Friday, October 28, 2011

လူဆိုပေမဲ့



အမေး

ဆရာတော်ဘုရား၊ ကမ္ဘာပေါ်မှာ လူဦးရေက စက္ကန့်နှင့်အမျှ တိုးပွါးလာနေပါတယ်ဘုရား။ အခြားတဖက်မှာတော့ သဘာဝသယံဇာတစွမ်းအင်တွေက အကန့်အသတ်နဲ့သာရှိနေတာပါ။ ဒီလိုမျိုးလူဦးရေအဆမတန်များပြားမှုနဲ့ သဘာဝသယံဇာတရှားပါးမှုအခြေအနေတွေကြောင့် တစ်နေ့နေ့မှာ အဆင်မပြေမှုတွေ ပေါ်ပေါက်လာနိုင်ပါတယ်ဘုရား။
ဒီကိစ္စ ဆရာတော့်အမြင်လေး အမိန့်ရှိပါအုံးဘုရား။

အဖြေ

ဗုဒ္ဓဘာသာရှုဒေါင့်ကပြောရမယ်ဆိုရင်
ဒီလူ့ဘုံတစ်ဘုံထဲမှာသာ သက်ရှိသတ္တ၀ါများတည်ရှိတာ မဟုတ်ပါဘူး။
ဘုံပေါင်း (၃၁) ဘုံရှိပြီး ဘုံ (၃၁) စလုံးမှာ သက်ရှိသတ္တ၀ါများ တည်ရှိပါတယ်။
တစ်ဘုံဘုံမှာ သက်ရှိသတ္တ၀ါတွေ တိုးပွါးများပြာလာတယ်ဆိုရင်
အခြားဘုံတွေမှာ လျော့နည်းလာမှာပါ။

ဘုံ ၃၁ မှာရှိကြတဲ့ သတ္တ၀ါအားလုံးဟာ
တစ်ဘုံတည်းမှာသာ တည်မြဲမနေပါဘူး။
အမြဲတမ်း ရွေ့လျား နေတာပါ။ ကျင်လည်နေတာပါ။
အနိစ္စသဘောကို မလွန်ဆန်နိုင်ကြပါဘူး။
အချိန်တိုင်းအချိန်တိုင်းမှာ အရာခပ်သိမ်း
ဖြစ်လိုက် ပျက်လိုက်နဲ့ ဖြစ်ပျက်နေကြတာပါ။

ဒါ့ကြောင့် လူ့ပြည်မှာ သက်ရှိသတ္တ၀ါတွေ များပြားလာပြီဆိုရင်
(လူဦးရေတိုးပွါးလာနေတယ်ဆိုရင်)
အခြားဘုံတွေမှာ သက်ရှိသတ္တ၀ါတွေ လျော့နည်းလာမှာပေါ့။
ဒီလိုနည်းနဲ့ ၃၁ ဘုံ သံသရာစက်ဝန်းထဲမှာ လည်ပတ်နှုန်းချိန်ခွင်လျှာ ညီမျှနေပါတယ်။

ဒါနဲ့ပတ်သက်ပြီး အလားတူ မေးခွန်းတစ်ခု အမေးခံရဘူးပါသေးတယ်။

ဗုဒ္ဓဘာသာစာပေမှာ
မနုဿတ္တ ဒုလ္လဘ - လူ့အဖြစ်ကို ရခဲတယ်လို့ဆိုပါတယ်။
ဒါပေမဲ့ နိုင်ငံနဲ့အ၀ှမ်း ကမ္ဘာနဲ့အ၀ှမ်းလူမွေးဖွားနှုန်းက တိုးပွါးလို့နေပါတယ်။
ဒါကို ဗုဒ္ဓဘာသာဘုန်းကြီးတစ်ပါးအနေနဲ့ ဘယ်လိုပြောချင်ပါသလဲတဲ့။

အများပြောဟောနေတဲ့ ရခဲတဲ့တရားငါးမျိုးရှိပါတယ်။
အဲ့ထဲမှာ ပဗ္ဗဇိတဘာဝ ဒုလ္လဘ - ရဟန်းအဖြစ်ကိုလည်း ရခဲတယ်လို့ဆိုပါတယ်။
ရဟန်းအဖြစ်ကို ရခဲတယ်ဆိုတာ
ခေါင်းရိပ်ပြီး သင်္ကန်းဝတ် ရဟန်းခံခွင့်
ရဟန်းအ၀တ်ဖြစ်တဲ့ သင်္ကန်းကို ၀တ်ခွင့်ကို ဆိုလိုတာလား။

ဒီလိုတော့ မထင်ပါဘူး။
ဘာဖြစ်လို့လဲဆိုလို့ရှိရင်
သင်္ကြန်လိုအခါမျိုး၊ တရုတ်နှစ်ကူးလိုအခါမျိုးတွေမှာ
ယာယီသင်္ကန်းဝတ်တဲ့ ဒုလ္လဘရဟန်းတွေ
လွယ်လွယ်ကူကူနဲ့ ရဟန်းဝတ်ခွင့် ရနေလို့ပါပဲ။

ဒါ့ကြောင့် ရဟန်းအဖြစ်ကို ရခဲတယ်ဆိုတာ
ရဟန်းတရားကို ကျင့်နိုင်ခဲတာကို ဆိုလိုတာလို့ နားလည်မိပါတယ်။

ဟုတ်ပါတယ်။
အလှူလေးလုပ်၊ ခေါင်းလေးရိပ်၊ သင်္ကန်းလေးဝတ်၊
ပြုသင့်ပြုထိုက်တဲ့ကံဆောင်လိုက်ပြီဆိုရင် ရဟန်းဖြစ်သွားတော့တာပါပဲ။
ဒါပေမဲ့ ရဟန်းတွေလိုက်နာရမဲ့ ၀ိနည်းစည်းကမ်းအကျင့်များကို
လိုက်နာကျင့်ကြံနိုင်ဘို့ကတော့ အင်မတန်ခဲရင်းပါတယ်။

မနုဿတ္တ ဒုလ္လဘ -
လူ့အဖြစ်ကို ရခဲတယ်ဆိုတာကလည်း ဒီလိုပါပဲ။

လူ့အဖြစ်ကို ရခဲတယ်ဆိုတာ
လူ့အဆင့်အတန်းမှီမှီနေနိုင်တဲ့ လူ့အဖြစ်ကို ရခဲတာ လို့ နားလည်မိပါတယ်။

ဟုတ်ပါတယ်။
ကမ္ဘာမြေကြီးပေါ်မှာ လူဦးရေ တိုးပွါးလာတာ အမှန်ပါပဲ။
လူဖြစ် အတော်လွယ်ပါတယ်။

ဒါပေမဲ့ လူနဲ့သူနဲ့တူတဲ့ လူတွေ တိုးပွါးလာတာရော ဟုတ်ရဲ့လား။
လူတွေ လူ့အဆင့်အတန်းမှီမှီနေနိုင်ကြရဲ့လား။
ငြိမ်းငြိမ်းချမ်းချမ်း နေနိုင်ကြရဲ့လား။
မပူမပင် အိပ်စက်နိုင်ရဲ့လား။
ငြိမ်းငြိမ်းချမ်းချမ်း မပူမပင် နေနိုင် အိပ်စက်နိုင်တဲ့လူ
ကမ္ဘာပေါ်မှာ အတော်ရှားသွားပါပြီ။

ဒီသဘောတရားတွေကြောင့်
လူ့အဖြစ်ကို ရခဲတယ်ဆိုတာကို
လူနဲ့သူနဲ့တူတဲ့ လူ့အဖြစ်ကို ရခဲတယ်လို့ နားလည်မိပါတယ်။