Monday, May 3, 2010

သဘာဝ နှင့် ရာဇတော ဆက်နွယ်မှု

ဒီစာကိုရေးရတာ အတော်အားယူရေးရပါ့ဗျာ၊
အင်တာနက်ဆိုင်ထဲ လူကလဲ ထူ၊ ပူကလဲ ပူနဲ့၊ အတော်အနေရ အထိုင်ရ ခက်နေပါ့ဗျာ။
မီးကလဲ မလာတော့ မီးစက်က အဲယားကွန်းစက်တွေကို မနိုင်လို့ ဖွင့်မရ၊ ဒုက္ခပါဗျာ။
ဒါတောင် စောစောကဘာ လူလည်လုပ်ပြီး ရှိတဲ့ပန်ကာလေး ၂ လုံးကို
မသိချင်ယောင်ဆောင်ပြီး ကိုယ်ထိုင်တဲ့ဘက် အသာလှည့်ထားလို့ နေသာတာပါ။
ကိုယ့်လိုလူလည်နောက်တစ်ယောက်ရောက်လာလို့ ပန်ကာကို သူ့ဘက်ပြန်လှည့်သွားရင်
ဆက်ထိုင်လို့ မဖြစ်တော့ပါဘူး။ ထပြေးရတော့မှာပါ။
ဒီနှစ်မြန်မာပြည်ရာသီဥတုက အတော်လေးပူပါတယ်။
မိုးလေ၀သသတင်းတွေကြည့်လိုက်ရင် ဒေသတော်တော်များများက
မေလရဲ့ ပျမ်းမျှအပူချိန်အထက်တွေမှပါပါ။
အခုဆို ၄၃ စင်တီဂရိတ် ၁၁၃ ဖာရင်ဟိုက်လောက် ရောက်နေပါ့ဗျာ။
အခုမေလအတွက် မိုးလေ၀သခန့်မှန်းချက်ထွက်လာတာက
မိုးအ၀င်နောက်ကျပြီး မိုးအထွက်စောမယ်လို့ မှန်းကြတယ်။
ဒီတစ်လလုံးတော့ လှိမ့်ပြီးပူနေမဲ့အခြေအနေရှိပါတယ်။
ဒီအတိုင်းဆက်ပူနေဦးမှာလား။
အပူချိန်ထပ်တိုးလာဦးမှာလားက မသေချာပါခင်ဗျာ။
မိုးမလာသေးရင် ရေလာသေးမှာ မဟုတ်။
ရေမလာသေးရင် မီးကလည်း လာဦးမှာ မဟုတ်ပါ။
အဓိကပြောချင်တာက ခုရက်ပိုင်းကြားနေရတဲ့သတင်းလေးတွေနဲ့ ဆက်စပ်လို့ပါ။
အပူဒဏ်နဲ့ပတ်သက်တဲ့ စပ်မိစပ်ရာ သတင်းလေးတွေပါ။
အခုဘဲ ဗွိုက်စ်ဂျာနယ်ထဲ ဖတ်လာရပါတယ်။ ကမာရွတ် လှည်းတမ်းမီးပွိုင့်မှာပါ။
နေ့လည်ခင်းအချိန် တက္ကစီယာဉ်မောင်းက မီးပွိုင့်ကို ကားရပ်စောင့်နေတုန်း
အိုက်လွန်းလို့ ရေခဲရေ ၀ယ်သောက်ပါသတဲ့ဗျ။
ရေခဲရေတ၀သောက်ပြီး ရေခဲရေနဲ့ဘဲ မျက်နှာဆက်သစ်ပါတယ်တဲ့ခင်ဗျ။
သူ့ခမျာ နေရထိုင်ရ အတော်အဆင်ပြေသွားပုံပါ။
ဒါတင်မက၊ ရေခဲရေကို သူမှာပါလာတဲ့ချွေးသုတ်တဘက်လေးကို
ရွှဲနေအောင် စွတ်လိုက်ပါတယ်။ ဒါလေးနဲ့ သူ့လည်ပင်းပတ်ထားရင်း
အပူဒဏ်သက်သာအောင်နေလိုက်ပုံပါ။
အဲဗျာ၊ ဖြစ်ချင်တော့ မီးပွိုင့်တောင် တစ်ကြိမ်မစိမ်းသေးဘူး။ အဲဒီပုံစံနဲ့ဘဲ ဦးဏှောက်ကြောပြတ်ပြီး
မီးပွိုင့်စောင့်ရင်း ကားပေါ်တင် ခေါင်းကြီးဇက်ကျိုးကျရင်း ကိစ္စပြတ်သွားရှာတယ်တဲ့ခင်ဗျ။
ပြီးခဲတဲ့ရက်ပိုင်းတွေကလဲ သမံတလင်း ရေလောင်းပြီး အဲဒီအပေါ်ဖျာခင်းအိပ်ရင်း
လေဖြတ်ပြီး ကိစ္စတုံးသွားတာတို့၊ ခြင်ထောင်ကို ရေစွတ်၊ ဖျာကို ရေစွတ်ပြီး
အိမ်အပြင်ထွက် အိပ်လိုက်ကြတဲ့ လင်မယားအစုံလိုက်တွေ၊
မနက်ကျတော့ တကိုယ်လုံးတောင့်တင်းပြီး အနိစ္စရောက်ကုန်တာတို့ ကြားရပါတယ်။
အခုလို ပူလွန်းတဲ့အချိန်မှာ ဒါတွေကို ဂရုစိုက်ဘို့ လိုပါတယ်။
လူက အပူဒဏ်ကို အသင့်အတင့်ခံနိုင်ပေမဲ့ အပူအအေးရုတ်တရက်ကွာခြားမှု ဒဏ်ကိုတော့
Temperature Shock ကို ခံနိုင်ရည် လုံးဝ မရှိပါဘူး။
ခန္ဓာကိုအပူချိန်နဲ့ ပတ်ဝန်းကျင်အပူချိန် ၃ ဒီဂရီလောက် ရုတ်တရက်ခြားနားသွားရင်
ပြဿနာ စဖြစ်ပါတယ်။ အပူချိန် ၅ ဒီဂရီလောက် ရုတ်တရက်ခြားနားသွားရင်
ရှော့ခါသေချာပေါက်ရနိုင်ပါတယ်ခင်ဗျာ။
လူ့ခန္ဓာကိုယ်က ဇီဝတုန့်ပြန်ပုံတွေက ထူးဆန်းပါတယ်။
သွေးကြောတွေ ကြွက်သားတွေက အပူချိန်ခြားနားမှုအလိုက် ချက်ချင်းတုန့်ပြန်ပါတယ်။
ခုနလို ချက်ချင်းအေးသွားရင် ကြွက်သားတွေ သွေးကြောတွေက ကြုံ့သွားပါတယ်။
ပြီးမှ ခဏနေမှ ပတ်ဝန်းကျင်အပူချိန်နဲ့ ချိန်ညှိရင်း ခန္ဓာကိုယ်က နဂိုပုံမှန် ပြန်ရောက်ပါတယ်။
ခုန တက္ကစီယာဉ်မောင်းဆိုရင် ရေခဲရေအ၀တ်နဲ့ လည်ပင်းအပတ်မှာ လည်ပင်းသွေးကြောမကြီး အပူအအေးကွာခြားတာကြောင့် ချက်ချင်းကြုံ့သွားပါတယ်။
ဒီအချိန်မှာ သွေးကြောတွေ အညှစ်ခံရသလို အဖိခံရသလိုဖြစ်ပြီး ရုတ်တရက်သွေးဖိအားတက်သွားကာ ဦးဏှောက်ထဲက သွေးကြောတချို့ ပေါက်သွားတာပါ။
မဖြစ်သင့်ပါဘူး။ အသိတရားရှိသင့်ပါတယ်။
အပြင်နေပူပူကနေ အဲယားကွန်းအခန်းထဲ ချက်ချင်းဝင်လိုက်ရင်
ဘယ်သူမဆို ကြက်သီးထဘူးကြမှာပါ။ ဒီသဘောပါဘဲ။ ကြွက်သားတွေက တုန့်ပြန်ပြတာပါ။
ဒါ့ကြောင့် အိုက်တယ်ဆိုပြီး ထင်ရာမလုပ်ကြဘို့ အဓိကပြောချင်တာပါဗျာ။
နေပူပူအချိန်မှာ သက်ကြီးရွယ်အိုတွေကို အထူးဂရုစိုက်ကြပါဗျာ။
ခုနပြောသလို အပူအအေးကို နည်းမှန်လမ်းမှန်လေးဖြစ်အောင် ဂရုစိုက်ပြီး ကြည့်ပေးကြပါ။
ပြီးတော့ ဒီအချိန်မှာ အစားအသောက်ဂရုစိုက်ဖို့လိုပါတယ်။
သက်ကြီးရွယ်အိုနဲ့ သွေးတက်စာကတော့ ဒီအချိန်မှာ ဘယ်လိုမှ မဖြစ်တော့လို့ပါ။
ပြီးခဲ့တဲ့ ၂ ရက်လောက် ကျွန်တော့သူငယ်ချင်းယောက္ခမကြီး ဆုံးသွားပါတယ်။
ဖြစ်ပုံက ဒီလိုဗျ။ သူငယ်ချင်းယောက္ခမကြီးက သူ့သူငယ်ချင်းအလှူကို သွားချင်တယ်ဆိုလို့
သူငယ်ချင်းက လိုက်ပို့ပါတယ်။ ဟိုကျတော့ လား လား၊ အုန်းနို့ခေါက်ဆွဲကျွေးပါတယ်။
သားမက်က ယောက္ခမကို အဲ့ဒါတွေမစားဘို့ တားပါတယ်
ယောက္ခမက စိတ်ဆိုးပြီး သူ့ကို ဆရာလာမလုပ်ဘို့ အချီအချစကားများရင်း နောက်ဆုံး
အလှူမှာ ခေါက်ဆွဲတစ်ပုဂံဘဲစားဘို့ ယောက္ခမက ဈေးတည့်သွားပါတယ်။
ဖြစ်ချင်တော့ အလှူလုပ်တဲ့အိမ်က အုန်းသီးခြစ်သည့်လုပ်ငန်းငန်းလုပ်တဲ့ စီးပွါးရေးလုပ်ငန်းရှိပါတယ်။ ဒီတော့ သူတို့အလှူမှာကျွေးတဲ့ အုန်းနို့ကတော့ ထူးထူးရှယ်ပေါ့ဗျား။
ဒါနဲ့အပြန်မှာ အိမ်ကျ သူ့မိန်းမအဆူခံရ မစိုးလို့ သူငယ်ချင်းက သူ့ယောက္ခမကို သံပုရာရည်ကို
အိမ်မပြန်ခင်ကတည်းက လမ်းမှာသောက်သွားဘို့ ဆရာထပ်လုပ်ပါတယ်။
ဒီတစ်ခါတော့ ယောက္ခမကလဲ သူနေမကောင်းလာရင် သူ့မိန်းမကြီးက ပွစိပွစိ ဆူမစိုးလို့
သံပုရာရည်ကို ကြိုသောက်ထားဘို့ စောဒကပြန်မတက်ဘဲ သဘောတူလိုက်ပါတယ်။ ဒါနဲ့ သားမက်ရယ် ယောက္ခမရယ်၊ ဈေးထဲဝင် သံပုရာရည် ချဉ်ချဉ်လေး ၂ခွက်မနတုန်းရှိပါသေးတယ်။
ယောက္ခမကြီး ခွေးချေပေါ်ထိုင်ရာကနေ ဗြုန်းဆို အောက်ကို ပြုတ်ကျသွားပြီး
ပါးစပ်က တခွီးခွီးနေအောင် သွေးတက်ရင်း ကိစ္စပြတ်သွားပါရောခင်ဗျ။
ဆက်ရေးချင်ပါသေးတယ်ချင်ဗျာ၊ အခု ပန်ကာလေက ကိုယ့်ဘက်မှာ မရှိတော့ဘူး။ အတော်အိုင်လာလို့ မနေနိုင်တော့လို့ ထပြန်ရတော့မှာပါ။
ခုနပြောတဲ့ အုန်းနို့တို့၊ ဒန်ပေါက်တို့၊ ကြက်ဟင်းခါးသီးတို့၊ ငါးသလောက်တို့က
ခုလိုနေပူပျင်းချိန်မှာ အစားမတော် တလုပ်ပါဗျာ။
အိုက်တယ်ဆိုပြီး ခဏလေးအေးရင်ပြီးရော၊ တဒင်္ဂအပူသက်သာရင် ပြီးရော မဆင်မခြင်နေမိတာကလဲ အသက်ကို ဥာဏ်စောင့်ဘို့ လိုပါသဗျာ။
ဒီစာလေးဖတ်ဖြစ်ခဲ့တဲ့ ကျူးပစ်ကြီးများ၊ ကိုယ့်ကိုယ်ကို ဂရုစိုက်ကြပါဗျာ။
ကြုံတဲ့သူတွေ သူငယ်ချင်းတွေ အိမ်သားတွေကို ပြောပေးကြပါဗျာ။
မြန်မာပြည်သူပြည်သားအားလုံး အပူဒဏ်ကနေ သက်တောင့်သက်သာ ရှိကြပါစေ။
ဒါနဲ့စကားမစပ်၊ ဒီလောက်ပူလောင်တဲ့ရာသီထဲမှာ
ဘယ်အမျိုးကောင်းသားကများ စိတ်ကူးယဉ်ပြီး ကျောင်းတွေ စပြန်ဖွင့်ထားသလဲ မသိပါ။
သန်လျင်၊ မှောဘီ၊ လှိုင်သာယာ၊ လှော်ကားကျောင်းသားများအတွက်ကတော့
ငရဲကြီးတယ်ဆိုတာ ဒါမျိုးလား၊ မေးရမလိုပဗျား။
Credit: Myanmarcupid