Thursday, July 8, 2010

ဝတ်ရုံသစ် မန္တလေး

မန္တလေးမြို့တွင် သမိုင်းဝင် ရှေးဟောင်း အဆောက်အဦးများနှင့် ရိုးရာယဉ်ကျေးမှု ဓလေ့ထုံးစံများ ထွန်းကားခဲ့သော်လည်း ယနေ့ခေတ် မန္တလေးသား လူငယ်များအနေဖြင့် တန်ဖိုးထား ဂုဏ်ယူမှုနည်းပါးလျက် ရှိပြီး ခေတ်လွန်ဝတ်စားဆင်ယင်မှုနှင့် လူနေမှုပုံစံများပြောင်းလဲ လျက်ရှိကြောင်း တွေ့ရှိရသည်။

ရာပြည့်လွန် သင်းပင်းဖွဲ့စည်းမှုများဖြင့် . . .
မန္တလေးမြို့သည် မြန်မာ့သမိုင်းကြောင်းတွင် နောက်ဆုံး မင်းနေပြည်တော်ဖြစ်ခဲ့ပြီး မြို့တည်နန်းတည်ခဲ့သော မင်းတုန်းမင်း၏ စီမံခန့်ခွဲမှုဖြင့် လေးထောင့်စပ်စပ်မြို့ပြပုံစံ ဖွဲ့စည်းကာ မြန်မာ့လူနေမှုစရိုက်ဖြစ်သော ၀င်းဖွဲ့စုစည်းနေထိုင်သည့် ပုံစံဖြင့် မြို့ပြကို ဖွဲ့စည်းခဲ့သည်။ ထို့ပြင်ဘာသာရေးကို အထူးဦးစားပေးပြီး ရိုးရာယဉ်ကျေးမှု အစဉ်အလာများ ထိန်းသိမ်းစောင့်ရှောက်မှုအတွက် လူပညာရှိ၊ ရဟန်း ပညာရှိများကို မြှောက်စားအားပေးမှုတွင် ထင်ရှားခဲ့သော ပြည်ထောင်မင်းတစ်ပါးဖြစ်ခဲ့သည်ဟု မန္တလေးမြို့ခံ သက်ကြီးဝါကြီး သမိုင်းသုတေသီကြီး တစ်ဦးက သုံးသပ်ပြသည်။ ''မင်းနေပြည်တော်ဖြစ်ခဲ့တော့ တစ်တိုင်းတစ်ပြည်လုံးက တော်ပေ့တတ်ပေ့ ကောင်းပေ့ညွတ်ပေ့ဆိုတဲ့ ဘာသာစကားအသုံးအနှုန်းကအစ သုခုမအနုပညာတွေအထိ မန္တလေးမှာပဲတစ်စု တစ်စည်းထဲ ဖြစ်ထွန်းစေခဲ့တယ်။ ပါတော်မူပြီး သူ့ကျွန်ဘ၀အောက် ရောက်တာတောင်မှ အမျိုးဘာသာ၊ သာသနာကို အထိပါးမခံဘဲ ရိုးရာယဉ်ကျေးမှုကိုလည်း အတတ်နိုင်ဆုံး ထိန်းသိမ်းစောင့်ရှောက်ကြပြီး လူငယ်တွေကိုလည်း အမွေအနှစ်တစ်ခုပမာ လက်ဆင့်ကမ်းခဲ့ကြတယ်။ မန္တလေးမြို့သက်နှစ်တစ်ရာအထိတော့ သည်အစဉ်အလာဟာ အားကောင်းခဲ့ပါတယ်။ ဒါ့ကြောင့်လည်း နှစ်တစ်ရာရဲ့ ရှေ့ပိုင်းကာလတွေ မှာ မန္တလေးသားတွေ တစ်စိတ်တစ်ဝမ်းထဲ စုစည်းပြီး အမျိုးဘာသာသာသနာအတွက် သာမက မြန်မာ့ရိုးရာယဉ်ကျေးမှု အစဉ်အလာတွေကို ခေတ်နဲ့အညီ အရိုးကိုအရွက်မဖုံးစေဘဲ ဖော်ထုတ်မြှင့်တင်နိုင်တဲ့ အသင်းအဖွဲ့အစည်းတွေ ထူထောင်နိုင်ခဲ့တာပေါ့။ ဒါပေမယ့် ဒီဘက်ဆယ်စုနှစ်ပိုင်းတွေမှာ မန္တလေးရဲ့လူမှု နေထိုင်ခြင်းဆိုင်ရာပုံစံနဲ့ လူမှုဆက်ဆံရေးပိုင်းကို ဆက်ခံထိန်းသိမ်းဖို့ လူငယ်တွေအနေနဲ့ ၀န်လေးလာကြတယ်။ ဒီစိတ်ဓာတ်နဲ့ တစ်ပါတည်း မန္တလေးရဲ့အဖိုးတန် သမိုင်းဝင် အဆောက်အဦးတွေပေါ် တန်ဖိုးထားစိတ်နဲ့ ယဉ်ကျေးမှုဓလေ့ထုံးစံတွေအပေါ် လေးစားလိုက်နာမှုတွေ သိသိသာသာကြီး နည်းပါးသွားတယ်။ စီးပွားရေးသဘောအရ မန္တလေးမှာ အခြေတည်ဖြစ်ထွန်းနေကြတဲ့ တစ်နယ်သားများရဲ့ဝတ်စားဆင်ယင်မှု၊ လူနေမှုပုံစံ၊ ဓလေ့ထုံးစံတွေအပေါ် အထင်ကြီးအတုယူ လာကြတာတွေပါ''ဟု ဆက်လက်၍သုံးသပ်ပြသည်။

လူငယ်တွေက လက်ဆင့်ကမ်းအမွေခံခဲ့ကြရာ
သက်တမ်းရာချီရှိသည့် မြောက် ပြင်ရပ်မှ အရုဏ်တော်ဝတ်အသင်း၊ သင်းမလူကြီးတစ်ဦးက သူ့အမြင်ကို ပြောကြားရာ၌လည်း'' ဘာသာရေး အခမ်းအနားတွေနဲ့ ပတ်သက်ပြီး မန္တလေးမှာအလွန် ထွန်းကားခဲ့ပါတယ်။ ကျွန်တော်တို့လို နှစ်ပေါင်းရာချီပြီး သက်တမ်းရှည်ခဲ့တဲ့ အရုဏ်တော် ၀တ်အသင်းကြီးတွေ မန္တလေးမှာမနည်း အသက်ရှည်အောင်ဆက်ပြီး ခက်ခက်ခဲခဲထိန်းသိမ်း နေကြရတယ်။ အထူးသဖြင့် မျိုးဆက်သစ်လူငယ်တွေက ဒီဘာသာရေးအလုပ်တွေပေါ်မှာ စိတ်ဝင်စားမှု နည်းကုန်ကြတယ်။ ရပ်ကွက်ထဲက အနည်းအကျဉ်းသော လူငယ်လေးတွေကိုပဲ ခက်ခက်ခဲခဲ စုစည်းထားရတယ်။ ၀ါတွင်းဝါပ ရပ်ကွက်ထဲ ဆွမ်းကြီးခံထွက်ရမှာကိုပဲ လိုက်လာရမှာကို အသည်းအသန် ရှက်တဲ့လူငယ်တွေ ဖြစ်ကုန်ပါပြီ။ ဒါပေမယ့် ဒီလူငယ်တွေဟာ ဘာသာရေးဆိုင်ရာ အခါကြီးရက်ကြီးတွေမှာ ဆိုင်ကယ်တွေပေါ် လူသုံးလေးယောက်တင်ပြီး လီဗာကုန်ဖွင့်မြို့လုံးအနှံ့ သွားလာဖို့တော့ ရှက်ရကောင်းမှန်း မသိကြတော့ပါဘူး။ အရင်ကအခါကြီး ရက်ကြီးတွေဆိုရင် ဆွမ်းကြီးခံအဖွဲ့တွေ၊ ၀တ်အသင်းတွေ၊ အရုဏ်တော်ကြီးတွေ၊ လူငယ်တွေကိုယ်တိုင် တည်တည်ငြိမ်ငြိမ် ဣနြေ္ဒရရ ပါဝင်ဆင်နွှဲကြတာ မြင်ကြရတော့ ကြည်နူးဝမ်းမြောက်ကြရတယ်။ ကျွန်တော်တို့ လူငယ်တုန်းကလည်း လူကြီးတွေဆီက ကောင်းတဲ့အမွေကို အဲဒီလို လက်ဆင့်ကမ်းယူခဲ့တာပါ။ အခုလူငယ်တွေအနေနဲ့ ကျွန်တော်တို့ဆီက လက်ဆင့်ကမ်း ယူရကောင်းမှန်းလည်း မသိတော့ဘူး။ ယူရမယ့်ကိစ္စအပေါ်မှာလည်း တလေး တစားမရှိတော့ဘူး''ဟု ဆိုသည်။

ပွဲလမ်းတွေမှာ အပျော်အပါးဘက်ကိုပဲ အားသန်ကုန်ကြကာ . . .
 မြန်မာတို့၏ အထင်ကရပွဲတော်ဖြစ်သော မဟာသင်္ကြန်တွင် မန္တလေးမြို့သည် အစဉ်အဆက် ရိုးရာယဉ်ကျေးမှုကို စောင့်ရှောက် ထိန်းသိမ်းခြင်းဖြင့် အဆင့်အတန်းမြင့်မားသည့် မြန်မာ့ယဉ်ကျေးမှုအတွက် ကမ္ဘာသို့တိုင်တိုင် ဂုဏ်ယူနိုင်ခဲ့သည်။ မန္တလေးသင်္ကြန် ယဉ်ကျေးမှုသင်္ကြန် အနှစ်သာရများကို မန္တလေးသား လူငယ်အများစုက ဂုဏ်ယူခြင်း၊ လေးစားမြတ်နိုးခြင်း မရှိကြတော့ဘဲ သင်္ကြန်ဟုဆိုလျှင် သောက်စားမူးယစ်မှုနှင့် ရင်းနှီးလွတ်လပ်မှုဟုသာ အဓိပ္ပာယ်တလွဲ မှတ်ထင်နေကြမှုများနှင့် ပတ်သက်၍ ''မန္တလေးသင်္ကြန်ဟာ အစဉ်အဆက် အကောင်းဘက်ကို ဦးတည်ပြီး အား ထုတ်ခဲ့ကြတာ သေချာတယ်။ အကောင်းဆိုတာ ရိုးရာယဉ်ကျေးမှုအကောင်း၊ သုခုမအနုပညာအကောင်း၊ လူလူချင်း စာနာထောက်ထားမှု အကောင်း၊ မောင်ရင်းနှမအသွင် ခင်မင်စေတဲ့အကောင်း၊ နှစ်သစ်နှစ်ဦးမှာ ကျက်သရေ မင်္ဂလာရှိစွာ ရင်းနှီးချစ်ကြည်စေလိုမှု အကောင်း၊ ဗြဟ္မစိုရ်တရားထွန်းကား စေမယ့်အကောင်း၊ မြန်မာမျိုးသမီးသားကောင်းလေးတွေ ဟီရိသြတပ္ပတရားနှင့် အဖိုးတန်သားကောင်း မိခင်တွေဖြစ်စေမယ့် အကောင်း ......၊ အဲဒီအကောင်းတွေ မန္တလေးသင်္ကြန်မှာ အစဉ်အဆက် ထွန်းကားခဲ့တယ်။ ဒီအမွေကို လက်ဆင့်ကမ်းခဲ့တယ်။ အခု မန္တလေးသင်္ကြန်က အဲဒီအကောင်းတွေ တစ်ခုမှမရှိတော့ဘူး။ အကောင်းတွေ ရဲ့ဆန့်ကျင်ဘက်တွေ ဖြစ်ကုန်တာ ပါပဲ။ တကယ်တော့ ဒီဖြစ်ရပ်တွေမှာ မန္တလေးသားလူငယ်တွေရဲ့အစုအစည်းပုံစံနဲ့ ပညာသားပါပါ သိရှိနားလည်ပြီး ခုခံကာကွယ်တည်ဆောက်နိုင်ကြဖို့ လိုအပ်ပါတယ်။ ဒါမှလူငယ်ဆိုတဲ့ ပွင့်လင်းတက်ကြွ ထက်မြက်ခြင်းဂုဏ်ရည်တွေကို ရယူပိုင်ဆိုင်နိုင်မှာပေါ့'' ဟု မန္တလေးသား ၀ါရင့်အနုပညာရှင်ကြီးတစ်ဦးက သုံးသပ်ပြခဲ့သည်။

အပြောင်းလဲကြီး ပြောင်းလဲသွားတဲ့ မန္တလေးသူလေးတွေရဲ့ ၀တ်စားဆင်ယင်မှုများမှာ . . ယခင်ကမန္တလေးမြို့၏ ၀တ်စား ဆင်ယင်မှုများနှင့် ပတ်သက်၍ မြန်မာ့ဓလေ့စရိုက် အပီသဆုံး၊ ယဉ်ကျေးမှုအရှိဆုံးဟု သတ်မှတ်ခဲ့ကြပြီး မြန်မာတို့၏ ၀တ်စားဆင်ယင်မှုနှင့် ပတ်သက်၍ နိုင်ငံတကာမှလေ့လာရာတွင် မန္တလေးကိုစံထားခဲ့သည်။ အထူးသဖြင့် မန္တလေးသူလေးများ၏ ဆံပင် ထုံးဖွဲ့မှု၊ အင်္ကျီလုံချည် အ၀တ်အစား မှသည် လက်ဝတ်ရတနာ အပြင်အဆင်အထိ ရိုးရာယဉ်ကျေးမှုအဖြစ် မှတ်ကျောက်တင်နိုင်ခဲ့သည်။ လွတ်လပ်သော ကုန်သွယ်မှုခေတ်တွင် မန္တလေးမြို့သို့ အနယ်နယ်အရပ်ရပ်မှ ကူးသန်းသွားလာကြခြင်း၊ အခြေကျနေထိုင် စီးပွားရှာကြခြင်း၊ ထို့အတူ မန္တလေးမှလည်း ပြည်တွင်းပြည်ပကူးလူး ဆက်ဆံမှုများပြားလာခြင်း၊ မီဒီယာအသီးသီး၏ ဖြန့်ကြက်ပေါက်ရောက်မှုကလည်း မန္တလေးတွင် ကျယ်ပြန့်လာခြင်းတို့ကြောင့် ၀တ်စားဆင်ယင်မှု အပြောင်းအလဲများသည် အချိုးပမာဏကြီးမားစွာ အံ့မခန်းရှိခဲ့ကြောင်း တွေ့မြင်ရသည်။ ''အရင်က မန္တလေးသူလေးတွေကို ကြည့်ချင်ရင် မန္တလေးဈေးချိုတော်နဲ့ မန္တလေးတက္ကသိုလ်လို နေရာတွေမှာ အဓိကထား ကြည့်ကြရတယ်။ မန္တလေးသူလေးတွေ ၀တ်စားဆင်ယင်မှုက တခြားမြို့ရွာက ၀တ်စားဆင်ယင်မှု တွေနဲ့ သိသိသာသာကွဲပြားတယ်။ မြန်မာဆန်တယ်။ ယဉ်ကျေးတယ်။ ကျက်သရေရှိတယ်ဆိုတဲ့ ဂုဏ်တွေကို မန္တလေးသူလေးတွေမှာ တွေ့ရတယ်။ 'မန်းဆန်တယ်၊ နန်းဆန်တယ်'ဆိုတဲ့ အသုံးအနှုန်းမျိုး တွင်ကျယ်လာတာပါ။ အရင်ကခြေမျက်စိအထက် မြင်ခွင့်မရတဲ့ မန္တလေး သူလေးတွေကို အခုအခါ ပေါင်ရင်းအထိ အကာအကွယ်မဲ့ မြင်တွေ့နေ ကြရပြီ။ ပိုဆိုးတာက မန္တလေးသူတွေဟာ ကိုယ်ပိုင်ကားနဲ့ သွားလာမှုထက်ဆိုင်ကယ်နဲ့ လွတ်လွတ်လပ်လပ် သွားလာမှုက ပိုများလေတော့ သူ တို့ရဲ့ဝတ်စားဆင်ယင်မှုတွေက သူတို့ရဲ့ခန္ဓာကိုယ်အစိတ်အပိုင်း တော်တော်များများကို လွတ်လွတ်လပ်လပ် မြင်တွေ့နိုင်ရတယ်။ တကယ်တော့ မန္တလေးကိုစီးပွားရှာဖို့ ငွေထုတ်ပိုက်ပြီး အပေါ်စီးက၀င်လာတဲ့ အရှေ့မြောက် ဘက်ကဧည့်သည် မိန်းမပျိုတွေရဲ့ ခပ်ရိုင်းရိုင်း ၀တ်စားဆင်ယင်မှုတွေ ကို ရိုးလွန်းအလွန်းတဲ့ မန္တလေးသူတွေ ရှက်ရကောင်းမှန်းမသိ အတုခိုးကြတာပါ။ မန္တလေးမှာ အသိသာဆုံး ပြောင်းလဲမှုကတော့ လူငယ်တွေရဲ့ ၀တ်စားဆင်ယင်မှုပါပဲ။ အထူးသဖြင့် မိန်းမပျိုလေးတွေရဲ့ ၀တ်စားဆင်ယင်မှုပါပဲ။ တစ်လျှောက်လုံး ထိန်းသိမ်းခဲ့တဲ့ မြန်မာ့ယဉ်ကျေးမှုဆိုတာနဲ့တော့ ဖြောင့်ဖြောင့်ကြီး ဆန့်ကျင်နေတာပေါ့''ဟု ဈေးချိုတော်မှ မန္တလေးသူကြီးတစ်ဦးက ဆိုသည်။

သမိုင်းမသိတာကိုပဲ
 မန္တလေးတွင် သမိုင်းနှင့်ပတ်သက်၍၊ ဘာသာရေးနှင့်ပတ်သက်၍ ယဉ်ကျေးမှုနှင့်ပတ်သက်၍ အထင်ကရနေရာ ဌာနကြီးများအပြင် ၁၂ ရာသီ ရိုးရာယဉ်ကျေးမှုပွဲလမ်းများလည်း ဖြစ်ထွန်းခဲ့သည့် အားလျော်စွာ ထိုနေရာ၊ ထိုဒေသ၊ ထိုပွဲလမ်းများ နှင့်ပတ်သက်သော သမိုင်းကြောင်း ဗျုပ္ပတ်များကို ယခင်က မန္တလေးသားများ နောကြေအောင် သိရှိခဲ့ကြပြီး ထိုအသိနှင့် တန်ဖိုးထားလေးစားမှု တစ်ထပ်တည်းလည်း ကျရောက်ခဲ့သည်။ ထို့ကြောင့် တစ်မြို့တစ်ရွာမှ ဧည့်သည်များသာမက နိုင်ငံခြားသားအထိ မိမိမြို့ရှိ အဆိုပါသမိုင်းဝင် ကြောင်းခြင်းရာများကို ရေရေလည်လည် ပြောဆိုရှင်းပြခြင်းဖြင့် ဂုဏ်ယူခဲ့ကြသည်။ တစ်နယ်သား၏ အထင်ကြီးလေးစားမှုကိုလည်း ရယူနိုင်ခဲ့ကြသည်။ '' မန္တလေးသူ လူငယ်လေးတွေက မန္တလေးမြို့ကို ဘယ်နှခုနှစ်မှာ ဘယ်ရှင်ဘုရင်က တည်ထောင်ခဲ့သလဲ ဆိုတာတောင် သိဖို့ခဲယဉ်းလာပြီ။ ၁၃၀၀ပြည့် အရေးတော်ပုံဆိုရင် ပိုဝေးသွားမယ်။ ပွဲတော်တွေနဲ့ ပတ်သက်လို့လည်း ခြေခြေမြစ်မြစ်သိဖို့ ခဲယဉ်းသွားပြီ။ လေ့လာလိုက်စားလိုတဲ့ တစ်နယ်တစ်ကျေးက ဧည့်သည်တွေကိုရှင်းပြဖို့ တော်တော်ခက်ခဲသွားပြီ။ မဟာမုနိ ဘုရားကြီးထဲက နှစ်ပေါင်းသုံးဆယ် လောက်ပဲသက်တမ်းရှိတဲ့ ကြေးစည်ထမ်း အောင်ကျော်ဇေယျာ၊ အောင်ကျော်ဒေ၀ါနတ်ရုပ်တွေကို ခြေထောက်ပွတ်လိုက်၊ ဗိုက်ပွတ်လိုက် ဆုတောင်းရင် ရောဂါဝေဒနာသက်သာမယ်လို့ တလွဲသိရှိရှင်းပြနေကြတယ်။ ဈေးချိုဆိုတာကတော့ သူတို့နဲ့ အတော်ကြီးဝေးသွားပြီပေါ့။ ပိုဆိုးတာက မန္တလေးသား လူငယ်လေးတွေဟာ ဒီအချက်အလက်တွေကို သိစရာမလိုတော့ဘူး။ အင်တာနက်ကဖေးမှာ အချိန်ကုန်ခံဖို့ပဲ အားထုတ်တာက ပိုပြီးခေတ်မီတယ်လို့ ယူဆကြ တယ်။ အင်တာနက်ကဖေးမှာ အချိန်ကုန်ခံတယ်ဆိုတာ ကမ္ဘာကိုသိဖို့မဟုတ်။ မိတ်ဖွဲ့ဆွေဖွဲ့ကိစ္စတွေပဲ များလာတယ်''ဟု ၀ါရင့်အယ်ဒီတာကြီး တစ်ဦးက ရှင်းပြသည်။

နောက်လှည့်ကြည့်ရမှာ ရှက်စရာ
တကယ်တော့ ခေတ်သည် အရှိန်အဟုန်ဖြင့် ပြောင်းလဲခြင်းကို အမှီလိုက်နိုင်ရန် လိုအပ်သည်။ လူငယ်များ အနေဖြင့် ကျယ်ပြန့်လာသော အတွေးအမြင်များနှင့် ခေတ်မီလာသော အတတ်ပညာများကို သိရှိတတ်မြောက်ခြင်းနှင့်အတူ အနာဂတ်သို့ အဓိက ကြည့်မြင်မှုဖြင့် အဆင့်မီအဆင့်မြင့် ဘ၀နေထိုင်မှု တည်ဆောက်သည်ဟု မှတ်ယူကြရမည်ဖြစ်သော်လည်း နှစ်ပေါင်းထောင်သောင်းချီ၍ ဖြစ်တည်ခဲ့သော တိုင်းပြည်နှင့်လူမျိုးအပေါ် သစ္စာရှိစွာ ချစ်မြတ်နိုးတန်ဖိုးထားမှသာ ယဉ်ကျေးသည့် လူသားတစ်ယောက်၏ တာဝန်ကျေပွန်ခြင်းဖြစ်သည်ဟု ဆိုရမည်။ ထို့ကြောင့် ရှေ့သို့မရောက်နိုင်ဘဲ အတိတ်ကိုချည်း တ၀ဲဝဲလည်လည် တသသဂုဏ်ယူခြင်းဖြင့် အချိန်ကုန်အချိန်နှောင်းမဖြစ်ရန် လိုအပ်သည်။''ဒီပဋိပက္ခကတော့ အမြဲ တမ်းရှိတာပါ။ ဒီနေရာမှာ ဘယ်တော့မှ တစ်ဖက်သတ် မယူဆကြဖို့ပါပဲ။ အတိတ်ကိုလည်း ပြန်လှန်ကြည့်ပြီး ဂုဏ်ယူသင့်တာဂုဏ်ယူ၊ သင်ခန်းစာ ယူသင့်တာ သင်ခန်းစာယူ၊ ပြီးတော့ အနာဂတ်ကိုလည်း မျက်စိတစ်ဆုံး မျှော်ကြည့်ပြီး လက်ရှိပစ္စက္ခတ်မှာ ခေတ်နဲ့အမီ ရင်ပေါင်တန်းလိုက်နိုင်ဖို့ လိုတယ်။ လွန်ခဲ့တဲ့နှစ်ပေါင်း ရှစ်ဆယ်ကျော်က အတိတ်မှအတိတ်ပဲဆိုပြီး အဟောင်းကိုတသသ လုပ်နေတဲ့ မြန်မာပညာရှိကြီးများနဲ့ ဘယ်လိုမှတားမရတဲ့ နိုင်ငံတကာခေတ်ပေါ် တို့ဖြစ်ရပ်မှာ ပညာတတ်ပြီးအမြင်ကျယ်ခဲ့တဲ့ မန္တလေးသားလူငယ်လေးတွေရဲ့ ကြိုးပမ်းအားထုတ်မှုကြောင့် ခေတ်ပေါ်ဂန္ထ၀င်လို့ သတ်မှတ်ခဲ့ကြတဲ့ ဂီတသစ်တစ်ခုလမ်းပေါက်ခဲ့ပြီး ယနေ့ထက်တိုင် အရှိန်အဟုန်ကောင်းစွာ ဖြစ်ထွန်းခဲ့တာပဲ။ ဒီအားထုတ်မှုရဲ့ ရလဒ်အပေါ် တကယ်သိ၊ တကယ်တတ်၊ ခေတ်ကိုလည်း အမြင်ကျယ်ကျယ် သိရှိထားတဲ့ နိုင်ငံတကာအဆင့်မီ လူငယ်လေးတွေက သဘောပေါက်တယ်။ ဂုဏ်ယူတယ်။ ကျွန်တော်တို့ တမြန်နှစ်က ရန်ကုန်မျှော်စင်ကျွန်းမှာ သွားရောက်တီးမှုတ်ဖျော်ဖြေတော့ ရန်ကုန်လူငယ်အများစုက တစ်ခဲနက် အားပေးတယ်။ သူတို့မမြင်ဖူးတဲ့ မြန်မာဒိုးတီးကွက်၊ ဒိုးဆစ်တွေကိုတောင် ပြန်လှန်တီးခိုင်းပြီး မှတ်တမ်းတင်ကြတယ်။ ဒါပေမယ့် ကျွန်တော် တို့ တီးဝိုင်းမန္တလေးမှာ ဖျော်ဖြေတီးမှုတ်ပြီဆိုရင်တော့ အသက်ငါးဆယ်ကျော်တန်း မန္တလေးသားလက်ဟောင်း လူကြီးအနည်းငယ်သာ မိုးတိုးမတ်တပ် လာနားထောင်ကြပြီး မန္တလေးသားလူငယ်အများစုကတော့ ဆိုင်ကယ်တောင်မှ စက်သံမလျော့ဘဲ ပြောင်လှောင်သရော်သွားကြတာ မြင်ရတာ အလွန်ဝမ်းနည်းစရာကောင်းပါတယ်''ဟု သက်တမ်း ၈၆ နှစ်ရှိ မန္တလေးမြို့မ တူရိယာအသင်းမှ အမှုဆောင်တစ်ဦးက ရှင်းပြသည်။

တကယ်ယဉ်ကျေးခေတ်မီ ကမ္ဘာအကြည့်ခံနိုင်ဖို့
 မြန်မာသည် ကမ္ဘာနှင့်ရင်ပေါင်တန်းပြီး အတိတ်သမိုင်းကောင်းသော၊ အဆင့်တန်းမြင့်သည့် ယဉ်ကျေးမှု ဓလေ့ထုံးစံများကို နှစ်ပေါင်းထောင်သောင်းကတည်းက ပိုင်ဆိုင်ခဲ့သော၊ တိုင်းပြည်၏ နယ်နိမိတ်ကို ဘယ်တော့မှ အထိပါးအပြောင်းအလဲ မခံဘဲ ခိုင်မာခဲ့သော လူမျိုးတစ်မျိုး၊ တိုင်းပြည်တစ်ပြည်အဖြစ် ကမ္ဘာတည်သရွေ့အစဉ် တည်တံ့ရေးတွင် မြန်မာစရိုက်လက္ခဏာနှင့် ပြယုဂ်များတွင် အများစု ဖြစ်ထွန်းတည်ရှိခဲ့သည့် မန္တလေး၏ ကိုယ်စိတ်နှစ်ပါးတည်တံ့ရေးသည် အထူးအရေးကြီးလှသည်။ ထိုတာဝန်ကို ယနေ့မန္တလေးသား လူငယ်လေးများ ပခုံးပြောင်းထမ်းဆောင်ရာတွင် မန္တလေး၏ ခိုင်မာသော အတိတ်ကို အမြဲမပြတ်လေ့လာစောင့်သိ နားလည်တန်ဖိုးထားကြမှသာ အနာဂတ်သည် အဆင့်တန်းမြင့်၍ ယဉ်ကျေးသော နိုင်ငံတကာစံချိန်မီအဖြစ် ဂုဏ်ယူဝံ့ကြွားနိုင်မည်ဟု အမြော်အမြင်ကြီးမားသည့် မန္တလေးသား မျိုးဆက်ဟောင်း လူကြီးသူများက ယုံကြည်နေကြကြောင်း လေ့လာသိရှိရပါသည်။
@Eleven Media Group