Saturday, July 31, 2010

သားအပြန်ကို မကြိုနိုင်တော့ပြီ

သေခြင်းဆိုတာ မဆန်းပါဘူး။ ဒါပေမဲ့ကျန်ရစ်သူတွေကတော့ ကြေကွဲရတာချည်းပါပဲ။
ကျန်ရစ်သူနဲ့ ချန်ရစ်သူ...
ဘယ်သူဖြစ်ဖြစ် မျှော်လင့်ချက်လေးတွေပြည့်မသွားတာတော့ စိတ်မကောင်းစရာပါ။
ရှေ့ကသွားနှင့်သူ ဇနီး အကြောင်း ဖခင်ဖြစ်သူက ဒီလို ကဗျာဖွဲ့သတဲ့..။

သားအပြန်ကို မကြိုနိုင်တော့ပြီ 
နှုတ်ပြောချိုချို၊ ဘယ်သူကိုမျှ၊
ရန်လိုစကား၊ မပြောကြားခဲ့၊
သား သုံးယောက်ပင်၊ ဖွားသန့်စင်၍၊
ကြည်ရွှင်မေတ္တာ၊ ကရုဏာနှင့်၊
ချီကာ ပိုက်ခြုံ၊ နေစာလှုံခဲ့၊
လုံးစုံမေတ္တာ၊ စေတနာနှင့်၊
သဒ္ဓါပြည့်လှိုင်၊ စာအုပ်ဆိုင်ကို၊
ဖြန့်လှိုင်ငှားရမ်း၊ အလုပ်ကျွမ်းခဲ့၊
တခန်းရွှေဆိုင်၊ ဖွင့်လှစ်နိုင်ခဲ့။

ကျန်းမာရေးမူ၊ နှလုံးသွေးဆူ၍၊
လွယ်ကူစုံပြီး၊ ဆေးရုံကြီးသို့၊
တက်ပြီး ကုသ၊ ပျောက်ကင်းရ၏။
ထိုမှ နောင်တွင်၊ ရုပ်သွင် ဆင်းဝါ၊
မျက်စိ ၀ါ၍၊ ရောဂါသုတ၊
ရှာဖွေရသည့်၊ ဌာနစစ်သည့်၊
ဓာတ်မှန်ကြည့်သော်၊ ကြီးသည့် ကင်ဆာ၊
ဝေဒနာကြောင့်၊ အစာမစားချင်၊
သို့ဖြစ်အင်ကို၊ ယင်းတွင်ဖယ်ခွာ၊
ဆွဲထုတ်ပါသော်၊ အောက်မှာခြောက်လျက်၊
ကျောက်ကပ်ပျက်၍။

ရွက်ဝါကြွေဟောင်း၊ လတပေါင်း၏၊
နှောင်း ဆယ်ရက်စေ့၊ သောကြာနေ့တွင်၊
မွေ့မွေ့ညင်သာ၊ တရားမှတ်ကာနှင့်၊
၈ နာရီခွဲ၊ လောကထဲမှ၊
ခွဲခွာထွက်သွား၊ မိခင်အားကို၊
သနားစိတ်ပို၊ မျက်ရည်ယိုကြ၊
ထိုသည့်နောက်နေ့၊ စခန်းစေ့အောင်၊
ပြုဆောင်ပြီးငြား၊ ပန်းရထားနှင့်၊
သယ်သွားရေဝေး၊ ရောက်ခါနွှေးသော်၊
ကိုယ်တော်အများ၊ မေတ္တာပွား၍၊
တရားသံဝေ၊ အထွေထွေကို၊
စုံစေ့ရွတ်ဖတ်၊ အလေးပြုလတ်သော်၊
မိုးနတ်သခင်၊ မိုးတိမ်ဆင်၍၊
ရှစ်ခွင်တကြော၊ နှင်းမှုန်တောဝယ်၊
ဥသြငိုသံ ပြာ၏တည်း။
နန်းညွန့်ဆွေ
 
အရင်သွားနှင့်သူဇနီးအတွက် သားပြန်လာရင်ဖတ်ဖို့
ကဗျာစပ်ခဲ့သူ ဆရာနန်းညွန့်ဆွေ (၈၇) နှစ်ဟာ
၂၀၁၀၊ ဇူလိုင် ၁၄ မှာကွယ်လွန်ခဲ့ပါတယ်။
   သားပြန်လာမဲ့ရက်ကို မျှော်နေသော မျက်ဝန်းတွေ အရောင်လက်မသွားရရှာတဲ့ 
ဆရာနန်းညွန့်ဆွေနဲ့ ဇနီး ဒေါ်လှကြည်တို့ကိုစာနာစွာ၊
ဝမ်းနည်းစွာ ဂါရ၀ ပြုပါတယ်။
နောင်ဘ၀မှာ ငြိမ်းချမ်းခြင်း အရသာ အပြည့်အ၀ ခံစားနိုင်ပါစေ။
   ps/  ဆရာနန်းညွန့်ဆွေ နဲ့ ဇနီး ဒေါ်လှကြည် ဆိုတာ ပြည်သူချစ်တဲ့
ကိုဇာဂနာ ခေါ် ကိုသူရ ရဲ့မိဘနှစ်ပါးပါ။