနေမှာပါ” လို့ တွေးမိပြီး ဒုတိယအကြိမ် အိမ်ဖော်မလေးကို စေလွှတ်ပြန်တယ်။ ဒီတခါတော့ ရဟန်းတော်တွေက မိုးရေချိုးပြီး ကိုယ့်အခန်းအသီးသီးမှာ ကွေးနေတဲ့အချိန်။ အိမ်ဖော်မလေး အခန်းထဲအထိ ဘယ်ဝင်ကြည့်ရဲပါ့မလဲ။ ကျောင်းပေါက်ကကြည့်၊ လှည့်ပြန်သွားပြီး “ကျောင်းမှာ ဘုန်းကြီးတစ်ပါးမှ မတွေ့ခဲ့ဘူး” လို့ ၀ိသာခါကို သံတော်ဦးတင်ပြန်တယ်။

တတိယအကြိမ်စေလွှတ်ပါမှ ဘုရားရှင်နဲ့ ရဟန်းသံဃာတော်တွေကို ပင့်နိုင်ခဲ့တယ်။ ဆွမ်းကပ်ပြီးတော့ ရဟန်းသံဃာတော်တို့အတွက် စားဝတ်နေရေး ကျန်းမာရေး အရေးလေးပါးအဆင်ပြေဘို့ ၀ိသာခါကျောင်းအမကြီးက ဘုရားရှင်ကို လျှောက်ထားရာမှာ အ၀တ်အတွက် မိုးရေခံသင်္ကန်း (၀ါဆိုသင်္ကန်း)ကို အလှူခံခွင့်ပြုဘို့ ထည့်သွင်းလျှောက်ထားခဲ့ပါတယ်။ ဘုရားရှင်ကလည်း ကြည်ကြည်ဖြူဖြူ ခွင့်ပြုတော်မူခဲ့ပါတယ်။

အကျဉ်းချုပ်ပြောရရင်တော့ ၀ါဆိုသင်္ကန်းဖြစ်ပေါ်လာတာဟာ ၀ိသာခါကျောင်းအမကြီးကြောင့်ဖြစ်ပေါ်လာ တာပါ။ ဒါ့ကြောင့် ယနေ့ခေတ်ဝါဆိုသင်္ကန်းအလှူရှင်တွေ ၀ါဆိုသင်္ကန်းလှူခွင့်ရတာဟာ ၀ိသာခါကျောင်းအကြီးကြောင့်ပါ။ ရဟန်းသံဃာတော်တွေ ၀ါဆိုသင်္ကန်းအလှူခံခွင့်ရတာဟာ ၀ိသာခါကျောင်းအမကြီးကြောင့်ပါ။ အလှူရှင်တွေဘက်ကရော ရဟန်းသံဃာတွေဘက်ကပါ ၀ါဆိုသင်္ကန်းနဲ့ပတ်သက်ပြီး ၀ိသာခါကျောင်းအမကြီးကို ကျေးဇူးတင်ရမှာပါ။
 
(ဓမ္မဥယျာဉ်ကျောင်း ၀ါဆိုသင်္ကန်းကပ်ပွဲတရား)
(၁၄၊၇၊၂၀၁၃)