Monday, March 7, 2011

သူ့ခေတ်ကိုယ့်ခေတ်


ငါးကြိမ်မြောက် ပိဋကတ်စာပေတွေကို ရွတ်ဖတ်တဲ့ပွဲ လို့ဆိုတဲ့ ပဉ္စမသံဂါယနာတင်ပွဲကို
မင်းတုန်းမင်းကြီးရဲ့ အကူအညီနဲ့ ကျင်းပပြီးတဲ့နောက် သာသနာအတော်သန့်စင်လာပြီး
စည်ပင်ပြန့်ပွါးလာတယ်လို့ ဆိုနိုင်ပါတယ်။
မင်းတုန်းမင်းရဲ့နောက် သီပေါမင်းလက်ထက်မှာလဲ ထို့အတူပါဘဲ။

အဲ့နောက် အင်္ဂလိပ်ခေတ်ရောက်လာပါတယ်။
အင်္ဂလိပ်တွေ မြန်မာနိုင်ငံကို ကျူးကျော်ဝင်ရောက်လာပြီး
အုပ်စိုးနေတဲ့အချိန်မှာလဲ ဆရာတော်သံဃာတော်များရဲ့ အခန်းကဏ္ဍမှေးမှိန်မသွားတဲ့အပြင်
ပိုလို့တောင် ရှေ့တိုးကာ ထမ်းဆောင်ခဲ့ရပါတယ်။

ရွှေတိဂုံလိုဗုဒ္ဓဘာသာတို့အထွဋ်အမြတ်ထားတဲ့စေတီတော်တွေပေါ်မှာ
အင်္ဂလိပ်တို့ ဖိနပ်မချွတ်ဘဲ တက်ရောက်တာကို ကန့်ကွက်တဲ့ကိစ္စလေးတွေကမှအစ
ဆရာတော်သံဃာတော်တွေဟာ ရှေ့တန်းက မားမားမတ်မတ်ပါဝင်ရပ်တည်ခဲ့ပါတယ်။
တကယ်လို့သာ ဆရာတော်သံဃာတော်များက မေ့မေ့လျှော့လျှော့နေခဲ့ကြမယ်ဆိုရင်
ဒီနေ့မြန်မာနိုင်ငံလူဦးရေမှာ ဗုဒ္ဓဘာသာဦးရေ ဒီလောက်များနိုင်စရာအကြောင်းမရှိပါဘူး။
အစ္စလာမ်ဖြစ်တဲ့သူကဖြစ်၊ ခရစ်ယာန်ဖြစ်တဲ့သူကဖြစ် ဖြစ်ကုန်မှာပါ။
ပြောချင်တာကတော့ လူမျိုးမပျောက်အောင် ဘာသာသာသနာမပျောက်အောင်
ဘုန်းကြီးတွေ ဆရာတော်သံဃာတော်တွေက
အခန်းကဏ္ဍတစ်ခုကနေပါဝင်ဆောင်ရွက်ခဲ့ပါတယ်။

အင်္ဂလိပ်ခေတ်ကုန်ဆုံးခါနီး ဗိုလ်ချုပ်လုပ်ကြံခံရပြီး လွတ်လပ်ရေးရလာကာ
ဦးနုခေတ်ရောက်လာတယ်ဆိုပါစို့။
၁၉၅၄ - ခုနှစ်၊ ဘုရားရှင်ပရိနိဗ္ဗာန်စံပြီး နှစ်ပေါင်း ၂၅၀၀ နီးပါးအချိန်။
ဦးနုအုပ်ချုပ်တဲ့အချိန် မြန်မာနိုင်ငံ အတော်စည်ပင်ပြန့်ပွါးတယ်လို့ ပြောတယ်။

သူ့ခေတ်သူ့အခါတုန်းက မြန်မာနိုင်ငံဟာ အရှေ့တောင်အာရှမှာ ထိပ်တန်းနိုင်ငံတဲ့။
ရန်ကုန်က မင်္ဂလာဒုံလေဆိပ်ကိုတောင် ခန်းနားကြီးကျယ်လွန်းလို့
တခြားနိုင်ငံကလူတွေ အစိုးရအရာရှိတွေ တကူးတက လာကြည့်ကြရတယ်ဆိုပဲ။
ရန်ကုန်မြို့တော်ကြီးကိုလဲ ခန်းနားကြီးကျယ်လွန်းလို့
စင်္ကာပူက အင်ဂျင်နီယာကြီးတွေ တကူးတက တအံ့တသြလာကြည့်ကြတယ်တဲ့။
မြန်မာပြည်က ဦးနုခေတ်တုန်းက အတော်ချမ်းသာတယ်ဆိုပဲ။
သူများပြောတာ ကြားဘူးတာ။ ဟုတ်မဟုတ်တော့ သိပါဘူး။

အိန္ဒိယကို အတူတူစာသင်သွားတဲ့ ဆရာတော်တစ်ပါးက အသက်အတော်ရနေပြီ။
အိန္ဒိယ ကုလားပြည်က ရထားကြီးပေါ်မှာ စီးနင်းလိုက်ပါရင်း
“မောင်ဣန္ဒကရေ၊ ဒို့ငယ်ငယ် ဦးနုလက်ထက်တုန်းက
မြန်မာပြည်က ရထားတွေကလဲ ဒီလိုပဲကွ၊ အရမ်းကောင်းတာ၊
ရထားပေါ်မှာ စားသောက်တွဲ၊ စားသောက်ခန်းတွေနဲ့၊
ကိုယ်စားချင်တာမှာလို့ရတယ်၊ ထိုင်ခုံတွေကလဲ သားနားတယ်၊ သန့်ရှင်းတယ်၊
အတော်အဆင်ပြေတယ်”တဲ့။
သူပြောပြဘူးတာပါ။

အိန္ဒိယကုလားပြည်ကလဲ ပြောမဲ့သာပြောရတယ်။
ရထားနဲ့ ခရီးသွားရတာ အတော်အဆင်ပြေတယ်။
ပိုက်ဆံအဆင်ပြေရင် ရထားတွဲအဆင့်အတန်း ရွေးချယ်ပိုင်ခွင့် အများကြီးရှိတယ်။
အခုခေတ် မြန်မာပြည်ကအဆင့်အမြင့်ဆုံး ရထားတွဲအနေအထားက
အိန္ဒိယကုလားပြည် ရထားတွဲ အညံ့စားထဲမှာပါတယ်။

အဲ့ဆရာတော်နဲ့ အိန္ဒိယနိုင်ငံတွင်း ခရီးထွက်တုန်းတုန်း AC တွဲနဲ့ခရီးသွားတာဆိုတော့
အတော်အဆင်ပြေတယ်လို့ ပြောရမှာပဲ။ ဒါကို သူကကြည့်ပြီး ခံစားပြီး
ဦးနုခေတ်ကို ပြန်လည်အမှတ်ရ တောင့်တမိဟန်တူပါရဲ့။

မြန်မာပြည်မှာ အခုခေတ်ရထားတွဲတွေကတော့ အတော်လေးယိုင်နဲ့နေတာတွေ့ရမှာပါ။
ရထားတွဲတွေမှာ AC မပြောနဲ့။ ပန်ကာတောင် မပါဘူး၊
ပန်ကာပါလဲ မလည်တော့ပါဘူး။

သူများနိုင်ငံတွေက တစ်နှစ်ထက်တစ်နှစ် တိုးတက်နေတာ။
ကားဆိုလဲ ကားမို့။ ရထားဆိုလဲ ရထားမို့။
ဒို့နိုင်ငံက တခြားနိုင်ငံတွေလို ရှေ့ကိုမသွားဘဲ
တခြားနိုင်ငံတွေနဲ့ ဆန့်ကျင်ဘက်များသွားနေသလားမသိပါဘူး။

ဦးနုခေတ် နိုင်ငံစည်ပင်ဝပြောနေတော့ သမိုင်းမှတ်တိုင်စိုက်ထူနိုင်လောက်တဲ့
ဘာသာရေးတွေကို ပိုလုပ်နိုင်တယ်။
ဦးနုခေတ်မှာ ဦးနုအထောက်အပံ့နဲ့ မြတ်စွာဘုရားရှင်ရဲ့
ပိဋကတ်တော်တွေကို ခြောက်ကြိမ်မြောက်ရွတ်ဆိုတဲ့ပွဲ
ဆဋ္ဌသံဂါယနာတင်ပွဲကို ကျင်းပဖြစ်ခဲ့ပါတယ်။
နေရာက ရန်ကုန်မြို့၊ ကမ္ဘာအေး မဟာပါသဏလှိုင်ဂူမှာ။
မဟာစည်ဆရာတော်ဘုရားကြီးက အမေး ပုစ္ဆကဆရာတော်အဖြစ်တာဝန်ယူပြီး
တိပိဋကမင်းကွန်းဆရာတော်ဘုရားကြီးက အဖြေ ၀ိသဇ္ဇကဆရာတော်အဖြစ်တာဝန်ယူခဲ့တယ်။
ဒီပွဲမှာ ဗုဒ္ဓဘာသာနိုင်ငံပေါင်းမြောက်များစွာက ပါဝင်ဆင်နွှဲကြတယ်။

ဒီလို ခြောက်ကြိမ်မြောက်စုပေါင်းရွတ်ဖတ်တဲ့ ဆဋ္ဌသံဂါယနာခေတ်ကနေပြီး
ယနေ့ခေတ်တိုင်အောင်လဲ မြန်မာနိုင်ငံရဟန်းသံဃာတော်တွေရဲ့ အခန်းကဏ္ဍဟာ
မကျရှုံးသေးပါဘူး။ အရေးပါတဲ့အခန်းကဏ္ဍက မြန်မာနိုင်ငံအတွက် ပါဝင်ပတ်သက်နေဆဲဘဲ။
အမျိုးဘာသာ သာသနာရေရှည်တည်တန့်ခိုင်မြဲဘို့အတွက်
သံဃာတော်တွေဟာ ဆက်လက်ကြိုးစားဆဲပဲ။

မြန်မာ့သမိုင်းထဲမှာ ရဟန်းသံဃာတော်တွေကို ပယ်နှုတ်လိုက်မယ်ဆိုရင်
မြန်မာ့မြေပေါ်မှာ မှီတင်းနေထိုင်ကြသူတွေရဲ့ ဘ၀မှာ အနှစ်သာရဆိုတာ
ဘာမှရှာလို့ရမှာ မဟုတ်တော့ဘူး။

ဒါ့ကြောင့် မြန်မာနဲ့ ဗုဒ္ဓဘာသာဆိုတာ ခွဲခြားကောင်းတဲ့အရာလဲ မဟုတ်ဘူး။

ဒီနေ့ဒီအချိန်အခါကာလမှာ ငါးပါးသီလမှသည် သစ္စာလေးပါးအသိတရားအထိ
ကျင့်ခွင့်သိခွင့်ရနေတာဟာ ရဟန်းသံဃာတော်မျိုးဆက် တစ်ဆက်မှတစ်ဆက်၊
ခေတ်တစ်ခေတ်မှ တစ်ခေတ် အဆင့်ဆင့် သင်ယူပို့ချလာခဲ့လို့သာ
မြန်မာနိုင်ငံကလူတွေ ကျင့်ခွင့် သိခွင့်ရနေကြတာ။
အရပ်သားလူတွေက ဒီလို ဘုရားရှင်အဆုံးအမသာသနာတော်ကြီးဖြစ်တဲ့
ပိဋကတ်တော်ကြီးတွေကို ရေရှည်ခိုင်မြဲတည့်တန့်အောင် ပြန့်ပွါးအောင် မလုပ်နိုင်ဘူး။
မလုပ်ခဲ့ဘူး။ ရဟန်းသံဃာတော်တွေပဲ လုပ်ခဲ့ရတာ။

ဒီလိုဗုဒ္ဓဘာသာယဉ်ကျေးမှု၊ ကျင့်စဉ်တွေကို မပျောက်ပျက်အောင်
ထိန်းသိမ်းစောင့်ရှောက်ခဲ့တဲ့သံဃာတော်တွေကို
ကျေးဇူးတင်လွန်းလို့ ကျေးဇူးတင်တဲ့အနေနဲ့
သံဃာတော်တွေကို ကိုးကွယ်ဆည်းကပ်ရတယ်။

ဘုရားရှင်ကတော့ ပရိနိဗ္ဗာန်စံသွားပြီ။
ဘုရားရှင်ရဲ့ တရားတော်တွေကို ဘုရားရှင်းရဲ့ကိုယ်စား
သံဃာတော်တွေက ထိန်းသိမ်းစောင့်ရှောက်ခဲ့တဲ့အတွက်
သံဃာတော်တွေကို ကျေးဇူးတင်ရတင်လွန်းလို့
ကိုးကွယ်ဆည်းကပ်နေရတာပါ။